Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 35:1-15

MALU ADI MU MUKANDA EU

  • Mêyi a buprofete a bualu buafikila mikuna ya Seî (1-15)

35  Dîyi dia Yehowa diakalua kabidi kundi, diamba ne:  “Muana wa muntu, tangija mpala webe ku buloba bua mikuna bua Seî,+ ne amba mêyi a buprofete a bualu buabufikila.+  Ambila buloba ebu ne: ‘Mona tshidi Mukalenge Mutambe Bunene Yehowa wamba: “Mona ndi nebe tshilumbu, wewe buloba bua mikuna bua Seî, ne nengolole tshianza tshianyi bua kukuluisha ne nenkuvuije buloba buatuke budi munda mutupu.+  Nemvuije bimenga biebe bikulu, ne neulue buloba buatuke budi munda mutupu;+ nunku neufike ku dimanya ne: meme ndi Yehowa.  Bualu wakaleja buluishi bua kashidi,+ wakafila bena Isalele ku muele wa mvita mu tshikondo tshia dikenga diabu, mu tshikondo tshia dilumbuluisha diabu dia ndekelu.”’+  “‘Nunku, bushuwa, bu mundi ne muoyo,’ ke mudi Mukalenge Mutambe Bunene Yehowa wamba, ‘nenkulongolole bua diela mashi panshi, ne diela mashi panshi nedikulondakaje.+ Bu muvuabi ne: mashi ke auvua mukine, diela mashi panshi nedikulondakaje.+  Nemvuije buloba bua mikuna bua Seî buloba buatuke budi munda mutupu,+ ne nengumbushamu muntu yonso udi upitshilamu ne muntu yonso udi upinganamu.  Nenguwuje mikuna yabu minene ne bantu bashipa; ne bantu badi bashipibue nebakuluke pa mikuna yebe mikese, mu bibandabanda biebe, ne mu tusulu tuebe tuonso.  Nenkuvuije muaba mutupu wa kashidi, ne mu bimenga biebe kamuakusomba bantu+ to; nunku neufike ku dimanya ne: meme ndi Yehowa.’ 10  “Bualu wewe uvua muambe ne: ‘Bisamba bibidi ebi ne matunga abidi aa nebilue bianyi, netubiangate buonso buabi bua bikale bietu,’+ nansha muvua Yehowa muine muikalamu, 11  ‘nunku, bushuwa, bu mundi ne muoyo,’ ke mudi Mukalenge Mutambe Bunene Yehowa wamba, ‘nenkuenzele malu bilondeshile tshiji ne mukawu bia muomumue ne biuvua muleje pawakabakina;+ nunku meme nendimanyishe munkatshi muabu pandi nkulumbuluisha. 12  Neufike ku dimanya ne: meme, Yehowa, ndi mumvue malu onso a dipota auvua muakule wamba mikuna ya Isalele, pawakamba ne: “Mbabashiye munda mutupu ne mbabafile kutudi bua kubadia.”* 13  Wakakula bua bualu buanyi ne diambu, ne wakavudija mêyi ebe mabi kundi.+ Ngakawumvua onso.’ 14  “Mona tshidi Mukalenge Mutambe Bunene Yehowa wamba: ‘Buloba bujima nebusanke pangakuvuija buloba buatuke budi munda mutupu. 15  Anu bu muuvua musanke pavuabu bashiye bumpianyi bua nzubu wa Isalele munda mutupu, ke mungakuenzela pebe.+ Neulue tshikulu tshidi munda mutupu, wewe buloba bua mikuna bua Seî, eyowa, Edome mujima;+ nunku nebafike ku dimanya ne: meme ndi Yehowa.’”

Note

Ku mua.: “bu biakudia.”