Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 32:1-32

MALU ADI MU MUKANDA EU

  • Kasala ka muadi bua Palô ne Ejipitu (1-16)

  • Dijikibua dia Ejipitu pamue ne bantu badi kabayi batengula (17-32)

32  Mu tshidimu tshia 12, mu ngondo wa 12, mu dituku dia kumpala dia ngondo, dîyi dia Yehowa diakalua kabidi kundi diamba ne:  “Muana wa muntu, ela kasala ka muadi* bua bualu bua Palô mukalenge wa Ejipitu, muambila ne:‘Wewe uvua bu muana wa ntambue wa bukole* wa bisamba,Kadi mbakupuwishe. Wewe uvua bu nyama munene wa mu mbuu,+ utambakana mu misulu yebe,Uvuandulula mâyi ne makasa ebe ne unyanga misulu.’*   Mona tshidi Mukalenge Mutambe Bunene Yehowa wamba: ‘Nenkuele bukondo buanyi ku diambuluisha dia tshisumbu tshia bisamba bia bungi,Ne nebakukoke mu kapamba kanyi.   Nenkulekele pa buloba;Nenkukupe mu mpata mualabale. Nengenze bua nyunyi yonso ya muulu yikile pambidi pebe,Ne nengukutshishe nyama ya tshisuku ya pa buloba bujima ne munyinyi webe.+   Nengimanshe munyinyi webe pa mikunaNe nenguwuje bibandabanda ne bishadile biebe.+   Nemboleshe buloba ne mashi ebe adi asampuka ku mikuna,Ne owu newuwuje tusulu.’*   ‘Paudi utalala, nembuikile diulu ne nemfiikishe mitoto yadi. Nembuikile dîba ne matutu,Ne ngondo kakufila kabidi butoke buende+ to.   Nemfiikishe bifidi bia bukenke bionso bidi bikenka mu diulu bua bualu buebe,Ne nembuikile buloba buebe ne mîdima,’ ke mudi Mukalenge Mutambe Bunene Yehowa wamba.   ‘Nenyingalaje mioyo ya bantu ba bungi pandi nya ne bakuatshibue bebe mu bisamba bikuabu,Mu maloba audi kuyi mumanye.+ 10  Nemfikishe bantu ba bungi ku dikuatshika buôwa,Ne bakalenge babu nebazakale ne buôwa bukole bua bualu buebe pandi ngela muele wanyi wa mvita muulu kumpala kuabu. Nebakanke anu kukanka, muntu yonso utshina bua muoyo wende,Mu dituku dia dikuluka diebe.’ 11  Nunku mona tshidi Mukalenge Mutambe Bunene Yehowa wamba: ‘Muele wa mvita wa mukalenge wa Babilona newukuluile.+ 12  Nenkulule misumba yebe ya bantu ku muele wa mvita wa bilobo bia mvita,Tshisamba tshidi katshiyi ne luse ku bisamba bionso, buonso buabi.+ Nebapuekeshe lutambishi lua Ejipitu, ne misumba yende yonso ya bantu neyibutudibue.+ 13  Nembutule bimuna biende bionso bidi pabuipi ne mâyi ende a bungi,+Ne dikasa dia muntu anyi tshikono tshia bimuna kabiakuavuandulula kabidi to.’+ 14  ‘Tshikondo atshi nentokeshe mâyi abu,Ne nempuekeshe misulu yabu bu mafuta,’ ke mudi Mukalenge Mutambe Bunene Yehowa wamba. 15  ‘Pandi mvuija Ejipitu buloba buatuke budi munda mutupu, buloba budibu bumbushe bionso bivua biuwulamu,+Pandi nshipa bonso badi basombelamu,Nebafike ku dimanya ne: meme ndi Yehowa.+ 16  Ke kasala ka muadi aku, ne bantu nebakele bushuwa;Bana ba bakaji ba mu bisamba nebakele. Nebakelele Ejipitu ne misumba yende yonso ya bantu,’ ke mudi Mukalenge Mutambe Bunene Yehowa wamba.” 17  Pashishe mu tshidimu tshia 12, mu dituku dia 15 dia ngondo, dîyi dia Yehowa diakalua kundi diamba ne: 18  “Muana wa muntu, elela misumba ya bantu ba Ejipitu kabobo ka muadi ne umupuekeshe mu buloba bua muinshi, yeye ne bana ba bakaji ba bisamba bia bukole, pamue ne badi bapueka mu dijimba.* 19  “‘Uudi mupite ku bulengele nnganyi? Pueka ne lala pamue ne bantu badi kabayi batengula!’ 20  “‘Nebakuluke munkatshi mua badibu bashipe ku muele wa mvita.+ Yeye mmufidibue ku muele wa mvita; mupulumunayi pamue ne misumba yende yonso ya bantu. 21  “‘Kumbukila mu ndondo ya Lukita,* bilobo bia mvita bia bukole bua bungi menemene nebiakule nende yeye ne bamuambuluishi bende. Bushuwa nebapueke muinshi ne nebalale anu bu bantu badi kabayi batengula, badi bashipa ku muele wa mvita. 22  Ashû udimu ne tshisumbu tshiende tshijima. Nkita yabu mmimunyunguluke, buonso buabu bavua bakuluke ku muele wa mvita.+ 23  Nkita yende idi mu ndondo ya dijimba,* ne tshisumbu tshiende ntshinyunguluke lukita luende, buonso buabu bavua bashipa ku muele wa mvita, bualu bavua bakebeshe buôwa mu buloba bua badi ne muoyo. 24  “‘Elama+ udimu ne misumba yende yonso ya bantu minyunguluke lukita luende, buonso buabu bavua bakuluke ku muele wa mvita. Mbapueke mu buloba bua muinshi kabayi batengula, bobu bavua bakebeshe buôwa mu buloba bua badi ne muoyo. Mpindieu nebambule bundu buabu pamue ne badi bapueka mu dijimba.* 25  Mbamuenzele bulalu munkatshi mua badibu bashipe, pamue ne misumba yende yonso idi minyunguluke nkita yende. Buonso buabu ki mbatengula to, mbashipa ku muela wa mvita, bualu bavua bakebeshe buôwa mu buloba bua badi ne muoyo; ne nebambule bundu buabu pamue ne badi bapueka mu dijimba.* Mmutekibue munkatshi mua badibu bashipe. 26  “‘Muomu ke mudi Mesheka ne Tubala+ ne misumba yabu* yonso ya bantu. Nkita yende mmimunyunguluke. Buonso buabu ki mbatengula, bavua babatubule ne muele wa mvita, bualu bavua bakebeshe buôwa mu buloba bua badi ne muoyo. 27  Kabakulala pamue ne bilobo bia mvita bia bukole bidi kabiyi bitengula bidi bikuluke, bivua bipueke mu Lukita* ne bia mvita biabi anyi? Nebateke miele yabi ya mvita muinshi mua mitu yabi* ne mpekatu yabi pa mifuba yabi, bualu bilobo bia mvita ebi bivua bizakeje buloba bua badi ne muoyo. 28  Kadi wewe, nebakuzaze munkatshi mua bantu badi kabayi batengula, neulale pamue ne bantu bavuabu bashipe ku muele wa mvita. 29  “‘Edome+ udimu, bakalenge bende ne bamfumu bende bonso, bavua baladika munkatshi mua bavuabu bashipe ku muele wa mvita nansha muvuabu ne bukole; bobu pabu nebaye pamue ne bantu badi kabayi batengula+ ne pamue ne badi bapueka mu dijimba.* 30  “‘Muomu amu mmudi bakokeshi* bonso ba ku nord, pamue ne bena Sidona+ bonso, badi bapueke ne bundu pamue ne bantu badibu bashipe, nansha muvuaku buôwa bukebesha kudi bukole buabu. Nebalale kabayi batengula pamue ne bantu bavuabu bashipe ku muele wa mvita ne nebambule bundu buabu pamue ne badi bapueka mu dijimba.* 31  “‘Palô neamone bionso ebi, ne neasambibue bua bionso bivua bienzekele misumba yende ya bantu;+ Palô ne tshiluilu tshiende tshijima nebashipibue ku muele wa mvita,’ ke mudi Mukalenge Mutambe Bunene Yehowa wamba. 32  “‘Bu muvuaye mukebeshe buôwa bukole mu buloba bua badi ne muoyo, Palô ne misumba yende yonso ya bantu nebabaladike bua kuikisha pamue ne badi kabayi batengula, pamue ne bantu badi bashipa ku muele wa mvita,’ ke mudi Mukalenge Mutambe Bunene Yehowa wamba.”

Note

Anyi “imba musambu wa madilu.”
Anyi “muana wa ntambue wa musalala.”
Ku mua.: “misulu yawu.”
Ku mua.: “Ne misulu neyuwule nebe.”
Anyi “lukita.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “lukita.”
Anyi “lukita.”
Anyi “lukita.”
Ku mua.: “yende.”
Anyi “Sheole,” mmumue ne: lukita lua bukua bantu buonso. Tang. Diumv.
Pamuapa mbakula bua bilobo bia mvita bivuabu bajiike ne miele yabi ya mvita, ne lumu lua busalayi.
Anyi “lukita.”
Anyi “balombodi.”
Anyi “lukita.”