Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 31:1-18

MALU ADI MU MUKANDA EU

  • Dikuluka dia Ejipitu, mutshi wa sedre mutumbuke (1-18)

31  Mu tshidimu tshia 11, mu ngondo muisatu, mu dituku dia kumpala dia ngondo, dîyi dia Yehowa diakalua kabidi kundi diamba ne:  “Muana wa muntu, ambila Palô mukalenge wa Ejipitu ne misumba yende ya bantu+ ne: ‘Wewe udi bu nganyi mu bunene buebe?   Kuvua muena Ashû mukuabu, mutshi wa sedre mu Lebanona,Muikale ne matamba mimpe bu tshipuka tshia dileji, mutumbuke mu bule;Lusongo luawu luvua munkatshi mua matutu.   Mâyi akawudiundisha, mishimi mile ya mâyi yakawulepesha. Tusulu tuvua tunyunguluke muaba wonso uvuabu bawukune;Minkoloji yayi ivua ipetesha mitshi yonso ya mu mpata mâyi.   Ke bualu kayi wakalepa kupita mitshi mikuabu yonso ya muitu. Matamba awu manene akavulangana, ne matamba awu makese akalepaBua bungi bua mâyi avua mu tusulu tuawu.   Nyunyi yonso ya muulu yakenzela masua mu matamba awu manene,Nyama yonso ya tshisuku ya mu mpata yakalelela muinshi mua matamba awu makese,Ne bisamba bionso bia bantu ba bungi bivua bisombele mu dileji diawu.   Wowu wakalua munene mu bulengele ne mu bule bua matamba awu,Bualu miji yawu ivua mipueke muinshi mu mâyi a bungi.   Mitshi ya sedre mikuabu ya mu budimi bua Nzambi+ kayivua mua kudifuanyikija nawu nansha. Mutshi wa ku mitshi ya jenevriye nansha umue kawuvua ne matamba manene bu wowu to,Ne mutshi wa ku mitshi ya platane nansha umue kawuvua mua kukumbanangana ne matamba awu makese to. Mutshi mukuabu mu budimi bua Nzambi kawuvua mua kutembangana nawu ku bulengele to.   Ngakawuvuija mulengele, muikale ne mabeji a bungi,Ne mitshi mikuabu yonso ya mu Edene, budimi bua Nzambi, yakawalakana.’ 10  “Nunku mona tshidi Mukalenge Mutambe Bunene Yehowa wamba: ‘Bu muvuawu* mulue mule menemene, mubandishe lusongo luawu munkatshi mua matutu, ne muoyo wawu mulue ne diambu bua butumbuke buawu, 11  nengufile mu tshianza tshia mfumu wa bisamba wa bukole.+ Bushuwa yeye neawuluishe, ne nengubenge bua malu mabi awu. 12  Bantu ba ku babende, tshisamba tshidi katshiyi ne luse tshia ku bisamba bionso, nebawukose, ne nebawulekele pa mikuna, ne mabeji awu neamate mu bibandabanda bionso, ne matamba awu nealale matshibuke mu tusulu tuonso tua mu ditunga.+ Bukua bantu buonso bua pa buloba nebumbuke mu dileji diawu ne nebuwulekele. 13  Nyunyi yonso ya muulu neyisombele pa mulamba wawu udi mukuluke, ne nyama yonso ya tshisuku ya mu mpata neyisombele pa matamba awu.+ 14  Mbienzeke nunku bua mutshi nansha umue udi pabuipi ne mâyi kawulepi bikole anyi kawubandishi lusongo luawu munkatshi mua matutu, ne bua mutshi nansha umue udi muaba wa mâyi a bungi kawufiki muulu kudiwu. Bualu nebayifile yonso mu lufu, mu buloba budi muinshi, pamue ne bana ba bantu badi bapueka mu dijimba.’* 15  “Mona tshidi Mukalenge Mutambe Bunene Yehowa wamba: ‘Dituku didiwu upueka mu Lukita,* nenkebeshe muadi. Nunku, nembuikile mâyi male ne nenkande tusulu tuawu bua mâyi a bungi imane. Nemfiikishe Lebanona bua bualu buawu, ne mitshi ya mu mpata neyifubidile yonso. 16  Ku mukuma wa dikuluka diawu, nenkankishe bisamba pandi ngupuekesha mu Lukita* pamue ne bonso badi bapueka mu dijimba,* ne mitshi yonso ya mu Edene,+ mitshi mimpe bikole ne mitambe buimpe ya mu Lebanona, mitshi yonso idi muaba udi mâyi a bungi, neyisambibue mu buloba bua muinshi. 17  Mmipueke nende mu Lukita,* kudi bavua bashipibue ku muele wa mvita,+ pamue ne bakuatshishi* bende bavua basombele mu dileji diende munkatshi mua bisamba.’+ 18  “‘Mmutshi kayi wa ku mitshi ya mu Edene uvua bu wewe mu butumbi ne mu bunene?+ Kadi bushuwa wewe newupuekeshibue ne mitshi ya mu Edene mu buloba bua muinshi. Newulale panshi munkatshi mua bantu badi kabayi batengula, pamue ne badi bashipibue ku muele wa mvita. Bualu ebu nebuenzekele Palô ne misumba yende yonso ya bantu,’ ke mudi Mukalenge Mutambe Bunene Yehowa wamba.”

Note

Ku mua.: “muuvua.”
Anyi “lukita.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “Sheole,” mmumue ne: lukita lua bukua bantu buonso. Tang. Diumv.
Anyi “lukita.”
Anyi “Sheole,” mmumue ne: lukita lua bukua bantu buonso. Tang. Diumv.
Ku mua.: “diboko.”