Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 3:1-27

MALU ADI MU MUKANDA EU

  • Yehezekele udi ne bua kudia muvungu mufila kudi Nzambi (1-15)

  • Yehezekele udi ne bua kuikala bu nsentedi (16-27)

    • Kalengu kadi kafikisha ku dibanza dia mashi (18-21)

3  Pashishe wakangambila ne: “Muana wa muntu, diaku tshidi kumpala kuebe.* Diaku muvungu eu, ndaku, uyukile ne nzubu wa Isalele.”+  Nunku ngakakangula mukana muanyi, yeye kundisha muvungu eu.  Wakatungunuka ne kungambila ne: “Muana wa muntu, diaku muvungu undi nkupesha eu, ne uwuje nawu tshifu tshiebe.” Nunku ngakatuadija kuwudia, uvua mushême bu buitshi mukana muanyi.+  Wakangambila ne: “Muana wa muntu, buela munkatshi mua nzubu wa Isalele, ubambile mêyi anyi.  Bualu kuena utumibua kudi tshisamba tshidi tshiakula muakulu udi kawuyi umvuika anyi muakulu udi kawuyi mumanyike to, kadi nkudi nzubu wa Isalele.  Kuena utumibua kudi bukua bantu ba bungi badi bakula muakulu udi kawuyi umvuika anyi muakulu udi kawuyi mumanyike udi ne miaku iudi kuyi mua kujingulula to. Bu meme mukutume kudibu, bavua mua kukuteleja.+  Kadi nzubu wa Isalele neabenge bua kukuteleja bualu ki mbasue kunteleja to.+ Bonso ba mu nzubu wa Isalele mbena mutu mukole ne muoyo mupape.+  Mona! Ndi mukoleshe ku mêsu kuebe anu mudi ku mêsu kuabu menemene ne mukoleshe mpala webe anu mudi mpala yabu menemene.+  Ndi muvuije mpala webe bu dibue dia mbongo, mukole kupita dibue dikole.+ Kubatshinyi anyi mpala yabu kayikuzakeji,+ bualu badi nzubu wa bantomboji.” 10  Wakatungunuka ne kungambila ne: “Muana wa muntu, mêyi anyi onso andi nkuambila, ualame ku muoyo ne uateleje. 11  Ndaku munkatshi mua bantu ba mu tshisamba tshienu*+ badibu bakuate baye nabu ku babende ne uyukile nabu. Ubambile ne: ‘Monayi tshidi Mukalenge Mutambe Bunene Yehowa wamba,’ nansha bobu bateleje anyi babenge kuteleja.”+ 12  Pashishe nyuma wakangambula,+ meme kumvua tshiona tshia mukungulu mukole panyima panyi tshivua tshiamba ne: “Butumbi bua Yehowa butumbishibue kumbukila muaba udiye.” 13  Kuvua tshiona tshia mapuapua a bifukibua bidi ne muoyo pavuawu enda afitakanangana,+ ne tshiona tshia nkata ivua pabuipi nabi,+ ne tshiona tshia mukungulu mukole. 14  Nyuma wakangambula ne wakaya nanyi, ne ngakumvua kanyinganyinga kakole ne tshiji tshikole mu lungenyi luanyi, ne tshianza tshia Yehowa tshiakasomba pambidi panyi ne bukole. 15  Nunku ngakaya kudi bantu bavuabu bakuate baye nabu ku Tele-abiba, bavua basombele pabuipi ne musulu wa Kebâ,+ ne ngakashala kuntu aku muaba uvuabu basombele; ne ngakasomba munkatshi muabu matuku muanda mutekete muikale ne dipampakana.+ 16  Ku ndekelu kua matuku muanda mutekete dîyi dia Yehowa diakalua kundi ne: 17  “Muana wa muntu, ndi mukuteke nsentedi bua nzubu wa Isalele;+ ne paudi umvua dîyi difumina mukana muanyi, udi ne bua kubandimuijila.+ 18  Pandi ngambila muntu mubi ne: ‘Wewe neufue bushuwa,’ kadi wewe kuena umudimuija, ne udi upangila kuakula bua kudimuija muntu mubi eu bua umbuke mu njila wende mubi bua amone mua kushala ne muoyo,+ yeye neafue bua tshilema tshiende bualu mmuntu mubi,+ kadi nenkulombe wewe mashi ende.*+ 19  Kadi wewe mudimuije muntu mubi ne yeye kena umbuka ku malu mabi ende ne mu njila wende mubi, yeye neafue bua tshilema tshiende, kadi bulelela wewe neupandishe muoyo* webe wewe.+ 20  Kadi padi muntu muakane ulekela buakane buende ne wenza malu mabi,* nemmutekele tshilenduishi kumpala kuende, ne yeye neafue.+ Biwikala kuvua mumudimuije, yeye neafue bua mpekatu wende ne kabakuvuluka bienzedi biende biakane, kadi meme nenkulombe mashi ende.*+ 21  Kadi wewe mudimuije muntu muakane bua kenji mpekatu, ne yeye kena wenza mpekatu, bushuwa yeye neashale ne muoyo bualu bavua bamudimuije,+ ne wewe neupandishe muoyo* webe wewe.” 22  Tshianza tshia Yehowa tshiakalua kundi kuntu aku, ne yeye kungambila ne: “Juka, ndaku mu tshibandabanda, ne nenyukile nebe muomu amu.” 23  Nunku ngakajuka, meme kuya mu tshibandabanda, ne mona! butumbi bua Yehowa buvuamu,+ bu butumbi bumvua mumone ku muelelu wa musulu wa Kebâ,+ meme kutua mpala panshi. 24  Pashishe nyuma wakabuela munda muanyi ne kungimanyikaye kuulu,+ yeye kuakula nanyi, kuambaye ne: “Ndaku, udikangile mu nzubu muebe. 25  Kadi wewe, muana wa muntu, nebakuele mionji ne nebakusuike nayi bua kumonyi mua kupatuka munkatshi muabu. 26  Nendamatshishe ludimi luebe mu tshilakalaka tshia mukana muebe, ne neulue kamama, kuyi mua kubabela, bualu badi nzubu wa bantomboji. 27  Kadi pandi ngakula nebe nenkangule mukana muebe ne wewe udi ne bua kubambila+ ne: ‘Monayi tshidi Mukalenge Mutambe Bunene Yehowa wamba.’ Muntu udi umvua umvue,+ ne muntu udi ubenga kumvua abenge, bualu badi nzubu wa bantomboji.+

Note

Ku mua.: “diaku tshiudi upeta.”
Ku mua.: “bana ba mu tshisamba tshienu.”
Anyi “nenkuase tshilumbu tshia mashi ende.”
Anyi “anyima.”
Anyi “wenza malu adi kaayi makane.”
Anyi “nenkuase tshilumbu tshia mashi ende.”
Anyi “anyima.”