Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 21:1-32

MALU ADI MU MUKANDA EU

  • Muele wa mvita wa Nzambi wa dilumbuluisha mupatula mu tshizubu (1-17)

  • Mukalenge wa Babilona udi ne bua kuela Yelushalema mvita (18-24)

  • Mfumu mubi wa Isalele udi ne bua kumbushibua (25-27)

    • “Tula tshifulu tshia butumbi” (26)

    • “Too ne padi eu udi ne bukenji ulua” (27)

  • Muele wa mvita bua kuluisha bena Amona (28-32)

21  Dîyi dia Yehowa diakalua kabidi kundi, diamba ne:  “Muana wa muntu, tangija mpala webe ku Yelushalema, ne manyisha malu afikila miaba ya tshijila, ne amba mêyi a buprofete afikila buloba bua Isalele.  Ambila buloba bua Isalele ne: ‘Mona tshidi Yehowa wamba: “Mona, ndi nebe tshilumbu ne nempatule muele wanyi wa mvita mu tshizubu tshiawu+ ne nenshipe bantu bakane ne bantu babi munkatshi muebe.  Bualu nenshipe bantu bakane ne bantu babi munkatshi muebe, muele wanyi wa mvita newupatudibue mu tshizubu tshiawu bua kushipa bantu bonso,* kumbukila ku sud too ne ku nord.  Bantu bonso nebafike ku dimanya ne: meme Yehowa ngudi mupatule muele wanyi wa mvita mu tshizubu tshiawu. Kawakupingana kabidi to.”’+  “Kadi wewe, muana wa muntu, tuaku mikemu paudi uzakala,* eyowa, tuaku mikemu ne kanyinganyinga kakole kumpala kuabu.+  Bobu bakuebeje ne: ‘Bua tshinyi udi utua mikemu?’ newambe ne: ‘Mbua lumu ludi lulua.’ Bualu luolu nelulue bushuwa, ne muoyo wonso newenguluke ne buôwa, tshianza tshionso netshilembelele, lungenyi luonso nelushikile, ne tshinu tshionso netshimatshishe mâyi.*+ ‘Tangila! nelulue bushuwa, nelukumbane,’ ke mudi Mukalenge Mutambe Bunene Yehowa wamba.”  Dîyi dia Yehowa diakalua kabidi kundi, diamba ne:  “Muana wa muntu, akula mêyi a buprofete ne amba ne: ‘Mona tshidi Yehowa wamba: “Amba ne: ‘Muele wa mvita! Muele wa mvita+ mmusakisha ne mmunona. 10  Mmusakisha bua kushipangana nawu bikole; mmunona bua kutua nsese bu mupenyi wa mvula.’”’” “Katuena ne bua kusanka anyi?” “‘Wowu newubenge* dikombo dia bumfumu dia muananyi,+ bu mudiwu wenzela mutshi wonso anyi? 11  “‘Mmufidibue bua bawunone ne bua benze nawu mudimu ku tshianza. Muele wa mvita eu mmusakisha ne mmunona bua kuwuteka mu tshianza tshia mushipianganyi.+ 12  “‘Muana wa muntu, ela lubila ne ela kabobo ka muadi,+ bualu wowu mmuluile bantu banyi; udi uluisha bamfumu bonso ba Isalele.+ Bobu abu nebashipibue ku muele wa mvita pamue ne bantu banyi. Nunku dikuma pa tshibelu tshiebe ne kanyinganyinga. 13  Bualu bakadi bamane kukonkonona,+ ne ntshinyi tshienzeka muele wa mvita wowu mubenge dikombo dia bumfumu? Kadiakuikalaku* kabidi to,’+ ke mudi Mukalenge Mutambe Bunene Yehowa wamba. 14  “Kadi wewe, muana wa muntu, amba mêyi a buprofete ne tuta bianza biebe, amba misangu isatu ne: ‘Muele wa mvita!’ Mmuele wa mvita wa bantu badi bashipibue, muele wa mvita wa dishipangana dikole udi mubanyunguluke.+ 15  Mioyo yabu neyenguluke ne buôwa+ ne ba bungi nebakulukile ku biibi bia tshimenga tshiabu; nenshipe ku muele wa mvita. Eyowa, wowu udi utua nsese bu mupenyi wa mvula ne mmunona bua kushipa! 16  Tapa diakamue ku dia bulume! Alukila ku dia bakaji! Ndaku kuonso kudi luseke luebe ludi lutapa lutangile! 17  Nentute panyi bianza bianyi ne nenjikije tshiji tshianyi tshikole.+ Meme Yehowa ke udi muakule.” 18  Dîyi dia Yehowa diakalua kabidi kundi, diamba ne: 19  “Kadi wewe, muana wa muntu, zola njila ibidi bua muele wa mvita wa mukalenge wa Babilona kuluilawu. Buonso buayi neyifumine mu buloba bumue, ne udi ne bua kuteka mutshi wa tshimanyinu* muaba udi njila udiabanya mutangile mu bimenga bibidi. 20  Udi ne bua kuzola njila umue bua muele wa mvita ulue bua kuluisha Laba+ wa bena Amona, ne njila mukuabu bua kuluisha Yelushalema mukolesha+ udi mu Yuda. 21  Bualu mukalenge wa Babilona udi wimana mu masangu a njila, muaba udi njila ibidi midiabanye, bua kutempa mbuku. Yeye udi unyukula mikete. Udi webeja mpingu* yende malu; udi ukonkonona mutshima. 22  Lubuku ludi mu tshianza tshiende tshia balume ndutangija ku Yelushalema, bua kuimanyika mitshi minene ya kupula nayi bimanu, bua kutuma dîyi bua kushipa, bua kuela lubila lua mvita, bua kutekela biibi mitshi minene ya kubiupula nayi, bua kujula tshibumba tshikole tshia kutshintshimika natshi, ne bua kuibaka tshimanu tshia kutshintshimika natshi.+ 23  Kadi nelumueneke bu lubuku lua dishima ku mêsu kua bavua* baditshipe mitshipu kudibu.+ Kadi yeye udi uvuluka dipila diabu ne neabakuate.+ 24  “Nunku monayi tshidi Mukalenge Mutambe Bunene Yehowa wamba: ‘Nudi benze bua kuvulukabu dipila dienu panudi nuela dishipa dienu dia mikenji patoke ne nuenza bua mpekatu yenu imuenekele mu bienzedi bienu bionso. Mpindieu udibu banuvuluke, nebanukuate ku bukole.’* 25  “Kadi dituku diebe diafiki, wewe udibu batape mputa wa lufu, mfumu mubi wa Isalele,+ dîba dia dinyoka diebe dia ndekelu. 26  Mona tshidi Mukalenge Mutambe Bunene Yehowa wamba: ‘Umbusha tshilamba tshia kujingila ku mutu, ne tula tshifulu tshia butumbi.+ Bualu ebu kabuakushala muomumue to.+ Bandisha muntu udi mupuekele+ ne puekesha muntu udi mubande.+ 27  Kabutu, kabutu, nentshivuije kabutu. Katshiakuikala tshia muntu too ne padi eu udi ne bukenji ulua,+ ne nemmupeshatshi.’+ 28  “Kadi wewe, muana wa muntu, akula mêyi a buprofete ne amba ne: ‘Mona tshidi Mukalenge Mutambe Bunene Yehowa wamba bua bena Amona ne bua bipendu biabu.’ Amba ne: ‘Muele wa mvita! Muele wa mvita mmupatula bua kushipa; mmunona bua kubutula ne bua kutua nsese bu mupenyi wa mvula. 29  Nansha mudiku bikena kumona bia dishima ne lubuku lua mafi bua bualu buebe, nebakutenteke pa bantu badi bashipibue,* bantu babi badi dituku diabu dilue, tshikondo tshia dinyoka diabu dia ndekelu. 30  Uwupingaje mu tshizubu tshiawu. Nenkulumbuluishile muaba uvuabu bakufukile, mu buloba muuvua mutuadijile. 31  Nenkupumuine tshiji tshianyi. Nenkupudijile kapia ka tshiji tshianyi tshikole, ne nenkufile mu tshianza tshia bantu ba tshikisu, badi bapiluke mu dibutulangana.+ 32  Neulue tshintu tshia kutemesha natshi kapia;+ mashi ebe wewe needibue panshi mu ditunga, kabakukuvuluka kabidi nansha, bualu meme Yehowa ke udi muakule.’”

Note

Ku mua.: “musunyi wonso.”
Ku mua.: “padi bikundukundu biebe bizakala.”
Mmumue ne: disukula menyi bua buôwa.
Mmumue ne: muele wa mvita wa Yehowa.
Anyi “Dikombo kadiakuikalaku.”
Ku mua.: “tshianza.”
Ku mua.: “telafima.”
Mmumue ne: bantu badi basombele mu Yelushalema.
Ku mua.: “ku tshianza.”
Ku mua.: “nshingu ya bantu badi bashipibue.”