Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 2:1-10

MALU ADI MU MUKANDA EU

  • Yehezekele udi utekibua bu muprofete (1-10)

    • ‘Nansha bateleje anyi babenge’ (5)

    • Badi baleja muvungu wa tusala tua muadi (9, 10)

2  Nunku wakangambila ne: “Muana wa muntu,* imana kuulu bua mmone mua kuyukila nebe.”+  Pakakulaye nanyi, nyuma wakabuela munda muanyi ne kungimanyikaye kuulu+ bua mmone mua kuteleja Yeye uvua uyukila nanyi.  Yeye wakatungunuka ne kungambila ne: “Muana wa muntu, ndi nkutuma kudi bantu ba Isalele,+ kudi bisamba bia bantomboji bidi bintombokele.+ Bobu ne bankambua babu mbashipe mikenji yanyi too ne dituku edi mene.+  Ndi nkutuma kudi bana badi ne tshishiku* ne mioyo mipape,+ ne udi ne bua kubambila ne: ‘Monayi tshidi Mukalenge Mutambe Bunene Yehowa wamba.’  Buabu bobu, nansha bobu bateleje anyi babenge kuteleja, bualu badi nzubu wa bantomboji,+ bulelela nebamanye ne: muprofete uvua munkatshi muabu.+  “Kadi wewe, muana wa muntu, kubatshinyi to,+ ne mêyi abu kaakutshinyishi to, nansha muudi munyunguluka kudi tumitshi tua mêba ne mêba*+ ne musombele munkatshi mua tuminyiminyi. Kutshinyi mêyi abu,+ ne mpala yabu kayikuzakeji to,+ bualu badi nzubu wa bantomboji.  Udi ne bua kubambila mêyi anyi, nansha bobu bateleje anyi kabayi bateleje, bualu badi tshisamba tshia bantomboji.+  “Kadi wewe, muana wa muntu, teleja tshindi nkuambila. Kulu ntomboji bu nzubu wa bantomboji eu to. Kangula mukana muebe, udie tshindi nkupesha.”+  Pangakatangila, ngakamona tshianza tshingoluela,+ ne munda muatshi, ngakamonamu muvungu mufunda.*+ 10  Pakawuvungululaye kumpala kuanyi, uvua ne mifundu munda ne panyima.+ Bavua bafundamu tusala tua muadi,* miadi ne kabobo ka muadi.+

Note

“Muana wa muntu”; musangu wa kumpala wa ku misangu 93 idi tshiambilu etshi tshisanganyibua mu mukanda wa Yehezekele.
Anyi “mutu mukole.”
Anyi pamuapa: “nansha bantu bikale ne mitu mikole ne bikale bu bintu bidi bikutua.”
Anyi “muvungu wa mukanda.”
Anyi “Misambu ya madilu.”