Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 19:1-14

MALU ADI MU MUKANDA EU

  • Kasala ka muadi bua bamfumu ba Isalele (1-14)

19  “Udi ne bua kuela kasala ka muadi* bua bualu bua bamfumu ba Isalele  ne amba ne:‘Mamuebe uvua nganyi? Ntambue mukaji munkatshi mua ntambue. Uvua mulale munkatshi mua bana ba ntambue ba bukole* ne mukoleshe tuana tuende.   Wakakolesha kamue ka ku tuana tuende, kuluaku muana wa ntambue wa bukole.+ Wakalonga mua kusunsulula nyama,Wakadia too ne bantu.   Bisamba biakumvua lumu lua bualu buende, kumukuatabi mu dijimba diabi,Kuyabi nende mu buloba bua Ejipitu muela ku ndobo.+   Wakindila ne ndekelu wa bionso kumonaye ne: kakuvua ditekemena bua yeye kupingana. Nunku yeye wakangata kana kakuabu ka mu tuana tuende, kukatumaye bu muana wa ntambue wa bukole.   Kakendakana paku munkatshi mua ntambue, kuluaku muana wa ntambue wa bukole. Wakalonga mua kusunsulula nyama, ne wakadia too ne bantu.+   Wakabembela munkatshi mua bibumba biabu bikolesha ne wakabutula bimenga biabu,Nunku buloba buvua bushale munda mutupu buakuwula tente ne tshiona tshia mukungulu wende.+   Bisamba bia mu bitupa bia maloba bivua bimunyunguluke biakamuluila bua kumuela bukondo,Ne yeye wakakuatshibua mu dijimba diabi.   Biakamuela mu nsanji ne ndobo, kuyabi nende kudi mukalenge wa Babilona. Kuoku aku biakamuela mu buloko, bua dîyi diende kadiumvuiki kabidi pa mikuna ya Isalele nansha. 10  Mamuebe uvua bu muonji wa tumuma tua mvinyo+ mu mashi ebe,* uvuabu bakune pabuipi ne mâyi. Wakakuama tumuma ne uvua ne matamba a bungi bua bungi bua mâyi. 11  Wakapatula matamba makole,* makumbane bua makombo a bakokeshi. Wakakola, kupitawu mitshi mikuabu ku bule,Ne uvua umueneka bua butumbuke buawu ne bua bungi bua mabeji awu. 12  Kadi bakamujula mu tshiji tshikole,+ kumuimanshabu panshi,Ne tshipepele tshia ku est tshiakumisha tumuma tuende. Bakakosa matamba ende makole, kumawu,+ ne kapia kakawosha.+ 13  Mpindieu mbamukune mu tshipela,Mu buloba bume budi kabuyi ne mâyi.+ 14  Kapia kakumbuka ku matamba ende,* koshaku ntonga yende ne tumuma tuende,Ne kakuvua kushale ditamba dikole nansha dimue, dikombo dia bukokeshi nansha dimue.+ “‘Aku ke kasala ka muadi, ne nekambuluishe bu kasala ka muadi.’”

Note

Anyi “kuimba musambu wa madilu.”
Anyi “munkatshi mua bana ba ntambue ba misalala.”
Anyi pamuapa: “bu muonji wa tumuma tua mvinyo mu budimi buebe bua tumuma tua mvinyo.”
Anyi “milangala.”
Anyi “milangala yende.”