Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 18:1-32

MALU ADI MU MUKANDA EU

  • Muntu yonso udi wambula bujitu bua mpekatu yende (1-32)

    • Anyima udi wenza mpekatu neafue (4)

    • Muana kena ne bua kufuta bua mpekatu wa tatuende (19, 20)

    • Kena usanka bua lufu lua bantu babi (23)

    • Dinyingalala bua mpekatu didi dipetesha muoyo (27, 28)

18  Dîyi dia Yehowa diakalua kabidi kundi, diamba ne:  “Ntshinyi tshidi lusumuinu elu lunudi nuela mu buloba bua Isalele lumvuija: ‘Batatu mbadie tumuma tua mvinyo tua buanji, kadi mênu a bana ke adi makuate buanji’?+  “‘Bushuwa bu mundi ne muoyo,’ ke mudi Mukalenge Mutambe Bunene Yehowa wamba, ‘kanuakutungunuka ne kuela lusumuinu elu mu Isalele kabidi to.  Monayi! Anyima* yonso, nyanyi meme. Mudi anyima wa tatu ke mudi kabidi anyima wa muana, nyanyi meme. Anyima* udi wenza mpekatu, yeye ke wafua.  “‘Fuanyikijabi ne: muntu kampanda mmuntu muakane ne udi wenza tshidi tshimpe ne tshiakane.  Kena udia milambu ya mpingu pa mikuna;+ kena utangila mpingu ya muendi* ya nzubu wa Isalele; kena unyanga mukaji wa mukuende+ anyi ulala ne mukaji udi ku tshijila tshia mashi;+  kena ukengesha muntu,+ kadi udi upingaja tshintu tshivua muena dibanza mumueyeke;+ kena unyenga muntu tshintu,+ kadi biakudia biende udi ubipesha muntu udi ne nzala+ ne udi ubuikila muntu udi butaka tshilamba;+  kena ulombangana tshia kasombela anyi ulomba makasa mapite bungi,+ kadi udi udikanda bua kuenza malu ne kansungansunga;+ udi ukosa tshilumbu ne dilumbuluisha diakane dia bushuwa pankatshi pa muntu ne mukuabu;+  ne udi utungunuka ne kuendela mu mêyi anyi mafunda ne utumikila mapangadika anyi bua kuenza malu ne lulamatu. Muntu wa nunku mmuntu muakane, bushuwa, yeye neashale ne muoyo,’+ ke mudi Mukalenge Mutambe Bunene Yehowa wamba. 10  “‘Kadi fuanyikijabi ne: mmulele muana udi munyengianganyi wa bintu+ anyi mushipianganyi*+ peshi udi wenza bumue bua ku malu makuabu aa 11  (nansha mudi tatuende kayi muenze bualu nansha bumue bua ku malu aa), udia milambu ya mpingu pa mikuna, unyanga mukaji wa mukuende, 12  ukengesha mukengi ne mupele,+ unyengangana bintu, kayi upingaja tshivuabu bamueyeke, utangila mpingu ya muendi,+ uditua mu dienza bienzedi bibi,+ 13  ulomba makasa mapite bungi ne ulomba tshia kasombela,+ nunku muana eu kakushala ne muoyo to. Bua malu mabi onso adiye muenze aa, bushuwa yeye neashipibue. Mashi ende neikale pambidi pende. 14  “‘Kadi fuanyikijabi ne: tatu udi ne muanende udi mumone mpekatu yonso idi tatuende muenze, nansha mudiye uyimona, kena wenza malu a nunku to. 15  Kena udia milambu ya mpingu pa mikuna; kena utangila mpingu ya muendi ya nzubu wa Isalele; kena unyanga mukaji wa mukuende; 16  kena ukengesha muntu; kena ulama tshintu tshivuabu bamueyeke; kena unyengangana tshintu nansha tshimue; biakudia biende udi ubipesha muntu udi ne nzala ne udi ubuikila muntu udi butaka tshilamba; 17  udi udikanda bua kukengesha mupele; kena ulomba makasa mapite bungi anyi ulomba tshia kasombela; udi utumikila mapangadika anyi, ne wendela mu mêyi anyi mafunda. Muntu wa nunku kakufua bua tshilema tshia tatuende to. Bushuwa, yeye neashale ne muoyo. 18  Kadi bu muvua tatuende mudifile mu dipeta bintu mu dishima, munyenge muanabu bintu, ne muenze malu avua mabi munkatshi mua tshisamba tshiabu, yeye neafue bua tshilema tshiende. 19  “‘Kadi nuenu nenukonke ne: “Bua tshinyi muana kena wambula dipila bua tshilema tshia tatuende?” Bu mudi muana muenze tshidi tshimpe ne tshiakane, mulame mêyi anyi mafunda onso ne muatumikile, bushuwa, yeye neashale ne muoyo.+ 20  Anyima* udi wenza mpekatu, yeye ke wafua.+ Muana kakuambula dipila bua tshilema tshia tatuende to, ne tatu kakuambula dipila bua tshilema tshia muanende to. Buakane bua muntu muakane nebamubadilabu yeye nkayende, ne bubi bua muntu mubi nebamubadilabu yeye nkayende.+ 21  “‘Nunku muntu mubi yeye mumbuke ku mpekatu yende yonso idiye muenze, yeye ulama mêyi anyi mafunda ne wenza tshidi tshimpe ne tshiakane, bushuwa, yeye neashale ne muoyo. Kakufua to.+ 22  Kabakumubadila* bualu nansha bumue bua ku matomboka avuaye muenze to.+ Yeye neashale ne muoyo bua dienza tshidi tshiakane.’+ 23  “‘Ndiku nsanka bua lufu lua muntu mubi anyi?’+ ke mudi Mukalenge Mutambe Bunene Yehowa ukonka. ‘Tshienaku musue bua yeye umbuke mu njila yende mibi bua ashale ne muoyo anyi?’+ 24  “‘Kadi padi muntu muakane ulekela buakane buende ne wenza malu mabi,* wenza malu onso mabi adi bantu babi benza, neikale ne muoyo anyi? Kabakuvuluka tshienzedi nansha tshimue tshia ku bienzedi biakane bivuaye muenze to.+ Bua dipanga diende dia lulamatu ne bua mpekatu udiye muenze, yeye neafue.+ 25  “‘Kadi nuenu nenuambe ne: “Njila wa Yehowa kena muakane.”+ Teleja koku, wewe nzubu wa Isalele! Njila wanyi ke udi kayi muakane anyi?+ Ki nnjila yenu idi kayiyi miakane anyi?+ 26  “‘Padi muntu muakane ulekela buakane buende ne wenza malu mabi, ne udi ufua bua malu au, yeye neafue bua dienza diende dia malu mabi. 27  “‘Padi muntu mubi umbuka ku malu mabi adiye muenze ne utuadija kuenza tshidi tshimpe ne tshiakane, yeye nealame muoyo* wende.+ 28  Padiye ujingulula bualu ebu ne umbuka ku dishipa dia mikenji dionso divuaye muenze, bushuwa, yeye neashale ne muoyo. Kakufua to. 29  “‘Kadi nzubu wa Isalele neambe ne: “Njila wa Yehowa kena muakane.” Njila yanyi ke idi bulelela kayiyi miakane anyi, wewe nzubu wa Isalele?+ Ki nnjila yenu idi kayiyi miakane anyi?’ 30  “‘Nunku nendumbuluishe muntu yonso wa kunudi bilondeshile njila yende,+ wewe nzubu wa Isalele,’ ke mudi Mukalenge Mutambe Bunene Yehowa wamba. ‘Umbukayi, eyowa, umbukayi kashidi ku dishipa dienu dionso dia mikenji, bua kadikadi tshilenduishi tshidi tshinupetesha dipila. 31  Umbushayi kunudi dishipa dienu dionso dia mikenji dinuvua benze,+ ne petayi* muoyo mupiamupia ne lungenyi lupialupia,+ bualu, bua tshinyi nudi ne bua kufua,+ wewe nzubu wa Isalele?’ 32  “‘Tshiena nsanka nansha kakese bua lufu lua muntu nansha umue to,’+ ke mudi Mukalenge Mutambe Bunene Yehowa wamba. ‘Nunku kudimukayi, nushale ne muoyo.’”+

Note

Anyi “mioyo.” Tang. Diumv.
Anyi “muntu.” Tang. Diumv.
Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
Ku mua.: “muedi wa mashi panshi.”
Anyi “Muntu.”
Ku mua.: “Kabakuvuluka.”
Anyi “wenza malu adi kaayi makane.”
Anyi “anyima.” Tang. Diumv.
Ku mua.: “dienzelayi.”