Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 16:1-63

MALU ADI MU MUKANDA EU

  • Dinanga dia Nzambi bua Yelushalema (1-63)

    • Mupeta bu muana mulekelela (1-7)

    • Nzambi udi umulengeja ne udia nende tshipungidi tshia dibaka (8-14)

    • Udi upanga lulamatu (15-34)

    • Udi unyokibua bu mukaji wa masandi (35-43)

    • Mufuanyikija ne Samalea ne Sodoma (44-58)

    • Nzambi udi uvuluka tshipungidi tshiende (59-63)

16  Dîyi dia Yehowa diakalua kabidi kundi, diamba ne:  “Muana wa muntu, manyisha Yelushalema bienzedi biende bibi.+  Udi ne bua kuamba ne: ‘Mona tshidi Mukalenge Mutambe Bunene Yehowa wambila Yelushalema: “Ntuadijilu webe ne diledibua diebe bivua mu buloba bua muena Kanâna. Tatuebe uvua muena Amole+ ne mamuebe uvua muena Hiti.+  Bua diledibua diebe, dituku divuabu bakulele, kabavua bakose mûfu webe, kabavua bakoweshe mâyi bua kukukezula, kabavua bakulabe mukele, ne kabavua bakujingile mu bilamba to.  Muntu nansha umue kavua mukumvuile luse nansha lukese bua kukuenzela bualu nansha bumue bua ku malu aa to. Muntu nansha umue kavua mukuleje luse to. Kadi bavua bakuimanshe mu mpata bualu bavua bakukine* dituku diuvua muledibue.  “‘“Pamvua mpita, ngakakumona usubakana mu mashi ebe, ne pauvua mulale muaba au mu mashi ebe, ngakamba ne: ‘Ikala ne muoyo!’ Eyowa, ngakakuambila wewe mulale muaba au mu mashi ebe ne: ‘Ikala ne muoyo!’  Ngakakuvuija tshisumbu tshinene menemene, bu bikunyibua bidi bitoloka mu budimi, ne wakakola, wewe kudiunda, kuvuala bilenga bitambe buimpe. Mabele ebe kudivungawu pa tshiadi, ne nsuki yebe kulepayi; kadi utshivua anu butaka, kuyi kantu pambidi.”’  “‘Pamvua mpita, ngakakumona, meme kujingulula ne: ukavua bukole bukumbane bua kukunanga. Ke meme kukubuikila tshilamba tshianyi,*+ kujika butaka buebe, kuditshipa ne kudia nebe tshipungidi,’ ke mudi Mukalenge Mutambe Bunene Yehowa wamba, ‘wewe kulua wanyi.  Kabidi, ngakakowesha mâyi, kukusampulula bua kumbusha mashi ebe ne meme kukulaba mafuta.+ 10  Pashishe meme kukuvuadika tshilamba tshilengeja ne manda, kukupesha sandala mimpe ya tshiseba* ne kukuvungila mu tshilamba tshia line muimpe menemene, meme kukuvuadika bilamba bia mushinga mukole. 11  Ngakakulengeja ne bilenga, kukuela bikanu ku bianza ne shene mu nshingu muebe. 12  Mvua kabidi mukuele kakanu ku diulu, tukanu ku matshi ne mukuase tshifulu tshia butumbi tshilengele ku mutu. 13  Wewe wakatungunuka ne kudilengeja ne or ne arjan, bilamba biebe bivua bia line muimpe menemene, bia mushinga mukole, ne tshilamba tshilengeja ne manda. Bukula bunefuke, buitshi, ne mafuta ke bintu biuvua udia, wewe kulua muimpe wa dikema,+ ne kulua mukumbane bua kuikala mukalenge mukaji.’”* 14  “‘Lumu luebe luakabanga* kutangalaka munkatshi mua bisamba+ bua bulengele buebe, bualu buvua bupuangane bua butumbi buanyi bumvua muteke pa mutu pebe,’+ ke mudi Mukalenge Mutambe Bunene Yehowa wamba.” 15  “‘Kadi wakatuadija kueyemena bulengele buebe,+ ne wewe kulua ndumba bua lumu luebe.+ Wakitshikijila muntu yonso uvua upita ne njila bienzedi biebe bia bundumba,+ ne bulengele buebe buakalua buende. 16  Wakangata bimue bilamba biebe, wewe kuenza miaba mitumbuke ya mekala iuvua wendela masandi,+ malu a nunku kaavua mua kuenzeka anyi kaavua mua kufika nansha. 17  Wewe wakangata kabidi bilengejilu* biebe bimpe bienza ne or ne arjan bimvua mukupeshe, wewe kudienzela bimfuanyi bia bantu balume, wewe kuenda nabi masandi.+ 18  Wakangata bilamba biebe bilengeja ne manda, wewe kubibuikila,* wewe kubilambula mafuta anyi ne musenga wanyi wa manananshi.+ 19  Diampa dimvua mukupeshe, dienza ne bukula bunefuke ne mafuta ne buitshi dimvua mukupeshe bua kudia, wakadilambula kabidi bimfuanyi ebi bu dipembu dimpe.*+ Ke tshivua tshienzeke menemene,’ ke mudi Mukalenge Mutambe Bunene Yehowa wamba.” 20  “‘Wewe wakangata bana bebe ba balume ne bana bebe ba bakaji bauvua mundelele,+ wewe kubalambula mpingu eyi bua ibadie,+ bienzedi biebe bia bundumba ki mbipite ne pa mukenji anyi? 21  Wakashipa bana banyi, wewe kubafila bu milambu pauvua mubapitshishe mu kapia.+ 22  Pauvua uditua mu bienzedi biebe bibi ne bienzedi biebe bia bundumba, kuvua muvuluke matuku a ku buana buebe pauvua butaka, kuyi kantu pambidi, usubakana mu mashi ebe. 23  Panyima pa bubi buebe buonso, diakabi, diakabi diebe,’+ ke mudi Mukalenge Mutambe Bunene Yehowa wamba. 24  ‘Wakadimanyikila kakunakuna ne kudienzela muaba mutumbuke muaba wonso wa tshinsangansanga. 25  Wakibakila miaba yebe mitumbuke pa muaba wa lumu lua bungi wa mu musesu wonso, ne wakavuija bulengele buebe tshintu tshibi pauvua udifila wewe muine* kudi muntu yonso uvua upita ne njila,+ ne wakavudija bienzedi biebe bia bundumba.+ 26  Wewe wakenda bundumba ne bana ba balume ba Ejipitu,+ bena mutumba bebe badi ne majinga makole,* ne wakamfiikisha munda ne bienzedi biebe bia bundumba bungi kabuyi kubala. 27  Nunku nenkutumine tshianza tshianyi ne nenkepeshe tshitupa tshiebe tshia biakudia+ ne nenkufile ku dijinga* dia bakaji badi bakukine,+ bana ba bakaji ba bena Peleshete bavua tshikadilu tshiebe tshia bundu tshitondeshe nsombelu.+ 28  “‘Bu muuvua kuyi mua kumana nyota, wakenda kabidi masandi ne bana ba balume ba Ashû,+ kadi wewe mumane kuenda nabu masandi, kuvua anu mumane nyota to. 29  Nunku wewe wakavudija bundumba buebe too ne mu buloba bua bangenda mushinga,* too ne kudi bena Kasada,+ kadi nansha nanku kuvua anu mumane nyota to. 30  Ke muvua muoyo webe musame* nunku,’* ke mudi Mukalenge Mutambe Bunene Yehowa wamba, ‘pauvua muenze malu onso aa, wenza malu bu ndumba wa dikamakama!+ 31  Kadi pauvua muimanyike kakunakuna kebe pa muaba wa lumu lua bungi wa mu musesu wonso ne muenzele muaba webe mutumbuke muaba wonso wa tshinsangansanga, wewe kuvua bu ndumba to, bualu uvua mubenge difutu kayi dionso. 32  Wewe udi mukaji wa masandi udi wangata benyi pamutu pa bayende!+ 33  Bantu batu bonda bandumba bonso tshintu,+ kadi wewe ke udi muonde bonso badi bakujinga bikole bintu,+ ne udi ubakosa mishiku bua balue kuudi bafumina ku nseke yonso bua kuenda bundumba.+ 34  Wewe udi mushilangane ne bakaji bakuabu badi baditua mu bundumba. Kakuena muntu udi wenda masandi mu mushindu webe eu to! Wewe udi ufuta bantu bakuabu, bobu kabena bakufuta. Webe mushindu mmushilangane ne wa bakuabu.’ 35  “Nunku, wewe ndumba,+ umvua dîyi dia Yehowa. 36  Mona tshidi Mukalenge Mutambe Bunene Yehowa wamba: ‘Bu muuvua mupongolole dijinga diebe dikole, ne mushiye butaka buebe patoke pauvua wenda masandi ne bananga bebe ne mpingu yebe yonso mibi, ya muendi*+ iuvua mene mulambule mashi a bana bebe,+ 37  nunku ndi nsangisha bananga bonso bauvua musankishe kaba kamue, bonso bauvua munange pamue ne bonso bauvua mukine. Nembasangishe kaba kamue bua kukuluisha bafumina ku nseke yonso, ne nembaleje butaka buebe, ne nebakumone butaka bua menemene.+ 38  “‘Nenkunyoke ne mêyi a dilumbuluisha adi makumbanyine bakaji ba masandi+ ne bakaji badi bamatshisha mashi panshi,+ ne mashi ebe needibue panshi mu tshiji tshikole ne mukawu.+ 39  Nenkufile mu tshianza tshiabu, ne bobu nebabumbule tukunakuna tuebe, ne miaba yebe mitumbuke neyupudibue;+ bobu nebakuvule bilamba biebe+ ne nebangate bilengejilu* biebe+ bimpe ne nebakushiye butaka, kuyi kantu pambidi. 40  Nebakutumine musumba wa bantu,+ nebakuase mabue+ ne nebakushipe ne miele yabu ya mvita.+ 41  Neboshe nzubu yebe ne kapia+ ne nebakumbaje dilumbuluisha kuudi ku mêsu kua bakaji ba bungi; nentuishe bundumba buebe ku ndekelu,+ ne wewe neulekele kupeshangana mafutu. 42  Nenkujikijile tshiji tshianyi tshikole,+ ne tshiji tshimvua mukukuatshile netshiumbuke kuudi;+ ne meme nentukije, tshiakufiika kabidi munda nansha.’ 43  “‘Bu muuvua kuyi muvuluke matuku a ku buana buebe+ ne mumfiikishe munda, wenza malu onso aa, mpindieu nenkutumine bipeta bia njila yebe pa mutu pebe,’ ke mudi Mukalenge Mutambe Bunene Yehowa wamba, ‘ne kuakutungunuka kabidi ne tshikadilu tshiebe tshia bundu ne bienzedi biebe bionso bibi nansha. 44  “‘Mona! Muntu yonso udi wela nsumuinu neakuelele lusumuinu elu: “Mudi mamu, mmudi muanende wa bakaji!”+ 45  Udi muana wa bakaji muena mamuebe uvua mukine bayende ne bana bende. Udi muanabu ne bana benu ba bakaji bavua bakine babayabu ne bana babu. Mamuebe uvua muena Hiti ne tatuebe uvua muena Amole.’”+ 46  “‘Yayebe udi Samalea+ udi musombele ku nord kuebe* ne bana bende ba bakaji,*+ ne muakunyebe wa bakaji udi musombele ku sud kuebe* udi Sodoma+ ne bana bende ba bakaji.+ 47  Kuvua anu muendele mu njila yabu ne mulonde bienzedi biabu bibi patupu to, kadi mu katupa kîpi uvua kabidi munyanguke bikole mu tshikadilu tshiebe tshionso kubapita ne bobu.+ 48  Bushuwa bu mundi ne muoyo,’ ke mudi Mukalenge Mutambe Bunene Yehowa wamba, ‘muanenu wa bakaji Sodoma ne bana bende ba bakaji ki mbenze malu audi wewe ne bana bebe ba bakaji benze to. 49  Tangila! Mona tshilema tshia muanenu wa bakaji Sodoma: Yeye ne bana bende ba bakaji+ bavua ne lutambishi+ ne bavua ne biakudia bia bungi+ ne bavua talalaa kabayi batshiuka bualu;+ kadi kabavua bakuatshishe bakengi ne bapele to.+ 50  Bavua anu badibandisha+ ne benza bienzedi bibi ku mêsu kuanyi,+ ke meme kumona ne: bivua bikengela kubumbusha.+ 51  “‘Samalea+ kavua muenze nansha tshia bibidi tshia mpekatu ya bungi iuvua wewe muenze to. Wewe wakatungunuka ne kuvudija bienzedi biebe bibi kubapita bobu, kuenzabi ne: bana benu ba bakaji bamueneke bobu bakane bua bienzedi biebe bionso bibi.+ 52  Mpindieu udi ne bua kupeta dipuekeshibua dia milongo bualu udi mubingishe bienzedi bia* bana benu ba bakaji. Bua mpekatu webe wa dienza malu mabi kubapita bobu, bobu mbakane kukupita wewe. Nunku, ufuishibue bundu ne upete dipuekeshibua dia milongo dia muudi muenze bua bana benu ba bakaji bamueneke bakane.’ 53  “‘Nensangishe bakuatshibue babu, bakuatshibue ba Sodoma ne bana bende ba bakaji, bakuatshibue ba Samalea ne bana bende ba bakaji; nembasangishe kabidi pamue ne bakuatshibue bebe,+ 54  bua upete dipuekeshibua diebe dia milongo; ne wewe neudiumvue mupuekeshibue milongo bua malu audi muenze pauvua mubakoleshe ku muoyo. 55  Bana benu ba bakaji, Sodoma ne bana bende ba bakaji, nebapingane muvuabu kale, ne Samalea ne bana bende ba bakaji nebapingane muvuabu kale, ne wewe pamue ne bana bebe ba bakaji nenupingane munuvua kale.+ 56  Muanenu wa bakaji Sodoma kavua ukumbana bua wewe kuakula bualu buende dituku dia lutambishi luebe, 57  kumpala kua bubi buebe buine kuedibua patoke.+ Mpindieu bana ba bakaji ba Sulia ne bena mutumba bende badi bakupenda, ne bana ba bakaji ba bena Peleshete,+ badi ku nseke yebe yonso, badi bakuenzela malu ne dipetu. 58  Neupete bipeta bia tshikadilu tshiebe tshia bundu ne bienzedi biebe bibi,’ ke mudi Yehowa wamba.” 59  “Bualu mona tshidi Mukalenge Mutambe Bunene Yehowa wamba: ‘Mpindieu nenkuenzele malu anu bu muuvua muenze,+ bualu wewe uvua mupetule mutshipu pauvua mushipe tshipungidi tshianyi.+ 60  Kadi meme nemvuluke tshipungidi tshimvua mudie nebe mu matuku a ku buana buebe, ne nenjadike nebe tshipungidi tshia kashidi.+ 61  Neuvuluke tshienzedi tshiebe ne neudiumvue mupuekeshibue milongo+ paudi wakidila bana benu ba bakaji, bayayebe ne bakunyi bebe kabidi, ne nembafile kuudi bu bana bebe ba bakaji, kadi kabiyi bua tshipungidi tshiebe to.’ 62  “‘Meme nenjadike nebe tshipungidi tshianyi; ne wewe neufike ku dimanya ne: meme ndi Yehowa. 63  Pashishe neuvuluke ne newikale ne bundu bua kukangula mukana muebe bua dipuekeshibua diebe dia milongo,+ pandi nkubuikidila mpekatu yebe tshiyi ntangila malu onso audi muenze,’+ ke mudi Mukalenge Mutambe Bunene Yehowa wamba.”

Note

Anyi “bakine anyima webe.”
Anyi “luzembe luanyi.”
Anyi “tshiseba tshia nyama wa nkonga.”
Anyi “mukumbane bua kubuela mu mulongo wa bakalenge.”
Ku mua.: “Dîna diebe diakabanga.”
Anyi “biju.”
Mmumue ne: mpingu milume.
Anyi “didi ditukijija; didi dituyisha.” Ku mua.: “didi difila dikisha.”
Ku mua.: “ubalula mikolo yebe.”
Ku mua.: “bena mutumba bebe ba musunyi munene.”
Anyi “anyima.”
Ku mua.: “buloba bua Kanâna.”
Anyi “mutekete.”
Anyi pamuapa: “Mona mundi muwule tente ne tshiji tshikole bua bualu buebe.”
Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
Anyi “biju.”
Ku mua.: “ku dia bakaji diebe.”
Pamuapa mbakula bua bimenga bivua ku bukokeshi buende.
Ku mua.: “ku dia balume diebe.”
Anyi “muakuile.”