Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 14:1-23

MALU ADI MU MUKANDA EU

  • Badi bapisha batendeledi ba mpingu (1-11)

  • Kakuena mushindu wa kunyema dilumbuluisha dia Yelushalema (12-23)

    • Muntu muakane Noa, Danyele, ne Yobo (14, 20)

14  Mpindieu, bamue ba ku bakulu ba Isalele bakalua, kusombabu kumpala kuanyi.+  Pashishe dîyi dia Yehowa diakalua kundi, diamba ne:  “Muana wa muntu, bantu aba mbadisuike bua kulonda mpingu yabu ya muendi,* ne mbateke tshilenduishi tshidi tshifikisha bantu ku dienza mpekatu. Bikengela mbalekele bangebeja malu anyi?+  Mpindieu yukila nabu, ubambile ne: ‘Monayi tshidi Mukalenge Mutambe Bunene Yehowa wamba: “Muena Isalele yeye mudisuike bua kulonda mpingu yende ya muendi ne muteke tshilenduishi tshidi tshifikisha bantu ku dienza mpekatu, ne pashishe udi ulua kuebeja muprofete malu, meme Yehowa, nemmuandamune mu mushindu mukumbane bilondeshile mpingu yende ya bungi ya muendi.  Nenjule buôwa mu mioyo ya ba mu nzubu wa Isalele* bualu buonso buabu mbumbuke kundi ne mbalonde mpingu yabu ya muendi.”’+  “Nunku ambila nzubu wa Isalele ne: ‘Monayi tshidi Mukalenge Mutambe Bunene Yehowa wamba: “Alukilayi, umbukayi ku mpingu yenu ya muendi ne umbushayi mpala yenu ku bienzedi bienu bibi bionso.+  Bualu muena Isalele kayi yonso anyi muntu udi musombe buenyi mu Isalele, yeye mumbuke kundi ne mudisuike bua kulonda mpingu yende ya muendi ne muteke tshilenduishi tshidi tshifikisha bantu ku dienza mpekatu, ne pashishe udi ulua kuebeja muprofete wanyi malu,+ meme Yehowa, nemmuandamune meme nkayanyi.  Nentangije mpala wanyi kudi muntu au bua kumuluisha, nemmuvuije tshimanyinu tshidi tshidimuijangana ne lusumuinu, ne nemmumbushe munkatshi mua bantu banyi;+ nunku nenufike ku dimanya ne: meme ndi Yehowa.”’  “‘Kadi bobu bashimakaje muprofete ne yeye mufile diandamuna, meme Yehowa, ke udi mushimakaje muprofete au.+ Pashishe nengolole tshianza tshianyi bua kumuluisha ne kumubutula munkatshi mua bantu banyi bena Isalele. 10  Nebadiambuile tshilema tshiabu; tshilema tshia muntu udi webeja malu netshikale muomumue ne tshilema tshia muprofete, 11  bua ba mu nzubu wa Isalele balekele kutambakana kule nanyi ne balekele kudinyanga ne dishipa diabu dionso dia mikenji. Nunku nebikale bantu banyi ne meme nengikale Nzambi wabu,’+ ke mudi Mukalenge Mutambe Bunene Yehowa wamba.” 12  Dîyi dia Yehowa diakalua kabidi kundi, diamba ne: 13  “Muana wa muntu, bikala buloba bungenzele mpekatu, buenza malu a dipanga lulamatu, nemboluele tshianza tshianyi, nembutule bilaminu bia biakudia bia* buloba ebu,+ nembutumine tshiyole tshia nzala+ ne nenshipamu muntu ne nyama.”+ 14  “‘Nansha bu bantu basatu aba: Noa,+ Danyele+ ne Yobo+ bikalamu, bavua mua kukumbana bua kudipandisha anu bobu nkayabu* bua buakane buabu,’+ ke mudi Mukalenge Mutambe Bunene Yehowa wamba.” 15  “‘Anyi fuanyikija ne: ndi mpitshisha nyama ya luonji ya tshisuku mu buloba abu, ne idi ishipa bantu badimu* ne ibushiya munda mutupu kakuyi muntu upitshilamu bua nyama ya tshisuku.+ 16  Bushuwa, bu mundi ne muoyo,’ ke mudi Mukalenge Mutambe Bunene Yehowa wamba, ‘nansha bu bantu basatu aba bikalamu, kabavua mua kupandisha ni mbana babu ba balume nansha bana babu ba bakaji to; bavua mua kudipandisha anu bobu nkayabu, ne buloba buvua mua kushala munda mutupu.’” 17  “‘Anyi fuanyikija ne: ndi ntumina buloba abu muele wa mvita+ ne ngamba ne: “Muele wa mvita upitshile mu buloba abu,” ne nshipamu muntu ne nyama,+ 18  nansha bu bantu basatu aba bikalamu, bushuwa bu mundi ne muoyo,’ ke mudi Mukalenge Mutambe Bunene Yehowa wamba, ‘kabavua mua kupandisha ni mbana babu ba balume nansha bana babu ba bakaji to; bavua mua kudipandisha anu bobu nkayabu.’” 19  “‘Anyi fuanyikija ne: ndi ntuma tshipupu mu buloba abu+ ne mbuitshikijila tshiji tshianyi tshikole mu diela dia mashi panshi bua kushipamu muntu ne nyama, 20  nansha bu Noa,+ Danyele+ ne Yobo+ bikalamu, bushuwa bu mundi ne muoyo,’ ke mudi Mukalenge Mutambe Bunene Yehowa wamba, ‘kabavua mua kupandisha ni mbana babu ba balume nansha bana babu ba bakaji to; bavua mua kudipandisha anu bobu nkayabu* bua buakane buabu.’”+ 21  “Bualu mona tshidi Mukalenge Mutambe Bunene Yehowa wamba: ‘Nebikale nunku pangatuma manyoka anyi anayi*+ aa: muele wa mvita, tshiyole tshia nzala, nyama ya luonji ya tshisuku ne tshipupu,+ mu Yelushalema bua kushipamu muntu ne nyama.+ 22  Kadi bamue bantu bashalamu nebapanduke ne nebabapatulamu,+ bana ba balume ne bana ba bakaji. Badi balua kunudi, ne panudi numona njila yabu ne bienzedi biabu, bushuwa nenusambibue bua dikenga dimvua mutumine Yelushalema, bua malu onso amvua mumuenzele.’” 23  “‘Nebanusambe panuamona njila yabu ne bienzedi biabu, ne nenumanye ne: ki mbua tshianana pamvua muenze tshimvua ne bua kumuenzela to,’+ ke mudi Mukalenge Mutambe Bunene Yehowa wamba.”

Note

Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
Ku mua.: “nenkuate nzubu wa Isalele mu muoyo wabu.”
Ku mua.: “ntshibula mbale ya mampa ya.” Pamuapa bakula bua mbale ivuabu balamina mampa.
Anyi “kupandisha anu anyima yabu.”
Anyi “ibushipela bana.”
Anyi “kupandisha anu anyima yabu.”
Anyi “bienzedi bianyi binayi bia dilumbuluisha bidi bikengesha.”