Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Yehezekele 11:1-25

MALU ADI MU MUKANDA EU

  • Badi bapisha bakokeshi babi (1-13)

    • Badi bafuanyikija tshimenga ne luesu (3-12)

  • Dilaya dia dipingajibua kabidi (14-21)

    • Badi bafila “nyuma mupiamupia” (19)

  • Butumbi bua Nzambi budi bumbuka mu Yelushalema (22, 23)

  • Yehezekele udi upingana ku Kasada mu tshikena kumona (24, 25)

11  Nyuma wakambandisha muulu, kuyaye nanyi ku tshiibi tshia ku est tshia nzubu wa Yehowa, tshiibi tshidi tshitangile ku est.+ Kuoku aku, ku tshibuelelu tshia tshiibi, ngakamona bantu balume 25, munkatshi muabu muvua Yâzanya muana wa Azû ne Pelatiya muana wa Benaya, bakokeshi ba bantu.+  Pashishe Yeye wakangambila ne: “Muana wa muntu, aba mbantu badi balukakaja malu mabi ne bafila lungenyi lubi mu* tshimenga etshi.  Badi bamba ne: ‘Etshi ki ntshikondo tshia kuibaka nzubu anyi?+ Tshimenga* ke luesu,*+ ne tuetu tudi munyinyi.’  “Nunku amba mêyi a buprofete a bualu buabafikila. Amba mêyi a buprofete, wewe muana wa muntu.”+  Pashishe nyuma wa Yehowa wakantulukila,+ yeye kungambila ne: “Amba ne: ‘Monayi tshidi Yehowa wamba: “Tshinudi bambe ntshilelela, nuenu nzubu wa Isalele, ne ndi mumanye meji anudi nuela.*  Nudi bashipeshe bantu ba bungi mu tshimenga etshi, ne nudi buwuje misesu yatshi ne bitalu.”’”+  “Nunku, monayi tshidi Mukalenge Mutambe Bunene Yehowa wamba: ‘Bitalu binudi batangalaje mu tshimenga ke munyinyi, ne tshimenga ke luesu.+ Kadi nuenu bine nebanupatulamu.’”  “‘Muele wa mvita ngunudi batshine,+ ne muele wa mvita ngunganutumina,’ ke mudi Mukalenge Mutambe Bunene Yehowa wamba.  ‘Nennupatule munda muatshi ne nennufile mu tshianza tshia bantu ba ku babende ne nenkumbaje dilumbuluisha dianyi kunudi.+ 10  Nenukuluke ku muele wa mvita.+ Nennulumbuluishile ku mukalu wa Isalele,+ ne nenufike ku dimanya ne: meme ndi Yehowa.+ 11  Tshimenga katshiakuikala luesu buenu nuenu to, ne nuenu kanuakuikala munyinyi munda mualu to; nennulumbuluishile ku mukalu wa Isalele, 12  ne nenufike ku dimanya ne: meme ndi Yehowa. Bualu kanuvua bendele mu mêyi ne mikandu bianyi ne batumikile mêyi anyi a dilumbuluisha to,+ kadi nudi benze malu mu diumvuangana ne mêyi a dilumbuluisha a bisamba bidi binunyunguluke.’”+ 13  Diakamue pangakamba mêyi a buprofete, Pelatiya muana wa Benaya wakafua, meme kutua mpala panshi, kudila ne dîyi dikole ne: “Kaah, Mukalenge Mutambe Bunene Yehowa! Neubutule bashadile ba Isalele anyi?”+ 14  Dîyi dia Yehowa diakalua kabidi kundi diamba ne: 15  “Muana wa muntu, bantu badi basombele mu Yelushalema mbambile bana benu, bana benu badi ne bukenji bua kupikula, pamue ne nzubu mujima wa Isalele ne: ‘Ikalayi kule ne Yehowa. Buloba mbuetu; mbatupeshabu bua buikale buetu.’ 16  Nunku amba ne: ‘Monayi tshidi Mukalenge Mutambe Bunene Yehowa wamba: “Nansha mundi mubumbushe mubatume kule munkatshi mua bisamba, ne mubatangalaje munkatshi mua maloba,+ mu katupa kîpi nendue muaba munsantu buabu bobu mu maloba adibu baye.”’+ 17  “Nunku amba ne: ‘Monayi tshidi Mukalenge Mutambe Bunene Yehowa wamba: “Kabidi, nennusangishe numbukila mu bukua bantu ne nennusangishe numbukila mu maloba mumvua munutangalaje, ne nennupeshe buloba bua Isalele.+ 18  Bobu nebapinganamu ne nebumbushamu bintu biabu bionso bia muendi ne bienzedi biabu bibi bionso.+ 19  Meme nembapeshe muoyo mujima,*+ ne nengele nyuma mupiamupia munda muabu;+ ne nengumbushe muoyo wa dibue mu mibidi yabu+ ne nembapeshe muoyo wa musunyi,*+ 20  bua bamone mua kuendela mu mêyi anyi mafunda ne kulama mêyi anyi a dilumbuluisha ne kuatumikila. Nunku nebalue bantu banyi, ne meme nendue Nzambi wabu.”’ 21  “‘“Kadi bua aba bena mioyo idi mipangadije bua kutungunuka ne kuenza malu abu a muendi ne bienzedi biabu bibi, nembatumine bipeta bia njila wabu pa mutu wabu,” ke mudi Mukalenge Mutambe Bunene Yehowa wamba.’” 22  Nunku bakeluba bakabandisha mapuapua abu, ne nkata ivua pabuipi nabu,+ ne butumbi bua Nzambi wa Isalele buvua pa mutu pabu.+ 23  Pashishe butumbi bua Yehowa+ buakabanda bufumina mu tshimenga, kuimanabu pa mutu pa mukuna ku est kua tshimenga.+ 24  Pashishe nyuma wakambandisha muulu, mu tshikena kumona tshia ku nyuma wa Nzambi, ne kuyaye nanyi kudi bantu bavua bakuatshibue mu Kasada. Pashishe tshikena kumona tshimvua mumone tshiakumbuka kundi. 25  Meme kutuadija kulondela bantu bavua bakuatshibue ku babende malu onso avua Yehowa mundeje.

Note

Anyi “bua kuluisha.”
Ku mua.: “Yeye,” tshimenga tshia Yelushalema, muvua bena Yuda bela meji ne: bavua mua kukubibua.
Anyi “luesu lunene lua kulambila.”
Anyi “malu adi anuvuila mu lungenyi.”
Ku mua.: “muoyo umue.”
Mmumue ne: udi witaba buludiki bua Nzambi.