Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Nsumuinu 9:1-18

MALU ADI MU MUKANDA EU

  • Meji malelela adi abikila bantu (1-12)

    • “Ku diambuluisha dianyi matuku ebe neikale a bungi” (11)

  • Mukaji mutshimbakane udi ubikila bantu (13-18)

    • “Mâyi miba mmashême” (17)

9  Meji malelela mmibake nzubu wawu;Mmasonge* makunji awu muanda mutekete.   Mmalambe munyinyi wawu* bimpe;Mmasambakaje mvinyo wawu;Mmalongolole kabidi mêsa awu.   Mmatume bena mudimu bawu bakajiBua kuelela lubila pa miaba mitumbuke ya tshimenga ne:+   “Muntu udi kayi ne dimanya, abuele munemu.” Yeye udi wambila muntu udi kayi ne lungenyi lujalame* ne:   “Luayi, nudie diampa dianyiNe nunue penu mvinyo undi musambakaje.   Lekela dipanga diebe,* wikale ne muoyo;+Ndaku mutangile kumpala mu njila wa dijingulula dia malu.”+   Muntu udi ubela musekianganyi udi udibikidila dipuekeshibua milongo,+Ne muntu udi ubela muntu mubi neadienzele bibi.   Kubedi musekianganyi, tshianana neakukine.+ Bela muena meji, yeye neakunange.+   Pesha muena meji, yeye nealue ne meji a bungi.+ Longesha muntu muakane, yeye neavudije dimanya diende. 10  Ditshina dia Yehowa didi tshibangidilu tshia meji,+Ne kumanya Mutambe Tshijila+ kudi dijingulula dia malu. 11  Bualu ku diambuluisha dianyi matuku ebe neikale a bungi,+Ne nebasakidile bidimu ku muoyo webe. 12  Wewe mulue muena meji, udi muena meji bua diakalenga diebe wewe,Kadi wewe muikale musekianganyi, wewe nkayebe neudiambuile bipeta bia tuseku. 13  Mukaji mutshimbakane udi ne mutoyi.+ Yeye udi tshinyonga ne ki mmumanye tshintu nansha tshimue. 14  Yeye udi usomba ku tshibuelelu tshia nzubu wendePa tshisombelu tshidi pa miaba mitumbuke ya mu tshimenga,+ 15  Wela badi bapita ne njila mbila,Badi baya batangile kumpala mu njila wabu wamba ne: 16  “Muntu udi kayi ne dimanya, abuele munemu.” Yeye udi wambila badi kabayi ne lungenyi lujalame* ne:+ 17  “Mâyi miba mmashême,Ne biakudia bidia mu musokoko mbimpe.”+ 18  Kadi yeye ki mmumanye ne: badi kabayi ne bukole mu lufu badimu,Kabidi ne: benyi bende badi mu ndondo ya Lukita.*+

Note

Anyi “Mmapempe.”
Ku mua: “Yeye mmushipe nyama wende.”
Ku mua.: “ne muoyo wa munda.”
Anyi “bantu badi kabayi ne dimanya.”
Ku mua.: “ne muoyo wa munda.”
Anyi “Sheole,” mmumue ne: lukita lua bukua bantu buonso. Tang. Diumv.