Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Nsumuinu 7:1-27

MALU ADI MU MUKANDA EU

  • Itaba mikenji ya Nzambi ne wikale ne muoyo (1-5)

  • Badi basesuisha nsongalume mutshimbakane (6-27)

    • “Bu ngombe uya ku tshishipelu” (22)

7  Muananyi, lama mêyi anyi,Ne ulame mikenji yanyi bimpe.+   Lama mêyi anyi bua wikale ne muoyo;+Ulame dilongesha* dianyi bu kamonyi ka dîsu diebe.   Bisuika ku minu yebe;Bifunda pa kabaya ka muoyo webe.+   Ambila meji ne: “Udi muanetu wa bakaji,”Ne bikila dijingulula dia malu ne: “mulela wanyi,”   Bua bikuepule kudi mukaji muenzavi,*+Kudi mukaji wa masandi* ne mêyi ende a ntekesha.*+   Pa dididishi dia ku nzubu wanyi,Pa masoso a ku dididishi dianyi, ngakatangila panshi,   Pamvua ntangila bantu bitaba mvinyingu,*Ngakamona munkatshi mua bansonga, nsongalume mukuabu uvua kayi ne lungenyi lujalame.*+   Yeye wakapitshila mu njila pabuipi ne disangu diende,*Ne wakaya mutangile ku nzubu kuende   Pakavua panshi pafiika, ku dilolo,+Pakavua butuku bukeba kuila ne mîdima ikeba kulua. 10  Pashishe ngakamona mukaji kampanda usambakena nende,Muvuale bu* mukaji wa ndumba,+ muikale ne muoyo wa budimu. 11  Udi ne mutoyi ne mutu mukole.+ Katu usomba* kumbelu nansha. 12  Udi katantshi pambelu, katantshi miaba ya tshinsangansanga,Udi ubutama pabuipi ne disangu dionso.+ 13  Udi umukuata, umutua mishiku;Ne mpala wa dikamakama, udi umuambila ne: 14  “Mvua ne bua kufila milambu ya diumvuangana.+ Ndi mukumbaje mitshipu yanyi lelu. 15  Ke bualu kayi mvua mupatuke bua kutuilangana nebe,Bua kukukeba, ne ngakakupeta! 16  Ndi muadije pa bulalu buanyi bilamba bimpe bia kubuikilapu,Bilamba bia line bia mekala bia mu Ejipitu.+ 17  Ndi mumiamine mire, alowe ne kinamona pa bulalu buanyi.+ 18  Luaku, tunue dinanga dietu tutondeshe too ne mu dinda;Tudisankishe ne mananga makole, 19  Bualu bayanyi kena kumbe-lu to;Mmuye ku luendu lule. 20  Uvua muye ne tshibombi tshia makuta,Yeye neapingane anu dituku didi ngondo ulua tshitongatonga.” 21  Yeye udi umupambuisha ne mêyi a bujitu a kumuitabijija nawu.+ Udi umusesuisha ne mêyi a ntekesha. 22  Diakamue yeye udi umulonda bu ngombe uya ku tshishipelu,Bu mutshimbakane wa kupeshila dinyoka mu bikunyi,*+ 23  Too ne padi mukete utubula mutshima wende;Bu nyunyi udi uya lubilu mu buteyi, yeye ki mmumanye ne: neajimije muoyo* wende to.+ 24  Mpindieu, bana banyi, ntelejayi;Teyayi ntema ku mêyi andi ngamba. 25  Kulekedi muoyo webe usesuka bua kuyila mu njila yende. Kupambuki bua kulonda njila yende to,+ 26  Bualu mmufikishe ba bungi ku dikuluka bafue,+Ne badiye mushipe mbapite bungi.+ 27  Nzubu wende udi ufikisha ku Lukita;*Udi upueka too ne mu nzubu ya munda ya lufu.

Note

Anyi “mukenji.”
Ku mua.: “muenyi.” Tang. Nsu 2:16.
Ku mua.: “wa ku babende.” Tang. Nsu 2:16.
Anyi “adi asesuisha.”
Anyi “bavua kabayi ne dimanya.”
Ku mua.: “kayi ne muoyo wa munda.”
Anyi “dia mukaji.”
Anyi “bilamba bia.”
Anyi “Makasa ende kaatu asomba.”
Anyi “nkanu.”
Anyi “anyima.”
Anyi “Sheole,” mmumue ne: lukita lua bukua bantu buonso. Tang. Diumv.