Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Nsumuinu 12:1-28

MALU ADI MU MUKANDA EU

  • Udi ukina mubelu kena ne meji (1)

  • “Mêyi mamba kaayi melela meji adi bu kutapa kua muele wa mvita” (18)

  • Kukebesha ditalala kudi kupetesha disanka (20)

  • Mishiku idi ishima idi mibi kudi Yehowa (22)

  • Kanyinganyinga kadi kanemesha muoyo bujitu (25)

12  Muntu udi munange dilongesha mmunange dimanya,+Kadi muntu udi ukina mubelu kena ne meji to.*+   Muntu muimpe udi upeta dianyishibua dia Yehowa,Kadi Yeye udi upisha muntu udi upangadija malu mabi.+   Kakuena muntu udi ukubibua ku malu mabi,+Kadi kabakujomona bantu bakane nansha.   Mukaji wa tshitembu udi tshifulu tshia butumbi kudi bayende,+Kadi mukaji udi wenza malu a bundu udi bu dibola mu mifuba yende.+   Ngenyi ya bantu bakane idi miakane,Kadi buludiki bua bantu babi budi dishima.   Mêyi a bantu babi adi bu kualaminangana kudi kukebesha lufu,*+Kadi mukana mua bena bululame mudi mubapandisha.+   Padibu batonkola bantu babi, kabenaku kabidi nansha,Kadi nzubu wa bantu bakane neashale muimane.+   Badi batumbisha muntu bua meji a mukana muende,+Kadi muntu udi ne muoyo mukonyangale nebamupetule.+   Mbimpe kuangatshibua ne mushinga mukese kadi muikale ne muena mudimuPamutu pa kuditumbisha kadi kuyi ne tshiakudia.*+ 10  Muntu muakane udi utabalela bimuna biende,*+Kadi nansha luse lua muntu mubi ludi tshikisu. 11  Muntu udi udima buloba buende neukute ne biakudia,+Kadi muntu udi wipatshila malu a patupu mmupangile lungenyi lujalame.* 12  Muntu mubi udi walakana bidi bantu babi bakuabu bakuate,Kadi muji wa bantu bakane udi ukuama mamuma. 13  Muntu mubi udi uteyibua kudi mêyi ende a mpekatu,+Kadi muntu muakane udi upanduka ku dikenga. 14  Muntu udi ukuta tshintu tshimpe ku mamuma a mêyi ende,*+Ne mudimu wa bianza biende newumufute. 15  Njila wa muntu mutshimbakane mmuakane ku mêsu kuende nkayende,+Kadi muena meji udi witaba lungenyi ludibu bamuleja.*+ 16  Muntu mutshimbakane udi uleja diakamue* mudiye mufiike munda,+Kadi muntu mudimuke udi ulengulula* tshipendu. 17  Muntu udi ujadika malu ne lulamatu neambe bulelela,*Kadi ntemu wa dishima udi wamba malu a dishima. 18  Mêyi mamba kaayi melela meji adi bu kutapa kua muele wa mvita,Kadi ludimi lua bena meji ludi luondapu.+ 19  Mishiku idi yamba bulelela neyishalaku kashidi,+Kadi ludimi ludi lushima neluikalaku anu bua tshitupa tshîpi.+ 20  Dishima didi mu muoyo wa bantu badi bela tshifufu bua kuenzelangana bibi,Kadi bantu badi bakebesha* ditalala badi bapeta disanka.+ 21  Bualu bubi kabuakufikila muntu muakane,+Kadi bantu babi nebapete dikenga diabu dionso.+ 22  Mishiku idi ishima idi mibi kumpala kua Yehowa,+Kadi bantu badi benza malu ne lulamatu badi bamusankisha. 23  Muntu mudimuke udi usokoka malu adiye mumanye,Kadi muoyo wa muntu mutshimbakane udi ubafula butshimbakane buende.+ 24  Tshianza tshia bantu badi benza mudimu ne muoyo mujima netshikokeshe,+Kadi bianza bidi bifube nebabienzeje mudimu mukole ku bukole.+ 25  Kanyinganyinga mu muoyo wa muntu kadi kawunemesha bujitu,*+Kadi dîyi dimpe didi diwusanguluja.+ 26  Muntu muakane udi ukonkonona bimpe mpata yende ya kudishila nyama,Kadi njila wa bantu babi udi ubapambuisha. 27  Muena lulengu kena ulondakaja nyama wa kukuata,+Kadi tshisumi ke tshiuma tshia mushinga mukole tshidi natshi muntu. 28  Njila wa buakane udi ufikisha ku muoyo;+Mu njila wabu kamuena lufu to.

Note

Anyi “kena ne lungenyi.”
Ku mua.: “kualamina mashi.”
Ku mua.: “diampa.”
Anyi “anyima wa tshimuna tshiende.”
Ku mua.: “kena ne muoyo wa munda.”
Ku mua.: “mukana muende.”
Anyi “mubelu.”
Anyi “dituku dimue dimue.”
Ku mua.: “ubuikila.”
Ku mua.: “tshidi tshiakane.”
Ku mua.: “badi babelangana bua.”
Anyi “kadi kamubungamija bikole.”