Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Nomba 24:1-25

MALU ADI MU MUKANDA EU

  • Lusumuinu luisatu lua Balâma (1-11)

  • Lusumuinu luinayi lua Balâma (12-25)

24  Pakamona Balâma ne: bivua bisankisha* Yehowa bua kubenesha Isalele, kakaya kabidi bua kukeba bimanyinu bia diakabi to,+ kadi wakatangija mpala wende ku tshipela.  Pakabandisha Balâma mêsu ende ne kumonaye Isalele muase bitudilu bilondeshile bisa biende,+ dîba adi nyuma wa Nzambi wakamutulukila.+  Ke yeye kuela lusumuinu elu ne:+ “Mêyi a Balâma muana wa Beô,Ne mêyi a muntu udibu babulule mêsu,   Mêyi a muntu udi umvua dîyi dia Nzambi,Muntu uvua mumone tshikena kumona tshia Wa Bukole Buonso,Muntu udi muiname ne mêsu ende mabulula:+   Ntenta yebe mmilengele, wewe Yakoba,Miaba yebe ya kusombela, wewe Isalele!+   Mmialabale miaba mile anu bu bibandabanda,*+Anu bu madimi adi kumpenga kua musulu,Anu bu mitshi ya alowe* idi Yehowa mukune,Anu bu mitshi ya sedre idi kumpenga kua mâyi.   Mâyi a mu mbeketshi yende ibidi ya biseba adi atungunuka ne kupongoloka,Ne mamiinu* ende adi akunyibua kumpenga kua mâyi a bungi.+ Mukalenge wende+ neikale kabidi munene kupita Agaga,+Ne bukalenge buende nebutumbishibue.+   Nzambi udi umupatula mu Ejipitu;Yeye udi bu nsengu ya ngombe mulume wa tshisuku buabu bobu. Neadie bisamba, baluishi bende,+Ne neakunye mifuba yabu, ne neabasunsule ne mikete yende.   Yeye mmualamine, mmulale bu nyama wa ntambue,Ne anu bu nyama wa ntambue, nnganyi udi mua kuteta bua kumubundula? Bantu badi bakubenesha badi babeneshibua,Ne bantu badi bakuela mulawu badi bedibua mulawu.”+ 10  Ke Balaka kukuatshila Balâma tshiji tshikole. Balaka wakakumakaja bianza ne dipetu, kuambilaye Balâma ne: “Mvua mukubikile bua wewe kuela bena lukuna banyi mulawu,+ kadi mpindieu kuena muenze tshintu tshikuabu anu kubabenesha misangu yonso isatu eyi. 11  Mpindieu pingana kuebe musangu umue. Mvua musue kukupesha difutu dinene,+ kadi tangila! Yehowa mmukupangishe difutu adi.” 12  Balâma kuandamuna Balaka ne: “Tshivua muambile bantu bauvua mutume ne mukenji ne: 13  ‘Nansha Balaka mumpeshe nzubu wende muwule tente ne arjan ne or, tshiena mua kuenza bualu nansha bumue ku disua dianyi* budi bubengangana ne dîyi dia Yehowa, nansha buimpe nansha bubi; nengambe anu tshiangambile Yehowa’ anyi?+ 14  Mpindieu nkadi nya kudi bena mu tshisamba tshietu. Luaku nkuambile tshikala tshisamba etshi mua kuenzela tshisamba tshienu mu matuku atshilualua.”* 15  Nunku wakela lusumuinu elu ne:+ “Mêyi a Balâma muana wa Beô,Ne mêyi a muntu udibu babulule mêsu,+ 16  Mêyi a muntu udi umvua dîyi dia Nzambi,Ne muntu udi ne dimanya dia Mutambe Bunene,Uvua mumone tshikena kumona tshia Wa Bukole BuonsoPavuaye muiname ne mêsu ende mabulula: 17  Nemmumone, kadi ki mmpindieu to;Nemmutangile, kadi ki mmu katupa kakese emu to. Mutoto+ newupatukile mu Yakoba,Ne dikombo dia bumfumu+ nedijukile mu Isalele.+ Ne neatayishe bushuwa mpala wa Moaba*+Ne kabalubalu ka mutu ka bana bonso ba kayumbayumba. 18  Ne Edome nealue tshintu tshia kuangata,+Bushuwa, Seî+ tshintu tshia bena lukuna bende,+Pikala Isalele wenda uleja dikima diende. 19  Ne mu Yakoba nemupatuke muntu wikala utshimuna,+Ne neabutule muntu yonso wa mu tshimenga wapanduka.” 20  Pakamonaye Amaleka, wakatungunuka ne lusumuinu luende ne: “Amaleka uvua wa kumpala ku bisamba bionso,+Kadi ku ndekelu neajimine.”+ 21  Pakamonaye bena Kene,+ wakatungunuka ne lusumuinu luende ne: “Muaba webe wa kusombela mmushindame, ne muaba webe wa kusombela mmuashila pa dibue. 22  Kadi muntu mukuabu neoshe Kaina. Nkushale musangu bule kayi kumpala kua Ashû kukukuata ne kuya nebe?” 23  Wakatungunuka ne lusumuinu luende ne: “Diakabi! Nnganyi wapanduka penza Nzambi bualu ebu? 24  Mazuwa neafumine ku malobo a ku Kitima,+Ne neakengeshe Ashû,+Ne neakengeshe Ebê. Kadi yeye pende neajimine kashidi.” 25  Pashishe Balâma+ wakajuka, kuyaye, kupinganaye muaba wende. Balaka pende kuyila wende njila.

Note

Ku mua.: “bivua bimpe ku mêsu kua.”
Anyi “tusulu tua tshilonda nkoka.”
Dîna dia mutshi udi ne budimbu bua mupuya muimpe buvuabu benza nabu manananshi tshikondo tshivuabu bafunda Bible.
Anyi “bana.”
Ku mua.: “ku muoyo wanyi.”
Anyi “ku ndekelu kua matuku.”
Anyi “nseke ya mutu wa Moaba.”