Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Muambi 10:1-20

MALU ADI MU MUKANDA EU

  • Butshimbakane bukese budi bubuikidija meji (1)

  • Njiwu ya dibenga kuikala mukumbane (2-11)

  • Nsombelu wa lutatu wa mutshimbakane (12-15)

  • Butshimbakane munkatshi mua bamfumu (16-20)

    • Nyunyi udi mua kuambulula mêyi ebe (20)

10  Anu mudi njiji mifue yinunkisha mafuta a muenji wa manananshi bibi ne yiatuntumuja, ke mudi butshimbakane bukese bubuikidija meji ne butumbi.+  Muoyo wa muena meji udi umulombola mu njila muimpe,* kadi muoyo wa mutatakane udi umulombola mu njila mubi.*+  Mu njila yonso udi mutshimbakane wendela, yeye mmupangile lungenyi lujalame,*+ ne udi umanyisha bantu bonso ne: yeye mmutshimbakane.+  Tshiji tshia* mfumu tshiotshi ne bua kukutemena, kumbuki muaba uudi,+ bualu lutulu ludi lutuyisha mpekatu minene.+  Kudi bualu budi bunyingalaja bundi mumone muinshi mua dîba, tshilema kampanda tshienza kudi badi bakokesha:+  Butshimbakane mbuteka pa miaba minene ya bungi, kadi babanji* mbashale pa miaba mishadile.  Ndi mumone bena mudimu babande pa tubalu kadi bakokeshi benda ku makasa anu bu bena mudimu.+  Muntu udi umbula dijimba udi mua kukulukamu;+ ne muntu udi utubula disoso mu tshimanu tshia mabue badi mua kumusuma kudi nyoka.  Muntu udi upanda mabue, adi mua kumuenzela bibi, ne muntu udi upanda mitshi, idi mua kumukebela njiwu.* 10  Tshiamu tshiotshi tshitshipale ne muntu kayi mutshinone, nebimulombe bua kufila makanda a bungi. Kadi meji adi ambuluisha bua kufika ku tshipeta tshimpe. 11  Nyoka yeye musumangane kumpala kua kumutekeshabu, muena mupongo wa ntekesha mupiluke* kena kabidi ne mushinga to. 12  Mêyi adi apatuka mukana mua muena meji adi apetesha dianyishibua,+ kadi mishiku ya muntu mutatakane idi kabutu kende.+ 13  Mêyi a kumpala adi apatuka mukana muende nga butshimbakane,+ ne mêyi ende a ndekelu nga bupale bubi menemene. 14  Kadi mutshimbakane udi utungunuka anu ne kuakula.+ Muntu ki mmumanye tshienzeka to; nnganyi udi mua kumuambila tshialua kuenzeka panyima pende?+ 15  Mudimu mukole wa muntu mutatakane udi umuzengeja, bualu yeye kena nansha mumanye mua kupeta njila wa kuyilaye mu tshimenga. 16  Ndiakabi kayipu bua ditunga padi mukalenge wadi muikale muana wa balume,+ ne bakokeshi batuadija bibilu biabu bia masanka mu dinda! 17  Ndiakalenga kayipu bua ditunga padi mukalenge wadi muikale muana wa bantu banene, ne bakokeshi badia pa dîba dikumbane bua kupeta bukole, kabiyi bua kukuatshika!+ 18  Bua lulengu lupite bungi musaka wa nzubu udi upuka, ne bua bianza bidi kabiyi bienza mudimu nzubu udi umatshisha mâyi.+ 19  Diampa ndienza* bua tuseku, ne mvinyo udi wenza bua muoyo wikale usankisha;+ kadi makuta adi akumbaja majinga onso.+ 20  Kuedi mukalenge mulawu* nansha mu lungenyi luebe,*+ ne kuedi bantu babanji mulawu mu nzubu webe wa bulalu; bualu nyunyi* udi mua kufikisha dîyi,* anyi bifukibua bidi ne mapuapua bidi mua kuambulula bivua biakudibue.

Note

Ku mua.: “udi ku tshianza tshiende tshia balume.”
Ku mua.: “udi ku tshianza tshiende tshia bakaji.”
Ku mua.: “kena ne muoyo wa munda.”
Ku mua.: “nyuma wa; mueyelu wa.”
Anyi “badi bakumbane.”
Anyi pamuapa: “udi ne bua kuyidimukila.”
Ku mua.: “mfumu wa ludimi.”
Anyi “Biakudia mbienza.”
Anyi “kujingidi mukalenge malu mabi.”
Anyi pamuapa: “pa bulalu buebe.”
Ku mua.: “tshifukibua tshidi tshibuuka tshia mu diulu.”
Anyi “mukenji.”