Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Misambu 86:1-17

MALU ADI MU MUKANDA EU

  • Kakuena nzambi bu Yehowa

    • Yehowa mmudiakaje bua kubuikidilangana (5)

    • Bisamba bionso bitendelele Yehowa (9)

    • “Ndongesha malu a njila webe” (11)

    • “Vuija muoyo wanyi muoyo umue” (11)

Disambila dia Davidi. 86  Inyika ditshi diebe,* wewe Yehowa, ungandamune,Bualu ndi nkenga ne ndi mupele.+   Lama muoyo* wanyi, bualu ndi muena lulamatu.+ Pandisha muena mudimu webe udi ukueyemena,Bualu wewe udi Nzambi wanyi.+   Ndeja luse, Yehowa wanyi,+Bualu ndi nkubila dituku dijima.+   Sankisha muena mudimu webe,*Bualu kuudi wewe, Yehowa, nkundi ntangila.*   Bualu wewe, Yehowa, udi muimpe+ ne udi mudiakaje bua kubuikidilangana;+Udi muwule tente ne dinanga dia lulamatu kudi bonso badi bakubila.+   Yehowa wanyi, teleja disambila dianyi;Ne teya ntema ku milombu yanyi ya dilomba diambuluisha.+   Ndi nkubila mu dituku dia dikenga dianyi,+Bualu wewe neungandamune.+   Yehowa wanyi, kakuena udi bu wewe munkatshi mua nzambi mikuabu,+Kakuena midimu mikuabu idi bu yebe to.+   Bisamba bionso biuvua mufukeNebilue kuinama kumpala kuebe wewe, Yehowa,+Nebipeshe dîna diebe butumbi.+ 10  Bualu wewe udi munene ne udi wenza malu a kukema;+Udi Nzambi, wewe nkayebe.+ 11  Yehowa wanyi, ndongesha malu a njila webe.+ Nengendele mu bulelela buebe.+ Vuija muoyo wanyi muoyo umue* bua ntshine dîna diebe.+ 12  Ndi nkutumbisha ne muoyo wanyi mujima, wewe Yehowa Nzambi wanyi,+Ne nentumbishe dîna diebe kashidi, 13  Bualu dinanga diebe dia lulamatu kundi ndinene,Ne wewe udi mupandishe muoyo* wanyi mu ndondo ya Lukita.*+ 14  Nzambi wanyi, bena dikamakama badi bajuka bua kunduisha;+Dingumba dia bena tshikisu didi dikeba bua kuangata muoyo wanyi,*Ne kabena bakunemeka* to.+ 15  Kadi wewe, Yehowa, udi Nzambi wa luse udi uditeka pa muaba wa bakuabu,*Udi kayi ukuata tshiji lukasa, muwule tente ne dinanga dia lulamatu pamue ne lulamatu.*+ 16  Tangila kundi, undeje luse.+ Pesha muena mudimu webe bukole buebe,+Ne pandisha muana wa balume wa mupika webe mukaji. 17  Ndeja tshimanyinu* tshia buimpe buebe,Bua badi bankine batshimone, bafuishibue bundu. Bualu wewe, Yehowa, udi muambuluishi wanyi ne munsambi.

Note

Anyi “Inama, uteleje.”
Anyi “anyima.”
Anyi “anyima wa muena mudimu webe.”
Anyi “nkundi mbandisha anyima wanyi.”
Anyi “Mpesha muoyo udi kawuyi mupanduluke.”
Anyi “anyima.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi “dikeba anyima wanyi.”
Anyi “ki mbakuteke wewe kumpala kuabu.”
Anyi “muena muoyo muimpe.”
Anyi “ne bulelela.”
Anyi “tshijadiki.”