Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Misambu 72:1-20

MALU ADI MU MUKANDA EU

  • Bukokeshi bua ditalala bua mukalenge wa Nzambi

    • “Muntu muakane neatante” (7)

    • Badi bakokela kumbukila ku mbuu too ne ku mbuu (8)

    • Disungidibua ku tshikisu (14)

    • Divulangana dia ntete pa buloba (16)

    • Dîna dia Nzambi didi ditumbishibua kashidi (19)

Bua Solomo. 72  Nzambi wanyi, pesha mukalenge mêyi ebe a dilumbuluisha,Ne pesha muana wa mukalenge buakane buebe.+   Yeye alumbuluile bantu bebe ne buakane,Alumbuluile bantu bebe bapuekele ne kulumbuluisha kuakane.+   Mikuna minene ituadile bantu ditalala,Ne mikuna mikese ilue ne buakane.   Yeye akuile* bapuekele munkatshi mua bantu,Apandishe bana ba bapele,Ne azaze muntu udi udiangana bintu ku mashimi.+   Bobu nebakutshine patshidi dîba ditema,Patshidi ngondo muikale muulu,Ku tshipungu ne tshipungu tshia bantu.+   Yeye neikale bu mvula udi ulokela pa bisonsa bidibu bakose,Bu mamata a mvula adi amiamina mâyi pa buloba.+   Mu matuku ende muntu muakane neatante,*+Ne ditalala nedivulangane+ too ne pikala ngondo katshiyiku kabidi.   Yeye neikale ne badi bamukokela* kumbukila ku mbuu too ne ku mbuu mukuabuNe kumbukila ku Musulu* too ne ku ntengu ya buloba.+   Bantu badi basombele mu tshipela nebamuinamine,Ne bena lukuna bende nebalake lupuishi.+ 10  Bakalenge ba ku Tâshishi ne ba mu bidiila* nebafile milambu.+ Bakalenge ba ku Sheba ne ba ku Seba nebafile mapa.+ 11  Bakalenge bonso nebamuinamine,Ne bisamba bionso nebimuenzele mudimu. 12  Bualu yeye neasungile bapele badi badila balomba diambuluisha,Kabidi ne mupuekele ne muntu yonso udi kayi ne mumuambuluishi. 13  Yeye neumvuile bapuekele ne bapele luse,Ne yeye neapandishe mioyo* ya bapele. 14  Neabasungile* ku dikengeshibua ne ku tshikisu,Ne mashi abu neikale ne mushinga mukole ku mêsu kuende. 15  Yeye ikale ne muoyo ne bamupeshe or wa kuSheba.+ Batungunuke ne kusambila bua bualu buende,Ne yeye abeneshibue dituku dijima. 16  Nekuikale ntete ya bungi pa buloba;+Neyivulangane bikole pa nsongo ya mikuna. Mamuma ende neatante bu mu Lebanona,+Ne bantu nebasampile mu bimenga bu bisonsa bia pa buloba.+ 17  Dîna diende dishalaku kashidi,+Ditungunuke ne kutanta bu dîba. Bantu badipetele dibenesha ku butuangaji buende;+Bisamba bionso bimuambe mudiye wa diakalenga. 18  Yehowa Nzambi atumbishibue, Nzambi wa Isalele,+Udi wenza malu a kukema yeye nkayende.+ 19  Dîna diende dia butumbi ditumbishibue kashidi,+Butumbi buende buwuje buloba bujima.+ Amen, Amen. 20  Mêyi aa ke adi ajikija masambila a Davidi, muana wa Yishai.+

Note

Ku mua.: “alumbuluishe.”
Ku mua.: “neasampile.”
Anyi “neakokeshe.”
Mmumue ne: musulu wa Pelata.
Anyi “bisanga.”
Anyi “anyima.”
Anyi “neakuule anyima yabu.”