Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Misambu 66:1-20

MALU ADI MU MUKANDA EU

  • Midimu ya Nzambi idi ikemesha

    • “Luayi, numone midimu ya Nzambi” (5)

    • “Nenkumbaje mitshipu yanyi kuudi” (13)

    • Nzambi udi uteleja disambila (18-20)

Kudi muludiki. Musambu. Mujiki. 66  Buloba bujima, elelayi Nzambi mbila ya butshimunyi.+   Imbayi misambu ya kutumbisha nayi* dîna diende dia butumbi. Tumbishayi butumbi buende.+   Ambilayi Nzambi ne: “Ke mudi midimu yebe ikemesha nunku!+ Bua bukole buebe bunene,Bena lukuna bebe nebadibombe kumpala kuebe bua kukukokela.+   Buloba bujima nebukuinamine;+Nebimbe misambu ya kukutumbisha nayi;Nebimbe misambu ya kutumbisha nayi dîna diebe.”+ (Sela)   Luayi, numone midimu ya Nzambi. Bienzedi bidiye wenzela bana ba bantu mbia dikema.+   Wakakudimuna mbuu kuluayi buloba bume;+Bakasabuka musulu ku makasa.+ Kuoku aku tuakasankila mu yeye.+   Yeye udi ukokesha kashidi+ ku bukole buende. Mêsu ende adi atangila bisamba.+ Badi ne mutu mukole kabadibandishi nansha.+ (Sela)   Tumbishayi Nzambi wetu, nuenu bukua bantu,+Nuenze bua tshiona tshia dimutumbisha tshiumvuike.   Yeye udi utulama ne muoyo,*+Kena ulekela makasa etu atondoka* nansha.+ 10  Bualu, wewe Nzambi, udi mutukonkonone;+Anu bu mudibu bakezula tshiamu tshia arjan, ke muudi mutukezule petu. 11  Uvua mutuele mu bukondo bua kulemba nabu;Uvua mutuambike* bujitu budi buzengeja. 12  Wakanyishila muntu ufuafua bua kuenda mubande pambidi petu;*Tuakapitshila mu kapia ne mu mâyi;Pashishe wewe kutufikisha muaba wa dikisha. 13  Nendue mu nzubu muebe ne milambu ya kuosha mijima;+Nenkumbaje mitshipu yanyi kuudi+ 14  Ivua mishiku yanyi milaye+Ne mukana muanyi muakule pamvua mu dikenga. 15  Nenkulambule milambu ya kuosha ya nyama ya manyiNe muishi wa milambu ya bimpanga. Nendambule ngombe pamue ne mbuji ya mpumbu. (Sela) 16  Luayi nuteleje, nuenu bonso badi batshina Nzambi,Nennuambile malu adiye mungenzele.*+ 17  Ngakamubikila ne mukana muanyi,Meme kumutumbisha ne ludimi luanyi. 18  Bu meme mupangadije bualu kampanda bubi mu muoyo wanyi,Yehowa kavua mua kuikala munteleje nansha.+ 19  Kadi Nzambi wakateleja bushuwa;+Wakateya ntema ku disambila dianyi.+ 20  Nzambi atumbishibue, yeye uvua kayi mubenge disambila dianyi,Anyi mumpale* dinanga diende dia lulamatu.

Note

Anyi “mijiki bua.”
Anyi “uteka anyima wetu mu muoyo.”
Anyi “alenduka; atetuka.”
Ku mua.: “muambike bimonu bietu.”
Ku mua.: “pa mitu yetu.”
Anyi “muenzele anyima wanyi.”
Anyi “mungimine.”