Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Misambu 64:1-10

MALU ADI MU MUKANDA EU

  • Dikubibua ku buluishi busokome

    • “Nzambi neabase” (7)

Kudi muludiki. Mujiki wa Davidi. 64  Nzambi wanyi, teleja dîyi dianyi pandi nkulomba.+ Kuba muoyo wanyi bua kawikadi ne buôwa bua muena lukuna.   Nsokoka ku bifufu bidi bantu babi bela mu musokoko,+Kudi musumba wa benji ba malu mabi.   Badi basakisha ludimi luabu anu bu muele wa mvita;Badi baludika mêyi abu a tshikisu anu bu mikete,   Bua kuasabu muntu udi kayi ne bualu kumbukila miaba idibu basokome;Badi bamuasa diakamue kayi mutekemene, kakuyi buôwa.   Badi balamata bikole ku ngenyi yabu mibi;*Badi bayukidilangana bua mushindu wa kusokoka mateyi abu. Badi bamba ne: “Nnganyi waamona?”+   Badi bakebakeba mishindu mipiamipia ya dienza malu mabi;Badi balukakaja mayele abu a budimu mu musokoko;+Meji adi mu muoyo wa muntu yonso kaena mua kujinguludibua.   Kadi Nzambi neabase;+Nebatapike mputa ku mukete diakamue kabayi batekemene.   Ludimi luabu nkayabu nelubakuluishe;+Bonso badi babandila nebakupe mutu.   Pashishe bantu bonso nebapete buôwa,Ne nebamanyishe malu adi Nzambi muenze,Nebapete busunguluji mu malu adiye wenza.+ 10  Muntu muakane neasankile mu Yehowa ne neanyemene kudiye;+Bonso badi ne bululame mu muoyo nebasanke bikole.*

Note

Anyi “Badi bakankamijangana bua kuenza malu mabi.”
Anyi “nebaditumbishe.”