Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Misambu 139:1-24

MALU ADI MU MUKANDA EU

  • Nzambi mmumanye bena mudimu bende bimpe

    • Kakuena mushindu wa kunyema nyuma wa Nzambi (7)

    • “Ndi muenjibue mu mushindu wa dikema” (14)

    • ‘Wakammona pantshivua mukuji’ (16)

    • “Ndombola mu njila wa tshiendelele” (24)

Bua muludiki. Wa Davidi. Mujiki. 139  Yehowa wanyi, wewe udi mukonkonone munda muanyi, ne udi mummanye.+   Wewe udi mumanye pandi nsomba ne pandi njuka.+ Udi ujingulula meji andi nawu anu ku bule.+   Wewe udi untangila* pandi ngenza luendu ne pandi ndala panshi;Udi mumanye njila yanyi yonso bimpe.+   Dîyi kadiyi dianji kuikala pa ludimi luanyi,Kadi tangila! Wewe Yehowa ukadi mudimanye bimpe.+   Wewe udi unnyunguluka panyima ne kumpala;Ne udi untenteka tshianza tshiebe.   Dimanya dia nunku didi dimpitshila bua kudiumvua.* Nditambe kutumbuka, tshiena mua kudipeta.*+   Nkuepi kundi mua kunyema nyuma webe,Ne nkuepi kundi mua kunyema mpala webe?+   Bu meme mua kubanda mu diulu, wewe newikalamu,Ne bu meme mua kuenza bulalu buanyi mu Lukita,* tangila, wewe newikalamu.+   Bu meme mua kubuuka ne masala a lunkelu kuyaBua kusombela ku muelelu kua mbuu wa kule menemene, 10  Nansha kuoku aku tshianza tshiebe netshindomboleNe tshianza tshiebe tshia balume netshinkuate.+ 11  Meme muambe ne: “Bushuwa mîdima neyinsokoke!” Dîba adi butuku budi bunnyunguluke nebulue butoke. 12  Nansha mîdima kayakuikala mifiike bikole kuudi wewe,Kadi butuku nebuikale butoke anu bu munda munya;+Kuudi wewe mîdima idi muomumue ne butoke.+ 13  Bualu wewe wakenza tuonyi tuanyi;Wakansokoka* mu difu dia mamuanyi.+ 14  Ndi nkutumbisha bualu mu mushindu udi ukemesha ndi muenjibue mu mushindu wa dikema.+ Midimu yebe nya kukema,+Ndi mumanye* bualu ebu bimpe menemene. 15  Mifuba yanyi kayivua mikusokokaPamvua ngenjibua mu musokoko,Pamvua ndukakajibua mu ndondo ya buloba.+ 16  Mêsu ebe mine akammona pantshivua mukuji;Bitupa biawu bionso bivua bifunda mu mukanda webeBua matuku avuabi bienjibue,Kumpala kua tshimue tshia kudibi katshiyi tshianji kuikalaku. 17  Nanku kundi meme, meji ebe adi ne mushinga wa bungi be!+ Nzambi wanyi, mona mudi bungi buawu bupite bunene!+ 18  Meme mutete bua kuabala, mmapite lusenga ku bungi.+ Pandi mbika, ntshidi anu nebe.*+ 19  Nzambi wanyi, bu wewe nansha mua kushipa bantu babi!+ Dîba adi bena tshikisu* bavua mua kumbuka kundi, 20  Bantu badi bakuamba malu ne lungenyi lubi;*Mbaluishi bebe badi bangata dîna diebe mu mushindu mubi.+ 21  Yehowa wanyi, tshienaku mukine badi bakukine,+Ne ngumvua muengu bua badi bakutombokela anyi?+ 22  Ndi mubakine ne muoyo mujima;+Bobu mbalue bushuwa bena lukuna banyi. 23  Nzambi wanyi, konkonona munda muanyi, ne umanye muoyo wanyi.+ Nkenketa, ne umanye meji adi antatshisha.*+ 24  Tangila bikala munda muanyi njila mubi,+Ne ndombola+ mu njila wa tshiendelele.

Note

Ku mua.: “umpima.”
Anyi “didi dinkemesha bikole.”
Anyi “Ndipite bungi bua meme kumvua.”
Anyi “Sheole,” mmumue ne: lukita lua bukua bantu buonso. Tang. Diumv.
Anyi pamuapa: “Wakandukakaja pamue.”
Anyi “Anyima wanyi mmumanye.”
Anyi pamuapa: “Nengikale amu ntshidi ngabala.”
Anyi “badi ne dibanza dia mashi.”
Anyi “bilondeshile lungenyi luabu.”
Anyi “andubakaja.”