Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Luta 3:1-18

MALU ADI MU MUKANDA EU

  • Naomi udi wambila Luta tshia kuenza (1-4)

  • Luta ne Boaza muaba wa tshishipuidi (5-15)

  • Luta udi upingana kudi Naomi (16-18)

3  Mpindieu Naomi mamuende muenu wa Luta wakamuambila ne: “Muananyi wa bakaji, tshienaku ne bua kukukebela lubanza*+ bua malu ende bimpe buebe wewe anyi?  Boaza ki mmulela wetu anyi?+ Yeye ke muena bansongakaji bauvua nabu abu. Butuku ebu yeye udi upepula orje muaba wa tshishipuidi.  Nunku owa mâyi, udilabe mafuta a mupuya muimpe; pashishe uvuale bimpe* ne upueke muaba wa tshishipuidi. Enza bua muntu au kamanyi ne: udi muaba au too ne padiye ujikija kudia ne kunua.  Padiye ulala, utangile muaba udiye ulala; pashishe uye, ubulule tshilamba ku makasa kuende ne ulale. Yeye neakuambile tshiudi ne bua kuenza.”  Ke yeye kuandamuna ne: “Nengenze malu onso audi mungambile.”  Nunku wakapueka muaba wa tshishipuidi, yeye kuenza malu onso avua mamuende muenu mumuambile bua kuenza.  Dîba adi Boaza uvua udia, unua ne umvua bimpe mu muoyo wende. Pashishe wakaya kulala kumpenga kua mushiki wa ntete. Panyima pa bualu ebu, Luta wakalua bitekete bitekete, yeye kumubulula tshilamba ku makasa, kulalaye.  Mundankulu, muntu au wakabanga kuzakala, yeye kuinama lua kumpala, kumonaye muntu mukaji mulale ku makasa ende.  Wakebeja ne: “Wewe udi nganyi?” Yeye kuandamuna ne: “Ndi Luta, muena mudimu webe. Balula tshilamba tshiebe,* ubuikile muena mudimu webe, bualu udi muntu udi mua kunkuula.”+ 10  Ke yeye kuamba ne: “Muananyi wa bakaji, Yehowa akubeneshe. Udi muleje dinanga diebe dia lulamatu musangu wa ndekelu eu kupita musangu wa kumpala,+ paudi mubenge kulonda bansongalume, nansha bikale bapele anyi babanji. 11  Mpindieu, muananyi wa bakaji, kutshinyi to. Nenkuenzele malu onso audi muambe,+ bualu muntu yonso mu tshimenga* etshi mmumanye ne: udi mukaji wa bikadilu bimpe menemene. 12  Nansha mudibi bushuwa ne: ndi mua kukukuula,+ kadi kudi muntu mukuabu udi mua kukukuula udi mulela wenu wa pabuipi menemene kumpita meme.+ 13  Shala muaba eu butuku ebu, nunku mu dinda yeye mukukuule, mbimpe! Akukuule.+ Kadi yeye kayi musue kukukuula, bushuwa bu mudi Yehowa ne muoyo, dîba adi meme nkayanyi nenkukuule. Lala muaba eu too ne mu dinda.” 14  Nunku wakalala ku makasa ende too ne mu dinda, pashishe wakabika panshi kapayi panji kutoka bimpe bua muntu kumanyikaye kudi mukuabu. Ke Boaza kuamba ne: “Kabimanyiki ne: muntu mukaji uvua mulue muaba wa tshishipuidi eu to.” 15  Wakamba kabidi ne: “Luaku ne tshilamba tshiudi mudijingile, utshibalule.” Nunku wakatshibalula, yeye kuelamu bipiminu* bisambombo bia orje, kumuambikaye, pashishe Boaza wakaya mu tshimenga. 16  Luta wakaya kudi mamuende muenu, ke yeye kumuebeja ne: “Muananyi wa bakaji, malu mmende bishi?”* Yeye kumuambila malu onso avua muntu au mumuenzele. 17  Yeye kuamba kabidi ne: “Mmumpeshe bipiminu 6 bia orje ebi, ne mmungambile ne: ‘Kuyi kudi mamuebe muenu bianza bitupu to.’” 18  Ke yeye kuamba ne: “Muananyi wa bakaji, somba muaba eu too ne paudi umanya mudi tshilumbu etshi tshipita, bualu muntu au kakuikisha too ne padiye ujikija tshilumbu etshi lelu.”

Note

Ku mua.: “muaba wa kuikishila.”
Anyi “uvuale bilamba biebe bia pa mutu.”
Anyi “luzembe lua tshilamba tshiebe.”
Ku mua.: “tshiibi tshionso tshia tshisamba tshianyi.”
Pamuapa mbipiminu bia seha bisambombo, anyi litre mitue ku 44. Tang. Tshis. B14.
Ku mua.: “wewe udi nganyi?”