Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Lumu luimpe lufunda kudi Luka 21:1-38

MALU ADI MU MUKANDA EU

  • Tukuta tubidi tua binjanja tua mukaji mukamba mupele (1-4)

  • TSHIMANYINU TSHIA MALU ADI NE BUA KULUA (5-36)

    • Mvita, dikanka dikole dia buloba, bipupu bia masama, biyole bia nzala (10, 11)

    • Yelushalema munyunguluka kudi biluilu bia basalayi (20)

    • Bikondo bisungula bia bisamba (24)

    • Dilua dia Muana wa muntu (27)

    • Tshilejilu tshia mutshi wa mfigi (29-33)

    • Nushale batabale (34-36)

  • Yezu udi ulongesha mu ntempelo (37, 38)

21  Nunku pakabandulukaye, wakamona babanji bela mapa abu mu tushete* tua diela makuta.+  Pashishe wakamona mukaji mukamba mukuabu mukengi wela tukuta tukese tua binjanja tubidi tua mushinga mukese menemene,*+  ke yeye kuamba ne: “Bulelela ndi nnuambila ne: mukaji mukamba mupele eu mmuele bia bungi kupita mudibu bobu bonso bele.+  Bualu bonso aba mbele mapa abu a pa mutu, kadi yeye, nansha mudiye ukenga,* mmuele bionso bivuaye nabi bua kudidisha.”+  Pashishe, pavua bamue bantu bakula bua ntempelo, bamba muvuaye mulengeja ne mabue matambe buimpe ne bintu bivuabu balambule,+  wakamba ne: “Bua bintu binudi numona mpindieu ebi, matuku nealue ikalabu kabayi mua kushiya dibue pa mutu pa dikuabu, kabayi badibumbule.”+  Pashishe bakamuebeja, bamba ne: “Mulongeshi, malu aa neenzeke dîba kayi menemene, ne ntshimanyinu kayi tshialeja dîba didi malu aa ne bua kulua?”+  Wakamba ne: “Nudimuke bua kabanupambuishi,+ bualu bantu ba bungi nebalue mu dîna dianyi, bamba ne: ‘Meme ke yeye,’ kabidi ne: ‘Tshikondo tshine tshidi pabuipi.’ Kanubalondi to.+  Kabidi, panudi numvua bakula bua mvita ne bimvundu,* kanutshinyi to. Bualu malu aa adi ne bua kuanji kuenzeka, kadi nshikidilu kakulua diakamue to.”+ 10  Pashishe wakabambila ne: “Tshisamba netshiluishe tshisamba tshikuabu,+ bukalenge nebuluishe bukalenge bukuabu.+ 11  Buloba nebukanke bikole, ne biyole bia nzala ne bipupu bia masama nebienzeke ku muaba ne ku muaba;+ nekuikale malu adi akuatshisha buôwa ne bimanyinu binene mu diulu. 12  “Kadi kumpala kua malu aa onso kuenzeka, bantu nebanukuate, nebanukengeshe,+ nebanufile mu nsunagoga ne mu maloko. Nebaye nenu kumpala kua bakalenge ne banguvena bua dîna dianyi.+ 13  Malu aa neapeteshe mushindu wa nuenu kufila bumanyishi. 14  Nunku, nuikale badisuike mu mioyo yenu bua kubenga kulongolola kumpala kua dîba mushindu unuikala mua kudibingisha,+ 15  bualu nennupeshe mêyi ne meji ikala baluishi benu bonso pamue kabayi mua kutua tshiadi anyi kuela mpata.+ 16  Bualu bukuabu, nebanutungile* too ne kudi baledi benu, bana benu, balela benu ne balunda benu, ne nebashipe bamue ba kunudi,+ 17  ne bantu bonso nebanukine bua dîna dianyi.+ 18  Kadi nansha lusuki lumue lua ku mitu yenu kaluakujimina.+ 19  Nenulame mioyo* yenu bua dinanukila dienu.+ 20  “Kadi panudi numona Yelushalema munyunguluka kudi biluilu bia basalayi biase tshitudilu,+ nunku numanye ne: dibutuka diende ndisemene pabuipi.+ 21  Dîba adi badi mu Yudaya batuadije kunyemena ku mikuna,+ badi munkatshi muende bapatuke, ne badi mu misoko ya pa mpenga kababuedi munda muende, 22  bualu aa mmatuku adibu ne bua kukosa bilumbu biakane* bua malu onso adibu bafunde akumbane. 23  Diakabi bua bakaji bikala ne mafu ne bikala bamusha bana mu matuku au!+ Bualu nekuikale lutatu lunene pa buloba ne tshiji tshikole bua bantu aba. 24  Nebakuluke ku muele wa mvita mutue, nebaye nabu bakuatshibue mu bisamba bionso;+ bisamba* nebidiatakaje Yelushalema too ne padi bikondo bisungula bia bisamba* bikumbana.+ 25  “Kabidi, nekuikale bimanyinu mu dîba, mu ngondo ne mu mitoto,+ ne pa buloba nepikale dikengakana dia bisamba, kabiyi bimanye tshia kuenza bua dikungula dia mbuu ne divuanduluka diende. 26  Bantu nebafue bipuka bua buôwa ne dindila dia malu adi alua pa buloba budi bantu basombele, bualu nebanyukule makole a mu diulu. 27  Pashishe nebamone Muana wa muntu+ ulua mu ditutu ne bukole ne butumbi bunene.+ 28  Kadi padi malu aa atuadija kulua, nuimane tendee, nujule mitu muulu, bualu dipikudibua dienu didi dienda disemena pabuipi.” 29  Bua bualu abu wakabapesha tshilejilu ne: “Tangilayi bimpe mutshi wa mfigi ne mitshi mikuabu yonso.+ 30  Padiyi yela ntonga, nudi numona bualu ebu ne numanya ne: mpindieu muvu wa luya lukole* ukadi pabuipi. 31  Bia muomumue nuenu kabidi, panudi numona malu aa enzeka, numanye ne: Bukalenge bua Nzambi budi pabuipi. 32  Bulelela ndi nnuambila ne: tshipungu tshia bantu etshi katshiakupita nansha kakese too ne padi malu onso enzeka.+ 33  Diulu ne buloba nebipite, kadi mêyi anyi kaakupita nansha kakese.+ 34  “Kadi nudimuke bua mioyo yenu kayinemi bujitu ne budiavi ne bunuavi+ ne tunyinganyinga tua mu nsombelu,+ ne bua dituku adi kadilu diakamue kunudi mu tshimpitshimpi 35  bu buteyi.+ Bualu nedilue kudi bantu bonso badi basombele pa mutu pa buloba bujima. 36  Nunku, nushale batabale+ nusengelela Nzambi dîba dionso+ bua numanye mua kuepuka malu onso adi ne bua kulua aa, ne mua kuimana kumpala kua Muana wa muntu.”+ 37  Nunku, mu munya uvua ulongesha mu ntempelo, kadi butuku uvua upatuka, uya kusomba ku mukuna uvuabu babikila ne: Mukuna wa Olive. 38  Bantu bonso bavua balua kudiye mu dinda menemene mu ntempelo bua kumuteleja.

Note

Anyi “tulondo.”
Ku mua.: “lepitona ibidi.” Tang. Tshis. B14.
Anyi “mupele.”
Anyi “ndululu; buntomboji.”
Anyi “nebanufile.”
Anyi “Nenupete anyima.”
Anyi “mmatuku a disombuela.”
Anyi “bantu ba bisamba bia bende.”
Anyi “bantu ba bisamba bia bende.”
Anyi “été.”