Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Lumu luimpe lufunda kudi Luka 16:1-31

MALU ADI MU MUKANDA EU

  • Tshilejilu tshia mulami wa bintu udi kayi muakane (1-13)

    • ‘Muntu udi ne lulamatu mu bintu bikese menemene udi ne lulamatu mu bia bungi’ (10)

  • Mikenji ne Bukalenge bua Nzambi (14-18)

  • Tshilejilu tshia muntu mubanji ne Lazalo (19-31)

16  Pashishe, wakambila kabidi bayidi bende ne: “Muntu mubanji kampanda uvua ne mulami wa bintu* biende uvuabu babande muvuaye unyangakaja bintu biende.  Ke yeye kumubikila, kumuambila ne: ‘Mbualu kayi ebu bundi ngumvua buebe wewe? Mpesha luapolo lua mudimu webe wa bulami, bualu kuakulama kabidi nzubu eu nansha.’  Pashishe mulami wa bintu wakadiambila ne: ‘Nengenze tshinyi, bu mudi mfumuanyi unnyenga mudimu wa bulami? Tshiena ne bukole bukumbane bua kumbula nabu, ne ndi ne bundu bua kulomba ka pa luse.  Aaa! ndi mumanye tshingenza, bua padibu bangumbusha ku mudimu wa bulami, bantu bangakidile mu nzubu yabu.’  Nunku, wakabikila muntu yonso uvua ne dibanza dia mfumuende, kuambilaye wa kumpala ne: ‘Biudi ne bua kufuta mfumuanyi bidi bungi munyi?’  Wakandamuna ne: ‘Bipiminu* lukama bia mafuta a olive.’ Kumuambilaye ne: ‘Angata mukanda webe wa diumvuangana nawu, somba ne funda lukasa 50.’  Pashishe, wakambila mukuabu ne: ‘Mpindieu wewe, biudi ne bua kufuta bidi bungi munyi?’ Kuambaye ne: ‘Bipiminu binene lukama* bia ntete ya blé.’ Wakamuambila ne: ‘Angata mukanda webe wa diumvuangana nawu, funda 80.’  Nunku mfumuende wakela mulami wa bintu au kalumbandi, nansha muvuaye kayi muntu muakane, bua muvuaye muenze malu ne meji adi ambuluisha;* bualu bana ba mu ndongoluelu wa malu eu* badi ne meji adi ambuluisha kudi bena tshipungu tshiabu kupita bana ba butoke.+  “Kabidi, ndi nnuambila ne: nudikebele balunda ku diambuluisha dia biuma bidi kabiyi biakane,+ bua padibi bijika, bamone mua kunuakidila mu miaba ya kusombela ya tshiendelele.+ 10  Muntu udi ne lulamatu mu bintu bikese menemene, udi kabidi ne lulamatu mu bia bungi, ne muntu udi kayi muakane mu bintu bikese menemene kena kabidi muakane mu bia bungi to. 11  Nunku, binuikala kanuyi badileje bena lulamatu mu bualu bua biuma bidi kabiyi biakane, nnganyi wanupesha biuma bidi bilelela? 12  Ne binuikala kanuyi badileje bena lulamatu mu bualu bua bintu bia muntu mukuabu, nnganyi wanupesha tshintu?+ 13  Muena mudimu kena mua kuikala mupika wa bamfumu babidi to, bualu neakine umue ne neanange mukuabu, anyi nealamate umue ne neapetule mukuabu. Kanuena mua kuikala bapika ba Nzambi ne ba Biuma* to.”+ 14  Kadi Bafalese bavua banangi ba makuta, bavua bateleja malu onso aa, nunku bakatuadija kumubuidia.+ 15  Ke yeye kubambila ne: “Nuenu nudi bantu badi badiamba munudi bakane kumpala kua bantu,+ kadi Nzambi mmumanye mioyo yenu.+ Bualu tshidi bantu bamona bu tshibandile ntshintu tshia muengu ku mêsu kua Nzambi.+ 16  “Mikenji ne Baprofete bivuaku too ne ku Yone. Kubangila anu ku dîba adi, badi bamanyisha Bukalenge bua Nzambi bu lumu luimpe, ne bantu ba mishindu yonso badi babuipatshila.+ 17  Bushuwa, mbipepele bikole bua diulu ne buloba kujiminabi, kadi katupa kamue ka dileta dia mu Mikenji kakakupanga kukumbana nansha.+ 18  “Muntu yonso udi ushipa dibaka ne mukajende, usela mukuabu, udi wenda masandi, ne muntu yonso udi usela mukaji udi dibaka diende ne bayende difue udi wenda masandi.+ 19  “Kuvua muntu mubanji mukuabu uvua ne tshibidilu tshia kuvuala bilamba bikunzubile ne bia line, uvua usanka ku dituku ne ku dituku ne bintu bitambe buimpe. 20  Kadi bavua bateka mulombi wa ka pa luse mukuabu diende Lazalo ku tshiibi tshiende, muikale ne mputa mubidi mujima 21  ne uvua ujinga kukuta bintu bivua bimata ku mêsa a muntu mubanji. Eyowa, too ne mbua ivua ilua, ilaka mputa yende. 22  Kadi mu kupita kua matuku, mulombi wa ka pa luse au wakafua ne banjelu bakaya nende ku luseke lua Abalahama.* “Kabidi, muntu mubanji wakafua pende ne bakamujiika. 23  Pavuaye mu Lukita,* yeye kujula mêsu, pavuaye ukengakana, kumonaye Abalahama ku bule ne Lazalo ku luseke luende.* 24  Nunku wakela dîyi, kuambaye ne: ‘Tatu Abalahama, ngumvuila koku luse, tuma Lazalo bua atue lusongo lua munu wende mu mâyi, atalaje ludimi luanyi, bualu ndi mu dikenga mu kapia kadi kalakuka aka.’ 25  Kadi Abalahama wakamba ne: ‘Muananyi, vuluka ne: uvua mupete bintu biebe bionso bimpe pautshivua ne muoyo, kadi Lazalo yeye wakapeta bintu bibi. Kadi mpindieu, yeye udi usambibua muaba eu, kadi wewe udi mu dikenga. 26  Pa kumbusha malu onso aa, mbajadike lupongo lunene pankatshi petu nenu, bua bantu badi basue kumbuka muaba eu kuya kunudi kabapetshi mushindu wa kupita, anyi bantu kabamonyi mua kusambuka bumbuka aku bua kulua kutudi to.’ 27  Pashishe wakamba ne: ‘Bu mudibi nanku, ndi nkulomba, tatu, umutume ku nzubu kua tatuanyi, 28  bualu ndi ne bana betu batanu, bua amone mua kubamanyisha bimpe menemene bua bobu pabu kabalu mu muaba wa makenga eu to.’ 29  Kadi Abalahama wakamba ne: ‘Badi ne Mose ne Baprofete; babateleje.’+ 30  Ke yeye kuamba ne: ‘Tòo, kabiena nanku to, tatu Abalahama, kadi muntu wa ku bafue yeye muye kudibu, nebanyingalale bua mpekatu yabu.’ 31  Kadi wakamuambila ne: ‘Bobu kabayi bateleja Mose+ ne Baprofete, nansha muntu yeye mujuke ku lufu kakubitabujija to.’”

Note

Anyi “mulami wa nzubu.”
Anyi “bipiminu bia bata.” Bata uvua ubuela litre 22. Tang. Tshis. B14.
Anyi “Bipiminu bia kore lukama.” Kore uvua ubuela litre 220. Tang. Tshis. B14.
Anyi “muenze malu ne mayele; muenze malu ne budimu.”
Anyi “tshikondo etshi.” Tang. Diumv.
Anyi “Mamona.”
Ku mua.: “mu tshiadi tshia Abalahama.
Anyi “Hadese,” mmumue ne: lukita lua bukua bantu buonso. Tang. Diumv.
Ku mua.: “mu tshiadi tshiende.”