Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Mukanda mutumina bena Lomo 16:1-27

MALU ADI MU MUKANDA EU

  • Paulo umanyisha bua Foibe, muena mudimu (1, 2)

  • Mioyo kudi bena Kristo bena Lomo (3-16)

  • Didimuija bua matapuluka (17-20)

  • Mioyo ya kudi benzejanganyi ba mudimu ne Paulo (21-24)

  • Bualu busokoka bua tshijila bumanyike mpindieu (25-27)

16  Ndi nnumanyisha bua* Foibe, muanetu wa bakaji, udi muena mudimu wa mu tshisumbu tshia ku Kanekelea+  bua numuakidile mu Mukalenge mu mushindu udi muakanyine bansantu, ne bua numuambuluishe mu bionso bidiye mua kuikala nabi dijinga,+ bualu yeye pende ukadi muambuluishe bantu ba bungi, too ne meme muine.  Nungelele Pisika ne Akila+ benzejanganyi nanyi ba mudimu mu Kristo Yezu muoyo,  bobu bavua bambe kufila mioyo* yabu buanyi meme*+ ne ndi mbela tuasakidila, ki nganu meme nkayanyi to, kadi kabidi bisumbu bionso bia mu bisamba bikuabu.  Nuele kabidi tshisumbu tshidi mu nzubu muabu muoyo.+ Nuele munangibue Epaineto muoyo, yeye udi mamuma a kumpala a Kristo mu Asia.  Nuele Mariya udi munuenzele mudimu mukole muoyo.  Nuele balela banyi+ ne bena buloko nanyi, Andaloniko ne Yunia muoyo; bobu mbantu badi bamanyike bimpe kudi bapostolo ne bakadi mu buobumue ne Kristo matuku a bungi kumpita meme.  Nungelele Ampuliato, munangibue wanyi mu Mukalenge muoyo.  Nuele Ubano, muenzejanganyi netu wa mudimu mu Kristo, ne munangibue wanyi Staku muoyo. 10  Nuele Apele udi muanyishibue mu Kristo muoyo. Nuele ba mu nzubu mua Alistobulo muoyo. 11  Nuele mulela wanyi Helodio muoyo. Nuele ba mu nzubu mua Nâkiso badi mu Mukalenge muoyo. 12  Nuele Tufaina ne Tufoso, bantu bakaji badi benza mudimu mukole mu Mukalenge muoyo. Nuele munangibue wetu Pêsi muoyo, bualu muanetu wa bakaji eu mmuenze mudimu mukole mu Mukalenge. 13  Nuele Lufo, musungula mu Mukalenge, ne mamuende udi mamuanyi kabidi muoyo. 14  Nuele Asunkulito, Filegone, Hême, Pateloba, Hêma ne bana betu badibu nabu muoyo. 15  Nuele Filologo ne Yulia, Neleo ne muanabu wa bakaji, ne Olimpa ne bansantu bonso badibu nabu muoyo. 16  Nuelangane muoyo ne dituangana dia mishiku dia tshijila. Bisumbu bionso bia Kristo bidi binuela muoyo. 17  Mpindieu bana betu, ndi nnusengelela bua kudimukila bantu badi bakebesha matapuluka ne malu adi alenduishangana adi abengangana ne dilongesha dinudi balonge, ne nubepuke.+ 18  Bualu bantu ba mushindu eu ki mbapika ba Mukalenge wetu Kristo to, kadi mbapika ba majinga* abu, ne badi basesuisha mioyo ya bantu badi kabayi bamanye bualu ne mêyi mashême ne miyuki ya kulabidilangana nayi. 19  Ditumikila dienu ndimanyike kudi bantu bonso, nunku, ndi nsanka bua bualu buenu. Tshidibi ndi musue bua nuikale bena meji mu malu mimpe, kadi kanuyi ne bualu mu malu mabi.+ 20  Ku luende luseke, Nzambi udi ufila ditalala neazaze Satana+ muinshi mua makasa enu mu katupa kîpi emu. Ngasa wa Mukalenge wetu Yezu ikale nenu. 21  Timote, muenzejanganyi nanyi wa mudimu udi unuela muoyo, ne Lukio, ne Yasona ne Sosipato, balela banyi,+ badi banuela pabu muoyo. 22  Meme Têtio udi mufunde mukanda eu ndi nnuela muoyo mu Mukalenge. 23  Gayo+ udi mungakidile kuende ne utu wakidila tshisumbu tshijima udi unuela muoyo. Elasto mulami wa tshibutshilu* wa mu tshimenga udi unuela muoyo, ne muanabu Kuâto udi pende unuela muoyo. 24 * —— 25  Mpindieu kudi Yeye udi mua kunukolesha bilondeshile lumu luimpe lundi ngamba ne diyisha dia Yezu Kristo, bilondeshile dibuluibua dia bualu busokoka bua tshijila+ buvuabu balame mu tshimuma munkatshi mua bikondo bile menemene 26  kadi budi bumueneshibue* mpindieu ne bumanyishibue ku diambuluisha dia Mifundu ya baprofete munkatshi mua bisamba bikuabu bionso bilondeshile dîyi dituma dia Nzambi wa tshiendelele bua kusaka bisamba ku ditumikila mu ditabuja; 27  kudi Nzambi udi nkayende muena meji,+ butumbi buikale kudiye ku butuangaji bua Yezu Kristo bua kashidi. Amen.

Note

Anyi “nnuanyishila.”
Ku mua.: “nshingu.”
Anyi “bua anyima wanyi.”
Anyi “mafu.”
Anyi “mulami wa bintu.”
Anyi “bubuluibue.”