Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda mutumina bena Lomo 15:1-33

MALU ADI MU MUKANDA EU

  • Nuakidilangane bu muvua Kristo muenze (1-13)

  • Paulo, muena mudimu wa bisamba bikuabu (14-21)

  • Paulo ulongolola ngendu yende (22-33)

15  Kadi tuetu badi bakole, tudi ne bua kuambula matekete a badi kabayi bakole,+ katuyi tudisankisha to.+  Yonso wa kutudi asankishe muinende bua diakalenga diende, bua kumukolesha.+  Bualu nansha Kristo kakadisankisha to,+ kadi anu mudibu bafunde ne: “Bipendu bia badi bakupenda, mbimmatshile pambidi.”+  Bualu malu onso avuabu bafunde kale bavua baafunde bua kutulongesha,+ bua tupete ditekemena+ ku diambuluisha dia dinanukila+ dietu ne dia busambi bua mu Mifundu.  Mpindieu Nzambi udi ufila bukole bua kunanukila ne busambi anuambuluishe bua nuikale munkatshi muenu ne meji a buena avua Kristo Yezu nawu,  bua nutumbishe Nzambi ne Tatu wa Mukalenge wetu Yezu Kristo mu buobumue+ ne dîyi dimue.*  Nunku nuakidilangane bimpe*+ anu muvua Kristo munuakidile bimpe+ bua butumbi bua Nzambi.  Bualu ndi nnuambila ne: Kristo wakalua muena mudimu wa batengula+ bua kuleja mudi Nzambi wamba bulelela, bua kujadika milayi ivua Nzambi mulaye bankambua babu,+  ne bua bisamba bikuabu bitumbishe Nzambi bua luse luende.+ Anu bu mudibu bafunde ne: “Ke bualu kayi nenkumanyishe patoke munkatshi mua bisamba bikuabu ne nengimbe misambu ya kutumbisha nayi dîna diebe.”+ 10  Udi wamba kabidi ne: “Nuenu bisamba, sankayi pamue ne tshisamba tshiende.”+ 11  Udi wamba kabidi ne: “Tumbishayi Yehowa,* nuenu bisamba bionso, ne bantu bonso bamutumbishe.”+ 12  Yeshaya udi wamba kabidi ne: “Nekuikale muji wa Yishai,+ muntu wajuka bua kukokesha bisamba;+ bisamba nebitekemene kudiye.”+ 13  Nzambi udi ufila ditekemena anuwuje tente ne disanka dionso ne ditalala dionso bualu nudi numueyemena, bua ditekemena dienu divule* ku bukole bua nyuma muimpe.*+ 14  Mpindieu bana betu, meme muine ndi mutuishibue bua bualu buenu ne: nuenu nudi penu buwule tente ne buimpe, buwujibue ne dimanya dionso, ne nudi mua kudimuijangana.* 15  Kadi ndi munufundile amue malu patoke menemene bua kunuvuluija kabidi. Ndi muenze nunku bua bualu bua ngasa uvua Nzambi mumpeshe 16  bua meme kuikala muena mudimu wa Kristo Yezu kudi bantu mu bisamba bikuabu.+ Ndi ngenza mudimu wa tshijila wa lumu luimpe lua Nzambi+ bua bisamba ebi bikale mulambu udi usankisha, mujidila ne nyuma muimpe.* 17  Nunku ndi ne bualu bua kusankila mu Kristo Yezu bua malu adi atangila Nzambi. 18  Bualu tshiena mua kuakula bua bualu bukuabu, anu bua malu adi Kristo muenze ku butuangaji buanyi bua bisamba bikuabu bikale ne ditumikila ku diambuluisha dia dîyi dianyi ne bienzedi bianyi, 19  ne bukole bua bimanyinu ne malu a kukema,*+ ne bukole bua nyuma wa Nzambi, bidi bimfikishe ku diyisha lumu luimpe lua Kristo bikole menemene+ kumbukila ku Yelushalema, kunyunguluka kufika too ne ku Iluliko. 20  Bulelela, mu mushindu eu mvua mudifundile tshipatshila tshia kubenga kuamba lumu luimpe muaba ukavuabu bamane kumanyisha dîna dia Kristo, bua kubenga kuibakila pa tshishimikidi tshia muntu mukuabu; 21  kadi anu bu mudibu bafunde ne: “Bantu bavua kabayi bapete lumu luende nebamone, ne bantu badi kabayi bumvue nebajingulule.”+ 22  Ke bualu kayi mvua kabidi mupangile misangu ya bungi bua kulua kunudi. 23  Kadi mpindieu tshiena kabidi ne muaba undi tshiyi muyishe mu bitupa ebi to, ne kukadi bidimu bia bungi* bindi ne dijinga dikole dia kulua kunudi. 24  Ke bualu kayi, pandi ngenza luendu mutangile ku Espanye, ndi mutekemene ne: nennumone ne nenunshindikije kuntu aku tshitupa tshia njila pangikala muanji kusanka mutantshi munkatshi muenu. 25  Kadi mpindieu nkadi pa kuya ku Yelushalema bua kukuatshilaku bansantu mudimu.+ 26  Bualu bena ku Makedonia ne ku Akaya bavua ne disanka dia kufila bintu biabu bu dipa kudi bapele badi munkatshi mua bansantu ba ku Yelushalema.+ 27  Bulelela, bavua ne disanka dia kuenza nanku, ne bavua bushuwa bena dibanza kudibu; bualu bikala bisamba bikuabu biangate pabi bintu biabu bia mu nyuma, biobi pabi bidi ne dibanza dia kubambuluisha ne bintu biabu bia ku mubidi.+ 28  Nunku pangikala mujikije bualu ebu ne mubafikishile dipa* edi bimpe, nempitshile kuenu bua kuya ku Espanye. 29  Bualu bukuabu, ndi mumanye ne: pangalua kunudi, nendue ne mabenesha a bungi a kudi Kristo. 30  Mpindieu bana betu, ndi nnusengelela ku butuangaji bua Mukalenge wetu Yezu Kristo ne ku butuangaji bua dinanga dia nyuma bua nudifile nanyi bikole mu masambila kudi Nzambi bua bualu buanyi,+ 31  bua mpanduke+ mu bianza bia bena mu Yudaya badi kabayi bena kuitabuja ne bua diambuluisha dindi ntuadila badi ku Yelushalema dianyishibue kudi bansantu,+ 32  bua ne: ku disua dia Nzambi ndue kunudi ne disanka ne nkoleshibue pamue nenu. 33  Nzambi udi ufila ditalala ikale nenu bonso.+ Amen.

Note

Ku mua.: “mukana mumue.”
Anyi “nuitabangane.”
Anyi “diyile ne panshi.”
Anyi “spiritu munsantu; nyuma wa tshijila.” Tang. Diumv.
Anyi “kulongeshangana.”
Anyi “spiritu munsantu; nyuma wa tshijila.” Tang. Diumv.
Anyi “bintu bidi bileja bualu buenzeka matuku atshilualua.”
Anyi pamuapa: “ndambu.”
Ku mua.: “dimuma.”