Ndaku munda

Ndaku ku tshikebelu

Bantemu ba Yehowa

Sungula muakulu Tshiluba

Hoshea 1:1-11

MALU ADI MU MUKANDA EU

  • Mukaji wa Hoshea ne bana badiye ulela (1-9)

    • Yizelele (4), Lo-luhama (6), ne Lo-ami (9)

  • Ditekemena dia dipingajibua kabidi ne buobumue (10, 11)

1  Dîyi dia Yehowa diakalua kudi Hoshea* muana wa Bêli mu matuku a Uziya,+ Yotama,+ Ahaza,+ ne Hezikiya,+ bakalenge ba Yuda,+ ne mu matuku a Yalobama+ muana wa Yoasha,+ mukalenge wa Isalele.  Pakatuadija Yehowa kuamba dîyi diende ku butuangaji bua Hoshea, Yehowa wakambila Hoshea ne: “Ndaku, usele mukaji wa ndumba* ne ulele bana ba mu bundumba,* bualu bua bundumba* buloba mbulekele kulonda Yehowa bulekeelamu.”+  Nunku, wakaya kusela Gomê muana wa bakaji wa Dibelayama, yeye kuimita, kulelaye muana wa balume.  Pashishe Yehowa wakamuambila ne: “Muinyika dîna ne: Yizelele,* bualu mu katupa kakese emu nendumbuluishe nzubu wa Yehu+ bua bienzedi bia diela mashi panshi bia Yizelele, ne nentuishe bukokeshi bua nzubu wa Isalele ku ndekelu.+  Dituku adi nentshibule buta bua mikete bua Isalele mu Tshibandabanda* tshia Yizelele.”  Yeye wakimita kabidi, kulelaye muana wa bakaji. Pashishe, Yeye wakamuambila ne: “Muinyika dîna ne: Lo-luhama,* bualu tshiakumvuila kabidi nzubu wa Isalele luse to,+ bualu meme nembipate bulelela.+  Kadi nengumvuile nzubu wa Yuda luse,+ ne nembapandishe ku diambuluisha dia Yehowa Nzambi wabu;+ tshiakubapandisha ku diambuluisha dia buta bua mikete, anyi dia muele wa mvita, anyi dia mvita, anyi dia tubalu, anyi dia bendeshi ba tubalu to.”+  Yeye mumane kulekesha Lo-luhama dibele, wakimita kabidi, kulelaye muana wa balume.  Pashishe, Yeye wakamba ne: “Muinyika dîna ne: Lo-ami,* bualu nuenu kanuena bantu banyi ne meme tshiakuikala wenu to. 10  “Kadi bungi bua bantu* ba Isalele nebuikale bu nsenga ya ku mbuu, idibu kabayi mua kupima anyi kubala.+ Muaba uvuabu babambidile ne: ‘Kanuena tshisamba tshianyi,’+ nebabambile ne: ‘Bana ba Nzambi wa muoyo.’+ 11  Nunku, nebasangishe bantu ba mu Yuda ne ba mu Isalele pamue mu buobumue+ ne nebadisunguile mfumu umue ne nebapatuke mu buloba, bualu dituku dia Yizelele nedikale dinene.+

Note

Tshikepeshilu tshia dîna dia Hoshaya didi diumvuija ne: “Mupandisha kudi Yah; Yah Mmupandishe.”
Anyi “masandi; tshiendenda.”
Anyi “masandi; tshiendenda.”
Anyi “masandi; tshiendenda.”
Diumvuija: “Nzambi neakune dimiinu.”
Anyi “Tshibatabata.”
Diumvuija: “Udibu kabayi bumvuile luse.”
Diumvuija: “Kabena bantu banyi.”
Ku mua.: “bana.”