Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Genese 6:1-22

MALU ADI MU MUKANDA EU

  • Bana ba balume ba Nzambi badi basela bakaji pa buloba (1-3)

  • Diledibua dia Banefilima (4)

  • Malu mabi a bantu adi abungamija Yehowa (5-8)

  • Badi bapesha Noa mudimu wa kuenza buatu (9-16)

  • Nzambi udi umanyisha dilua dia Mvula wa kabutu (17-22)

6  Pakatuadija bantu kuvulangana bikole pa buloba ne kulela bana ba bakaji,  bana ba balume ba Nzambi+ mulelela* bakatuadija kumona ne: bana ba bakaji ba bantu bavua bimpe kumona. Ke kutuadijabu kudiangatshila bonso bavuabu basungula bu bakaji babu.  Nunku Yehowa wakamba ne: “Nyuma wanyi kakuikala kabidi lutulu ne muntu tshiendelele,+ bualu udi anu muntu.* Nunku matuku ende neafike ku bidimu 120.”+  Mu matuku au ne mu akalonda kuvua Banefilima* pa buloba. Tshikondo atshi, bana ba balume ba Nzambi mulelela bakatungunuka ne kusangila ne bana ba bakaji ba bantu, bobu kubalelela bana ba balume. Bavua bantu ba bukole bua bungi ba bikondo bia kale, bantu bende lumu.  Nunku Yehowa wakamona ne: bubi bua muntu buvua buvule pa buloba, kumonaye kabidi ne: meji onso avuaye wela mu muoyo wende avua anu mabi misangu yonso.+  Yehowa wakanyingalala* bua muvuaye muenze bantu pa buloba, ne muoyo wende wakabungama.*+  Ke Yehowa kuamba ne: “Bantu bamvua mufuke, ndi mbajimija pa buloba, muntu pamue ne bimuna, ne nyama idi idikoka panshi, ne bifukibua bidi bibuuka muulu, bualu ndi nyingalala bua mumvua mubifuke.”  Kadi Noa wakatuta diakalengele ku mêsu kua Yehowa.  Eku nkulondolola kua malu a Noa. Noa uvua muntu muakane.+ Wakadileja kayi kalema* munkatshi mua bantu ba tshikondo tshiende.* Noa wakenda ne Nzambi mulelela.+ 10  Mu kupita kua matuku Noa wakalela bana ba balume basatu: Shema, Hama, ne Yafete.+ 11  Kadi buloba bukavua bunyanguke ku mêsu kua Nzambi mulelela, ne buloba buvua buwule ne tshikisu. 12  Nzambi wakatangila buloba, buvua bunyanguke;+ bantu bonso* bavua banyange njila wabu pa buloba.+ 13  Pashishe Nzambi wakambila Noa ne: “Ndi mupangadije bua kubutula bantu bonso, bualu buloba mbuwule ne tshikisu bua bualu buabu, nunku ndi mbanyangakaja pamue ne buloba.+ 14  Udienzele buatu* ne mutshi wa budimbu.+ Neukosolole buatu munda muabu ne neubulabe kabudimbu*+ munda ne pambelu. 15  Neubuenze mushindu eu: Bule bua buatu nebuikale nkubita* 300, butshiama buabu nkubita 50, ne butumbuke nkubita 30. 16  Newenze dididishi bua kutokesha* mu buatu, nkubita umue kumbukila kuulu. Wenze tshibuelelu mu luseke lua buatu,+ ne ubuenze ne tshisasa tshia panshi, tshisasa tshibidi ne tshisasa tshisatu. 17  “Meme nentume mvula wa bungi+ pa buloba bua kubutula bintu bionso bidi ne mupuya wa muoyo* bidi muinshi mua diulu. Tshintu tshionso tshidi pa buloba netshijimine.+ 18  Ndi njadika nebe tshipungidi tshianyi, ne udi ne bua kubuela mu buatu, wewe ne bana bebe ba balume ne mukajebe ne bakaji ba bana bebe.+ 19  Neubueje bifukibua bibidi bia bintu bia mishindu yonso bidi ne muoyo+ mu buatu bua kubilama ne muoyo pamue nebe, tshilume ne tshikaji:+ 20  bifukibua bidi bibuuka bilondeshile mishindu yabi, bimuna bilondeshile mishindu yabi, nyama yonso idi idikoka panshi bilondeshile mishindu yayi, bibidi bia ku bionso ebi nebibuele muaba uudi, bua kubilama ne muoyo.+ 21  Kadi wewe, udi ne bua kusangisha bintu bia kudia bia mishindu yonso,+ ubuelamu nabi, bua bikale biakudia buebe wewe ne bua nyama.” 22  Noa wakenza malu bilondeshile bionso bivua Nzambi mumutumine dîyi bua kuenza. Wakenza amu nanku.+

Note

Ngakuilu wa mu tshiena Ebelu udi uleja banjelu badi bana ba Nzambi.
Anyi pamuapa: “bualu udi wenza malu bilondeshile mubidi.”
Diumvuija pamuapa: “Bakuludianganyi,” mmumue ne: bantu badi bakulula bakuabu. Tang. Diumv.
Anyi “wakumvua bibi.”
Anyi “muoyo wende wakamusama.”
Anyi “kayi kubandibua.”
Ku mua.: “bena mu bipungu biende.”
Ku mua.: “misunyi yonso.”
Ku mua.: “mushete”; buatu bunene.
Anyi “budimbu.”
Nkubita uvua ne santimetre 44,5. Tang. Tshis. B14.
Tshiena Ebelu: tsohar. Bilondeshile lungenyi lukuabu, tsohar udi uleja musaka muiname bule bua nkubita umue, pamutu pa kuleja disoso didi dibueja butoke anyi dididishi.
Anyi “nyuma wa muoyo.”