Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda mutumina bena Filipoyi 4:1-23

MALU ADI MU MUKANDA EU

  • Buobumue, disanka, meji mimpe (1-9)

    • Kanusamishi mutu bua tshintu nansha tshimue (6, 7)

  • Dianyisha bua mapa a bena Filipoyi (10-20)

  • Dielangana muoyo dia ndekelu (21-23)

4  Nunku bana betu bandi munange ne njinga bikole, disanka dianyi ne tshifulu tshianyi tshia butumbi,+ nushale bashindame+ mushindu eu mu Mukalenge, bananga banyi.  Ndi nsengelela Evodi ne ndi nsengelela Sentishe bua bikale ne meji amue mu Mukalenge.+  Eyowa, ndi nkulomba wewe pebe, bu muudi muenzejanganyi nanyi wa mudimu wa bushuwa,* bua utungunuke ne kuambuluisha bakaji aba badi batate* pamue nanyi bua lumu luimpe, pamue ne Kulemento ne benzejanganyi nanyi ba mudimu bakuabu bonso badi ne mêna abu mu mukanda wa muoyo.+  Ikalayi nusanka mu Mukalenge misangu yonso. Nengambe kabidi ne: Sankayi!+  Enzayi bua bantu bonso bamanye munudi kanuyi bena malu makole.+ Mukalenge udi pabuipi.  Kanusamishi mutu bua tshintu nansha tshimue,+ kadi mu malu onso, ku diambuluisha dia disambila ne disengelela pamue ne disakidila, numanyishe Nzambi milombu yenu;+  ne ditalala+ dia Nzambi didi dipite dijingulula dionso dia malu nedilame mioyo yenu+ ne bieledi bienu bia meji* ku butuangaji bua Kristo Yezu.  Ndekelu wa bionso bana betu, malu onso adi malelela, malu onso adibu ne bua kuditatshishila bikole, malu onso adi makane, malu onso adi makezuke,* malu onso adibu ne bua kunanga, malu onso adibu bakula bimpe bua bualu buawu, malu onso adi mimpe, ne malu onso adibu ne bua kutumbisha, tungunukayi ne kuelela malu aa meji.*+  Malu anudi balonge ne bitabe kabidi ne bumvue ne bamone kundi, nuenze malu aa,+ ne Nzambi wa ditalala neikale nenu. 10  Ndi nsanka bikole mu Mukalenge bua munudi mpindieu batuadijilule ndekelu wa bionso kungelela meji.+ Nansha munuvua nungelela meji, nuvua bapangile mpunga wa kuleja bualu ebu. 11  Tshiena ngamba nunku bualu ndi nkengela bintu to, bualu ndi mulonge mua kudikumbajila majinga anyi* nansha meme mu nsombelu kayi.+ 12  Ndi mumanye mua kuikala ne bintu bikese+ ne mua kuikala ne bintu bia bungi. Mu malu onso ne mu nsombelu yonso ndi mulonge tshia kuenza pandi mukute ne pandi ne nzala, ne tshia kuenza pandi ne bintu bia bungi ne pandi tshiyi nabi. 13  Bua malu onso ndi ne bukole ku diambuluisha dia yeye udi umpesha bukole.+ 14  Nansha nanku, nuvua benze bimpe panuvua bangambuluishe mu dikenga dianyi. 15  Mu bulelela, nuenu bena Filipoyi nudi bamanye penu ne: panyima pa nuenu bamane kumvua lumu luimpe musangu wa kumpala pamvua mumbuke ku Makedonia, kakuvua tshisumbu nansha tshimue tshivua tshidisange kundi mu tshilumbu tshia kupeshangana bintu ne kuangata, anu nuenu nkayenu;+ 16  bualu pamvua ku Tesalonike, nuvua bantumine bintu bua majinga anyi, ki nganu musangu umue to, kadi misangu ibidi. 17  Ki mbua ne: ndi nkeba dipa, kadi ndi nkeba dimuma didi dikumbajija bintu bienu. 18  Kadi ndi ne bintu bionso bindi nabi dijinga, bipite mene bungi. Ndi ne bintu bia bungi mpindieu undi mupete bintu binuvua bantumine kudi Epafodito,+ bintu bia dipembu dimpe,+ mulambu muanyishibue, udi usankisha Nzambi. 19  Ku luende luseke, Nzambi wanyi neanukumbajile majinga enu onso+ bilondeshile bubanji buende mu butumbi ku butuangaji bua Kristo Yezu. 20  Mpindieu butumbi buikale kudi Nzambi wetu ne Tatu kashidi ne tshiendelele. Amen. 21  Nungelele bansantu bonso badi mu buobumue ne Kristo Yezu muoyo. Bana betu badi nanyi badi banuela muoyo. 22  Bansantu bonso, kadi nangananga ba mu nzubu mua Kaisa,+ badi banuela muoyo. 23  Ngasa wa Mukalenge Yezu Kristo ikale ne lungenyi lunudi nuleja.

Note

Ku mua.: “muikale ku mutshi wa tshikokedi umue nanyi mu bulelela.”
Anyi “badi baluangane bikole.”
Anyi “lungenyi luenu; meji enu.”
Anyi “adi a bunonoke.”
Anyi “kutuma meji ku malu aa; kuelangana meji bua malu aa.”
Anyi “kusanka ne bindi nabi.”