Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Dutelonome 27:1-26

MALU ADI MU MUKANDA EU

  • Difunda Mikenji pa mabue (1-10)

  • Ku mukuna wa Ebala ne wa Gelizima (11-14)

  • Diambulula milawu (15-26)

27  Pashishe Mose ne bakulu ba mu Isalele bakatumina bantu dîyi bamba ne: “Nulame mêyi onso andi nnuambila lelu.  Dituku dinuasabuka Yadene bua kubuela mu buloba budi Yehowa Nzambi webe ukupesha, neudimanyikile mabue manene ne neuashinguile.*+  Pashishe neufundapu mêyi onso a Mikenji eyi pawasabuka dia muamua, bua ubuele mu buloba budi Yehowa Nzambi webe ukupesha, buloba budi ne mabele ne buitshi bia bungi, anu mudi Yehowa Nzambi wa bankambua bebe mukulaye.+  Panudi nusabuka Yadene, nenuimanyike mabue aa ku mukuna wa Ebala+ ne nenuashinguile,* anu mundi nnutumina dîyi lelu bua kuenza.  Udi kabidi ne bua kuibakila Yehowa Nzambi webe tshioshelu kuntu aku, tshioshelu tshia mabue. Kuena ne bua kuatapa ne bintu bia tshiamu to.+  Newibakile Yehowa Nzambi webe tshioshelu ne mabue majima ne neulambulapu Yehowa Nzambi webe milambu ya kuosha.  Neufile milambu ya diumvuangana,+ neuyidiile kuntu aku,+ ne neusanke kumpala kua Yehowa Nzambi webe.+  Pashishe ufunde mêyi onso a Mikenji eyi mamueneke bimpe pa mabue au.”+  Pashishe Mose ne bakuidi bena Lewi bakakula ne bena Isalele bonso, bamba ne: “Wewe Isalele shala mupuwe, uteleje. Lelu eu udi mulue tshisamba tshia Yehowa Nzambi webe.+ 10  Udi ne bua kuteleja dîyi dia Yehowa Nzambi webe ne kutumikila mêyi ende+ ne mikenji yende bindi nkutumina dîyi lelu bua kuenza.” 11  Dituku adi Mose wakatumina bantu dîyi wamba ne: 12  “Panuasabuka Yadene, bisa bidi bilonda ebi nebimane ku mukuna wa Gelizima+ bua kubenesha bantu: tshisa tshia Simeona, tshia Lewi, tshia Yuda, tshia Yisakâ, tshia Jozefe, ne tshia Benyamina. 13  Bisa bidi bilonda ebi nebimane ku mukuna wa Ebala+ bua kuela mulawu: tshisa tshia Lubena, tshia Gada, tshia Ashê, tshia Zebulona, tshia Dana, ne tshia Nafatale. 14  Bena Lewi nebambile muntu yonso wa mu Isalele ne dîyi dikole ne:+ 15  “‘Mulawu wikale kudi muntu udi wenza lupingu lusonga+ anyi lupingu lua tshiamu,*+ ne udi mulusokoke, bualu ntshintu tshibi kumpala kua Yehowa,+ mmudimu wa ku bianza bia nsenda.’* (Bantu bonso nebandamune, bamba ne: ‘Amen!’*) 16  “‘Mulawu wikale kudi muntu udi upetula tatuende anyi mamuende.’+ (Bantu bonso nebambe ne: ‘Amen!’) 17  “‘Mulawu wikale kudi muntu udi utentemuna tshimanyinu tshia mukalu wa mukuende.’+ (Bantu bonso nebambe ne: ‘Amen!’) 18  “‘Mulawu wikale kudi muntu udi upambuisha mpofu mu njila wende.’+ (Bantu bonso nebambe ne: ‘Amen!’) 19  “‘Mulawu wikale kudi muntu udi ukonyangaja tshilumbu+ tshia muntu udi musombe buenyi, tshia muana udi mufuishe tatuende,* anyi tshia mukaji mukamba.’+ (Bantu bonso nebambe ne: ‘Amen!’) 20  “‘Mulawu wikale kudi muntu udi ulala ne mukaji wa tatuende, bualu mmufuishe tatuende bundu.’*+ (Bantu bonso nebambe ne: ‘Amen!’) 21  “‘Mulawu wikale kudi muntu udi ulala ne nyama kayi yonso.’+ (Bantu bonso nebambe ne: ‘Amen!’) 22  “‘Mulawu wikale kudi muntu udi ulala ne muanabu wa bakaji, muana wa tatuende anyi muana wa mamuende.’+ (Bantu bonso nebambe ne: ‘Amen!’) 23  “‘Mulawu wikale kudi muntu udi ulala ne mamuende muenu.’+ (Bantu bonso nebambe ne: ‘Amen!’) 24  “‘Mulawu wikale kudi muntu udi walamina mukuende ne umushipa.’+ (Bantu bonso nebambe ne: ‘Amen!’) 25  “‘Mulawu wikale kudi muntu udi witaba bua bamukose mishiku bua kushipa muntu udi kayi ne bualu.’*+ (Bantu bonso nebambe ne: ‘Amen!’) 26  “‘Mulawu wikale kudi muntu wabenga kulama mêyi a Mikenji eyi bua kuatumikila.’+ (Bantu bonso nebambe ne: ‘Amen!’)

Note

Anyi “neualabe lupemba.”
Anyi “nenualabe lupemba.”
Anyi “lupingu lua tshiamu tshiengulula.”
Anyi “wa muntu udi wenza mudimu ne mitshi ne biamu.”
Anyi “Bikale nanku!”
Anyi “muana wa nshiya.”
Ku mua.: “mmubulule tshilamba tshia tatuende.”
Anyi “anyima wa mashi adi kaayi ne bualu.”