Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Dutelonome 10:1-22

MALU ADI MU MUKANDA EU

  • Dienzulula mabue abidi (1-11)

  • Tshidi Yehowa ulomba (12-22)

    • Tshina Yehowa, umunange (12)

10  “Tshikondo atshi Yehowa wakangambila ne: ‘Disongela mabue abidi a buena a kumpala au,+ ubande kundi ku mukuna; udi ne bua kudienzela kabidi mushete wa mabaya.  Nemfunde pa mabue au mêyi avua pa mabue a kumpala auvua mutayishe au, ne udi ne bua kuateka mu mushete.’  Nunku ngakenza mushete wa mabaya a mutshi wa musese, meme kusonga mabue abidi a buena a kumpala, meme kubanda ku mukuna ne mabue abidi au mu tshianza tshianyi.+  Pashishe yeye kufunda pa mabue au mêyi avuaye mufunde kumpala,+ Mêyi Dikumi,*+ avua Yehowa munuambile ku mukuna mu kapia+ dituku dia disangisha;*+ ne Yehowa wakaampesha.  Nunku ngakakudimuka, meme kutuluka ku mukuna,+ kuteka mabue mu mushete umvua muenze, muaba udiwu anu muvua Yehowa muntumine dîyi bua kuenza.  “Pashishe bena Isalele bakumbuka ku Belota Bene-yâkana batangile ku Mosela. Alona wakafuila kuntu aku ne bakamujiika;+ muanende Eleazâ wakabanga kuenza mudimu wa buakuidi pa muaba wende.+  Bakumbuka kuntu aku batangile ku Gudugoda, bakumbuka kabidi ku Gudugoda batangile ku Yotebata,+ buloba budi ne tusulu tua mâyi* tua bungi.  “Tshikondo atshi Yehowa wakateka tshisa tshia Lewi+ ku luseke bua kuambula mushete wa tshipungidi tshia Yehowa,+ bua kuimana kumpala kua Yehowa bua kumuenzela mudimu, ne bua kubenesha bantu mu dîna diende,+ anu mudibu benza too ne lelu eu.  Ke bualu kayi Lewi kena ne tshiende tshitupa anyi bumpianyi pamue ne bana babu. Yehowa ke bumpianyi buende, anu muvua Yehowa Nzambi webe mumuambile.+ 10  Ngakashala ku mukuna meme nkayanyi anu bu musangu wa kumpala, matuku 40, munya ne butuku,+ ne Yehowa wakanteleja kabidi musangu au.+ Yehowa kavua musue kukubutula to. 11  Nunku Yehowa wakangambila ne: ‘Pita kumpala kua bantu aba, ne udilongolole bua kuya, bua babuele ne bangate buloba bumvua muditshipe kudi bankambua babu bua kubapesha.’+ 12  “Mpindieu, wewe Isalele, Yehowa Nzambi webe udi ukulomba tshinyi?+ Udi ukulomba anu bualu ebu: kutshina Yehowa Nzambi webe,+ kuendela mu njila yende yonso,+ kumunanga, kuenzela Yehowa Nzambi webe mudimu ne muoyo webe wonso ne anyima* webe yonso,+ 13  ne kutumikila mêyi a Yehowa ne mikenji yende mifunda bindi nkutumina dîyi lelu eu bua kuenza bua diakalenga diebe wewe.+ 14  Mona, diulu, nansha diulu dia mu diulu,* ne buloba ne bionso bidipu mbia Yehowa.+ 15  Kadi Yehowa uvua musemene pabuipi ne bankambua benu nkayabu ne mubaleje dinanga diende, ne mmunusungule nuenu, bana babu,+ munkatshi mua bisamba bionso, anu bu munudi lelu eu. 16  Mpindieu nudi ne bua kulengeja* mioyo yenu+ ne kulekela kuikala ne tshitunu* nunku.+ 17  Bualu Yehowa Nzambi wenu udi Nzambi wa banzambi+ ne Mukalenge wa bakalenge, Nzambi munene, wa bukole, ne wa kutshina, udi kayi wenzela muntu nansha umue malu ne kansungansunga+ ne udi kayi witaba dikosa mishiku. 18  Udi ulumbuluila muana udi mufuishe tatuende* ne mukaji mukamba,+ ne mmunange muntu udi musombe buenyi,+ umupesha biakudia ne bia kuvuala. 19  Nuenu penu nudi ne bua kunanga muntu udi musombe buenyi, bualu nuvua penu basombe buenyi mu buloba bua Ejipitu.+ 20  “Yehowa Nzambi webe ke uudi ne bua kutshina, yeye ke uudi ne bua kuenzela mudimu,+ yeye ke uudi ne bua kulamata, ne mu dîna diende ke muudi ne bua kuditshipa. 21  Yeye nkayende ke uudi ne bua kutumbisha.+ Yeye udi Nzambi webe udi mukuenzele malu manene ne adi akemesha onso aa adi mêsu ebe madimuene.+ 22  Bankambua bebe bavua bapueke mu Ejipitu bantu* 70,+ kadi mpindieu Yehowa Nzambi webe mmukuvuije bungi bu bua mitoto ya mu diulu.+

Note

Anyi “Mikenji Dikumi.”
Anyi “tshisumbu.”
Anyi “tusulu tua mâyi tua tshilonda nkoka.”
Tang. Diumv.
Anyi “diulu dia muulu menemene.”
Ku mua.: “kutengula musoso wa.”
Ku mua.: “ne kanukoleshi kabidi nshingu yenu.”
Anyi “muana wa nshiya.”
Anyi “anyima.”