Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Balumbuluishi 14:1-20

MALU ADI MU MUKANDA EU

  • Mulumbuluishi Shimishona ukeba mukaji muena Peleshete (1-4)

  • Shimishona udi ushipa ntambue ku nyuma wa Yehowa (5-9)

  • Kasumuinu ka Shimishona mu tshibilu tshia dibaka (10-19)

  • Mukaji wa Shimishona mupesha muntu mukuabu (20)

14  Pashishe Shimishona wakapueka ku Timena, kumonaye mukaji mukuabu muena Peleshete* mu Timena amu.  Nunku wakabanda, kuambilaye tatuende ne mamuende ne: “Ndi mumone mukaji mukuabu muena Peleshete mu Timena udi munsankishe, ne ndi musue numungangatshile bua alue mukajanyi.”  Kadi tatuende ne mamuende bakamuambila ne: “Kuenaku mua kukeba mukaji munkatshi mua balela bebe ne munkatshi mua tshisamba tshietu tshionso anyi?+ Bua tshinyi udi ne bua kuya kuangata mukaji munkatshi mua bena Peleshete abu badi kabayi batengula?” Kadi Shimishona wakambila tatuende ne: “Umungangatshile, bualu yeye ke udi munkumbanyine.”*  Tatuende ne mamuende kabavua bajingulule ne: bualu abu buvua bufumina kudi Yehowa, bualu Yeye uvua ukeba pa kubuelela bua kuluisha bena Peleshete, bu muvua bena Peleshete bakokesha Isalele tshikondo atshi.+  Nunku Shimishona wakapueka ne tatuende ne mamuende ku Timena. Pakafikaye mu madimi a tumuma tua mvinyo a mu Timena, monayi! nyama wa ntambue* wakalua kudiye wenda ukungula!  Dîba adi nyuma wa Yehowa wakamupesha bukole,+ yeye kumupandulula mu bipese bibidi anu mutu muntu upandulula muana wa mbuji mu bitupa bibidi ne bianza biende nkayabi. Kadi kakambila tatuende anyi mamuende tshivuaye muenze to.  Pashishe wakapueka, kuyukilaye ne mukaji au, ne mukaji au utshivua anu mukumbane ku mêsu kua Shimishona.+  Pakapita matuku, pavuaye upingana bua kuya ne mukaji kuende,+ wakapuka bua kutangila tshitalu tshia nyama wa ntambue au, ne munda mua tshitalu tshia nyama wa ntambue au muvua tshisumbu tshia mbulubulu ne buitshi.  Nunku wakakona buitshi, kubuelaye mu bianza biende ne uvua ubudia pavuaye wenda uya. Pakapetanganaye ne tatuende ne mamuende, wakabapesha ndambu bua kudiabu. Kadi kavua mubambile ne: uvua mukone buitshi abu mu tshitalu tshia nyama wa ntambue to. 10  Tatuende wakapueka kudi mukaji au, ne Shimishona wakenzeja didia dinene kuntu aku, bualu ke muvua bansongalume ne tshibidilu tshia kuenza. 11  Pakamumonabu, bakamutuadila bansongalume 30 bua kumushindikija. 12  Pashishe Shimishona wakabambila ne: “Anyishayi nnuelele kasumuinu. Nuenu bakumvuije munkatshi mua matuku muanda mutekete a didia dinene edi ne bampeshe diandamuna, nennupeshe bilamba bia line 30 ne bilamba bikuabu 30. 13  Kadi nuenu bapangile bua kumpesha diumvuija, nudi ne bua kumpesha bilamba bia line 30 ne bilamba bikuabu 30.” Bakamba ne: “Tuelelaku kasumuinu kebe, tudi basue kukumvua.” 14  Nunku wakabambila ne: “Munda mua mudianganyi muakapatuka tshintu tshia kudia,Ne munda mua tshintu tshia bukole muakapatuka tshintu tshishême.”+ Bakapangila mua kumvuija kasumuinu aku munkatshi mua matuku asatu. 15  Dituku dinayi bakambila mukaji wa Shimishona ne: “Dingakaja bayebe+ bua atupeshe diumvuija dia kasumuinu aku. Tshianana netukuoshe wewe ne ba mu nzubu wa tatuebe ne kapia. Uvua mutubikile muaba eu bua kuangata bintu bietu anyi?” 16  Nunku mukaji wa Shimishona wakamudidila, kuambaye ne: “Wewe udi ne bua kuikala munkine; kuena munnange to.+ Uvua muelele bena kuetu kasumuinu, kadi kuena mumpeshe diumvuija diaku to.” Ke yeye kumuandamuna ne: “Kia! Tshiena nansha mudipeshe tatuanyi meme ne mamuanyi meme. Ndi mua kukupeshadi wewe anyi?” 17  Kadi wakatungunuka ne kumudidila matuku onso avua mashale a didia dinene dia matuku muanda mutekete adi. Ndekelu wa bionso, dituku dia muanda mutekete Shimishona wakamupesha diumvuija, bualu uvua mumutondeshe. Pashishe wakapesha bena kuabu diumvuija dia kasumuinu aku.+ 18  Nunku dituku dia muanda mutekete kumpala kua dîba kubuela,* bantu ba mu tshimenga bakamuambila ne: “Ntshinyi tshidi tshishême kupita buitshi,Ne ntshinyi tshidi ne bukole kupita nyama wa ntambue?”+ Wakabandamuna ne: “Bu nuenu kanuyi badime ne muana wanyi wa ngombe,+Kanuvua mua kuikala bumvuije kasumuinu kanyi aku to.” 19  Nunku nyuma wa Yehowa wakamupesha bukole,+ yeye kupueka ku Ashekelona,+ kushipaye bantu babu 30, kuangataye bilamba biabu, kubipeshaye bantu bavua bumvuije kasumuinu kende.+ Uvua ne tshiji pavuaye ubanda bua kupingana ku nzubu kua tatuende. 20  Pashishe bakafila mukaji wa Shimishona+ kudi umue wa ku bansongalume bavua bamushindikije.+

Note

Ku mua.: “mukaji wa mu bana ba bakaji ba bena Peleshete.”
Ku mua.: “mukumbane ku mêsu kuanyi.”
Anyi “muana wa ntambue wa musalala.”
Anyi pamuapa: “kumpala kua yeye kubuela mu nzubu wa munda.”