Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Esetê 2:1-23

MALU ADI MU MUKANDA EU

  • Dikeba mukalenge mukaji mupiamupia (1-14)

  • Esetê udi ulua mukalenge mukaji (15-20)

  • Môdekai udi wela tshifufu patoke (21-23)

2  Panyima pa malu aa, pavua tshiji tshikole tshia mukalenge Ahashawelosha+ tshipueke, wakavuluka bualu buvua Washeti muenze+ ne dipangadika divuabu bamuangatshile.+  Nunku bambuluishi ba mukalenge nkayende bakamba ne: “Bakebele mukalenge bansongakaji bimpe kumona batshidi tumama.  Mukalenge atume bantu mu maprovense* onso a mu bukalenge buende+ bua basangishe bansongakaji bonso bimpe kumona batshidi tumama ku Shushana* nzubu mukolesha,* ku nzubu wa bantu bakaji.* Hegai+ muntu mutungu wa mukalenge ne mulami wa bantu bakaji ikale ubatangila, ne bikale babapesha bintu bia kudilengeja nabi.*  Nunku nsongakaji udi usankisha mukalenge kupita bakuabu neikale mukalenge mukaji pa muaba wa Washeti.”+ Lungenyi elu luakasankisha mukalenge, ne ke tshiakenzaye.  Kuvua muena Yuda mukuabu mu Shushana*+ nzubu mukolesha,* dîna diende Môdekai+ muana wa Yaî muana wa Shimei muana wa Kishi, muena Benyamina,+  uvuabu bakuate mu Yelushalema baye nende pamue ne bantu bavuabu baye nabu pamue ne Yekoniya*+ mukalenge wa Yuda uvua Nebukadenesâ mukalenge wa Babilona mukuate muye nende.  Uvua mukoleshe* Hadasa,* mmumue ne: Esetê, muana wa tatuende mukuabu,+ bualu kavua ne tatu anyi mamu. Nsongakaji eu uvua ne mubidi muimpe ne tshimuenekelu tshimpe, ne pakafua tatuende ne mamuende, Môdekai uvua mumuangate bu muanende wa bakaji.  Pavuabu bamanyishe dîyi dia mukalenge ne mukenji wende, ne pavuabu basangishe bansongakaji ba bungi ku Shushana* nzubu mukolesha* babateke mu bianza bia Hegai,+ bakalua kabidi ne Esetê ku nzubu* wa mukalenge kumutekabu mu bianza bia Hegai mulami wa bantu bakaji.  Nunku nsongakaji eu wakamusankisha, yeye kumuanyisha,* ke yeye kumulongoluela diakamue bintu bia kudilengeja nabi*+ ne biakudia biende, ne yeye kumupesha bansongakaji muanda mutekete basungula ba ku nzubu wa mukalenge. Wakamumbusha kabidi muaba uvuaye, kumutekaye yeye ne bansongakaji bavua bamuambuluisha muaba mutambe buimpe mu nzubu wa bantu bakaji.* 10  Esetê kavua muambe bualu nansha bumue bua tshisamba tshiabu+ anyi bua balela bende to, bualu Môdekai+ uvua mumuambile bua kambidi muntu nansha umue to.+ 11  Ku dituku ku dituku Môdekai uvua upitshila kumpala kua lubanza lua nzubu wa bantu bakaji* bua kumanya muvua Esetê ne bua kumanya tshivua tshimufikila. 12  Nsongakaji yonso uvua ne diende dîba dia kubuela kudi mukalenge Ahashawelosha pavuaye ujikija ngondo 12 ya didilengeja ivuabu bakosele bantu bakaji, bualu mushindu eu ke uvuabu bakumbaja didilengeja diabu: ngondo isambombo ne mafuta a mire+ ne ngondo isambombo ne mafuta a bome+ ne mafuta mashilashilangane a didilengeja nawu. 13  Dîba adi nsongakaji uvua ukumbana bua kubuela kudi mukalenge, ne tshionso tshivuaye ulomba bavua bamupeshatshi pavuaye umbuka mu nzubu wa bantu bakaji* bua kuya ku nzubu kua mukalenge. 14  Ku dilolo uvua ubuela, ne mu dinda uvua upingana ku nzubu muibidi wa bantu bakaji,* mu bianza bia Shâshagaza muntu mutungu wa mukalenge,+ mulami wa bakaji babanjija. Kavua upingana kabidi kudi mukalenge to, anu yeye musankishe mukalenge mu mushindu wa pa buawu ne bamubikile mu dîna diende.+ 15  Pavua dîba dia Esetê muana wa Abihayila tatuende mukuabu wa Môdekai uvua mumuangate bu muanende wa bakaji+ dikumbane dia kubuela kudi mukalenge, kakalomba tshintu nansha tshimue pa kumbusha bintu bivua Hegai muntu mutungu wa mukalenge, mulami wa bantu bakaji, muambe. (Dîba dionso adi Esetê uvua wenda wanyishibua kudi muntu yonso uvua umumona.) 16  Bakaya ne Esetê kudi mukalenge Ahashawelosha ku nzubu wende wa bukalenge mu ngondo wa dikumi, mmumue ne: ngondo wa Tebeta,* mu tshidimu tshia muanda mutekete+ tshia bukokeshi buende. 17  Mukalenge wakalua kunanga Esetê bikole kupita bakaji bakuabu bonso, ne wakamusankisha, yeye kumuanyisha* bikole kupita bansongakaji bonso batshivua tumama. Nunku wakateka tshia ku mutu* tshia bukalenge pa mutu pende, yeye kumuteka mukalenge mukaji+ pa muaba wa Washeti.+ 18  Nunku mukalenge wakenzejila bakokeshi bonso ba mu bukalenge buende ne bena mudimu bende didia dinene, didia dia Esetê. Pashishe wakamanyisha dilekela bua maprovense,* ne uvua anu upesha bantu mapa bilondeshile bubanji bua mukalenge. 19  Mpindieu pakasangishabu bansongakaji batshivua tumama*+ musangu muibidi, Môdekai uvua musombe mu tshiibi tshia mukalenge. 20  Esetê kavua muambe bualu nansha bumue bua balela bende ne tshisamba tshiabu,+ anu muvua Môdekai mumuambile; Esetê wakatungunuka ne kuenza malu avua Môdekai wamba, anu bu pavuaye ku bukokeshi buende.+ 21  Mu matuku au pavua Môdekai musombe mu tshiibi tshia mukalenge, Bigatana ne Teleshe, bena mudimu babidi ba mu lubanza lua mukalenge, balami ba ku biibi, bakakuata tshiji, bobu kuela tshifufu bua kushipa* mukalenge Ahashawelosha. 22  Kadi Môdekai wakumvua bualu abu, diakamue yeye kubuambila Esetê mukalenge mukaji. Esetê pende wakakula ne mukalenge mu dîna dia Môdekai.* 23  Nunku bakalondolola bualu abu, ndekelu wa bionso bobu kusangana ne: buvua bulelela, ne bakuowa bantu babidi abu ku mutshi; bakafunda bualu buonso ebu mu mukanda wa malu a bikondo abi mu mêsu mua mukalenge.+

Note

Anyi “madistrike.”
Anyi “Susa.”
Anyi “dibalasa; muaba mukolesha.”
Anyi “muaba mulongolola uvua bantu bakaji bu mudi bakaji ba mukalenge anyi bakaji bende babanjija basombela.”
Anyi “babapeshe mafuta mashilashilangane a kudilaba.”
Anyi “Susa.”
Anyi “dibalasa; muaba mukolesha.”
Badi bamubikila ne: Yehoyakina mu 2Bk 24:8.
Anyi “Uvua mulami wa; ndeji wa.”
Diumvuija: “Mutshi wa Mirte.”
Anyi “Susa.”
Anyi “dibalasa; muaba mukolesha.”
Anyi “dibalasa.”
Anyi “kumuleja dinanga dia lulamatu.”
Anyi “mafuta mashilashilangane a kudilaba.”
Anyi “muaba mulongolola uvua bantu bakaji bu mudi bakaji ba mukalenge anyi bakaji bende babanjija basombela.”
Anyi “muaba mulongolola uvua bantu bakaji bu mudi bakaji ba mukalenge anyi bakaji bende babanjija basombela.”
Anyi “muaba mulongolola uvua bantu bakaji bu mudi bakaji ba mukalenge anyi bakaji bende babanjija basombela.”
Anyi “muaba muibidi mulongolola uvua bantu bakaji bu mudi bakaji ba mukalenge anyi bakaji bende babanjija basombela.”
Anyi “kumuleja dinanga dia lulamatu.”
Anyi “tshintu tshia kujingila ku mutu.”
Anyi “madistrike.”
Anyi “bansongakaji.”
Ku mua.: “kulenga.”
Anyi “bua Môdekai.”