Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda muisatu wa Yone 1:1-14

MALU ADI MU MUKANDA EU

  • Dielangana muoyo ne disambila (1-4)

  • Diela Gayo kalumbandi (5-8)

  • Diotelefe mmusue malu manene (9, 10)

  • Badi bakula bimpe bua Demetelio (11, 12)

  • Didilongolola bua kuya kudibu ne dibatumina muoyo (13, 14)

 Meme, muntu mukulumpe,* kudi Gayo, munanga, undi munange bushuwa.  Munanga, ndi nsambila bua mu malu onso utungunuke ne kuya kumpala ne kuikala ne bukole bua mubidi, anu bu muudi* uya kumpala mpindieu.  Bualu mvua musanke bikole menemene pavua bana betu balue ne bajadike bua bulelela buudi mulamate, bu muudi utungunuka ne kuenda mu bulelela.+  Tshiena ne disanka dinene* kupita edi: bua meme kumvua ne: bana banyi badi batungunuka ne kuenda mu bulelela.+  Munanga, udi uleja lulamatu luebe mu malu audi wenzela bana betu, nansha mudibu benyi kuudi.+  Mbafile bujadiki bua bualu bua dinanga diebe kumpala kua tshisumbu. Ubatume koku mu njila wabu mu mushindu udi muakanyine Nzambi.+  Bualu bavua bapatuke bua dîna diende, kabayi bangate tshintu nansha tshimue+ kudi bantu ba bisamba.  Nunku tuetu tudi benzejibue bua kuakidila bantu ba mushindu eu,+ bua tulue benzejanganyi ba mudimu mu bulelela.+  Mvua mufundile tshisumbu bualu kampanda, kadi Diotelefe, udi musue kuangata muaba wa kumpala munkatshi muabu,+ kena witaba bualu nansha bumue bua kutudi ne kanemu.+ 10  Ke bualu kayi meme mulue, nendeje malu adiye wenza, mudiye utangalaja ngumu mibi bua bualu buetu.*+ Ki mmushikidile anu apu to, udi ubenga kuakidila bana betu+ ne kanemu; ne bantu badi basue kubakidila, udi ukeba kubapangisha ne kubipata mu tshisumbu. 11  Munanga, kuidikiji malu mabi, kadi idikija malu mimpe.+ Muntu udi wenza malu mimpe mmufumine kudi Nzambi.+ Muntu udi wenza malu mabi ki mmuanji kumona Nzambi to.+ 12  Buonso buabu mbakule bimpe bua Demetelio ne bulelela buine mbujadike bualu ebu. Mu bulelela, tuetu petu tudi tujadika bualu buende, ne nudi bamanye ne: bujadiki butudi tufila mbulelela. 13  Mvua ne malu a bungi a kukufundila, kadi tshiena musue kutungunuka ne kukufundila ne mutshi wa mukanda ne mâyi a mukanda to. 14  Kadi ndi mutekemene bua kukumona mu tshitupa tshîpi emu, ne netuyukile mpala ne mpala. Ditalala dikale nebe. Balunda badi bakutumina muoyo. Ngelela balunda muoyo, muntu yonso mu dîna diende.

Note

Anyi “mukulu.”
Anyi “mudi anyima webe.”
Anyi pamuapa: “bualu bua kulejila dianyisha.”
Ku mua.: “ulabakana bua bualu buetu ne mêyi mabi.”