Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda Muibidi wa Kulondolola 3:1-17

MALU ADI MU MUKANDA EU

  • Solomo udi ubanga kuibaka ntempelo (1-7)

  • Muaba Mutambe Tshijila (8-14)

  • Makunji 2 a tshiamu tshia mitaku (15-17)

3  Pashishe Solomo wakabanga kuibaka nzubu wa Yehowa+ mu Yelushalema pa mukuna wa Moliya,+ muaba uvua Yehowa mumuenekele tatuende Davidi,+ mu muaba uvua Davidi mulongolole muaba wa tshishipuidi wa Ônana+ muena Yebuse.  Wakatuadija kuibaka mu dituku dibidi dia ngondo muibidi, mu tshidimu tshinayi tshia bukokeshi buende.  Tshishimikidi tshivua Solomo muenze bua kuibaka nzubu wa Nzambi mulelela tshivua ne nkubita 60 mu bule ne nkubita 20 mu butshiama,+ bilondeshile tshipiminu tshia kale.*  Lutanda lua kumpala luvua ne nkubita 20 mu bule, bipetangana ne butshiama bua nzubu,* ne luvua ne butumbuke bua 120;* wakalamika or muimpe menemene munda mualu.+  Wakalamika mabaya a mutshi wa jenevriye ku nzubu munene, kuluaye kumulamika or muimpe menemene,+ ne pashishe kumulengejaye ne bimfuanyi bia mabue a ngaji+ ne shene.+  Pashishe wakalamika mabue mimpe a mushinga mukole ku nzubu;+ ne or+ uvuaye mulamike uvua or wa ku Pâwayima.  Wakalamika or ku nzubu, ku mikamba ya muulu, ku mishiku ya mbelu, ku bimanu bia nzubu ne ku biibi biende;+ pashishe wakondola bimfuanyi bia bakeluba ku bimanu.+  Wakenza kabidi tshibambalu* tshia Muaba Mutambe Tshijila;+ bule buatshi buvua bupetangana ne butshiama bua nzubu, nkubita 20, ne uvua ne nkubita 20 mu butshiama. Wakalamikamu or muimpe menemene uvua ne bujitu bua ntalanta* 600.+  Bujitu bua or wa misonso buvua bua nshekele* 50; ne wakalamika or ku bibambalu bia kuulu. 10  Pashishe wakasonga bimfuanyi bibidi bia bakeluba mu tshibambalu* tshia Muaba Mutambe Tshijila, kubilamikaye or.+ 11  Bule buonso bua mapuapua a bakeluba+ buvua bua nkubita 20; dipuapua dia mukeluba wa kumpala divua bule bua nkubita itanu ne divua dilenga ku tshimanu tshia nzubu; dipuapua diende dikuabu divua bule bua nkubita itanu ne divua dilenga dipuapua dia mukeluba mukuabu au. 12  Dipuapua dia mukeluba mukuabu divua bule bua nkubita itanu ne divua dilenga ku tshimanu tshikuabu tshia nzubu; dipuapua diende dikuabu divua bule bua nkubita itanu ne divua dilenga dipuapua dia mukeluba wa kumpala. 13  Mapuapua a bakeluba aba avua mabalula bule bua nkubita 20; bavua bimane kuulu, batangile munda.* 14  Wakenza kabidi tshilamba tshia kukosolola natshi+ tshienza ne tshilamba tshimpe menemene ne buanda bua dikala dia ble ne miosa mikunzubile ya mikoko ne buanda bukunze, yeye kuzolapu bakeluba.+ 15  Pashishe wakenza makunji abidi+ kumpala kua nzubu, mikale bule bua nkubita 35, ne mutu wa dikunji uvua ku mutu kua dikunji dionso uvua ne nkubita itanu.+ 16  Wakenza kabidi shene, mienze bu shene ya kuela mu nshingu, yeye kuyela ku mitu ya makunji, kuenzaye kabidi bimuma bia grenade lukama, yeye kubiela ku shene ayi. 17  Wakimanyika makunji au kumpala kua ntempelo, dimue ku dia balume* ne dikuabu ku dia bakaji;* wakinyika dikunji dia ku dia balume ne: Yakina,* dia ku dia bakaji ne: Boaza.*

Note

Pa tshibidilu nkubita uvua ne santimetre 44,5, kadi bamue bantu badi bela meji ne: padibu bakula bua “tshipiminu tshia kale,” badi bakula bua nkubita mule uvua ne santimetre 51,8. Tang. Tshis. B14.
Anyi “nkubita 20 ilonda butshiama bua nzubu.”
Bule budi kabuyi bumanyike.
Ku mua.: “nzubu.”
Ntalanta uvua ne kilo 34,2. Tang. Tshis. B14.
Nshekele uvua ne grame 11,4. Tang. Tshis. B14.
Ku mua.: “nzubu.”
Mmumue ne: batangile Muaba wa Tshijila.
Anyi “ku sud.”
Anyi “ku nord.”
Diumvuija: “Yeye [mmumue ne: Yehowa] ashindamije bikole.”
Diumvuija pamuapa: “Ne bukole.”