Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda wa kumpala wa Petelo 3:1-22

MALU ADI MU MUKANDA EU

  • Bakaji ne balume (1-7)

  • Kuditeka pa muaba wa bakuabu; kukeba ditalala (8-12)

  • Kukenga bua bualu bua buakane (13-22)

    • Kuikala badiakaje bua kuandamuna bua ditekemena dienu (15)

    • Dibatiza ne kondo ka muoyo kimpe (21)

3  Bia muomumue, nuenu bakaji, kokelayi babayenu,+ bua bikala bakuabu kabayi batumikila dîyi, bapetshibue kakuyi dîyi ku diambuluisha dia bikadilu bia bakaji babu,+  bualu mbadimuene bikadilu bienu bimpe+ pamue ne kanemu kakole.  Didilengeja dienu kadikadi dia pambelu (dilukisha dia nsuki ne divuala dia bilenga bia or+ anyi bilamba bilengele)  kadi dikale dia muntu musokome wa mu muoyo mu didilengeja didi kadiyi dinyanguka dia meji a ditalala ne mapole+ adi ne mushinga wa bungi ku mêsu kua Nzambi.  Bualu ke muvua bakaji ba tshijila ba kale bavua batekemena Nzambi badilengeja, bakokela babayabu,  anu bu muvua Sala utumikila Abalahama, umubikila ne: mukalenge.+ Ne nudi balue bana bende, kadi anu nuenu nutungunuka ne kuenza malu mimpe, kanuyi numvua buôwa to.+  Bia muomumue, nuenu balume, tungunukayi ne kusomba nabu bilondeshile dimanya.* Nubapeshe bunême+ bu tshivuadi tshitambe butekete, tshia buntu bukaji, bualu badi pabu bapianyi nenu+ ba ngasa wa muoyo, bua masambila enu kaapangishibu.  Ndekelu wa bionso, nuenu bonso nuikale tshintu tshimue mu lungenyi,*+ nuditeka pa muaba wa bakuabu, nunangangana bikole bu bana ba muntu, numvuilangana luse+ ne nudipuekesha.+  Kanupingaji bubi ku bubi+ anyi tshipendu ku tshipendu.+ Kadi nupingaje dibenesha,+ bualu nuvua babikidibue bua bualu ebu,* bua nupiane dibenesha. 10  Bualu “muntu yonso udi musue kunanga muoyo ne kumona matuku mimpe udi ne bua kulama ludimi luende ku malu mabi+ ne mishiku yende ku diakula malu a dishima. 11  Yeye umbuke ku malu mabi,+ enze malu mimpe;+ akebe ditalala ne adilonde.+ 12  Bualu mêsu a Yehowa* adi kudi bantu bakane, ne matshi ende adi ateleja disengelela diabu,+ kadi mpala wa Yehowa* mmutangija kudi badi benza malu mabi.”+ 13  Mu bulelela, nnganyi wanuenzela bibi nuenu balue bena tshisumi bua malu mimpe?+ 14  Kadi nansha nuenu ne bua kukenga bua bualu bua buakane, nudi ba diakalenga.+ Kadi kanutshinyi tshidibu batshina,* ne kanupampakanyi to.+ 15  Kadi nujidile Kristo bu Mukalenge mu mioyo yenu, badiakaje misangu yonso bua kuandamuna kumpala kua muntu yonso udi unukonka bua tshinyi nudi ne ditekemena dinudi nadi, kadi nuenza nanku ne bupole+ ne kanemu kakole.+ 16  Nuikale anu ne kondo ka muoyo kimpe,+ bua mu mushindu wonso udibu bakula bibi bua bualu buenu, bantu badi bakula bibi bua bualu buenu bafuishibue bundu+ bua bikadilu bienu bimpe bu bayidi ba Kristo.+ 17  Bualu mbimpe kukenga bua munudi nuenza malu mimpe,+ bikalabi disua dia Nzambi dia kulekela bualu ebu, pamutu pa kukenga ne: mbualu nudi nuenza malu mabi.+ 18  Bualu Kristo wakafua musangu umue bua kashidi bua mpekatu,+ muntu muakane bua bantu badi kabayi bakane,+ bua kunulombola kudi Nzambi.+ Wakashipibua mu mubidi,+ kadi wakavuijibua ne muoyo mu nyuma.+ 19  Mu nsombelu eu wakaya, kuyishaye nyuma ivua mu buloko,+ 20  ivua mibenge kutumikila kale pavua Nzambi muindile ne lutulu* mu matuku a Noa,+ pavuabu benza buatu,+ muvua bantu bakese, mmumue ne: anyima* muanda mukulu, basungidibue pa mâyi.+ 21  Dibatiza didi dipetangana ne bualu ebu didi dinupandisha penu mpindieu (ki nku diumbusha dia manyanu a mubidi, kadi nku dilomba Nzambi kondo ka muoyo kimpe),+ ku diambuluisha dia dibishibua dia Yezu Kristo ku lufu. 22  Yeye udi ku tshianza tshia balume tshia Nzambi,+ bualu uvua muye mu diulu, ne banjelu ne makokeshi ne makole biakatekibua ku bukokeshi buende.+

Note

Anyi “nubatua mushinga; nubumvuila.”
Anyi “numvuangana mu diela dia meji.”
Anyi “bua njila eu.”
Anyi pamuapa: “kanutshinyi mifunu yabu.”
Ku mua.: “lutulu lua Nzambi luindile.”
Anyi “bantu.”