Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda wa Kumpala wa Kulondolola 5:1-26

MALU ADI MU MUKANDA EU

  • Ndelanganyi ya Lubena (1-10)

  • Ndelanganyi ya Gada (11-17)

  • Badi batshimuna bena Hagâ (18-22)

  • Tshitupa tshia tshisa tshia Manashe (23-26)

5  Aba mbana ba balume ba Lubena,+ muanabute wa Isalele. Yeye uvua muanabute, kadi bu muvuaye munyange bulalu bua tatuende,+ bakafila bukenji buende bua buanabute kudi bana ba balume ba Jozefe+ muana wa Isalele, ke bualu kayi kabavua bamufunde mu dilondangana dia dîku diabu bua bukenji bua buanabute to.  Nansha muvua Yuda+ mupite bana babu ne nansha muvua muntu uvua ne bua kuikala mulombodi mufumine kudiye,+ bukenji bua buanabute buvua bua Jozefe.  Bana ba balume ba Lubena muanabute wa Isalele bavua: Hanoka, Palu, Heselona, ne Kâmi.+  Bana ba balume ba Yoele bavua: Shemaya, muanende uvua Goga, muanende uvua Shimei,  muanende uvua Mika, muanende uvua Leaya, muanende uvua Bâla,  ne muanende uvua Bêlaha uvua Tigelata-pilenesê+ mukalenge wa Ashû mukuate muye nende mu buloba bukuabu; uvua umue wa ku bamfumu ba bena Lubena.  Bana babu ba balume bilondeshile mêku abu muvuabu babafunde mu dilondangana dia mêku abu bilondeshile ndelanganyi yabu bavua: Yiele uvua ku mutu, Zekâya,  ne Bela muana wa balume wa Azaza muana wa balume wa Shema muana wa balume wa Yoele, uvua musombele mu Aloê+ too ne ku Nebo ne ku Bâla-meona.+  Lua ku est wakasombela too ne ku ntuadijilu kua tshipela tshidi tshiye too ne ku musulu wa Pelata,+ bualu bimuna biabu bivua bilue bia bungi mu buloba bua Gilada.+ 10  Mu matuku a Shaula, bakela bena Hagâ mvita, kubatshimunabu, ke bobu kusombela mu ntenta yabu mu buloba buonso buvua ku est kua Gilada. 11  Mpindieu ndelanganyi ya Gada ivua misombele ku luseke luabu mu buloba bua Bashana too ne ku Saleka.+ 12  Mu Bashana Yoele uvua ku mutu, Shafama umulondela, ne Yanai ne Shafata. 13  Bana babu ba balume ba mu nzubu ya batatuabu bavua: Mikaele, Meshulama, Sheba, Yolai, Yakana, Zia, ne Ebê, bonso muanda mutekete. 14  Bobu aba bavua bana ba balume ba Abihayila muana wa balume wa Huli muana wa balume wa Yaloa muana wa balume wa Gilada muana wa balume wa Mikaele muana wa balume wa Yeshishai muana wa balume wa Yado muana wa balume wa Buza. 15  Ahi muana wa balume wa Abediele muana wa balume wa Guni uvua ku mutu kua nzubu wa batatuabu. 16  Bavua basombele mu Gilada,+ mu Bashana+ ne misoko ivua kumpenga kuende,* ne mu mpata yonso ya kudishila nyama ya Shalona too ne ku ndekelu kuayi. 17  Bavua bafunde mêna abu bonso bilondeshile dilondangana dia mêku abu mu matuku a Yotama+ mukalenge wa Yuda ne mu matuku a Yalobama*+ mukalenge wa Isalele. 18  Bena Lubena, bena Gada, ne tshitupa tshia tshisa tshia Manashe bavua ne bilobo bia mvita 44 760 mu tshiluilu tshiabu bivua biambula ngabu ne miele ya mvita, bikale ne mata a mikete,* ne bivua bilongesha mvita. 19  Bakela bena Hagâ,+ bena Yetû, bena Nafisha,+ ne bena Nodaba mvita. 20  Bakapeta diambuluisha pavuabu baluangana nabu, ke bualu kayi bena Hagâ ne bantu bonso bavuabu nabu bakafidibua mu tshianza tshiabu, bualu bavua balombe Nzambi diambuluisha bua mvita, ne wakandamuna dilomba diabu bualu bavua bamueyemene.+ 21  Bakakuata bimuna biabu: tumelu binunu 50, mikoko binunu 250, ne mpunda 2 000, pamue ne bantu* binunu 100. 22  Bantu ba bungi bakakuluka bashipa, bualu mvita ivua ya kudi Nzambi mulelela.+ Nunku bakasomba muaba wabu au too ne tshikondo tshivuabu balue kubakuata kuyabu nabu mu buloba bukuabu.+ 23  Ndelanganyi ya tshitupa tshia tshisa tshia Manashe+ ivua misombele mu buloba buvua bumbukila ku Bashana too ne ku Bâla-hêmona ne Senî ne mukuna wa Hêmona.+ Ndelanganyi ayi ivua ya bungi. 24  Aba bavua bamfumu ba nzubu ya batatuabu: Efê, Ishi, Eliele, Azeliele, Yelemiya, Hodawiya, ne Yadiele; bavua bilobo bia mvita, bantu bende lumu, ne bamfumu ba nzubu ya batatuabu. 25  Kadi bakapanga lulamatu kudi Nzambi wa bankambua babu, bobu kuenda masandi ne nzambi* ya bisamba bia mu buloba abu+ bivua Nzambi mubutule kumpala kuabu. 26  Nunku Nzambi wa Isalele wakasonsola lungenyi lua Pula mukalenge wa Ashû+ (mmumue ne: Tigelata-pilenesê+ wa mu Ashû) ke yeye kukuata bena Lubena, bena Gada, ne tshitupa tshia tshisa tshia Manashe, kuyaye nabu ku Halaha, ku Habô, ku Hala, ne ku musulu wa Gozana,+ miaba idibu too ne lelu.

Note

Anyi “mimunyunguluke.”
Mmumue ne: Yalobama muibidi.
Ku mua.: “ne bivua bidiata buta.”
Anyi “anyima ya bantu.”
Mmumue ne: “kutendelela nzambi.”