Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda wa Kumpala wa Kulondolola 28:1-21

MALU ADI MU MUKANDA EU

  • Muyuki wa Davidi bua dibaka dia ntempelo (1-8)

  • Malu a Solomo kuenza; bamupesha tshimfuanyi tshizola (9-21)

28  Pashishe Davidi wakasangisha bakokeshi bonso ba mu Isalele ku Yelushalema: bakokeshi ba bisa, bamfumu ba bisumbu+ bivua bienzela mukalenge mudimu, bamfumu ba bantu tshinunu tshinunu ne ba bantu lukama lukama,+ bamfumu ba bintu bionso ne bimuna bionso bia mukalenge+ ne bia bana bende,+ pamue ne banene bavua benza mudimu mu lubanza lua mukalenge ne muntu yonso wa bukole ne mukumbane.+  Pashishe mukalenge Davidi wakimana, kuambaye ne: “Bana betu ne bena mu tshisamba tshietu, ntelejayi. Meme mvua ne dijinga mu muoyo wanyi dia kuibaka nzubu bua ikale muaba wa kuikishila bua mushete wa tshipungidi tshia Yehowa ne ikale tshitekelu tshia makasa a Nzambi wetu,+ ne mvua mulongolole bintu bua kuibaka.+  Kadi Nzambi mulelela uvua mungambile ne: ‘Wewe kuakuibaka nzubu bua dîna dianyi to,+ bualu udi muntu udi muluangane mvita, ne udi muele mashi a bantu panshi.’+  Kadi Yehowa Nzambi wa Isalele uvua munsungule mu nzubu wa tatuanyi mujima bua meme kulua mukalenge wa Isalele bua kashidi,+ bualu yeye uvua musungule Yuda bua ikale mulombodi,+ ne mu nzubu wa Yuda musungule nzubu wa tatuanyi,+ ne mu bana ba tatuanyi, meme ke muntu uvuaye muanyishe bua kuteka mukalenge wa Isalele mujima.+  Pashishe mu bana banyi bonso (bualu Yehowa mmumpeshe bana ba bungi)+ yeye uvua musungule muananyi Solomo+ bua asombe mu nkuasa wa bukalenge wa bukokeshi bua Yehowa ku mutu kua Isalele.+  “Yeye uvua mungambile ne: ‘Muanebe Solomo ke wibaka nzubu wanyi ne mbanza yanyi, bualu ndi mumusungule bua ikale muananyi ne meme nengikale tatuende.+  Nenjadike bukalenge buende bikole bua kashidi+ yeye mutumikile mêyi anyi ne mapangadika anyi ne muoyo mujima,+ anu bu mudiye wenza mpindieu.’  Ke bualu kayi ndi ngamba ku mêsu kua Isalele mujima, tshisumbu tshia Yehowa, ne mu matshi a Nzambi wetu ne: Tumikilayi mêyi onso a Yehowa Nzambi wetu ne nuakebe ne muoyo mujima bua nuangate buloba buimpe ebu+ ne nubushile bana benu balua panyima penu bu bumpianyi bua kashidi.  “Nunku wewe, muananyi Solomo, manya Nzambi wa tatuebe ne umuenzele mudimu ne muoyo mujima*+ ne anyima* wa disanka,* bualu Yehowa udi ukonkonona mioyo yonso,+ ne udi ujingulula meji onso ne dijinga dionso.+ Wewe mumukebe, neenze bua umupete,+ kadi wewe mumulekele, neakubenge kashidi.+ 10  Mpindieu, ela meji bimpe, bualu Yehowa mmukusungule wewe bua kuibaka nzubu bua ikale muaba munsantu. Ikala ne dikima ne ndaku wenze mudimu.” 11  Pashishe Davidi wakapesha muanende Solomo tshimfuanyi tshizola tshia mushindu wikala+ lutanda+ ne nzubu yalu, nzubu yalu ya dilamina bintu, bibambalu bialu bia kuulu, bibambalu bialu bia munda, ne nzubu wa tshibuikidiji tshia dilengejangana.*+ 12  Wakamupesha tshimfuanyi tshizola tshia tshintu tshionso tshivuabu bamuleje ku bukole bua nyuma* bua mbanza+ ya nzubu wa Yehowa, bua nzubu ya didiila yonso ivua mimunyunguluke, bua bibutshilu bia nzubu wa Nzambi mulelela, ne bua bibutshilu bia bintu bivuabu bavuije bia tshijila;*+ 13  kabidi ne bua bisumbu bia bakuidi+ ne bia bena Lewi, bua midimu yonso ivua itangila mudimu wa nzubu wa Yehowa, ne bua bintu bionso bia mudimu wa nzubu wa Yehowa; 14  kabidi ne bua bujitu bua or, or bua bintu bionso bia midimu mishilashilangane, bujitu bua bintu bionso bia arjan, ne bua bintu bionso bia midimu mishilashilangane; 15  kabidi ne bujitu bua bitekelu bia miendu bia or+ ne miendu yabi ya or, bujitu bua bitekelu bia miendu bishilashilangane ne miendu yabi, ne bujitu bua bitekelu bia miendu bia arjan, bua tshitekelu tshia muendu tshionso ne miendu yatshi bilondeshile mudimu watshi; 16  kabidi ne bujitu bua or bua mêsa a milongo ya mampa,*+ bua mêsa onso, pamue ne arjan bua mêsa a arjan, 17  bua nsomo, bibakudi, mbidika ya or muimpe menemene, ne bujitu bua tubakudi tua or,+ bua kabakudi konso, ne bujitu bua tubakudi tua arjan, bua kabakudi konso. 18  Uvua mufile kabidi bujitu bua or mulengeja bua tshioshelu tshia musenga wa manananshi+ ne bua tshimfuanyi tshia ditempu,+ mmumue ne: bakeluba+ ba or bavua babalule mapuapua abu ne babuikile mushete wa tshipungidi tshia Yehowa. 19  Davidi wakamba ne: “Tshianza tshia Yehowa tshivua nanyi, ne yeye uvua mumpeshe lungenyi lutue bua kuzola malu onso a tshimfuanyi tshizola+ tshia bintu bia kuibaka.”+ 20  Pashishe Davidi wakambila muanende Solomo ne: “Ikala ne dikima ne bukole ne ndaku wenze mudimu. Kutshinyi anyi kuikadi ne buôwa, bualu Yehowa Nzambi, Nzambi wanyi meme, udi nebe.+ Kakukushiya anyi kakukulekela to,+ kadi neikale nebe too ne pajika mudimu wonso udi utangila mudimu wa nzubu wa Yehowa. 21  Mona, ebi mbisumbu bia bakuidi+ ne bia bena Lewi+ bua mudimu wonso wa nzubu wa Nzambi mulelela. Wewe udi ne bena mudimu badi badiakaje ne bapiluke bua kuenza midimu ya mishindu yonso,+ pamue ne bakokeshi+ ne tshisamba tshijima bikala ne bua kutumikila malu onso awamba.”

Note

Anyi “muoyo mufila wonso.”
Tang. Diumv.
Anyi “anyima mudiakaje.”
Anyi “nzubu wa dibuikila dia mpekatu.”
Ku mua.: “kudi nyuma.”
Anyi “bintu bivuabu bafile bua mudimu wa Nzambi.”
Mmumue ne: mampa a dileja.