Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Mukanda wa Kumpala wa Kulondolola 13:1-14

MALU ADI MU MUKANDA EU

  • Mushete mufuma nawu ku Kîyata-yalima (1-14)

    • Badi bakuma Uza, ufua (9, 10)

13  Davidi wakayukila ne bamfumu ba bantu tshinunu tshinunu ne ba bantu lukama lukama ne balombodi bonso.+  Pashishe Davidi wakambila tshisumbu tshijima tshia Isalele ne: “Nuenu bamone ne: mbimpe, ne Yehowa Nzambi wetu yeye muitabe, tutume mukenji mu bitupa bionso bia buloba bua Isalele kudi bana betu badi bashale ne kabidi kudi bakuidi ne bena Lewi mu bimenga biabu+ bidi ne mpata ya kudishila nyama bua balue kudisangisha kutudi.  Nunku tupingaje Mushete+ wa Nzambi wetu.” Bualu kabavua bawutabalele mu matuku a Shaula to.+  Tshisumbu tshijima tshiakitaba bua kuenza nanku, bualu bivua bimueneke bimpe ku mêsu kua bantu bonso.  Nunku Davidi wakasangisha Isalele mujima, kumbukila ku musulu* wa Ejipitu too ne ku Lebo-hamate,*+ bua kumbusha Mushete wa Nzambi mulelela ku Kîyata-yalima.+  Davidi ne Isalele mujima bakabanda ku Bâlaha,+ ku Kîyata-yalima wa Yuda, bua kubanda ne Mushete wa Yehowa Nzambi mulelela udi usomba mu nkuasa wa bukalenge pa mutu* pa bakeluba,+ muaba udibu babila dîna diende.  Kadi bakateka Mushete wa Nzambi mulelela mu ditempu dipiadipia,+ kumbukabu nawu ku nzubu kua Abinadaba; ne Uza ne Ahio bavua benda balombola ditempu adi.+  Davidi ne Isalele mujima bavua benda basanka kumpala kua Nzambi mulelela ne bukole buabu buonso, benda bimba misambu, ne nzenze, ne biombelu bikuabu bia nshinga, ne ngoma,+ ne bintu bia kukumakaja,+ ne mpungi.+  Kadi pakafikabu muaba wa tshishipuidi wa Kidona, Uza wakolola tshianza, kukuataye Mushete, bualu ngombe ivua yamba kuwukulula. 10  Ke tshiji tshia Yehowa kutemenatshi Uza, ne Yeye wakamukuma bualu uvua muolole tshianza ku Mushete,+ ne wakafuila muaba au kumpala kua Nzambi.+ 11  Kadi Davidi wakafiika munda* bualu tshiji tshia Yehowa tshivua tshitemene Uza; ne badi babikila muaba au ne: Pelese-Uza* too ne lelu. 12  Nunku Davidi wakabanga kutshina Nzambi mulelela dituku adi, kuambaye ne: “Ndi mua kuya ne Mushete wa Nzambi mulelela muaba undi mushindu kayi?”+ 13  Davidi kavua muye ne Mushete muaba uvuaye mu Tshimenga tshia Davidi to, kadi wakawambuisha bua baye nawu ku nzubu kua Obeda-edome muena Gata. 14  Mushete wa Nzambi mulelela uvua kudi ba mu nzubu mua Obeda-edome ne wakashala kuende ngondo isatu; ne Yehowa uvua ubenesha ba mu nzubu mua Obeda-edome ne bionso bivuaye nabi.+

Note

Anyi “ku Shihô.”
Anyi “tshibuelelu tshia Hamate.”
Anyi pamuapa: “pankatshi.”
Anyi “wakapampakana.”
Diumvuija: “Tshiji tshitemene Uza.”