Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Bible ku Enternete | BIBLE—NKUDIMUINU WA BULONGOLODI BUPIABUPIA

Diumvuija dia miaku ya mu Bible

A B D E F G H I K L M N O P S T U Y Z

A

  • Aba.

    Panyima pa dipatuka mu Babilona, dîna dia ngondo muitanu mu kalandriye ka tshijila ka bena Yuda ne dia ngondo wa 11 mu kalandriye kavua kakayi ka bena Yuda. Uvua utuadija munkatshi mua ngondo wa 7 uya too ne mua ngondo wa 8. Ki mbatele dîna edi mu Bible to; badi bakula bua bualu buende anu bu “ngondo muitanu” patupu. (Nom 33:38; Ezl 7:9)​—Tang. Tshis. B15.

  • Abiba.

    Dîna dia ntuadijilu dia ngondo wa kumpala mu kalandriye ka tshijila ka bena Yuda ne dia wa 7 mu kalandriye kavua kakayi ka bena Yuda. Udi umvuija “Miepu mibishi (ya ntete)”; uvua utuadija munkatshi mua ngondo muisatu uya too ne mua ngondo muinayi. Panyima pa difuma dia bena Yuda mu Babilona, bakamubikila ne: Nisana. (Dut 16:1)​—Tang. Tshis. B15.

  • Adâ.

    Dîna dia ngondo wa 12 mu kalandriye ka tshijila ka bena Yuda ne dia ngondo muisambombo mu kalandriye kavua kakayi ka bena Yuda panyima pa difuma mu Babilona. Uvua utuadija munkatshi mua ngondo muibidi uya too ne mua ngondo muisatu. (Est 3:7)​—Tang. Tshis. B15.

  • Akaya.

    Mu Mifundu ya tshiena Greke ya buena Kristo, mprovense wa bena Lomo uvua ku sud kua Grese uvua ne tshimamuende wa bukalenge mu Kolinto. Uvua ukongoloja tshitupa tshionso tshia Grese ne tshia munkatshi mua Grese wa ku mputu. (Bz 18:12)​—Tang. Tshis. B13.

  • Alabasta.

    Dîna dia tulondo tua manananshi tuvuabu benza ne dibue divuabu bapeta pabuipi ne tshimenga tshia Alabastron mu Ejipitu. Pa tshibidilu bavua benza milondo ya buena eyi ne nshingu mukese uvuabu mua kujika bua manananshi a mushinga mukole kaapongoloki. Bakabanga kubikila dibue edi ku dîna edi.​—Mâk 14:3.

  • Alama; bena Alama.

    Ndelanganyi ya Alama muana wa Shema ivua misombele mu maloba a kumbukila ku mikuna ya Lebanona too ne dishiya dia Mezopotamia ne ku mikuna ya Taurus, ku nord too ne ku Damaseke ne dinsambu ku sud. Muaba eu udibu babikila mu tshiena Ebelu ne: Alama, bakalua kuwubikila ne: Sulia, ne kubikila bantu bavua basombamu ne: bena Sulia.—Gen 25:20; Dut 26:5; Hos 12:12.

  • Alamota.

    Tshibikidilu tshia mu misambu tshidi tshiumvuija “Bansongakaji; Bakaji basela batshidi bansonga,” pamuapa bakula bua misambu ya bakaji basela batshidi bansonga mimba ne mêyi makole. Badi batshitela pamuapa bua kuleja ne: tshitupa tshia musambu anyi bia kuimba nabi misambu bivua bia kuimba ne tshikuma tshikole.​—1Ku 15:20; Mis 46:Mut.

  • Aleopago.

    Mukuna mule wa mu Atena, ku nord lua ku ouest kua Acropole. Divua kabidi dîna dia tshipangu (kabadi) tshivua tshienzela bisangilu muaba au. Bavua baye ne Paulo ku Aleopago kudi bena nkindi ba Stoiko ne ba Epikuleo bua umvuije malu avuaye witabuja.—Bz 17:19.

  • Alfa ne Omega.

    Mêna a dileta dia kumpala ne dia ndekelu mu alfabe wa tshiena Greke; badi baatela pamue misangu 3 mu Buakabuluibua bu muanzu wa Nzambi. Miaba eyi tshiambilu etshi tshidi ne diumvuija dimue ne “wa kumpala ne wa ndekelu” ne “ntuadijilu ne ndekelu.”​—Bua 1:8; 21:6; 22:13.

  • Amen.

    “Bikale nanku,” anyi “menemene.” Muaku mufumine ku muaku aman wa mu tshiena Ebelu udi umvuija “kuikala muena lulamatu, wa kueyemena.” Bavua bamba “Amen” bua kuitaba mutshipu, disambila, anyi bualu buamba. Mu Buakabuluibua, badi batela Amen bu muanzu wa Yezu.​—Dut 27:26; 1Ku 16:36; Bua 3:14.

  • Anyima.

    Mushindu udibu batamba kukudimuna muaku wa mu tshiena Ebelu nephesh ne wa mu tshiena Greke psykhe. Patudi tukonkonona mudibu batele miaku eyi mu Bible, bidi bimueneka patoke ne: idi yakula nangananga bua 1) bantu, 2) nyama, anyi 3) muoyo udi nawu muntu anyi nyama. (Gen 1:20; 2:7; Nom 31:28; 1Pt 3:20; kabidi ne dim.) Bishilangane ne mudibu bumvuija muaku “anyima” mu bitendelelu bia bungi, Bible udi uleja ne: padibu batela muaku nephesh ne psykhe bua kuakula bua bifukibua bia pa buloba, idi itangila bifukibua bidi ne mubidi, bidibu mua kulenga, kumona, ne bifuafua. Mu Bible eu, miaku ya mu miakulu ya ntuadijilu eyi badi batamba kuyikudimuna bilondeshile diumvuija diayi ne tshidibu bamba, batela biambilu bu mudi: “muoyo,” “tshifukibua,” “muntu,” “tshidi muntu mu kabujima,” peshi bu mupinganyi nkaya wa pa bantu (tshilejilu: “meme” bua “anyima wanyi”). Misangu ya bungi, badi bakudimuna  miaku eyi ne: “anyima” mu dimanyisha dia kuinshi kua dibeji. Padibu batela muaku “anyima” mu mvese anyi mu dimanyisha, ngua kumvua bilondeshile mumvuija adibu bafile aa. Padibu bakula bua kuenza bualu kampanda ne anyima mujima, bidi biumvuija kubuenza wewe yonso mujima, ne muoyo umue, anyi ne muoyo mujima. (Dut 6:5; Mat 22:37) Miaba mikuabu, miaku ya mu miakulu ya ntuadijilu eyi idi mua kuleja dijinga anyi muoyo wa kudia tshintu udi nawu tshifukibua tshidi ne muoyo. Idi kabidi mua kuleja muntu mufue anyi tshitalu.—Nom 6:6; Nsu 23:2; Yes 56:11; Hag 2:13.

  • Armagedone.

    Ufumina ku muaku wa mu tshiena Ebelu Har Meghiddohn, udi umvuija “Mukuna wa Megido.” Badi balamakaja muaku eu ne “mvita ya dituku dinene dia Nzambi Wa Bukole Buonso” muikala “bakalenge ba pa buloba bujima budi bantu basombele” badisangishe bua kuela Yehowa mvita. (Bua 16:14, 16; 19:11-21)—Tang. DIKENGA DINENE.

  • Aselgeia.

    Tang. TSHIKADILU TSHIA DIKAMAKAMA.

  • Ashatelota.

    Nzambi mukaji wa bena Kanâna wa mvita ne bufuka, mukaji wa Bâla.—1Sm 7:3.

  • Asia.

    Mu mifundu ya tshiena Greke ya buena Kristo, ndîna dia provense wa Lomo divua dikongoloja tshidibu babikila lelu ne: tshitupa tshia ku ouest kua Turquie, kusangisha ne bidiila bia ku mbuu, bu mudi tshia Samo ne tshia Patemo. Tshimamuende wa bukalenge tshivua Efeso. (Bz 20:16; Bua 1:4)—Tang. Tshis. B13.

  • Azazele.

    Muaku wa mu tshiena Ebelu udi pamuapa umvuija “Mbuji udi ujimina.” Mu Dituku dia Dibuikila mpekatu, bavua batuma mbuji uvuabu basungula bua Azazele mu tshipela, bileja diya ne mpekatu ya tshisamba ya tshidimu tshikadi tshipite.—Lew 16:8, 10.

B

  • Bademon.

    Bifukibua bibi bia mu nyuma bidi kabiyi bimueneka bidi ne bukole bupite bua bantu. Mbababikile mu Genese 6:2 ne: “bana ba balume ba Nzambi” ne mu Yuda 6 ne “banjelu,” kabavua babafuke babi to; kadi mbanjelu bavua badivuije bena lukuna ba Nzambi pa kubenga kumutumikila mu matuku a Noa ne kudituabu ku tshia Satana mu ditombokela Yehowa.​—Dut 32:17; Luk 8:30; Bz 16:16; Yak 2:19.

  • Bafalese.

    Kasumbu ka malu a Nzambi kende lumu ka buena Yuda mu bidimu lukama bia kumpala. Kabavua ba mu ndelanganyi ya bakuidi to, kadi bavua batumikidi ba Mikenji mu katoba ne mu katoba ne dîsu dikole, ne bavua babandisha bilele bia malu mamba mukana bilua bu Mikenji. (Mat 23:23) Bakaluisha buenzeji bua bibidilu bia bena Greke, ne bu muvuabu bamanyi ba Mikenji ne ba bilele bia bantu, bavua ne bukokeshi bua bungi kudi bantu. (Mat 23:2-6) Bamue bavua kabidi bena mu Tshilumbuluidi Tshinene. Bavua baluisha Yezu misangu ya bungi bua dienza Nsabatu, bua bilele bia bantu, ne disomba ne bena mpekatu ne balambuishi ba bitadi. Bamue bakalua bena Kristo, kusangisha ne Shaula wa ku Tâso.​—Mat 9:11; 12:14; Mâk 7:5; Luk 6:2; Bz 26:5.

  • Bakeluba.

    Banjelu ba muaba mubandile badi ne midimu ya pa buayi. Mbashilangane ne baselafima.—Gen 3:24; Eks 25:20; Yes 37:16; Eb 9:5.

  • Bâla.

    Nzambi muena Kanâna uvuabu bangata bu muena diulu ne mufidi wa mvula ne bufuka. Badi batela “Bâla” bua kuleja kabidi nzambi mishadile ya muaba au. Muaku wa mu tshiena Ebelu udi umvuija “Muena bintu, Mfumu.”—1Bk 18:21; Lom 11:4.

  • Balumbuluishi.

    Bantu bavua Yehowa ujula bua kusungila bantu bende kumpala kua bakalenge ba Isalele kutuadija kukokesha.​—Bal 2:16.

  • Bamanyi ba mikenji.

    Mu mbulamatadi wa Babilona, bampulushi bamanyi ba mikenji bavua bena mudimu ba mbulamatadi bavua mu madistrike bavua bamanye mikenji ne bikale ne bukokeshi bua kulumbuluisha buvua ne mikalu. Mu matunga avua ku bukokeshi bua Lomo, bamanyi ba mikenji ba tshianana bavua balombodi ba mu mbulamatadi. Bavua ne mudimu wa kufila bulongame, kutangila malu a mpetu, kulumbuluisha bashipi ba mikenji, ne kulondakaja difila dia manyoka.—Dan 3:2; Bz 16:20.

  • Bana ba balume ba Alona.

    Ndelanganyi ya Alona muikulu wa Lewi uvuabu basungule bu muakuidi munene wa kumpala mu Mikenji ya Mose. Bana ba Alona bakenza midimu ya buakuidi ku ntenta wa tshitendelelu ne ku ntempelo.—1Ku 23:28.

  • Banefilima.

    Bana ba balume ba tshikisu bavuabu balele kudi banjelu bavuale mibidi ya bantu ne bana ba bakaji ba bantu kumpala kua Mvula wa kabutu.​—Gen 6:4.

  • Banetinima.

    Bena mudimu ba ku ntempelo bavua kabayi bena Isalele, anyi basadidi. Muaku wa mu tshiena Ebelu eu udi umvuija ku muaku ku muaku ne: “bantu bafila,” bileja ne: bavua babafile bua mudimu wa ku ntempelo. Bidi bimueneka ne: Banetinima ba bungi bavua ndelanganyi ya bena Gibeona bavua Yoshua mushiye “bangudi ba nkunyi ne basunyi ba mâyi bua tshisumbu ne bua tshioshelu tshia Yehowa.”​—Yos 9:23, 27; 1Ku 9:2; Ezl 8:17.

  •  Banjelu.

    Mu tshiena Ebelu malakh ne mu tshiena Greke aggelos. Miaku yonso ibidi eyi idi yumvuija “mutuadi wa mukenji,” kadi mbayikudimune ne: “muanjelu” padibu bakula bua batuadi ba mikenji ba mu nyuma. (Gen 16:7; 32:3; Yak 2:25; Bua 22:8) Banjelu mbifukibua bia mu nyuma bia bukole bifuka kudi Nzambi kumpala menemene kua kufukaye bantu. Bible udi ubabikila kabidi ne: “binunu ne binunu bia bansantu,” “bana ba balume ba Nzambi” ne “mitoto ya mu dinda.” (Dut 33:2; Yob 1:6; 38:7) Kabavua babafuke ne bukokeshi bua kulelangana to, kadi bavua babafuke umue ku umue. Bungi buabu mbupite pa miliyo lukama. (Dan 7:10) Bible udi uleja ne: muanjelu yonso udi ne diende dîna ne buende bumuntu, nansha nanku badi badipuekesha babenga bua babatendelele, ne ba bungi batu mene babenga kuamba mêna abu. (Gen 32:29; Luk 1:26; Bua 22:8, 9) Badi mu milongo mishilashilangane ne badi ne midimu mishilangane bu mudi: kuenza mudimu kumpala kua nkuasa wa bukalenge wa Yehowa, kufila mikenji yende, kusungila batendeledi ba Yehowa badi pa buloba, kukumbaja malumbuluisha a Nzambi, ne kuambuluisha mu mudimu wa diyisha lumu luimpe. (2Bk 19:35; Mis 34:7; Luk 1:30, 31; Bua 5:11; 14:6) Kumpala eku, nebambuluishe Yezu mu mvita ya Armagedone.​—Bua 19:14, 15.

  • Basadoke.

    Kasumbu kende lumu ka ntendelelu wa bena Yuda kenza ne babanji banene ne bakuidi bavua ne bukokeshi bua bungi pa midimu ya ku ntempelo. Bavua babenga bilele bia bungi biamba mukana bivuabu balonda kudi Bafalese pamue ne malu makuabu avuabu bitabuja. Kabavua bitabuja dibishibua ku lufu anyi dikalaku dia banjelu to. Bavua baluisha Yezu.—Mat 16:1; Bz 23:8.

  • Basalayi balami ba mukalenge wa bena Lomo.

    Balami aba bakalua ne bukole mu malu a tshididi buvua mua kulama anyi kukulula mukokeshi kampanda.​—Flp 1:13.

  • Baselafima.

    Bifukibua bia mu nyuma bidi bimane binyunguluke nkuasa wa bukalenge wa Yehowa mu diulu. Muaku wa mu tshiena Ebelu seraphim udi umvuija ku muaku ku muaku ne: “badi batema.”—Yes 6:2, 6.

  • Bata.

    Tshipiminu tshia bintu bia mâyi mâyi tshivua tshibuela litre mitue ku 22 bilondeshile biyoyi bia mulondo biangula mu bintu bia kale bidi ne dîna edi. Mu Bible, bipiminu bikuabu bia bintu biume ne bia mâyi mâyi mbipima bilondeshile bunene butshinka bua tshipiminu tshia bata. (1Bk 7:38; Yhz 45:14)—Tang. Tshis. B14.

  • Batismo; Dibatiza.

    Muaku wa pa muanda udi umvuija “kuina,” anyi kubueja mu mâyi. Yezu wakavuija batismo bualu budi bayidi bende ne bua kukumbaja. Mifundu idi yakula kabidi bua batismo wa Yone, batismo wa ku nyuma muimpe, ne batismo wa kapia ne mikuabu kabidi.​—Mat 3:11, 16; 28:19; Yne 3:23; 1Pt 3:21.

  • Belezebula.

    Dîna dipesha Satana, mulombodi anyi mukokeshi wa bademon. Pamuapa mmfundilu mukuabu wa dîna dia Bâla-zebuba, Bâla uvuabu batendelela kudi bena Peleshete ku Ekelona.—2Bk 1:3; Mat 12:24.

  • Bena dia Helode.

    Tshisumbu tshia bena Yuda bavua bimanyine bipatshila bia malu a tshididi bia dîku dia ba Helode mu bulombodi buabu ku bukokeshi bua bena Lomo. Pamuapa bamue Basadoke bavua mu dingumba edi. Bena dia Helode bakadisangisha ne Bafalese bua kuluisha Yezu.​—Mâk 3:6.

  • Bena Madayi; Madayi.

    Tshisamba tshifumine kudi Madayi muana wa Yafete; bavua basombele mu mpata wa pa mukuna wa Iran udi mulue ditunga dia Madayi. Bena Madayi bakadisangisha ne Babilona bua kutshimuna Ashû. Tshikondo atshi, Pelasa uvua provense wa mu Madayi, kadi Kolesha wakatomboka ne Madayi wakadisanga ne Pelasa bua kuenza bukalenge bua bena Madayi ne Pelasa buakatshimuna bukalenge bupiabupia bua Babilona mu 539 K.B.B. Bena Madayi bavuaku mu Yelushalema mu Pentekoste wa mu 33 B.B. (Dan 5:28, 31; Bz 2:9)​—Tang. Tshis. B9.

  • Bena nkindi ba Epikuleo.

    Bayidi ba muena nkindi muena Greke Epikuleo (341-270 K.B.B.). Nkindi yabu ivua mimanyine pa lungenyi lua ne: disanka dia muntu divua tshipatshila tshinene tshia muoyo.​—Bz 17:18.

  • Bena nkindi ba Stoiko.

    Kalasa ka bena nkindi ka bena Greke bavua bitabuja ne: disanka didi difumina ku dikala mu diumvuangana ne lungenyi ne bufuki. Mu diabu dimona, muntu uvua mu bulelela ne meji kavua umvua kusama anyi milowu to.—Bz 17:18.

  • Bena Samalea.

    Dîna edi divua kumpala ditangila bena Isalele ba mu bukalenge bua bisa 10 bua ku nord, kadi panyima pa dikuatshibua dia Samalea kudi bena Ashû mu 740 K.B.B., divua dikongoloja bantu ba ku babende bavuabu balue nabu kudi bena Ashû. Mu matuku a Yezu, pamutu pa dîna edi kuikaladi anu dileja tshisamba anyi malu a tshididi, divua kabidi ditamba kuleja bantu ba mu kasumbu ka tshitendelelu kavua pabuipi ne Shekeme wa kale ne Samalea. Bena mu kasumbu aka bavua ne amue malu avuabu bitabuja avua mashilangane bikole ne a buena Yuda.—Yne 8:48.

  •  Bia mvita.

    Bintu bia kudikuba nabi bivuabu bavuala kudi basalayi bu mudi: tshifulu, kazaku ka mvita ka tuamu, mukaba, bintu bia kukuba nabi mikolo ne ngabu.—1Sm 31:9; Ef 6:13-17.

  • Bikunyi.

    Tshintu tshivuabu bapayikila muntu bua kumunyoka. Bimue bia ku bintu ebi bivua bikanga anu makasa nkayawu, pavua eku bikuabu bilama mubidi mukobame, pamuapa bikuata makasa, bianza ne nshingu.—Yel 20:2; Bz 16:24.

  • Bimenga bia kunyemena.

    Bimenga bia bena Lewi muvua muntu udi mushipe mukuabu kabiyi ku bukole ukebela bukubi, unyema musombuedi wa mashi. Bimenga 6 ebi bivua mu Buloba Bulaya bujima bivua bisungula kudi Mose ne pashishe kudi Yoshua ku bulombodi bua Yehowa. Pavua muntu uvua unyema ufika mu tshimenga tshia kunyemena, uvua wambila bakulu bualu buende ku tshiibi tshia tshimenga ne bavua bamuakidila bimpe. Bua kupangisha bashipianganyi ba ku bukole bua kabanyemenyi pabu miaba eyi, mukebi wa bukubi uvua ne bua kulumbuluila mu tshimenga muvua dishipangana dienzekele bua kuleja ni kavua ne bualu. Yeye kayi ne bualu, bavua bamupingaja mu tshimenga tshia kunyemena; uvua ushala mu mikalu yatshi matuku onso a muoyo wende anyi too ne pavua muakuidi munene ufua.​—Nom 35:6, 11-15, 22-29; Yos 20:2-8.

  • Bintu bia kuambuila kapia.

    Bintu bienza ne or, arjan anyi ne tshiamu tshia mitaku bivuabu benza nabi mudimu ku ntenta wa tshitendelelu ne ku ntempelo bua kuosha musenga wa manananshi, kumbusha nabi makala mu tshioshelu tshia milambu ne kumbusha mikaba ya miendu ikavua mioshike ku tshitekelu tshia muendu tshia or. Bavua babibikila kabidi ne: bintu bia kuoshila musenga wa manananshi.​—Eks 37:23; 2Ku 26:19; Eb 9:4.

  • Bintu bia kujima nabi kapia.

    Bintu bivuabu benza nabi mudimu mu ntenta wa tshitendelelu ne mu ntempelo bienza ne or anyi ne tshiamu tshia mitaku. Bivua mua kuikala bu tushola tua kukoka natu mikaba ya miendu.​—2Bk 25:14.

  • Bintu bia luse.

    Bintu bifila bua kuambuluisha muntu udi mu lutatu. Ki mbitela buludiludi mu mifundu ya tshiena Ebelu to, kadi Mikenji ivua ipesha bena Isalele buludiki busunguluke bua malu avuabu ne bua kuenzela bapele.​—Mat 6:2.

  • Bintu binyenga mu mvita.

    Bintu bia muntu anyi bia bena mu dîku, bimuna, anyi bintu bikuabu bia mushinga bidibu banyenge muena lukuna udibu batshimune.—Yos 7:21; 22:8; Eb 7:4.

  • Bishima; Midimu ya bukole.

    Bienzedi anyi malu a kukema bidi bipita makole onso atu bantu bamanye ne bitubu bamona bu bienzeja kudi muntu anyi bukole bidi kabiyi bia pa buloba. Mu Bible batu imue misangu bakula bua “tshimanyinu,” “tshintu tshidi tshileja bualu buenzeka matuku atshilualua” ne “bualu bua kukema” bu miaku idi ipetangana.​—Eks 4:21; Bz 4:22; Eb 2:4.

  • Bisote.

    Bizubuzubu bitubu bumbusha ku ntete ya kudia padibu bayishipula anyi bayipepula. Batu batela bisote mu ngakuilu wa difuanyikija malu bu tshimanyinu tshia tshintu tshia patupu anyi tshidibu kabayi bajinga.​—Mis 1:4; Mat 3:12.

  • Buakane.

    Mu Mifundu, ntshidi tshiakane bilondeshile mmuenenu wa Nzambi wa tshidi tshiakane ne tshibi.—Gen 15:6; Dut 6:25; Nsu 11:4; Sef 2:3; Mat 6:33.

  • Bualu busokoka bua tshijila.

    Tshibadi tshia bualu budi Nzambi mulongolole tshidi tshifumina kudi Nzambi, tshilama too ne padi tshikondo tshiende tshikumbana, ne ntshisokoluela anu bantu badiye usungula bua kubamanyishatshi.—Mâk 4:11; Kls 1:26.

  • Budimbu bua mupuya muimpe.

    Mâyi a mutshi mumisha (budimbu) a mishindu kampanda ya mitshi ya Boswellia. Padibu babuosha, budi bupatula dipembu dimpe. Bavua benza nabu musenga wa manananshi wa tshijila uvuabu benza nawu mudimu ku ntenta wa tshitendelelu ne ku ntempelo. Bavua babufila kabidi pamue ne milambu ya ntete ne babuteka mu mulongo wonso wa mampa a dileja mu Muaba wa Tshijila.​—Eks 30:34-36; Lew 2:1; 24:7; Mat 2:11.

  • Bujadiki.

    “Bujadiki” butu butamba kuleja Mêyi Dikumi mafunda pa mabue abidi avuabu bapeshe Mose.—Eks 31:18.

  • Bukalenge bua Nzambi.

    Tshiambilu tshidibu batela nangananga bua bumfumu butambe bunene bua Nzambi buleja mpala kudi mbulamatadi wa bukalenge bua Muanende, Kristo Yezu.​—Mat 12:28; Luk 4:43; 1Ko 15:50.

  • Bukezuke.

    Mu Bible muaku eu udi wakula bua bukezuke bua ku mubidi, udi kabidi wakula bua kulama anyi kupingaja tshintu mu nsombelu udi kayi ne kalema, kayi ne katoba, ne katshiyi ne tshintu tshidi mua kutshishila manyanu, kutshibipisha, anyi kutshinyanga mu bikadilu anyi mu nyuma. Mu Mikenji ya Mose, muaku eu udi uleja dikala bakezuke anyi bakumbane bilondeshile mikenji.​—Lew 10:10; Mis 51:7; Mat 8:2; 1Ko 6:11.

  • Bula.

    Dîna dia ngondo wa 8 mu kalandriye ka tshijila ka bena Yuda ne dia ngondo muibidi  mu kalandriye kavua kakayi ka bena Yuda. Udi ufumina ku muaku udi umvuija “kukuama; kupatula” ne udi utuadija munkatshi mua ngondo wa 10 too ne mua wa 11. (1Bk 6:38)​—Tang. Tshis. B15.

  • Butontolodi.

    Muaku eu mu tshiena Greke (apostasia) udi ufumina ku muaku wa pa muanda udi umvuija ku muaku ku muaku “kuimanyina pa bule ne.” Dîna edi didi ne lungenyi lua “dishiya, dilekela, anyi buntomboji.” Mu Mifundu ya tshiena Greke ya buena Kristo, badi bakula bua “butontolodi” nangananga bua aba badi bumbuka ku ntendelelu mulelela.—Nsu 11:9; Bz 21:21; 2Ts 2:3.

D

  • Dagona.

    Nzambi wa bena Peleshete. Ntuadijilu wa dîna edi ki mmumanyike to, kadi bamue bamanyi badi badisuikakaja ne muaku wa mu tshiena Ebelu wa dagh (mushipa).​—Bal 16:23; 1Sm 5:4.

  • Darike.

    Tshinjanja tshia or tshia bena Pelasa tshia bujitu bua grame 8,4. (1Ku 29:7)​—Tang. Tshis. B14.

  • Dekapoli.

    Tshisumbu tshia bimenga bia bena Greke, tshivua tshienza kumpala ne bimenga 10 (ufumina ku muaku wa tshiena Greke deka, mmumue ne: “10” ne polis, mmumue ne: “tshimenga”). Uvua kabidi dîna dia buloba bua ku est kua Mbuu wa Galela ne Musulu wa Yadene, muaba uvua bia bungi bia ku bimenga ebi bisanganyibua. Ke miaba ivua bilele bia bena Greke ne bungenda mushinga bitamba kuenzekela. Yezu wakapitshila mu buloba ebu, kadi ki mbafunde muaba nansha umue muvuaye mukumbule tshimue tshia ku bimenga ebi. (Mat 4:25; Mâk 5:20)​—Tang. Tshis. A7 ne B10.

  • Diabolo.

    Dîna didibu babikila Satana mu Mifundu ya tshiena Greke ya buena Kristo didi diumvuija “Mushiminyinyanganyi wa malu.” Bavua bapeshe Satana dîna dia Diabolo bualu mmushiminyinyanganyi wa malu munene wa kumpala ne muena dishima udi ubanda Yehowa, ubanda dîyi Diende dimpe ne dîna Diende dia tshijila.​—Mat 4:1; Yne 8:44; Bua 12:9.

  • Dibala dia ngondo.

    Dituku dia kumpala dia ngondo yonso mu kalandriye ka bena Yuda divuabu basekelela bu dituku dia kudisangisha, kuenza bibilu, ne kufila milambu ya pa buayi. Pashishe, dituku edi diakalua dituku dia tshibilu tshia mushinga bua tshisamba, ne bantu kabavua benza mudimu to.​—Nom 10:10; 2Ku 8:13; Kls 2:16.

  • Dibishibua ku lufu.

    Dijuka ku lufu. Muaku wa mu tshiena Greke anastasis udi umvuija ku muaku ku muaku “dijuka; dimana.” Mu Bible mbakule bua bantu 9 bavuabu babishe ku lufu, kusangisha ne dibishibua dia Yezu ku lufu kudi Yehowa Nzambi. Nansha muvuabu babishe bantu bakuabu kudi Eliya, Elisha, Yezu, Petelo ne Paulo, bishima ebi bivua bushuwa bienza ku bukole bua Nzambi. Dibishibua pa buloba dia “bakane ne dia badi kabayi bakane” didi ne mushinga bua tshidi Nzambi mulongolole. (Bz 24:15) Bible udi wakula kabidi bua dibishibua dia kuya mu diulu, didibu babikila kabidi ne: dibishibua “didi didianjila kumpala” anyi “dia kumpala” didi ditangila bana babu ne Yezu bela manyi a nyuma.—Flp 3:11; Bua 20:5, 6; Yne 5:28, 29; 11:25.

  • Dibue dia mpelu.

    Dibue dia tshijengu diteka pa mutu pa dikuabu dia muomumue divuabu bapela nadi ntete bua ilue bukula. Mulonda uvuabu bapayika munkatshi mua dibue dia muinshi uvua wambuluisha bua kunyunguluja divua pa mutu. Ku kale, mu nzubu ya bungi muvua mabue a kupelela avua bantu bakaji bapela nawu. Bu muvua dibue dia kupelela diambuluisha dîku bua kupeta tshiakudia tshia ku dituku, Mikenji ya Mose ivua ikandika dinyengangana dibue edi anyi dibue diadi dia pa mutu bua kudilama bu tshieya. Mabue manene a kupelela a muomumue bavua baanyunguluja kudi nyama.​—Dut 24:6; Mâk 9:42.

  • Dibue dia mu ditumba.

    Dibue diteka mu ditumba dia nzubu, muaba uvua bimanu bibidi bituangana, divua diambuluisha bua kubituangaja ne kubilamakaja. Dibue dinene dia mu ditumba divua dibue dia mu ditumba dia mu tshishimikidi; bavua batamba kusungula dibue dikole bua bimanu bia nzubu anyi bia tshimenga. Badi batela dîna edi mu tshimfuanyi bua difukibua dia buloba, ne badi bakula bua Yezu bu “dibue dia mu ditumba dia tshishimikidi” dia tshisumbu tshia bena Kristo tshidibu bafuanyikija ne nzubu wa mu nyuma.​—Ef 2:20; Yob 38:6.

  • Dibuikila dia mpekatu.

    Mu Mifundu ya tshiena Ebelu, tshilele etshi tshivua tshisuikakaja ne milambu ivuabu bafila bua kuambuluisha bantu bua kusemena kudi Nzambi ne kumutendelela. Mu Mikenji ya Mose, bavua bafila milambu nangananga mu Dituku dia Dibuikila mpekatu dia ku tshidimu bua dilengejangana ne Nzambi dienzeke nansha muvua bantu ne tshisamba tshijima benze mpekatu. Milambu ayi ivua ileja mulambu wa Yezu uvua mubuikidile bukua bantu mpekatu yonso musangu umue bua kashidi, upesha bantu mpunga wa kulengejangana ne Yehowa.—Lew 5:10; 23:28; Kls 1:20; Eb 9:12.

  • Didia dia dilolo dia Mukalenge.

    Didia dilelela dia diampa kadiyi diela luevene ne mvinyo bivua bileja mubidi wa Kristo ne mashi ende;  ntshivulukilu tshia lufu lua Yezu. Bu mudi Bible ulomba bena Kristo bua kuikala kuenza tshibilu etshi, mbikumbane bua kutshibikila kabidi ne: “Tshivulukilu.”​—1Ko 11:20, 23-26.

  • Dielangana manyi.

    Muaku wa mu tshiena Ebelu udi umvuija nangananga “kuela tshintu tshia mâyi mâyi.” Bavua bela muntu anyi tshintu manyi bua kuleja dibanjijibua bua mudimu wa pa buawu. Mu Mifundu ya tshiena Greke ya buena Kristo mbatele kabidi muaku eu bua kuleja ditshikijila bantu basungula nyuma muimpe bua kuya mu diulu.​—Eks 28:41; 1Sm 16:13; 2Ko 1:21.

  • Dijiba dia kapia.

    Muaba wa mu tshimfuanyi udi ‘utema ne kapia ne sufre,’ udibu babikila kabidi ne: “lufu luibidi.” Badi belamu benji ba mpekatu badi kabayi banyingalala, Diabolo, nansha lufu ne Lukita (anyi Hadese). Bu mudibu belamu tshifukibua tshia mu nyuma ne lufu ne Hadese (bintu bidi kabiyi mua kumvua buonso buabi diosha dia kapia), bidi bileja ne: dijiba edi ndia mu tshimfuanyi, ki ndikenga dia tshiendelele to, kadi nkabutu ka tshiendelele.​—Bua 19:20; 20:14, 15; 21:8.

  • Dijimba dile menemene.

    Difumina ku muaku wa tshiena Greke abyssos udi umvuija “tshiondoke bikole” anyi “katshiyi kupima, katshiyi ndekelu.” Badi batela dîna edi mu Mifundu ya tshiena Greke ya buena Kristo bua kuakula bua muaba anyi nsombelu wa buloko. Didi mua kumvuija lukita kadi ki ndolu nkayalu to.​—Luk 8:31; Lom 10:7; Bua 20:3.

  • Dikalaku.

    Mu imue miaba mu Mifundu ya tshiena Greke ya buena Kristo, muaku eu udi uleja dikalaku dia bumfumu dia Yezu Kristo katshia ku tshikondo tshia ditekibua mu nkuasa bu Mukalenge Masiya didi kadiyi dimueneka too ne mu matuku a ku nshikidilu wa ndongoluelu wa malu eu. Dikalaku dia Kristo kadiena anu dilua dia tshianana ne pashishe umbuka lukasa lukasa to; kadi didi diangata mukungulu wa tshikondo tshia pa buatshi.​—Mat 24:3.

  • Dikenga dinene.

    Muaku wa mu tshiena Greke udibu bakudimune ne: “dikenga” udi uleja kanyinganyinga anyi ntatu idi ifumina ku nsombelu mikole. Yezu wakakula bua “dikenga dinene” divua kadiyi dianji kuenzeka divua ne bua kukuata Yelushalema ne nangananga bua divua ne bua kulua kukuata bukua bantu ‘mu dilua diende ne butumbi.’ (Mat 24:21, 29-31) Paulo wakumvuija dikenga edi bu tshienzedi tshia Nzambi tshia buakane bua kuluisha “bantu badi kabayi bamanye Nzambi ne badi kabayi batumikila lumu luimpe” lua Yezu Kristo. Buakabuluibua nshapita wa 19 udi uleja Yezu bu muntu udi ulombola biluilu bia mu diulu bua kuluisha “nyama wa luonji ne bakalenge ba pa buloba ne biluilu biabu.” (2Ts 1:6-8; Bua 19:11-21) “Musumba munene wa bantu” mmuleja bu bantu badi bapanduke mu dikenga dinene edi. (Bua 7:9, 14)​—Tang. ARMAGEDONE.

  • Dikombo dia bukalenge.

    Mutshi anyi mulangala uvuabu bakuata kudi mfumu bu tshimanyinu tshia bukokeshi bua bukalenge.—Gen 49:10; Eb 1:8.

  • Dikuata diya nende.

    Dipata muntu mu ditunga diabu peshi kuabu, misangu ya bungi dikebesha kudi batshimunyi. Muaku eu mu tshiena Ebelu udi umvuija “diya.” Dikuata bena Isalele diya nabu diakenzeka misangu minene ibidi. Bena Ashû bavua bakuate bukalenge bua bisa dikumi bia ku nord kuya nabu, ne pashishe bena Babilona kukuatabu pabu bukalenge bua bisa bibidi bua ku sud kuya nabu. Bashadile ba mu bitupa bibidi ebi bakapingana mu matunga abu ku bulombodi bua Kolesha mukalenge wa bena Pelasa.​—2Bk 17:6; 24:16; Ezl 6:21.

  • Dikunji.

    Tshipanda tshimane tshiambule tshintu, anyi tshintu tshikuabu tshidi tshimane bu tshipanda. Bavua bimanyika amue makunji bua kuvuluka bienzedi anyi malu a kale. Ntempelo ne nzubu ya bukalenge bivua Solomo muibake bivua ne makunji. Batendeledi ba Nzambi ya dishima bakimanyika makunji a tshijila bua ntendelelu wabu wa dishima, ne bena Isalele bakangata pabu tshilele etshi imue misangu. (Bal 16:29; 1Bk 7:21; 14:23)​—Tang. MUTU WA DIKUNJI.

  • Dikunji dia tshijila.

    Dikunji dilulame, nangananga dia dibue, ne bimueneka ne: ntshimfuanyi tshia mubidi wa buntu bulume muimane wa Bâla anyi wa nzambi mikuabu ya dishima.—Eks 23:24.

  • Dilamata Nzambi.

    Dinemeka, ditendelela ne dienzela Yehowa Nzambi mudimu bikale balamate ku bumfumu buende butambe bunene.​—1Tm 4:8; 2Tm 3:12.

  • Dilenge.

    Muaku utubu batela bua bikunyibua bia bungi bitu bikolela nangananga mu bisense. Dilenge didibu bakuila miaba ya bungi ndia Arundo donax. (Yob 8:11; Yes 42:3; Mat 27:29; Bua 11:1)​—Tang. DILENGE DIA KUPIMA NADI BINTU.

  • Dilenge dia kupima nadi bintu.

    Dilenge dia kupima nadi divua bule bua nkubita 6. Bilondeshile nkubita uvua mutambe kumanyika, divua bule bua metre 2,67; bilondeshile nkubita mule, divua bule bua metre 3,11. (Yhz 40:3, 5; Bua 11:1)​—Tang. Tshis. B14.

  • Dilengejangana ne Nzambi.​

    Tang. DIBUIKILA DIA MPEKATU.

  •  Dilongolola.

    Dîna dia dituku dia muladilu wa Nsabatu divua bena Yuda balongolola malu anyi bintu bivua ne mushinga. Dituku edi divua dijika ne dibuela dia dîba dia tshitudi tubikila lelu ne: Ditanu, dîba divua Nsabatu utuadija. Bua bena Yuda, dituku divua dibanga ku dilolo diya too ne ku dilolo dikuabu.​—Mâk 15:42; Luk 23:54.

  • Dinanga dia lulamatu.

    Badi batamba kudikudimuina ku muaku wa tshiena Ebelu wa chesedh, udi uleja dinanga disaka kudi didifila, muoyo mutoke, lulamatu ne dilamata bikole. Badi batamba kuditela bua dinanga didi Nzambi munange nadi bantu, kadi ndinanga didi kabidi bantu balejangana.—Eks 34:6; Lut 3:10.

  • Dinyingalala bua mpekatu.

    Mu Bible, ndishintulula lungenyi pamue ne diumvua kanyinganyinga mu muoyo bua nsombelu wa kale, bienzedi bibi, anyi bua tshivua muntu mupangile bua kuenza. Dinyingalala dilelela didi dipatula mamuma, dishintulula dia bienzedi.​—Mat 3:8; Bz 3:19; 2Pt 3:9.

  • Dipanga bukezuke.

    Didi mua kuikala manyanu a ku mubidi anyi dishipa mikenji ya bikadilu bimpe. Kadi mu Bible muaku eu udi utamba kuleja tshintu tshidi katshiyi tshianyishibue anyi tshikezuke bilondeshile Mikenji ya Mose. (Lew 5:2; 13:45; Mat 10:1; Bz 10:14; Ef 5:5)​—Tang. BUKEZUKE.

  • Dipiana mukaji wa muanenu.

    Tshilele tshiakaluabu kuela mu Mikenji ya Mose tshivua tshianyishila muntu bua kusela mukaji wa muanabu udi mufue kayi mulele muana wa balume bua kulelela muanabu bana bua kutungunuja ndelanganyi yende. Badi batshibikila kabidi ne: dipianangana.​—Gen 38:8; Dut 25:5.

  • Dipumbulula.

    Disangisha bintu bionso bidi bishala ku bintu bia pa madimi bidi banowi bashiye ku bukole anyi bapue muoyo. Mikenji ya Mose ivua ilomba bantu bua kabanowi bintu bionso bia ku mielelu ya madimi abu anyi bua kabapuodi tumuma tua olive tuonso anyi tua mvinyo. Mbukenji buvua Nzambi mupeshe bapele, bakengi, benyi, muana udi mufuishe tatuende, ne mukamba bua kupumbulula bishadile bia pa madimi.​—Lut 2:7.

  • Disama dia mitshi.

    Dimue dia ku masama atu anyanga mitshi makebesha kudi biowelawela. Bakaleja ne: disama dia mitshi didibu batele mu Bible ndimomena difiike (Puccinia graminis).​—1Bk 8:37.

  • Ditempu.

    Tshintu tshia nkata ibidi tshivuabu bakoka kudi kabalu ne tshivuabu kumpala baya natshi mu mvita.​—Eks 14:23; Bal 4:13; Bz 8:28.

  • Ditengudibua.

    Diumbusha dia musoso ku butaka bua muntu mulume. Mbualu buvuabu bambile Abalahama ne ndelanganyi yende bu mukenji, kadi ki mbabulombe bena Kristo to. Badi baditela kabidi mu tshimfuanyi miaba mishilashilangane.​—Gen 17:10; 1Ko 7:19; Flp 3:3.

  • Dituku dia Dibuikila dia mpekatu.

    Dituku dia tshijila dia mushinga mukole bua bena Isalele, bavua badibikila kabidi ne: Yom Kippur (difumina ku muaku wa mu tshiena Ebelu yohm hakkippurim, “dituku dia dibuikila”) divuabu basekelela mu dia 10 ngondo wa Etanima. Edi ke dituku dimuepele dia ku tshidimu divua muakuidi munene ubuela mu Muaba Mutambe Tshijila wa mu ntenta wa tshitendelelu. Muaba au ke uvuaye ulambuila mashi a milambu bua mpekatu yende, ya bena Lewi bakuabu ne ya tshisamba. Tshivua tshikondo tshia didisangisha dia tshijila ne dijila biakudia, ne tshivua kabidi nsabatu, tshikondo tshia kubenga kuenza midimu ya pa tshibidilu.​—Lew 23:27, 28.

  • Dituku dia Dilumbuluisha.

    Dituku disunguluke anyi tshikondo kampanda tshikala bisumbu kampanda, bisamba, peshi bukua bantu mu kabujima ne bua kubadila Nzambi malu. Didi mua kuikala tshikondo tshikalabu ne bua kubutula aba badibu bamona bakumbanyine lufu, anyi dilumbuluisha edi didi mua kupesha bamue mpunga wa kupanda bua kupeta muoyo wa tshiendelele. Yezu Kristo ne bayidi bende bakatela “Dituku dia Dilumbuluisha” ditshilualua didi ditangila ba muoyo ne aba bavua bafue kale.​—Mat 12:36.

  • Dîyi dia buprofete.

    Mukenji muamba ku nyuma, nansha wowu muikale dibuluibua dia disua dia Nzambi anyi diwumanyisha. Dîyi dia buprofete didi mua kuikala dilongesha dia malu a bikadilu diamba ku nyuma, diamba dia dîyi dituma dia Nzambi anyi dilumbuluisha, peshi dimanyisha bualu budi bulua.​—Yhz 37:9, 10; Dan 9:24; Mat 13:14; 2Pt 1:20, 21.

  • Drakma.

    Mu Mifundu ya tshiena Greke ya buena Kristo, muaku eu udi uleja makuta a tshinjanja a bena Greke avua musangu au ne bujitu bua grame 3,4. Mu Mifundu ya tshiena Ebelu, badi bakula bua drakma wa or mu tshikondo tshia bena Pelasa uvua upetangana ne darike. (Neh 7:70; Mat 17:24)​—Tang. Tshis. B14.

E

  • Edoma.

    Dîna dikuabu divuabu bapeshe Esau muana wa Izaka. Ndelanganyi ya Esau (Edoma) yakanyenga buloba bua Sei, buloba bua mikuna budi pankatshi pa Mbuu Mufue ne tshinkonya tshia Akaba. Bakalua kububikila ne: Edoma. (Gen 25:30; 36:8)​—Tang. Tshis. B3 ne B4.

  •  Efa.

    Bungi bua bintu biume buvua bubuela mu efa ne tshipiminu tshine tshivuabu bapima natshi ntete. Uvua upetangana ne tshipiminu tshia mâyi mâyi tshia bata, nunku uvua ubuela litre 22. (Eks 16:36; Yhz 45:10)​—Tang. Tshis. B14.

  • Efelayima.

    Dîna dia muana muibidi wa Jozefe; bakalua kubikila tshimue tshia ku bisa bia Isalele mu dîna edi. Isalele mumane kukosoloka, bu muvua Efelayima tshisa tshinene, wakaleja mpala wa bukalenge bua bisa bionso 10.​—Gen 41:52; Yel 7:15.

  • Efoda.

    Tshilamba tshienze bu kalamba ka mudimu tshivuabu bavuala kudi bakuidi. Muakuidi munene uvua uvuala efoda wa pa buende uvuabu batenteka tshilamba tshia pa tshiadi tshikale ne mabue 12 a mushinga mukole. (Eks 28:4, 6)​—Tang. Tshis. B5.

  • Elula.

    Panyima pa dipatuka mu babilona, dîna dia ngondo muisambombo mu kalandriye ka tshijila ka bena Yuda ne dia ngondo wa 12 mu kalandriye kavua kakayi ka bena Yuda. Uvua utuadija munkatshi mua ngondo wa 8 too ne mua wa 9. (Neh 6:15)​—Tang. Tshis. B15.

  • Epotre.

    Mushindu mushadile wa ntete ya blé (Triticum spelta), ntete yayi kayitu yumbuka mu bizubu bipepele to.—Eks 9:32.

  • Etanima.

    Dîna dia ngondo wa 7 mu kalandriye ka tshijila ka bena Yuda ne dia ngondo wa kumpala mu kalandriye kavua kakayi ka bena Yuda. Uvua utuadija munkatshi mua ngondo wa 9 too ne mua wa 10. Bena Yuda bamane kumbuka mu Babilona, bakamubikila ne: Tishri. (1Bk 8:2)​—Tang. Tshis. B15.

  • Etshiopi.

    Ditunga dia kale dia ku sud kua Ejipitu. Divua dikongoloja tshitupa tshinene tshia ku sud kua Ejipitu wa lelu ne tshia bibidi tshia ku nord kua Soudan wa lelu. Badi batela dîna edi imue misangu bua muaku wa mu tshiena Ebelu “Kusha.”​—Est 1:1.

F

  • Fatoma.

    Tshintu tshia kupima natshi bule bua mâyi tshivua bule bua metre 1,8. (Bz 27:28)​—Tang. Tshis. B14.

G

  • Gera.

    Bujitu bua grame 0,57. Buvua bupetangana ne nshekele 1/20. (Lew 27:25)​—Tang. Tshis. B14.

  • Gilada.

    Bua kuamba bualu pa bualu, mmuaba wa bufuke wa ku est kua Musulu wa Yadene uvua uya too ne ku nord ne ku sud kua Tshibandabanda tshia Yaboka. Imue misangu badi bamutela bua kuleja tshipapu tshijima tshia Isalele tshia ku est kua Yadene, muaba uvua tshisa tshia Lubena, tshia Gada ne tshitupa tshia tshisa tshia Manashe bisombele. (Nom 32:1; Yos 12:2; 2Bk 10:33)​—Tang. Tshis. B14.

  • Gitita.

    Muaku wa mu dimba misambu udi ne diumvuija kadiyi dimanyike nansha mudiwu bu udi ufumina ku muaku wa tshiena Ebelu gath. Bamue badi bela meji ne: udi mua kuikala mujiki mulamakaja ne misambu misuikakaja ne dienza mvinyo, bualu gath udi uleja tshikaminu tshia mvinyo.—Mis 81:Mut.

H

  • Hadese.

    Muaku wa mu tshiena Greke udi upetangana ne wa mu tshiena Ebelu wa “Sheole.” Badi bamukudimuna ne: “Lukita” (bafunde dileta dia kumpala mu bunene), bua kuleja lukita lua bukua bantu buonso.​—Tang. LUKITA.

  • Helode.

    Dîna dia dîku dia bakalenge divua dilombola bena Yuda diteka kudi Lomo. Wa kumpala uvua Helode Munene, mumanyike bikole bua dibakulula dia ntempelo mu Yelushalema ne bua dituma dîyi bua bashipe bana mu lungenyi lua kubutula Yezu. (Mat 2:16; Luk 1:5) Helode Âkelao ne Helode Antipa, bana ba Helode Munene, bavua batekibue ku mutu kua miaba ivua tatuabu ukokesha. (Mat 2:22) Antipa uvua mukokeshi wa tshitupa tshinayi tshia provense, uvua muende lumu bu “mukalenge” uvua mukokeshe mu bidimu bisatu ne tshitupa bia mudimu wa Kristo too ne ku tshikondo tshidibu bafunde Bienzedi 12. (Mâk 6:14-17; Luk 3:1, 19, 20; 13:31, 32; 23:6-15; Bz 4:27; 13:1) Pashishe muanjelu wa Yehowa wakashipa Helode Agipa wa kumpala, muikulu wa Helode Munene yeye mumane kukokesha bua tshikondo tshîpi. (Bz 12:1-6, 18-23) Muanende, Helode Agipa muibidi, wakalua mukalenge ne wakakokesha too ne ku tshikondo tshivua bena Yuda batombokele Lomo.—Bz 23:35; 25:13, 22-27; 26:1, 2, 19-32.

  • Hême.

    Nzambi wa bena Greke, muana wa Zeuse. Mu Luseta, bantu bakatupakana kubikilabu Paulo ne: Hême bua mudimu uvuabu bela meji ne: ke uvua nawu nzambi au wa kuikala mutuadi wa mêyi wa banzambi ne nzambi uvua ne tshipedi tshia kuakula.—Bz 14:12.

  • Higayone.

    Muaku wa dilombola nawu dimba dia misambu. Anu mudibu bawutele mu Musambu 9:16, muaku eu udi mua kuleja dimanyika dia lunzenze luvua ludila bikole anyi dimanyika mijiki bua kuelangana meji.

  • Hine.

    Tshipiminu tshia bintu bia mâyi mâyi ne mulondo watshi. Tshivua tshibuela litre 3,67. (Eks 29:40)​—Tang. Tshis. B14.

  • Holeba; mukuna wa Holeba.

    Buloba bua mikuna budi bunyunguluke mukuna wa Sinai. Ndîna dikuabu dia mukuna wa Sinai. (Eks 3:1; Dut 5:2)​—Tang. Tshis. B3.

  •  Homer.

    Tshipiminu tshia bintu biume tshidi tshipetangana ne tshia kore. Tshidi tshibuela litre 220 bilondeshile bunene butshinka bua tshipiminu tshia bata. (Lew 27:16)​—Tang. Tshis. B14.

I

  • Iluliko.

    Provense wa mu Lomo ku nord lua ku ouest kua Grese. Paulo wakaya too ne muaba eu mu mudimu wende, kadi ki mbambe bikalaye muyishe mu Iluliko anyi mubandaku tshianana to. (Lom 15:19)​—Tang. Tshis. B13.

  • Isalele.

    Dîna divua Nzambi mupeshe Yakoba. Bakalua kudibikila ndelanganyi yende yonso mu kabujima, mu tshikondo kayi tshionso. Misangu ya bungi bavua babikila ndelanganyi ya bana ba balume ba Yakoba 12 ne: bana ba Isalele, nzubu wa Isalele, tshisamba tshia (bantu ba mu) Isalele, anyi bena Isalele. Bavua kabidi babikila bukalenge bua bisa 10 bua ku nord buvua bukosoloke ne bukalenge bua ku sud ne: Isalele, ne pashishe mbalue kubikila bena Kristo bela manyi ne: “Isalele wa Nzambi.”—Gal 6:16; Gen 32:28; 2Sm 7:23; Lom 9:6.

  • Izope.

    Kamutshi ka tutamba tukese ne mabeji kavuabu bamiamina naku mashi anyi mâyi mu malu a dilengejangana. Kavua pamuapa tshisonsa tshia marjolaine (Origanum maru; Origanum syriacum). Mu Yone 19:29 izope udi mua kuikala tshisonsa tshia marjolaine tshisuikila ku ditamba anyi ku doura, mushindu kampanda wa mponda, (Sorghum vulgare), bualu tshikunyibua etshi tshivua mua kuikala ne tshikolakola bule bukumbane bua kufikisha musukula mpampa uvua ne mvinyo wa buanji mukana mua Yezu.​—Eks 12:22; Mis 51:7.

K

  • Kaba.

    Tshipiminu tshia bintu biume tshia litre 1,22 tshilondeshila bunene butshinka bua tshipiminu tshia bata. (2Bk 6:25)​—Tang. Tshis. B14.

  • Kaisa.

    Dîna dia dîku dia mu Lomo diakalua muanzu wa bakalenge bena Lomo. Mu Bible mbatele Augusto, Tibelio, ne Kulaudio mu mêna abu, ne nansha mudibu kabayi batele Neron mu dîna diende, muanzu eu udi umukumbanyina pende. Mbatele kabidi “Kaisa” mu Mifundu ya tshiena Greke ya buena Kristo bua kuleja bakokeshi anyi mbulamatadi.​—Mâk 12:17; Bz 25:12.

  • Kakunakuna.

    Tshibumba kampanda tshia mu Tshimenga tshia Davidi. Kavua mua kuikala bimanu bienze bu mabula bivua bikuba anyi bintu bikuabu bivua bienza mudimu wa muomumue.​—2Sm 5:9; 1Bk 11:27.

  • Kanâna.

    Muikulu wa Noa ne muana muinayi wa Hama. Bisa 11 bivua bifumine kudi Kanâna biakalua kusombela mu buloba bua ku est kua Mbuu wa Mediterane pankatshi pa Ejipitu ne Sulia. Bakabikila muaba au ne: “buloba bua Kanâna.” (Lew 18:3; Gen 9:18; Bz 13:19)​—Tang. Tshis. B4.

  • Kasada; bena Kasada.

    Kumpala bivua buloba ne bantu bavua basombele muaba uvua musulu wa Tigele ne wa Pelata idielela mu mbuu; pashishe bavua batela mêna aa bua Babilona mujima ne bantu bavuamu. Bena Kasada bavua baleja kabidi kasumbu ka bantu bavua bashidimuke bavua balonge malu a sianse, malu a kale, malu a miakulu, ne a mabulungu, kadi bavua ne majimbu ne lubuku lua mitoto kabidi.​—Ezl 5:12; Dan 4:7; Bz 7:4.

  • Kasala ka muadi.

    Musambu mufunda anyi muimba udi uleja dibungama dikole, bu mudi (kanyinganyinga) dibungama bua lufu lua mulunda anyi lua munangibue; peshi muadi.​—2Sm 1:17; Mis 7:Mut.

  • Kasia.

    Bintu bienza ne bizubu bia mutshi wa kasia (Cinnamomum cassia) udi mufuanangane ne mutshi wa kinamona. Bavua bangata kasia bu manananshi ne bu tshintu tshia kuela mu manyi a tshijila a kuelangana.​—Eks 30:24; Mis 45:8; Yhz 27:19.

  • Kasulu ka tshilonda nkoka.

    Tshibandabanda anyi njila wa kasulu udi misangu ya bungi mume pa kumbusha mu mvula; tshiambilu etshi tshidi kabidi mua kuleja kasulu kine. Tumue tusulu tuvua tupetela mâyi ku mishimi, nunku katuvua tuma to. Mu imue mvese, badi babikila kasulu ka tshilonda nkoka ne: “tshibandabanda.”—Gen 26:19; Nom 34:5; Dut 8:7; 1Bk 18:5; Yob 6:15.

  • Kasumbu ka malu a ntendelelu.

    Tshisumbu tshia bantu badi balamate dilongesha anyi mulombodi kampanda ne balonda malu adibu bitabuja. Badi batela muaku eu bua kuakula bua bitupa bibidi biende lumu bia buena Yuda: Bafalese ne Basadoke. Bantu bavua kabayi bena Kristo bavua pabu babikila buena Kristo ne: “kasumbu ka malu a ntendelelu” anyi “kasumbu ka bena Nazaleta,” pamuapa bela meji ne: kavua kakosoloke ku buena Yuda. Ndekelu wa bionso, tusumbu tuakenzeka mu tshisumbu tshia bena Kristo; mbatele “kasumbu ka Nikolao” mu mukanda wa Buakabuluibua.—Bz 5:17; 15:5; 24:5; 28:22; Bua 2:6; 2Pt 2:1.

  • Kemoshe.

    Nzambi munene wa bena Moaba.​—1Bk 11:33.

  • Kiseleu.

    Panyima pa difuma dia bena Yuda mu Babilona, dîna dia ngondo wa 9 mu kalandriye ka tshijila ka bena Yuda ne dia ngondo muisatu mu kalandriye kavua kakayi ka bena Yuda. Uvua utuadija munkatshi mua ngondo  wa 11 too ne mua wa 12. (Neh 1:1; Zek 7:1)​—Tang. Tshis. B15.

  • Koraye.

    Tshintu tshikole, tshienze bu dibue tshienza kudi mifuba ya tunyama tua mu mbuu. Udi mu mbuu mualabale mu mekala a bungi, bu mudi: dikunze, ditoke ne difiike. Koraye ivua ya bungi nangananga mu Mbuu Mukunze. Ku kale bavua bangata koraye mutoke ne mushinga wa bungi ne bavua benza nende masanga ne bilengejilu bikuabu.​—Nsu 8:11.

  • Kore.

    Tshipiminu tshia bintu biume ne bia mâyi mâyi. Tshivua tshibuela litre 220 bilondeshile bunene butshinka bua tshipiminu tshia bata. (1Bk 5:11)​—Tang. Tshis. B14.

  • Kristo.

    Muanzu wa Yezu wa mu tshiena Greke Khristos udi upetangana ne muaku wa mu tshiena Ebelu mukudimuna ne: “Masiya,” anyi “Muela manyi.”​—Mat 1:16; Yne 1:41.

  • Kujila biakudia; tshijila tshia biakudia.

    Kubenga kudia biakudia bionso bua tshikondo kampanda. Bena Isalele bavua bajila biakudia Dituku dia Dibuikila dia mpekatu, mu bikondo bia ntatu anyi pavuabu bakeba bulombodi bua kudi Nzambi. Bena Yuda bakateka misangu inayi ya dijila biakudia ku tshidimu bua kuleja bikondo bia ntatu bivuabu bapete. Ki mbalombe bena Kristo bua kujila biakudia to.​—Ezl 8:21; Yes 58:6; Luk 18:12.

  • Kushipa mikenji; Matomboka.

    Kusambuka mukenji muela; tshienzedi tshia kusambuka mukenji. Kudi diatshimue ne “mpekatu” mu Bible.—Mis 51:3; Lom 5:14.

  • Kushipula; muaba wa kushipuila.

    Mudimu wa kumbusha ntete ku tukolakola ne mu bizubu; muaba uvuabu benzela mudimu eu. Bavua bashipula ku bianza ne mutshi, anyi bua ntete ya bungi, bavua bashipula ne tshintu tshia pa buatshi, bu mudi bintu bia kushipula nabi anyi nkata bikoka kudi nyama. Bavua bendeshila bintu ebi pa ntete ivuabu babaale muaba wa kushipuila, muaba mubatalale wa tshijengu nangananga pa muaba mutumbuke udi lupepele lututa.—Lew 26:5; Yes 41:15; Mat 3:12.

  • Kutenteka bianza pa mutu.

    Bavua batentekela muntu bianza bua kumuteka mu mudimu wa pa buawu anyi bua kumusungula bua dibenesha kampanda, luondapu anyi dipa dia nyuma muimpe. Imue misangu bavua batentekela nyama bianza kumpala kua kuyilambula.​—Eks 29:15; Nom 27:18; Bz 19:6; 1Tm 5:22.

L

  • Lahaba.

    Dîna didibu batele mu tshimfuanyi mu mukanda wa Yobo, Misambu, ne Yeshaya (ki ndia kubuejakaja ne Lahaba, mukaji wa mu mukanda wa Yoshua to). Mu mukanda wa Yobo, mvese idi pabuipi nende idi ituambuluisha bua kumanya mudi Lahaba muikale nyama munene wa mu mâyi; mu mvese mikuabu badi batela nyama munene wa mu mâyi eu bu tshimfuanyi tshia Ejipitu.​—Yob 9:13; Mis 87:4; Yes 30:7; 51:9, 10.

  • Lepitona.

    Pavuabu bafunda Mifundu ya tshiena Greke ya buena Kristo, ntshinjanja tshitambe bukese tshia tshiamu tshia mitaku anyi tshikunze tshia bena Yuda. Mbamukudimune mu imue Bible ne: “tuntu tukese.” (Mâk 12:42; Luk 21:2; dim.)​—Tang. Tshis. B14.

  • Leviyatane.

    Nyama udibu batamba kusuikakaja ne mâyi, bimueneka ne: ntshifukibua tshia mu mâyi. Mu Yobo 3:8 ne 41:1, udi mua kuikala ngandu anyi tshifukibua tshikuabu tshia mu mâyi tshinene tshia bukole. Mu Misambu 104:26 udi mua kuikala balene wa mushindu kampanda. Miaba mikuabu mbamutele mu tshimfuanyi ne ki mbu nyama kampanda to.​—Mis 74:14; Yes 27:1.

  • Lewi; muena Lewi.

    Muana muisatu wa Yakoba ne mukajende Lea; bakinyika kabidi tshisa dîna edi. Bana bende basatu ba balume bakalua benji ba bitupa binene bisatu bia tshivuabu babikila ne: buakuidi bua bena Lewi. Imue misangu, muaku “bena Lewi” udi uleja tshisa tshijima, kadi misangu ya bungi kawutu uleja dîku dia buakuidi dia Alona to. Tshisa tshia Lewi katshivua tshipete tshitupa tshia buloba mu Buloba Bulaya to, kadi bavua batshipeshe bimenga 48 mu mikalu ya buloba buvuabu bapeshe bisa bikuabu.​—Dut 10:8; 1Ku 6:1; Eb 7:11.

  • Loga.

    Tshipiminu tshitambe bukese tshia bintu bia mâyi mâyi tshidibu batele mu Bible. Mu mukanda wa Talmud wa bena Yuda, badi batshitela bu tshia 12 tshia hine, nanku tuetu bangatshile muaba eu, loga uvua mua kuikala bungi bua litre 0,31. (Lew 14:10)​—Tang. Tshis. B14.

  • Luevene.

    Tshintu tshidibu basambakaja ne bukula busopa bua bubande anyi ne bintu bia mâyi mâyi bua bizaze; nangananga ndambu wa bukula busopa bubandisha budibu bumbushe mu bua kumpala bua kubulama. Bible udi utamba kumutela bu tshimfuanyi tshia mpekatu anyi dinyanguka, badi bamutela kabidi bua kuleja didiunda disokome anyi didi ditangalaka.​—Eks 12:20; Mat 13:33; Gal 5:9.

  • Lukita.

    Padibu balufunda ne dileta dia kumpala dikese, ludi luleja lukita lua muntu; padibu balufunda ne dileta dinene ludi luleja lukita lua bukua bantu buonso, lupetangana ne “Sheole” wa mu tshiena Ebelu ne “Hadese” wa mu tshiena Greke. Badi balutela mu Bible bu muaba wa mu tshimfuanyi anyi nsombelu  mudi kamuyi mudimu anyi dimanya bualu.​—Gen 47:30; Mbi 9:10; Bz 2:31.

  • Lukita lua tshivulukilu.

    Muaba wa kujiikilangana uvuabu bateka bishadile bia mubidi wa muntu uvua mufue. Muaku eu udi ufumina ku muaku wa tshiena Greke mnemeion udi ufuma ku muaku wa pa muanda “kuvuluka,” bua kuleja ne: mbavuluke muntu udi mufue.—Yne 5:28, 29.

  • Lumu luimpe.

    Mu Mifundu ya tshiena Greke ya buena Kristo, ndumu luimpe lua Bukalenge bua Nzambi ne lua lupandu mu ditabuja Yezu Kristo.—Luk 4:18, 43; Bz 5:42; Bua 14:6.

  • Lupangu; Lubanza.

    Muaba mubululuke uvua munyunguluke ntenta wa tshitendelelu uvua mukange, pashishe umue wa ku miaba mibululuke miela bimanu minyunguluke nzubu wa ntempelo. Tshioshelu tshia mulambu wa kuosha tshivua mu lupangu lua ntenta wa tshitendelelu ne mu lubanza lua munda lua ntempelo. (Tang. Tshis. B5, B8, B11.) Bible udi wakula kabidi bua mpangu padiye wakula bua nzubu ne mabalasa.​—Eks 8:13; 27:9; 1Bk 7:12; Est 4:11; Mat 26:3.

  • Lusengu.

    Bakula bua nsengu ya nyama ivuabu banuina bintu, belela mafuta, balamina mâyi a mukanda ne bintu bia kudilengeja nabi, ne bavua bimba nayi misambu anyi bamanyisha nayi malu. (1Sm 16:1, 13; 1Bk 1:39; Yhz 9:2) Misangu ya bungi batu batela “lusengu” mu tshimfuanyi bua kuleja bukole, dikuata, ne ditshimuna.—Dut 33:17; Mik 4:13; Zek 1:19.

  • Lusumuinu.

    Dîyi dia meji anyi muyuki muîpi udi ulongesha peshi uleja bulelela bunene mu mêyi makese menemene. Lusumuinu lua mu Bible ludi mua kuikala ngakuilu musokome anyi nshinga. Lusumuinu ludi ne bulelela mu ngakuilu udi uleja malu patoke, misangu ya bungi mu diafuanyikija. Amue mêyi akalua biambilu bia kusekangana nabi anyi kupetulangana nabi bua bamue bantu.​—Mbi 12:9; 2Pt 2:22.

M

  • Madilu.

    Dileja kanyinganyinga bua lufu anyi bua dikenga kampanda. Mu tshikondo tshivuabu bafunda Bible, bantu bavua ne tshibidilu tshia kuenza madilu bua tshikondo bule kampanda. Pa kumbusha didila ne dîyi dikole, bantu bavua mu madilu bavua bavuala bilamba bia pa buabi, badiela butu mu mutu, badipanda bilamba, ne badikuma pa tshiadi. Imue misangu bavua babikidisha badidi ba muadi bapiluke pavuabu benza amue malu dîba dia kujiikangana.​—Gen 23:2; Est 4:3; Bua 21:4.

  • Mahalata.

    Muaku wa mu dimba dia misambu udi mu mutu wa mukanda wa Musambu wa 53 ne wa 88. Udi mua kuikala upetangana ne muaku wa pa muanda wa tshiena Ebelu udi umvuija “kuteketa; kusama,” nunku ufila tshikuma tshia kanyinganyinga ne dibungama tshidi tshipetangana ne malu a dibungama adi mu misambu ibidi eyi.

  • Makedonia.

    Buloba bua ku nord kua Grese buvua buende lumu mu bukokeshi bua Alexandre Munene ne bushale budikadile too ne pavua bena Lomo babutshimune. Makedonia uvua provense wa Lomo pavua mupostolo Paulo muye ku Mputu musangu wa kumpala. Paulo wakaya muaba eu misangu isatu. (Bz 16:9)​—Tang. Tshis. B13.

  • Malakama.

    Pamuapa ndîna dimue ne Moleke, nzambi munene wa bena Amona. (Sef 1:5)​—Tang. MOLEKE.

  • Malu a mîdima.

    Ditabuja dia ne: nyuma ya bafue idi ishala ne muoyo padi mubidi ufua ne idi mua kuyukila anyi idi iyukila ne badi ne muoyo, nangananga ku butuangaji bua muntu (muena lubuku) udi ku buenzeji buayi. Muaku wa tshiena Greke udibu bakudimune ne: ‘kuenza malu a mîdima’ udi pharmakia udi umvuija ku muaku ku muaku “kunua kua diamba.” Bakalua kusuikakaja muaku eu ne malu a mîdima bualu kale bavua banua bintu bidi bikuatangana bu mudi diamba pavuabu babikila bukole bua bademon bua kuenza malu a mupongo.—Gal 5:20; Bua 21:8.

  • Mampa a dileja.

    Mampa 12 avuabu bateka mu mishiki ibidi ya mampa 6 pa mêsa mu tshibambalu tshia Tshijila tshia ntenta wa tshitendelelu ne tshia ntempelo. Bavua baabikila kabidi ne: “milongo ya mampa” anyi “mampa a mulambu.” Mulambu wa kupesha Nzambi eu bavua bawushintulula ne mampa mapiamapia dia Nsabatu dionso. Mampa avuabu bumbusha bavua baadia anu kudi bakuidi. (2Ku 2:4; Mat 12:4; Eks 25:30; Lew 24:5-9; Eb 9:2)​—Tang. Tshis. B5.

  • Mampa a mulambu.​—

    Tang. MAMPA A DILEJA.

  • Mampa kaayi mela luevene.

    Adi aleja mampa menza kakuyi luevene.—Dut 16:3; Mâk 14:12; 1Ko 5:8.

  • Mamuma a kumpala.

    Bintu bia kumpala bia mu tshikondo tshia dipuola; bipeta anyi bintu bia kumpala bia tshintu kampanda. Yehowa uvua mulombe tshisamba tshia Isalele bua tshimupeshe bintu biatshi bia kumpala, nansha biobi bikale muntu, nyama anyi bintu bidi buloba bupatula. Bena Isalele, bu tshisamba, bavua bapesha Nzambi bintu bia kumpala bia pa madimi mu Tshibilu tshia Mampa kaayi mela Luevene ne mu Pentekoste. Mbatele kabidi tshiambilu “mamuma a kumpala” mu  tshimfuanyi bua kuakula bua Kristo ne bayidi bende bela manyi.​—1Ko 15:23; Nom 15:21; Nsu 3:9; Bua 14:4.

  • Mana.

    Tshiakudia tshinene tshia bena Isalele mu bidimu 40 mu tshipela. Yehowa ke uvua uafila. Avua amueneka panshi mu lumuma mu tshishima mu dinda dionso pa kumbusha dituku dia Nsabatu. Pavua bena Isalele baamone bua musangu wa kumpala bakakonka ne: “Ntshinyi etshi?” anyi mu tshiena Ebelu ne: “man hu?” (Eks 16:13-15, 35) Miaba mikuabu badi baatela bu “lutete lua mu diulu” (Mis 78:24), “mampa a mu diulu” (Mis 105:40), ne “biakudia bia bilobo” (Mis 78:25). Yezu wakakula pende bua mana mu ngumvuilu wa mu tshimfuanyi.​—Yne 6:49, 50.

  • Manda a mu bule.

    Mu diluka bilamba, ntshisumbu tshia manda adi mu bule bua tshilamba. Manda a mu butshiama mmanda maluka enda apitshila pa mutu ne muinshi mua aa mu tshilamba.—Bal 16:13.

  • Manda a mu butshiama.

    Mu diluka bilamba, ntshisumbu tshia manda adi mu butshiama bua tshilamba. Bavua baaluka enda apitshila pa mutu ne muinshi mua manda a mu bule bua tshilamba.—Lew 13:59.

  • Masandi.

    Muaku mufumine ku muaku wa tshiena Greke porneia udi uleja disangila dionso didi dibengangana ne mikenji. Udi ukongoloja masandi a basele, bundumba, disangila dia bantu badi kabayi baselangane, disangila dia balume ne balume anyi dia bakaji ne bakaji, ne disangila ne nyama. Mbatele muaku eu mu tshimfuanyi mu Buakabuluibua bua ndumba wa mu malu a Nzambi udibu babikila ne: “Babilona Munene” bua kumvuija mudiye mubuelakane ne bamfumu ba pa buloba ebu bua kupeta bukokeshi ne bintu bia ku mubidi. (Bua 14:8; 17:2; 18:3; Mat 5:32; Bz 15:29; Gal 5:19)—Tang. NDUMBA.

  • Masikile.

    Muaku wa mu tshiena Ebelu udi ne diumvuija kadiyi dimanyike bimpe udi mu mitu ya mikanda ya misambu 13. Udi mua kuikala umvuija “kasala ka diela meji.” Bamue badi bela meji ne: muaku wa muomumue udibu bakudimuna ne: ‘kuenza mudimu ne meji’ udi mua kuikala ne diumvuija dia muomumue.​—2Ku 30:22; Mis 32:Mut.

  • Masiya.

    Muaku udi ufumina ku wa tshiena Ebelu udi umvuija “muela manyi” anyi “muntu muela manyi.” “Kristo” mmuaku umue umue au mu tshiena Greke.​—Dan 9:25; Yne 1:41.

  • Matuku a ku nshikidilu.

    Tshiambilu etshi ne bikuabu bia muomumue bu mudi: “ku ndekelu kua matuku,” mbabitele mu mêyi a buprofete a mu Bible bua kuleja tshikondo tshikala malu avuabu balaye ne bua kutua ku tshibungubungu. (Yhz 38:16; Dan 10:14; Bz 2:17) Bilondeshile tshidi mêyi a buprofete aleja, tshidi mua kuikala tshikondo tshia bidimu anu bikese anyi bia bungi. Misangu ya bungi Bible udi wakula bua tshiambilu etshi bua kuleja “matuku a ku nshikidilu” a ndongoluelu wa malu eu, mu dikalaku dia Kristo didi kadiyi dimueneka.​—2Tm 3:1; Yak 5:3; 2Pt 3:3.

  • Mazuwa a ku Tâshishi.

    Kumpala, dîna divuabu babikila mazuwa avua aya ku Tâshishi wa kale (Espanye wa lelu). Bidi bimueneka ne: ndekelu wa bionso dîna edi diakashala dia mazuwa manene avua akumbana kuenza ngendu mile. Solomo ne Yehoshafata bakenza mudimu ne mazuwa a nunku bua malu a mishinga.—1Bk 9:26; 10:22; 22:48.

  • Mbalanda wa Solomo.

    Mu ntempelo wa mu matuku a Yezu, ndutanda luvua bantu bapitshila luvua ku est kua lubanza lua pambelu, luvua bantu ba bungi bela meji ne: ntshishadile tshia ku ntempelo wa Solomo. Yezu wakendelamu mu “tshikondo tshia mashika makole,” ne bena Kristo ba kumpala bavua batuilanganamu bua kutendelela. (Yne 10:22, 23; Bz 5:12)​—Tang. Tshis. B11.

  • Melodaka.

    Nzambi munene wa tshimenga tshia Babilona. Hammourabi mukalenge wa bena Babilona ne mubeledi wa mikenji mumane kuvuija Babilona tshimenga tshikulu tshia bukalenge bua Babilona, Melodaka (anyi Mardouk) wakapeta lumu lua bungi, ne ndekelu wa bionso wakumbusha ndambu wa nzambi ya kale ne kuluaye nzambi munene wa nzambi ya bena Babilona. Pashishe muanzu “Belu” (“Muena bintu”) wakapingana pa muaba wa dîna Melodaka (anyi Mardouk), ne bakavua batamba kubikila Melodaka ne: Bele.​—Yel 50:2.

  • Mfumu mulombodi.

    Muena mbulamatadi uvua kuinshi kua muleji mpala wa mfumu mu mbulamatadi wa Babilona. Mu Bible, bamfumu balombodi bavua ne bukokeshi ku mutu kua bena meji ba ku tshilumbuluidi tshia bena Babilona. Mbabatele kabidi mu bukokeshi bua mukalenge Dayawesha muena Madayi.​—Dan 2:48; 6:7.

  • Mfumu wa bakuidi.

    Dîna ditubu batela pa muaba wa “muakuidi munene” mu Mifundu ya tshiena Ebelu. Mu Mifundu ya tshiena Greke ya buena Kristo, tshiambilu “bamfumu ba bakuidi” tshivua tshileja patoke bantu banene ba mu bakuidi, bakongoloja pamuapa ne bakuidi banene bonso bavuabu bumbushe mu buakuidi ne bamfumu ba bisumbu 24 bia bakuidi.​—2Ku 26:20; Ezl 7:5; Mat 2:4; Mâk 8:31.

  •  Mfumu wa banjelu.

    Bu mudi Bible wakula bua “mfumu wa banjelu” anu ku bumue, bidi bileja ne: kudi mfumu wa banjelu anu umue. Bible udi ufila dîna dia mfumu wa banjelu, uleja ne: m’Mikaele.—Dan 12:1; Yuda 9; Bua 12:7.

  • Mikenji.

    Padibu bafunda babanga ne dileta dinene, bidi bileja Mikenji ya Mose anyi mikanda itanu ya kumpala ya mu Bible. Padibu babanga ne dileta dikese, udi mua kuleja mikenji ya mu Mikenji ya Mose anyi dîyi dinene dia mukenji kampanda.​—Nom 15:16; Dut 4:8; Mat 7:12; Gal 3:24.

  • Mikenji ya Mose.

    Mikenji ivua Yehowa mupeshe Isalele ku butuangaji bua Mose mu tshipela tshia Sinai mu 1513 K.B.B. Batu batamba kubikila mikanda itanu ya ntuadijilu ya mu Bible ne: Mikenji.​—Yos 23:6; Luk 24:44.

  • Miketame.

    Muaku wa tshiena Ebelu udi mu mitu ya mikanda ya misambu 6. (Mis 16, 56-60) Mmuaku udi diumvuija diawu kadiyi dimanyike nansha mudiwu mua kuikala upetangana ne muaku “mufundu.”

  • Milekoma.

    Nzambi uvua bena Amona batendelela, pamuapa nnzambi umue umue ne Moleke. (1Bk 11:5, 7) Lua ku ndekelu kua bukokeshi bua Solomo, wakibakila nzambi wa dishima eu miaba mitumbuke.​—Tang. MOLEKE.

  • Mina.

    Mbamubikile kabidi mu Yehezekele ne: manehe. Bavua bapima nende bujitu ne mushinga wa makuta. Bilondeshile bintu bia kale biangula bidi bileja muvua mina umue ne nshekele 50 (ne nshekele umue ne bujitu bua grame 11,4), mina wa mu Mifundu ya tshiena Ebelu uvua ne bujitu bua grame 570. Kuvua kabidi mua kuikala mina wa bakalenge, anu bu mudibi bua nkubita. Mu Mifundu ya tshiena Greke ya buena Kristo, mina uvua ne drakma 100. Uvua ne bujitu bua grame 340. Ntalanta umuepele uvua wangata mina 60. (Ezl 2:69; Luk 19:13)​—Tang. Tshis. B14.

  • Mire (Mula).

    Budimbu bua mupuya muimpe buvuabu bapetela ku mitshi ya mêba ya mishindu ne mishindu anyi ku tumitshi tukese tua Commiphora. Mire uvua tshimue tshia ku bintu bivuabu benza nabi manyi a tshijila avuabu belangana. Bavua bamuela ku bintu bu mudi bilamba anyi malalu bu manananshi, ne bavua bamusambakaja ne mafuta bua kukama mubidi ne kulaba pambidi. Bavua kabidi bela bitalu mire bua kubilongolola bua kubijiika.​—Eks 30:23; Nsu 7:17; Yne 19:39.

  • Moleke.

    Nzambi wa bena Amona; pamuapa ngua diatshimue ne Malakama, Milekoma ne Moloke. Tshidi mua kuikala muanzu patupu katshiyi dîna dia nzambi kampanda to. Mikenji ya Mose ivua ikosela muntu uvua ulambula bana bende kudi Moleke tshibawu tshia lufu.​—Lew 20:2; Yel 32:35; Bz 7:43.

  • Moloke.​

    Tang. MOLEKE.

  • Mparadizu.

    Lupangu lulengele anyi budimi bua mitshi ne bilongo buenze bu lupangu. Muaba wa kumpala wa nunku uvua Edene uvua Yehowa muenze bua bantu babidi ba kumpala. Pavua Yezu wakula ne muena tshibawu uvua ku luseke luende pa mutshi wa makenga, wakaleja ne: buloba nebulue mparadizu. Mu 2 Kolinto 12:4, muaku eu udi bushuwa uleja mparadizu udi ulua, ne mu Buakabuluibua 2:7 udi uleja mparadizu wa mu diulu.​—Mso 4:13; Luk 23:43.

  • Mpasu.

    Mushindu kampanda wa bishi bidi bibuka bienza ngendu mu bisumbu binene. Mu Mikenji ya Mose bavua bayimona mikezuke bua kudia. Bavua bamona bisumbu binene bia mpasu bivua bidia tshintu tshionso tshia muaba uvuabi bikila ne binyangakaja bintu bikole bu tshipupu.—Eks 10:14; Mat 3:4.

  • Mpeta wa kutua nende tshitampi.

    Mushindu wa tshitampi tshivuabu bela ku munu anyi ku nshinga, imue misangu bavuala mu nshingu. Uvua uleja bukokeshi bua mfumu anyi bua mukokeshi kampanda. (Gen 41:42)​—Tang. TSHITAMPI.

  • Mpingu; ditendelela mpingu.

    Lupingu ntshimfuanyi, tshifuanyikijilu tshia tshintu kampanda, tshilelela anyi tshifuanyikija tshidi bantu mua kutendelela natshi. Ditendelela mpingu ndinemekela lupingu, dilunanga, diluvuija nzambi, anyi dilukukuila.​—Mis 115:4; Bz 17:16; 1Ko 10:14.

  • Mpungi.

    Tshintu tshia kupudijila tshia tshiamu tshivuabu bamanyishangana natshi malu ne bimba natshi mijiki. Bilondeshile Nomba 10:2, Yehowa wakamba bua kuenza mpungi ibidi ya tshiamu tshia arjan ivuabu ne bua kuela mu mushindu musunguluke bua kusangisha bantu, kuasa luendu, anyi kumanyisha mvita. Bidi bimueneka ne: ivua mpungi milulame, mishilangane ne mpungi ya “nsengu” mikobame ivuabu benza ne nsengu ya nyama. Mpungi ya mushindu udi kawuyi mumanyike ivua kabidi mu biombelu bia mijiki bia ku ntempelo. Tshiona tshia mpungi tshitu misangu ya bungi mu tshimfuanyi tshienda pamue ne dimanyisha dia malumbuluisha a Yehowa anyi malu makuabu manene a kudi Nzambi.—2Ku 29:26; Ezl 3:10; 1Ko 15:52; Bua 8:7–11:15.

  • Muaba munsantu.

    Pa tshibidilu, muaba muteka pa bule bua ntendelelu, muaba wa tshijila. Kadi utu utamba kuleja ntenta wa tshitendelelu anyi ntempelo wa mu Yelushalema. Badi batela kabidi dîna edi bua muaba utu Nzambi  usombela mu diulu.—Eks 25:8, 9; 2Bk 10:25; 1Ku 28:10; Bua 11:19.

  • Muaba Mutambe Tshijila.

    Muaba wa munda menemene wa ntenta wa tshitendelelu ne wa ntempelo, muvuabu balamina mushete wa tshipungidi; bavua bawubikila kabidi ne: Muaba wa tshijila wa Miaba ya tshijila. Pa kumbusha Mose, muntu mukuabu uvuabu banyishile bua kubuela mu Muaba Mutambe Tshijila uvua muakuidi munene, ne uvua ubuelamu anu Dituku dia Dibuikila dia mpekatu dia ku tshidimu.—Eks 26:33; Lew 16:2, 17; 1Bk 6:16; Eb 9:3.

  • Muaba mutumbuke.

    Muaba wa kutendelela uvua misangu ya bungi pa mutu pa tukunakuna ne pa mikuna, peshi tshintu tshienza bua kuimanyina. Nansha muvuabu batendelela Nzambi imue misangu pa miaba mitumbuke, badi batamba kuyilamakaja ne ntendelelu wa nzambi ya dishima wa batendeledi ba dishima.—Nom 33:52; 1Bk 3:2; Yel 19:5.

  • Muaba wa Tshijila.

    Tshibambalu tshinene tshia kumpala tshia ntenta wa tshitendelelu anyi tshia ntempelo, tshishilangane ne tshibambalu tshia munda menemene, Muaba Mutambe Tshijila. Mu ntenta wa tshitendelelu, Muaba wa Tshijila uvua ne tshitekelu tshia miendu tshia or, tshioshelu tshia musenga wa manananshi tshia or, mêsa bua mampa a dileja, ne bintu bia kuenza nabi mudimu bia or; mu ntempelo, uvua ne tshioshelu tshia or, bitekelu bia miendu 10 bia or, ne mêsa 10 bua mampa a dileja. (Eks 26:33; Eb 9:2)​—Tang. Tshis. B5 ne B8.

  • Muakuidi.

    Muntu mumanya uvua uleja mpala wa Nzambi kudi bantu bavuaye wenzela mudimu, ubalongesha malu a Nzambi ne mikenji yende. Bakuidi bavua kabidi bimanyina bantu kumpala kua Nzambi, bafila milambu ne kabidi balombela bantu Nzambi. Kumpala kua kuelabu Mikenji ya Mose, mfumu wa dîku ke uvua muakuidi bua dîku diende. Mu Mikenji ya Mose, bantu balume ba mu dîku dia Alona ba mu tshisa tshia Lewi ke bavua ne buakuidi. Bantu balume bakuabu bena Lewi bavua babambuluisha. Pakabanjijabu tshipungidi tshipiatshipia, Isalele wa mu nyuma wakalua tshisamba tshia bakuidi tshikale ne Kristo Yezu muikale Muakuidi Munene.​—Eks 28:41; Eb 9:24; Bua 5:10.

  • Muakuidi munene.

    Mu Mikenji ya Mose, muakuidi munene uvua uleja mpala wa tshisamba kumpala kua Nzambi ne ulombola bakuidi bakuabu. Bavua bamubikila kabidi ne: “mfumu wa bakuidi.” (2Ku 26:20; Ezl 7:5) Anu yeye ke uvuabu banyishile bua kubuela mu Muaba Mutambe Tshijila, muaba wa munda menemene wa ntenta wa tshitendelelu ne pashishe wa ntempelo. Uvua ubuelamu anu Dituku dia Dibuikila dia mpekatu tshidimu tshionso. Badi babikila kabidi Yezu Kristo ne: “muakuidi munene.”—Lew 16:2, 17; 21:10; Mat 26:3; Eb 4:14.

  • Muanabute.

    Tshia kumpala, muana wa balume mukulumpe ku bana bonso ba tatu (kabiyi bua muanabute wa mamu). Ku kale, muanabute wa balume uvua ne muaba wa mushinga mu dîku ne bavua bamupesha mudimu wa kulombola dîku pavua tatu ufua. Muaku eu uvua kabidi uleja muana mulume wa kumpala wa nyama, imue misangu bavua bamubikila ne: “muanabute.”​—Eks 11:5; 13:12; Gen 25:33; Kls 1:15.

  • Muana wa Davidi.

    Tshiambilu tshitu tshitamba kutangila Yezu, tshishindika mudiye Mupianyi wa tshipungidi tshia Bukalenge tshivuabu ne bua kukumbaja kudi muntu wa mu ndelanganyi ya Davidi.—Mat 12:23; 21:9.

  • Muana wa muntu.

    Tshiambilu tshidi mu Evanjeliyo misangu mitue ku 80. Tshidi tshitangila Yezu Kristo ne tshileja ne: ku diambuluisha dia diledibua diende dia ku mubidi, wakalua muntu ne kavua tshifukibua tshia mu nyuma patupu tshivua tshiangate mubidi wa muntu to. Tshiambilu etshi tshidi tshileja kabidi ne: Yezu uvua ne bua kukumbaja dîyi dia buprofete didi mu Danyele 7:13, 14. Bavua batele tshiambilu etshi mu Mifundu ya tshiena Ebelu bua Yehezekele ne Danyele, bileja dishilangana pankatshi pa batuadi ba dîyi bafuafua aba ne Nzambi Muena mukenji uvuabu bamanyisha.​—Yhz 3:17; Dan 8:17; Mat 19:28; 20:28.

  • Mubi.

    Mushindu udibu babikila Satana Diabolo udi uluisha Nzambi ne mikenji yende miakane.​—Mat 6:13; 1Yn 5:19.

  • Mudimu wa tshijila.

    Mudimu munsantu udi utangila buludiludi ditendelela didi muntu utendelela Nzambi.​—Lom 12:1; Bua 7:15.

  • Muena Kristo.

    Dîna didi Nzambi mupeshe bayidi ba Yezu Kristo.​—Bz 11:26; 26:28.

  • Muena lubuku lua mitoto.

    Muntu udi ulonga luendu lua dîba, lua ngondo ne mitoto bua kuamba malu enzeka pashishe.​—Dan 2:27; Mat 2:1.

  • Muena mbuku.

    Muntu udi wamba mudiye uyukila ne bafue.​—Lew 20:27; Dut 18:10-12; 2Bk 21:6.

  • Muena Nazaleta.

    Dîna dia Yezu bu muntu wa mu tshimenga tshia Nazaleta. Didi pamuapa dipetangana ne muaku wa tshiena Ebelu udi mu Yeshaya 11:1 wa “mutoloku.” Bakalua kubikila kabidi bayidi ba Yezu mu dîna edi.​—Mat 2:23; Bz 24:5.

  • Muena Yuda.

    Dîna divuabu babikila muntu wa mu tshisa tshia Yuda panyima pa dikuluka dia bukalenge bua Isalele bua bisa 10.  (2Bk 16:6) Panyima pa dikuatshibua mu Babilona, bakadibikila bena Isalele ba mu bisa bishilashilangane bivua bipingane mu Isalele. (Ezl 4:12) Pashishe, bavua baditela pa buloba bujima bua kufila dishilangana pankatshi pa bena Isalele ne bantu ba bisamba bikuabu. (Est 3:6) Mupostolo Paulo wakatela pende dîna edi mu tshimfuanyi pavuaye uleja ne: tshisamba tshia muntu katshiena ne bualu mu tshisumbu tshia bena Kristo.​—Lom 2:28, 29; Gal 3:28.

  • Mufumbi.

    Muenji wa mabungu, malongo, ne bivuadi bikuabu bia diima. Muaku wa tshiena Ebelu bua mufumbi udi umvuija ku muaku ku muaku “muenji.” Misangu ya bungi batu bakula bua bukokeshi bua mufumbi bua kuleja bukokeshi butambe bunene budi nabu Yehowa kudi bantu kampanda anyi kudi bisamba.​—Yes 64:8; Lom 9:21.

  • Mufundi.

    Mutentudi wa Mifundu ya tshiena Ebelu. Pavua Yezu pa buloba, dîna edi divua dileja kasumbu ka bamanyi ba Mikenji. Bavua baluisha Yezu.—Ezl 7:6, dim.; Mâk 12:38, 39; 14:1.

  • Mufundu; Mifundu.

    Mifundu minsantu ya mu Dîyi dia Nzambi. Muaku eu udi anu mu Mifundu ya tshiena Greke ya buena Kristo.—Luk 24:27; 2Tm 3:16.

  • Mukaji mubanjija.

    Mukaji wa mu mulongo muibidi uvua misangu ya bungi mupika mukaji.​—Eks 21:8; 2Sm 5:13; 1Bk 11:3.

  • Mukalenge Mukaji wa Diulu.

    Muanzu wa nzambi mukaji uvuabu batendelela kudi bena Isalele batontolodi mu matuku a Yelemiya. Bamue badi bamba ne: udi uleja Ishtar (Astarté) nzambi mukaji wa bena Babilona. Inanna (dîna dia nzambi mukaji nende wa mu tshitupa tshia buloba tshia Sumer uvuaku kale) udi umvuija “Mukalenge Mukaji wa Diulu.” Pa kumbusha dimusuikakaja ne diulu, uvua nzambi mukaji wa bufuka. Bavua babikila kabidi Astarté mu miaku ya mu tshiena Ejipitu ne: “Inabanza wa Diulu.”​—Yel 44:19.

  • Mukulu; muntu mukulumpe.

    Muntu wa bidimu bia bungi, kadi mu Mifundu ngeu udi tshia kumpala ne bukokeshi ne mudimu mu tshisumbu tshia bantu anyi mu tshisamba. Mbatele kabidi dîna edi bua bifukibua bia mu diulu mu Buakabuluibua. Muaku wa tshiena Greke presbyteros mmukudimuna ne: “mukulu” padibu bakula bua badi ne majitu a kulombola mu tshisumbu.—Eks 4:29; Nsu 31:23; 1Tm 5:17; Bua 4:4.

  • Mulambu 1.

    Tshintu tshipesha Nzambi bu tshimanyinu bua kuela tuasakidila, kuitaba dipila, ne kupingaja nende malanda mimpe. Kutuadijila ku Abele, bantu mbafile milambu mishilashilangane ku budisuile, kusangisha ne nyama, too ne pavua tshipungidi tshia Mikenji ya Mose tshiyivuije bualu bulomba. Milambu ya nyama kayivua kabidi ne mushinga pakavua Yezu mumane kufila muoyo wende bu mulambu mupuangane, nansha mutshidi bena Kristo batungunuka ne kulambula Nzambi milambu ya mu nyuma.—Gen 4:4; Eb 13:15, 16; 1Yn 4:10.

  • Mulambu 2.

    Difutu divua ditunga anyi mfumu ufuta ditunga anyi mfumu mukuabu bu tshimanyinu tshia dikokela bua kulama ditalala anyi bua kupeta bukubi. (2Bk 3:4; 18:14-16; 2Ku 17:11) Bavua kabidi batela muaku eu bua tshitadi tshia pa muntu tshivuabu bafutshisha muntu yonso.—Neh 5:4; Lom 13:7.

  • Mulambu wa biakunua.

    Mulambu wa mvinyo uvuabu bapongolola pa tshioshelu ne bafila pamue ne milambu mikuabu ya bungi. Paulo uvua muwutele mu tshimfuanyi bua kuleja muvuaye musue kudifila bua bena Kristo nende.​—Nom 15:5, 7; Flp 2:17.

  • Mulambu wa dipila.

    Mulambu bua mpekatu ya muntu. Uvua mushilangane kakese ne milambu mikuabu ya mpekatu bualu bavua bawufila bua kukumbaja anyi kupingajilula malu kampanda a tshipungidi avua muenji wa bubi uvua unyingalala mujimije bua mpekatu, ne bua kumupesha disulakana ku tshibawu tshiende.​—Lew 7:37; 19:22; Yes 53:10.

  • Mulambu wa diumvuangana.

    Mulambu mupesha Yehowa bua kumulomba bua kuikala nende mu ditalala. Mutendeledi ne ba mu nzubu muende, muakuidi uvua ulambula, ne bakuidi bavua ku mudimu bonso bavua bawudia. Bivua bienza bu ne: muishi muimpe wa manyi avuabu bosha uvua ufika kudi Yehowa. Bavua bamupesha kabidi mashi avua aleja muoyo. Bivua bienze anu bu ne: bakuidi ne batendeledi bavua basomba badia pamue ne Yehowa, bileja muvuabu mu ditalala.​—Lew 7:29, 32; Dut 27:7.

  • Mulambu wa kuela nawu tuasakidila.

    Mulambu wa diumvuangana mufila bua kuela Nzambi tuasakidila bua malu adiye mulongolole ne bua dinanga diende dia lulamatu. Bavua badia munyinyi wa nyama wa mulambu ne mampa mela luevene ne adi kaayi mela luevene. Munyinyi uvua wa kudia dituku dimue dimue adi.​—2Ku 29:31.

  • Mulambu wa kukumbaja nawu mutshipu.

    Mulambu wa budisuile uvua wenda pamue ne imue mitshipu.​—Lew 23:38; 1Sm 1:21.

  • Mulambu wa kukupakaja.

    Mulambu uvua muakuidi uteka bianza biende muinshi mua bianza bia mutendeledi uvua muambule mulambu  wa kufila ne ubikupakaja panyima ne kumpala; peshi muakuidi nkayende uvua ukupakaja mulambu. Tshienzedi etshi tshivua tshileja difila milambu kudi Yehowa.​—Lew 7:30.

  • Mulambu wa kuosha.

    Mulambu wa nyama uvuabu boshila Nzambi pa tshioshelu bu mulambu mujima; mutendeledi kavua ulama tshitupa nansha tshimue tshia nyama (ngombe mulume, tshimpanga tshia mukoko, mpumbu, kamanda nkutshi, anyi kana ka nkudimba).​—Eks 29:18; Lew 6:9.

  • Mulambu wa mpekatu.

    Mulambu mufila bua mpekatu muenza kabiyi ku bukole bua butekete bua mubidi mupange bupuangane. Bavua bafila milambu ya nyama mishilashilangane, kutuadijila ku ngombe mulume too ne ku nkudimba, bilondeshile mushindu ne nsombelu bia muena mpekatu uvuabu ne bua kubuikidila.​—Lew 4:27, 29; Eb 10:8.

  • Mulawu.

    Kufuna anyi kujingila muntu peshi tshintu diakabi. Mmushilangane ne mêyi a kapeja anyi tshiji tshikole. Mulawu utu misangu ya bungi dimanyisha bualu kampanda anyi didianjila kulaya diakabi; wowu wa kudi Nzambi anyi wa kudi muntu udibu bapeshe bukokeshi, udi ulua mêyi a buprofete ne udi ne bukole.​—Gen 12:3; Nom 22:12; Gal 3:10.

  • Muleji mpala wa mukalenge.

    Tshindondi tshia mukalenge, anyi nnguvena wa provense, mu bukalenge bua bena Babilona ne bua bena Pelasa. Bavua basungula muleji mpala wa mukalenge kudi mukalenge bu mfumu munene.—Ezl 8:36; Dan 6:1.

  • Mulombodi Munene.

    Muaku wa mu tshiena Greke udi utamba kumvuija “Muludiki Munene.” Udi uleja mudimu wa mushinga wa Yezu Kristo mu dikuula bena lulamatu ku bipeta bia mpekatu bia lufu ne mu dibalombola ku muoyo wa tshiendelele.​—Bz 3:15; 5:31; Eb 2:10; 12:2.

  • Mulondo wa mvinyo wa tshiseba.

    Mulondo muenza ne tshiseba tshia nyama bu mudi mbuji anyi mukoko, ne bavua belelamu mvinyo. Bavua belela mvinyo mu milondo ya biseba mipiamipia bualu padiye wenda ukola udi upatula kapepa kadi kapatakana mu milondo eyi. Biseba bipiabipia bidi bidiunda; bia kale bidi kabiyi mua kudinana bidi bitayika bua dipatakana dia kapepa.​—Yos 9:4; Mat 9:17.

  • Mulongolongo wa mikuna ya mu Lebanona.

    Umue wa ku milongolongo ibidi ya mikuna idi yenza muaba wa mikuna wa mu Lebanona. Mulongolongo wa mikuna ya mu Lebanona udi ku ouest ne mukuabu ku est. Tshibandabanda tshile tshia bufuke tshidi tshitapulula milongolongo ibidi eyi. Mulongolongo wa mikuna ya mu Lebanona udi upatukila buludiludi lua ku muelelu kua mbuu wa Mediterane, ne badi batshinka ne: udi ne bule butue ku metre pankatshi pa 1 800 ne 2 100. Ku kale, Lebanona uvua mubuikidija kudi mitshi minene ya sedre ivuabu banange bikole kudi bisamba bivua bimunyunguluke. (Dut 1:7; Mis 29:6; 92:12)​—Tang. Tshis. B7.

  • Muludiki.

    Anu bu mu mukanda wa Misambu, muaku wa mu tshiena Ebelu eu udi mua kuikala uleja muntu uvua mu mushindu kampanda mulongolole misambu ne muludike diyimba, muibidije bimbi ba misambu bena Lewi, mubalongeshe ne mulombole bimbi too ne mu dimba dinene dia kumpala kua bantu. Nkudimuinu mikuabu mmikudimune muaku eu ne: “mfumu wa bimbi ba misambu” anyi “muludiki wa misambu.”​—Mis 4:Mut; 5:Mut.

  • Muluishi wa Kristo.

    Muaku eu mu tshiena Greke udi ne bitupa bibidi. Udi uleja tshidi tshiluisha, anyi tshibengangana ne Kristo. Udi mua kuleja kabidi Kristo wa dishima, muntu udi wangata muaba wa Kristo. Bantu bonso, malongolodi onso, anyi bisumbu bionso bidi bishima biamba mudibi bileja mpala wa Kristo anyi mudibi Masiya peshi bidi biluisha Kristo ne bayidi bende mbikumbane bua kubikidibua ne: baluishi ba Kristo.​—1Yn 2:22.

  • Muluki wa bilamba.

    Muntu uvua wenza mudimu ne tshiamu tshia kuluka natshi bilamba.

  • Mumonyi wa malu.

    Muntu uvua Nzambi mupeshe bukokeshi bua kujingulula disua dia Nzambi, muntu uvuabu bakangule mêsu bua kumona ne kujingulula malu avua bantu bakuabu kabayi mua kujingulula. Muaku wa tshiena Ebelu mmuangatshila ku muji wa muaku udi umvuija “kumona” kuetu kuena dîna eku anyi kua mu tshimfuanyi. Mumonyi wa malu mmuntu uvua bakuabu baya kukonka malu bua kupeta mibelu ya meji bua malu avuabu bapeta.​—1Sm 9:9.

  • Munazi.

    Muaku muangatshila ku tshiena Ebelu bua “muntu mumbusha,” “muntu mujidila,” “muntu mutapulula.” Kuvua bisumbu bibidi bia Banazi: bavua badifile nkayabu ne bavua Nzambi muteke Banazi. Mulume anyi mukaji uvua mua kuenzela Yehowa mutshipu wa pa buawu bua kushala Munazi bua tshikondo kampanda. Bantu bavua benze mutshipu ku budisuile bavua ne malu manene asatu avuabu babakandike: kabavua ne bua kunua maluvu makole anyi kudia tshintu tshienza ne tumuma tua mvinyo, kabavua ne bua kukosesha nsuki, ne kabavua ne bua kulenga tshitalu to. Aba bavua Nzambi muteke Banazi bavua bashala nanku bua kashidi, ne Yehowa uvua muleje malu avuabu babalombe.​—Nom 6:2-7; Bal 13:5.

  •  Munsantu; bunsantu.

    Ngikadilu udi nende Yehowa; dikala mukezuke munda ne pambelu mu bikadilu ne dikala wa tshijila. (Eks 28:36; 1Sm 2:2; Nsu 9:10; Yes 6:3) Padibu bakula bua bantu (Eks 19:6; 2Bk 4:9), nyama (Nom 18:17), bintu (Eks 28:38; 30:25; Lew 27:14), miaba (Eks 3:5; Yes 27:13), bikondo (Eks 16:23; Lew 25:12), ne midimu (Eks 36:4), muaku wa mu tshiena Ebelu udibu batela udi umvuija ditekibua ku luseke, dikala anu wa, anyi dikala wa tshijila bua Nzambi wa tshijila; ndikala mutekibue ku luseke bua mudimu wa Yehowa. Mu Mifundu ya tshiena Greke ya buena Kristo, miaku idibu bakudimune ne: “munsantu” ne “bunsantu” idi mua kuleja ditekibua ku luseke bua Nzambi. Badi batela kabidi miaku eyi bua kuakula bua bukezuke bua bikadilu bia muntu.​—Mâk 6:20; 2Ko 7:1; 1Pt 1:15, 16.

  • Muntu mudikadile; muntu udi mupete budikadidi.

    Mu bukokeshi bua Lomo, ‘muntu mudikadile’ ngeu uvuabu balela mudikadile, muikale ne bukenji buonso bua buena muabu. Kadi ‘muntu uvua mupete budikadidi’ ngeu uvuabu bapikule ku bupika. Dipikudibua divua dimanyine pa mikenji divua dipesha muntu uvuabu bapikule buena Lomo, kadi kavua mua kupeta muaba mu malu a tshididi to. Divua kadiyi dimanyine pa mikenji divua dipikula muntu ku bupika kadi kadiyi dimupesha manême onso a bumuntu to.​—1Ko 7:22.

  • Muntu mutungu.

    Ku muaku ku muaku, mmuntu mupakula. Bavua batamba kuteka bantu ba nunku mu mbanza ya bakalenge bua bikale bambuluishi anyi balami ba mukaji wa mukalenge ne ba bakaji bende babanjija. Tshiambilu etshi tshidi kabidi tshileja muntu uvua kayi mutungu mulelela, kadi uvuabu bapeshe midimu mu lubanza lua mukalenge. Badi batshitela mu tshimfuanyi bua ‘mutungu bua Bukalenge,’ mmumue ne: muntu udi udikanda ku amue malu bua kudifila mu mudimu wa Nzambi bikole.​—Mat 19:12; Est 2:15; Bz 8:27.

  • Muntu udi wamba malu atshilualua.

    Muntu udi wamba mudiye ne bukole bua kuamba malu atshilualua. Bible udi uleja ne: bakuidi bena majimbu, bena mbuku, bena lubuku lua mitoto ne bakuabu badi pabu mu mulongo eu.​—Lew 19:31; Dut 18:11; Bz 16:16.

  • Muntu uvua muitabuje buena Yuda.

    Muntu mukudimune mutshima. Muntu mulume uvua witaba buena Yuda uvua utengudibua.​—Mat 23:15; Bz 13:43.

  • Mupongo.

    Dienza mudimu ne bukole budibu bitaba ne: budi bufumina kudi nyuma mibi.​—2Ku 33:6.

  • Mupostolo.

    Muaku eu udi umvuija nangananga “muntu mutuma,” ne mbawutele bua Yezu ne bua bantu bakuabu bavuabu batume bua kuambuluisha bakuabu. Misangu ya bungi, badi bawutela bua bayidi bavua Yezu nkayende musungule bua bikale kasumbu ka bantu 12 basungula bu baleji mpala.​—Mâk 3:14; Bz 14:14.

  • Muprofete.

    Muntu udibu bambila bua kumanyisha malu adi Nzambi mulongolole. Baprofete bavua baleji mpala ba Nzambi; kabavua bamba anu malu avua ne bua kulua to, kadi bavua kabidi bamanyisha malongesha a Yehowa, mêyi matuma ende ne malumbuluisha ende.​—Amo 3:7; 2Pt 1:21.

  • Musadidi wa mudimu.

    Dîna didi difumina ku muaku wa tshiena Greke diakonos udibu batamba kukudimuna ne: “musadidi” anyi “muena mudimu.” “Musadidi wa mudimu” mmuntu udi wambuluisha kasumbu ka bakulu mu tshisumbu. Udi ne bua kukumbaja malu malomba a mu Bible bua kukumbanaye bua mudimu eu.​—1Tm 3:8-10, 12.

  • Musambu.

    Musambu wa kutumbisha nawu Nzambi. Bakabueja misambu mu mijiki ne bavua bayimba kudi batendeledi ba Nzambi, bayimba kabidi pavuabu batendelela Yehowa Nzambi ku ntempelo wende mu Yelushalema.​—Luk 20:42; Bz 13:33; Yak 5:13.

  • Musambu wa mu dibanda.

    Mutu wa mukanda wa Misambu 120-134. Nansha mudiku ngenyi mishilashilangane bua diumvuija dia tshiambilu etshi, ba bungi badi bela meji ne: bavua bimba misambu 15 eyi kudi batendeledi bena Isalele bavua ne disanka pavuabu ‘babanda’ ku Yelushalema uvua kuulu ku mikuna ya Yuda, bua kubuelaku mu bibilu binene bisatu bia ku tshidimu.

  • Musenga wa manananshi.

    Mmuenza ne madimbu a mupuya muimpe masambakaja ne madimbu a mutshi wa bome; utu utema kakese kakese, ufila dipembu dia mupuya muimpe. Bavua benze musenga wa pa buawu muenza ne bintu binayi bua kuenza nawu mudimu ku ntenta wa tshitendelelu ne ku ntempelo. Bavua bawosha pa tshioshelu tshia musenga wa manananshi mu tshibambalu tshia Muaba wa Tshijila dinda ne butuku, ne mu Dituku dia Dibuikila dia mpekatu bavua bawoshila munda mua tshibambalu tshia Muaba Mutambe Tshijila. Uvua tshimfuanyi tshia masambila a bena mudimu ba Nzambi ba lulamatu avua manyishibue. Ki mbalombe bena Kristo bua kuenza nawu mudimu to.​—Eks 30:34, 35; Lew 16:13; Bua 5:8.

  •  Mushete wa tshipungidi.

    Mushete wa mabaya a mutshi wa musese mulamika or uvuabu balame mu Muaba Mutambe Tshijila wa mu ntenta wa tshitendelelu ne pashishe mu Muaba Mutambe Tshijila wa ntempelo muasa kudi Solomo. Uvua ne tshibuikidiji tshikole tshia or tshikale ne bakeluba babidi batangilangane. Bintu binene bivuamu bivua mabue abidi a Mêyi Dikumi. (Dut 31:26; 1Bk 6:19; Eb 9:4)​—Tang. Tshis. B5 ne B8.

  • Musongolo.

    Mulangala mule muikale ne lusongo lua tshiamu lutue uvua balami ba nyama basaka nawu nyama. Badi bafuanyikija musongolo ne mêyi a muena meji adi asaka muateleji bua kutumikila mubelu wa meji. “Kuditua ku misongolo” kudi kufumina ku tshidi nyama wa tshitunu wenza padiye ubenga dimusaka ne musongolo ne uditua kudiwu, bimufikisha ku ditapika yeye nkayende.​—Bz 26:14; Bal 3:31.

  • Muta-labene.

    Muaku udi mu mutu wa mukanda wa Musambu wa 9. Bilondeshile bilele bivuaku, uvua umvuija ne: “bua lufu lua muana.” Bamue badi bamba ne: tshivua dîna anyi pamuapa mêyi a mbangilu a mujiki wa tshibidilu avuabu bimba pavuabu bimba musambu eu.

  • Mutangidi.

    Muntu udi wende mudimu munene muikale wa kutangila tshisumbu ne kutshilama. Lungenyi ludi mu muaku wa tshiena Greke episkopos ndua kutangila ne kulama. Miaku “mutangidi” ne “mukulu” (presbyteros) idi ileja mudimu umue mu tshisumbu tshia bena Kristo; muaku “mukulu,” udi uleja ngikadilu mishindame ya muntu udibu bateka mukulu, ne muaku “mutangidi” wowu udi utamba kuimanyina pa midimu ya tshidibu bamutekele.​—Bz 20:28; 1Tm 3:2-7; 1Pt 5:2.

  • Mutoto wa mu dinda.​

    Tang. MUTOTO WA NKESHA.

  • Mutoto wa nkesha.

    Udi ne diumvuija dimue ne “mutoto wa mu dinda.” Mmutoto wa ndekelu utu ujuka ku est kumpala kua dîba kupatuka, nunku umanyisha dituku dipiadipia.​—Bua 22:16; 2Pt 1:19.

  • Mutshi.

    Dikunji dilulame kuvuabu bakudikila muntu. Mu bimue bisamba bavua bashipelaku muntu anyi belaku tshitalu bua kudimuija bantu peshi bua kumufuisha bundu kumpala kua bantu. Bena Ashû bavua bamanyike bua mvita yabu ya tshikisu bavua bela bantu bavuabu bakuata ku mitshi pa kukudika mibidi yabu ku nsongo ya mitshi ivuabu batuila mu difu ibuela mu tshiadi tshia muntu. Kadi mu mikenji ya bena Yuda, bantu bavua bapile bua malu mabi menemene bu mudi: dipenda Nzambi anyi ditendelela mpingu, bavua banji babashipa ne mabue anyi mu mushindu mukuabu, pashishe bakudika bitalu biabu ku makunji anyi ku mitshi bu bilejilu bua kudimuija bakuabu. (Dut 21:22, 23; 2Sm 21:6, 9) Bena Lomo bavua imue misangu basuikila muntu ku mutshi patupu, nanku uvua mua kushala ne muoyo matuku ndambu kumpala kua kufuaye bua dikenga, nyota, nzala, ne munya. Misangu mikuabu, bu pavuabu bashipe Yezu, bavua bapopela bianza ne makasa bia muntu uvuabu bafunde ku mutshi. (Luk 24:20; Yne 19:14-16; 20:25; Bz 2:23, 36)​—Tang. MUTSHI WA MAKENGA.

  • Mutshi wa bululu.

    Mitshi mishilashilangane idi ne bululu bua bungi ne mupuya mukole. Badi batela mutshi wa bululu mu tshimfuanyi mu Bible bua kuleja bipeta bibi bia dienda masandi, bupika, malu mabi ne butontolodi. Mu Buakabuluibua 8:11, “mutshi wa bululu” udi uleja tshintu tshia bululu tshikale mulungu, badi bawubikila kabidi ne: bululu.​—Dut 29:18; Nsu 5:4; Yel 9:15; Amo 5:7.

  • Mutshi wa dimanya dia tshidi tshimpe ne tshidi tshibi.

    Mutshi wa mu budimi bua Edene uvua Nzambi muteke bu tshimanyinu tshia bukenji budiye nabu bua kuelela bantu mikenji ya “tshidi tshimpe” ne “tshidi tshibi.”​—Gen 2:9, 17.

  • Mutshi wa kuluka nawu bilamba.

    Tshintu tshivuabu balukila bilamba ne manda.​—Eks 39:27.

  • Mutshi wa makenga.

    Nkudimuinu wa muaku wa tshiena Greke stauros udi umvuija mutshi anyi dikunji dilulame bu divuabu bashipele Yezu. Kakuena tshijadiki tshidi tshileja ne: muaku wa mu tshiena Greke eu uvua umvuija mutshi mutshiamakane anyi nkuruse bu uvua bampangano benze nende mudimu bu tshimanyinu tshia ntendelelu bidimu nkama ya bungi kumpala kua Kristo. “Mutshi wa makenga” udi ufila diumvuija dijima dia muaku wa ntuadijilu, bualu Yezu uvua pende mutele muaku stauros bua kuleja dikengeshibua, dikenga, ne bundu bivua bayidi bende ne bua kupeta. (Mat 16:24; Eb 12:2)​—Tang. MUTSHI.

  • Mutshi wa muoyo.

    Mutshi wa mu budimi bua Edene. Bible kena uleja ne: bimuma biawu bivua ne bukole bua kufila muoyo to; kadi uvua uleja bukokeshi bua Nzambi bua kupesha bonso badiye mua kuanyishila bua kudia bimuma biawu muoyo wa tshiendelele.—Gen 2:9; 3:22.

  • Mutshi wa tshijila.

    Muaku wa mu tshiena Ebelu (asherah) udi uleja 1) mutshi wa tshijila udi uleja Ashéra, nzambi mukaji wa bufuke wa bena Kanâna, anyi 2) tshimfuanyi tshia nzambi mukaji Ashéra yeye muine. Bidi bimueneka ne: mitshi eyi ivua mimane milulame. Ivua  mua kuikala mitshi kayiyi misonga, anyi mitshi yetu ya tshia bushuwa eyi.​—Dut 16:21; Bal 6:26; 1Bk 15:13.

  • Mutshipu 1.

    Dilaya Nzambi ne muoyo umue bua kuenza bualu kampanda, kufila mulambu anyi dipa, kubuela mu mudimu, anyi kudilama ku bimue bintu bivua kabiyi anu bibi to.​—Nom 6:2; Mbi 5:4; Mat 5:33.

  • Mutshipu 2.

    Kuditshipa bua kujadika ne: bualu kampanda mbulelela, anyi dilaya dia muoyo mujima dia ne: muntu neenze bualu kampanda anyi kakubuenza. Misangu ya bungi utu dilaya dienzela muntu udi ku mutu, nangananga Nzambi. Yehowa wakakolesha tshipungidi tshiende ne Abalahama ku mutshipu.​—Gen 14:22; Eb 6:16, 17.

  • Mutuangaji.

    Muntu udi wenza bua bisumbu bidi kabiyi bipetangana bipunge. Mu Mifundu, Mose mmutuangaji bua tshipungidi tshia Mikenji, ne Yezu bua tshipungidi tshipiatshipia.​—Gal 3:19; 1Tm 2:5.

  • Mutu wa dikunji.

    Lusongo ludi lulengeja dikunji. Makunji a muomumue (Yakina ne Boaza) avua menza kumpala kua ntempelo wa Solomo. (1Bk 7:16)​—Tang. Tshis. B8.

  • Mutu wa mukanda.

    Mutu wa bualu udi ku ntuadijilu kua musambu udi uleja muwufundi, malu adi amutangila, mushindu wa kuwimba, anyi uleja mushinga wa musambu peshi kimbila kawu.​—Tang. mitu ya mikanda ya Misambu 3, 4, 5, 6, 7, 30, 38, 60, 92, 102.

  • Muvungu.

    Tshiseba tshile anyi nyandu, bifundila luseke lumue bivuabu pa tshibidilu bavungila ku mutshi. Bavua bafunda Mifundu ne bayitentuila pa mivungu ivuabu bangata bu mikanda tshikondo tshivuabu bafunda Bible.​—Yel 36:4, 18, 23; Luk 4:17-20; 2Tm 4:13.

  • Muvungu wa tshiseba.

    Tshiseba tshia mukoko, tshia mbuji anyi tshia kana ka ngombe tshienza bua kufundilapu. Uvua ulala kupita nyandu ne bavua benza nawu mivungu ya Bible. Mivungu ya biseba ivua Paulo mulombe Timote bua kulua nayi ivua pamuapa imue ya ku mivungu ivua ne Mifundu ya tshiena Ebelu. Imue ya ku Mivungu ya ku Mbuu Mufue ivua ya mivungu ya biseba.​—2Tm 4:13.

N

  • Nare.

    Mafuta makunzubile a dipembu dimpe a makuta a bungi a tshisonsa tshia nare (Nardostachys jatamansi ). Bu muvua nare ne mushinga mukole, bavua batamba kumusambakaja ne mafuta a mushinga mukese, ne imue misangu bavua benza mafuta mabi kadi mafuanangane nende. Mâko ne Yone badi bamba bulelela ne: bavua bele Yezu “nare mulelela.”​—Mâk 14:3; Yne 12:3.

  • Ndenaliyo.

    Tshinjanja tshia arjan tshia bena Lomo tshia grame 3,85 tshivua ne mpala wa Kaisa luseke lumue. Tshivua difutu dia ku dituku dia muenji wa mudimu ne tshivua “tshitadi” tshia tshinjanja tshivua bena Lomo balomba bena Yuda muntu ku muntu. (Mat 22:17; Luk 20:24)​—Tang. Tshis. B14.

  • Ndongoluelu wa (ya) malu.

    Nkudimuinu wa muaku wa tshiena Greke aion padiwu uleja malu adiku peshi malu a pa buawu adi atangila tshikondo kampanda. Bible udi wakula bua “ndongoluelu wa malu eu” bua kuleja malu adi atamba kuenzeka mu bulongolodi ebu mu kabujima ne nsombelu udiku pa buloba. (2Tm 4:10) Ku diambuluisha dia tshipungidi tshia Mikenji, Nzambi wakateka ndongoluelu wa malu udi bamue mua kubikila ne: tshikondo tshia bena Isalele anyi tshia bena Yuda. Ku diambuluisha dia mulambu wa Yezu Kristo wa kupikulangana nawu, Nzambi wakenza nende mudimu bua kuteka ndongoluelu wa malu mukuabu uvua utangila tshia kumpala tshisumbu tshia bena Kristo bela manyi. Bualu ebu buakaleja ntuadijilu wa tshikondo tshipiatshipia tshileja kudi malu malelela madianjila kuleja kudi tshipungidi tshia Mikenji. Padibu bafunda tshiambilu etshi ku bungi, tshidi tshileja ndongoluelu ya malu mishilashilangane anyi malu adi atamba kuenzeka, avuaku peshi ikalaku.—Mat 24:3; Mâk 4:19; Lom 12:2; 1Ko 10:11.

  • Ndumba.

    Muntu udi wenda masandi ne muntu udi kayi muena dibaka nende, nangananga bua kupeta makuta. (Muaku wa mu tshiena Greke porne udibu bakudimune ne: “ndumba,” udi ufumina ku muji udi umvuija “kupana.”) Muaku eu udi utamba kutangila muntu mukaji nansha mudi Bible wakula kabidi bua bandumba balume. Bavua bakandike bundumba mu Mikenji ya Mose, ne kabavua bitaba difutu dia ndumba bu mulambu mu muaba munsantu wa Yehowa to, bishilangane ne tshilele tshia bampangano tshia kuenza mudimu ne bandumba ba ku ntempelo bua kupeta makuta. (Dut 23:17, 18; 1Bk 14:24) Bible udi kabidi utela muaku eu mu tshimfuanyi, uleja bantu, bisamba, anyi malongolodi bidi biditua mu mushindu kampanda wa ditendelela mpingu eku biamba mudibi bitendelela Nzambi. Tshilejilu, nsangilu wa bitendelelu udibu babikila ne: “Babilona munene” mmumvuija mu Buakabuluibua bu ndumba bualu mmubuelakane ne bakokeshi ba bulongolodi ebu bua kupeta bukole ne bintu bia ku mubidi.​—Bua 17:1-5; 18:3; 1Ku 5:25.

  • Ndundu wa kukupa nende mabue.

    Mukaba wa tshiseba anyi mukaba muluka ne bijilujilu bia  nyama, ne nkodi anyi ne miosa. Bavua bela tshintu tshia kukupa, nangananga dibue munkatshi muende. Bavua basuikila luseke lumue lua ndundu au ku diboko, eku lukuabu lukuate ku tshianza ne balulekelela panyima pa bamane kumunyungulula bikole. Bisamba bia kale bivua ne bakupi ba ndundu eyi mu biluilu biabu.​—Bal 20:16; 1Sm 17:50.

  • Nehilota.

    Muaku udi diumvuija kadiyi dimanyike udi ku mutu wa mukanda wa Musambu 5. Bamue badi bela meji ne: udi uleja tshiombelu tshia kuela mupuya, batshilamakaja ne muaku wa tshiena Ebelu udi upetangane ne chalil (lushiba). Kadi udi mua kumvuija mujiki.

  • Ngasa.

    Muaku wa mu tshiena Greke udi ne lungenyi lunene lua tshidi tshimpe ne tshilengele. Batu batamba kutela muaku eu bua kuakula bua dipa dimpe anyi mushindu muimpe wa kufila. Padibu bakula bua ngasa wa Nzambi, muaku eu udi umvuija dipa didi Nzambi ufila patupu ne tshianza tshilekelela kayi utekemena difutu. Nunku udi uleja difila dia kalolo, dinanga dia bungi ne bulenga bia Nzambi kudi bantu. Muaku wa tshiena Greke eu badi bawukudimuna kabidi ne: “luse” anyi “dipa dimpe.” Ngasa udi ufidibua kayi mutatshila anyi mukumbanyina, kadi ufidibua anu bua muoyo wa kupa wa mumufidi.—2Ko 6:1; Ef 1:7.

  • Ngena.

    Dîna dia mu tshiena Greke dia Tshibandabanda tshia Hinoma, ku sud lua ku ouest kua Yelushalema wa kale. (Yel 7:31) Bavua bamutele mu mêyi a buprofete bu muaba uvuabu ne bua kumuangalaja bitalu. (Yel 7:32; 19:6) Kakuena tshijadiki tshia ne: bavua bimansha nyama anyi bantu mu Ngena bua kubiosha ne muoyo anyi kubikengeshamu to. Nunku muaba eu kawena uleja muaba udi kawuyi umueneka udibu bakengeshila anyima ya bantu bua kashidi mu kapia ketu kalelela aka to. Kadi Yezu ne bayidi bende bavua batela Ngena bu tshimfuanyi tshia dinyoka dia kashidi dia “lufu luibidi,” mmumue ne: kabutu ka tshiendelele, dijimijibua.​—Bua 20:14; Mat 5:22; 10:28.

  • Nguvena.

    Nguvena eu nnguvena wa provense mulombola kudi tshipangu tshia mu Lomo tshia baleji mpala ba provense. Uvua ne bukokeshi bua kulumbuluisha ne uvua ne basalayi; nansha muvua tshipangu tshia baleji mpala ne bua kutangilula malu avuaye wenza, uvua ne bukokeshi bunene mu provense.​—Bz 13:7; 18:12.

  • Nisana.

    Dîna dipiadipia dia ngondo wa Abiba panyima pa dikuatshibua mu Babilona, ngondo wa kumpala mu kalandriye ka tshijila ka bena Yuda ne ngondo wa 7 mu kalandriye kavua kakayi ka bena Yuda. Uvua utuadija munkatshi mua ngondo muisatu too ne mua ngondo muinayi. (Neh 2:1)​—Tang. Tshis. B15.

  • Njila.

    Muaku mutela mu tshimfuanyi mu Mifundu bua kuleja ngenzelu wa malu anyi tshikadilu tshidi Yehowa wanyisha anyi kayi wanyisha. Bavua bakula bua aba bakalua bayidi ba Yezu Kristo ne: badi mu “Njila,” mmumue ne: bavua ne nsombelu muimanyine pa ditabuja mu Yezu Kristo, balonda tshilejilu tshiende.—Bz 19:9.

  • Nkuasa wa tshilumbuluidi.

    Pa tshibidilu, ntshintu tshienza patoke tshikale kuulu, tshivuabu babandila ku tubibandilu, tshivua bamfumu basomba bua kuakula ne misumba ya bantu ne kubambila mapangadika abu. Tshiambilu “nkuasa wa tshilumbuluidi wa Nzambi” ne “nkuasa wa tshilumbuluidi wa Kristo” bidi tshimfuanyi tshia malu adi Yehowa mulongolole bua kulumbuluisha bukua bantu.​—Lom 14:10; 2Ko 5:10; Yne 19:13.

  • Nkubita.

    Tshipiminu tshia bule bu tshia ntanta wa ku lukenyibua too ne ku lusongo lua munu wa bukulu. Bena Isalele bavua batamba kupima bintu ne nkubita uvua ne santimetre mitue ku 44,5, kadi kuvua kabidi nkubita mupitshile eu ku bunene bua tshianza, wa santimetre mitue ku 51,8. (Gen 6:15; Luk 12:25)​—Tang. Tshis. B14.

  • Nsabatu.

    Mufumine ku muaku wa mu tshiena Ebelu udi umvuija “kuikisha; kulekela.” Ndituku dia 7 dia lumingu lua bena Yuda (dibuela dia dîba mu Ditanu too ne ku dibuela dia dîba mu Disambombo). Amue matuku a bibilu mu tshidimu, kabidi ne tshidimu tshia 7 ne tshia 50, bivua bibikidibua ne: nsabatu. Mu dituku dia Nsabatu, kabavua benza mudimu mukuabu to, anu mudimu wa buakuidi ke uvua ne bua kuenzeka mu muaba munsantu. Mu bidimu bia Nsabatu, buloba buvua busomba kabuyi budima ne kabavua batatshisha bena Ebelu bua kufuta mabanza to. Mu Mikenji ya Mose, malu avuabu bakandike dia Nsabatu kaavua makole to, kadi balombodi ba bitendelelu bavua baakolesha ku kakese ku kakese, kuenzabi bua bikolele bantu bua kuatumikila mu matuku a Yezu.​—Eks 20:8; Lew 25:4; Luk 13:14-16; Kls 2:16.

  • Nsengu ya tshioshelu.

    Bintu bienze bu nsengu bivua bipatukile mu matumba anayi a bimue bioshelu. (Lew 8:15; 1Bk 2:28)​—Tang. Tshis. B5 ne B8.

  • Nsentedi.

    Muntu udi ulama bantu anyi bintu ku njiwu idi mua kufika, nangananga butuku, ne udi mua kufila didimuija padiku njiwu. Bansentedi bavua batamba kuimana pa bimanu ne pa bibumba bia tshimenga bua  kumona bantu bavua benda balua kumpala kua kufikabu pabuipi. Batu babikila nsentedi mu busalayi ne: mulami anyi mutentekedi. Mu tshimfuanyi, baprofete bavua bansentedi bua tshisamba tshia Isalele, badimuija bua kabutu kakavua bapuipi.—2Bk 9:20; Yhz 3:17.

  • Nshekele.

    Bujitu bua nshindamenu bua bena Ebelu bua kupima bujitu ne mushinga wa makuta. Bujitu abu buvua bua grame 11,4. “Nshekele wa muaba wa tshijila” udi mua kuikala tshiambilu tshivuabu batela bua kushindika ne: bujitu budi ne bua kuikala bujadika anyi ne: budi ne bua kuikala bukumbanangane ne bujitu bua nshindamenu buvuabu balame mu ntenta wa tshitendelelu. Kuvua mua kuikala nshekele wa bukalenge (mushilangane ne nshekele uvua mumanyike) anyi bujitu bua nshindamenu bulama mu dibalasa dia mukalenge.—Eks 30:13.

  • Nshikidilu wa ndongoluelu wa malu.

    Tshikondo tshidi tshifikisha ku ndekelu kua ndongoluelu wa malu anyi mushindu wa dienzeka dia malu udi Satana ulombola. Udi wenda pamue ne dikalaku dia Kristo. Ku bulombodi bua Yezu, banjelu “nebumbushe bantu babi munkatshi mua bantu bakane” ne nebababutule. (Mat 13:40-42, 49) Bayidi ba Yezu bavua ne dijinga dia kumanya tshikondo tshia “nshikidilu” atshi. (Mat 24:3) Kumpala kua Yezu kupingana mu diulu, wakalaya bayidi bende ne: uvua ne bua kuikala nabu too ne ku tshikondo atshi.​—Mat 28:20.

  • Nshobo.

    Nsoka anyi tutupa tua mitshi anyi mabue bivuabu benza nabi mudimu bua kuangata mapangadika. Bavua babiela mu mibunyi ya tshilamba anyi mu dilongo ne pashishe babinyukakaja. Nshobo uvua umata anyi uvuabu bapatula ke uvuabu basungule. Misangu ya bungi bavua benza nunku basambila. Mbatele “nshobo” anu mudiyi amu anyi mu tshimfuanyi ne diumvuija dia ne: “tshintu tshiabanya” anyi “tshitupa.”​—Yos 14:2; Mis 16:5; Nsu 16:33; Mat 27:35.

  • Nsudi; muena nsudi.

    Disama dibi dia pa dikoba. Mu Mifundu nsudi kayena imanyina anu pa disama didi dimanyike mu dîna adi lelu to, bualu kayivua ikuata anu bantu to, kadi ivua ikuata kabidi bilamba ne nzubu. Muntu uvua ne nsudi badi bamubikila ne: muena nsudi.​—Lew 14:54; Luk 5:12.

  • Nsunagoga.

    Muaku udi umvuija “kusangisha pamue; masangisha,” kadi mu mifundu ya bungi, nnzubu anyi mmuaba uvua bena Yuda badisangishila bua kubala Mifundu, kulongesha, kuyisha, ne kusambila. Mu matuku a Yezu, tshimenga tshionso tshia mu Isalele tshia bunene bukumbane tshivua ne nsunagoga, ne bimenga bia binene bivua ne ya bungi.—Luk 4:16; Bz 13:14, 15.

  • Ntalanta.

    Tshipiminu tshitambe bunene tshia bujitu ne tshia malu a makuta tshia bena Ebelu. Tshivua ne bujitu bua kilo 34,2. Ntalanta wa bena Greke uvua mukese, uvua ne bujitu bua kilo mitue ku 20,4. (1Ku 22:14; Mat 18:24)​—Tang. Tshis. B14.

  • Ntanta wa tshianza tshibalula.

    Tshipiminu tshia bule tshidi tshisua kupetangana ne ntanta wa kumbuka ku lusongo lua tshiala too ne lua kantengenene padi tshianza tshibalula. Padibu bangatshila pa nkubita wa santimetre 44,5, ntanta eu udi mua kuikala wa bule bua santimetre 22,2. (Eks 28:16; 1Sm 17:4)​—Tang. Tshis. B14.

  • Ntempelo.

    Nzubu wa mu Yelushalema uvua mupingane pa muaba wa ntenta wa tshitendelelu uvuabu bambula uvua muaba munene wa ntendelelu wa bena Isalele. Ntempelo wa kumpala uvua muibaka kudi Solomo ne mupula kudi bena Babilona. Muibidi uvua muibaka kudi Zelubabela panyima pa difuma mu Babilona muvuabu bakuatshibue ne bakamuibakulula pashishe kudi Helode Munene. Mu Mifundu bavua batamba kubikila ntempelo ne: “nzubu wa Yehowa.” (Ezl 1:3; 6:14, 15; 1Ku 29:1; 2Ku 2:4; Mat 24:1)​—Tang. Tshis. B8 ne B11.

  • Ntenta wa kusambakena.

    Tshiambilu tshivua tshileja ntenta wa Mose ne ntenta wa tshitendelelu wa tshijila uvuabu base bua musangu wa kumpala mu tshipela.—Eks 33:7; 39:32.

  • Ntenta wa tshitendelelu.

    Ntenta wa tshitendelelu uvuabu bambula uvua bena Isalele benza nende mudimu panyima pa Diumbuka diabu mu Ejipitu. Bavua balaminamu mushete wa tshipungidi tshia Yehowa uvua uleja dikalaku dia Nzambi, ne uvua muaba wa kufidila milambu ne kutendelela. Badi bamubikila kabidi misangu mikuabu ne: “ntenta wa kusambakena.” Uvua muenza ne nyunguluilu ya mabaya mibuikila bibuikilu bia line bizola bakeluba ne buanda. Uvua ne bibambalu bibidi, bavua babikila tshia kumpala ne: Muaba wa Tshijila, ne tshibidi ne: Muaba Mutambe Tshijila. (Yos 18:1; Eks 25:9)​—Tang. Tshis. B5.

  • Nyandu.

    Tshisonsa tshia mu mâyi tshienze bu dilenge tshitubu benza natshi bintu bu mudi bianda, bisaka, ne matu. Bavua benza nende kabidi bintu bia kufundila bienze bu mabeji ne benza nende mivungu ya bungi.​—Eks 2:3.

  • Nyuma.

    Muaku wa mu tshiena Ebelu ruach ne wa mu tshiena Greke pneuma, itubu batamba kukudimuna ne: “nyuma,” idi ne mumvuija a bungi. Buonso buayi idi ileja tshintu tshidi katshiyi  tshimueneka ku mêsu kua bantu, tshidi tshileja bukole mu tshienzedi. Badi batela muaku wa mu tshiena Ebelu ne wa mu tshiena Greke eu bua kuakula bua 1) lupepele, 2) bukole bua muoyo budi ne buenzeji munda mua bifukibua bia pa buloba, 3) bukole buenzeji budi bufumina mu muoyo wa mu tshimfuanyi wa muntu, budi bumusaka bua kuakula anyi kuenza malu mu mushindu kampanda, 4) mêyi mamba ku nyuma adi afumina muaba udi kawuyi umueneka, 5) bantu ba mubidi wa nyuma, ne 6) bukole buenzeji bua Nzambi, anyi nyuma muimpe.—Eks 35:21; Mis 104:29; Mat 12:43; Luk 11:13.

  • Nyuma muimpe (wa tshijila).

    Bukole budi bufila makanda budi kabuyi bumueneka butu Nzambi ukumbaja nabu disua diende. Ngua tshijila bualu udi ufumina kudi Yehowa udi ne mankenda ne muakane mu tshipidi tshitambidile, ne bualu mmushindu udi Nzambi ukumbaja nawu malu a tshijila. Badi bamubikila kabidi ne: spiritu munsantu.​—Luk 1:35; Bz 1:8.

  • Nzambi mulelela.

    Nkukudimuna kua tshibikidilu “Nzambi” mulamika kanungu kadi kamusunguluja mu tshiena Ebelu. Misangu ya bungi, dilamika dia kanungu aka mu tshiena Ebelu didi diambuluisha bua kusunguluja Yehowa bu Nzambi umuepele mulelela mushilangane ne nzambi ya dishima. Dikudimuna tshibikidilu tshia mu tshiena Ebelu atshi ne: “Nzambi mulelela” didi diambuluisha bua kupatula diumvuija diatshi dionso bimpe miaba idi tshibikidilu tshia mushindu eu.—Gen 5:22, 24; 46:3; Dut 4:39.

O

  • Omer.

    Tshipiminu tshia bintu biume tshivua mua kubuela litre 2,2, anyi tshia dikumi tshia efa. (Eks 16:16, 18)​—Tang. Tshis. B14.

  • Onikse.

    Dibue dia mushinga mushadile, mushindu mukuabu wa dibue dikole dia agate, anyi dibue dia kalasedone dia mekala mekala. Onikse udi ne mekala matoke, mafiike, makunzubile, makunze, mafiikuluke anyi a mâyi a matamba enda alondangana. Bavua basa onikse ku bilamba bia pa buabi bia muakuidi munene.​—Eks 28:9, 12; 1Ku 29:2; Yob 28:16.

P

  • Palô.

    Muanzu wa bakalenge ba mu Ejipitu. Mu Bible mbatele bapalô batanu (Shishaka, So, Tîhaka, Neko, ne Hofela), kadi bakuabu ki mbabatele to, kusangisha ne bavua benzele Abalahama, Mose ne Jozefe malu a bungi.​—Eks 15:4; Lom 9:17.

  • Pasaka.

    Tshibilu tshia ku tshidimu tshivuabu basekelela dia 14 ngondo wa Abiba (wakaluabu kubikila Nisana) bua kuvuluka dipikudibua dia bena Isalele mu Ejipitu. Bavua bamuenza pa kushipa muana wa mukoko (anyi mbuji) ne bamuosha pa kapia ne balua kumudia ne bisekiseki bia bululu ne mampa kaayi mela luevene.​—Eks 12:27; Yne 6:4; 1Ko 5:7.

  • Pelasa; bena Pelasa.

    Buloba ne bantu bidibu batela pa tshibidilu pamue ne bena Madayi, ne bavua bushuwa mu malanda ne bena Madayi. Ku ntuadijilu kua bena Pelasa, bavua anu ne buloba bua ku sud lua ku ouest bua mpata wa pa mukuna wa Iran. Mu bukokeshi bua Kolesha Munene (uvua tatuende muena Pelasa ne mamuende muena Madayi bilondeshile bamue bamanyi ba malu a kale), bena Pelasa bakapita bena Madayi bukole, nansha muvua bukalenge abu butungunuke ne kuikala ne bitupa bibidi. Kolesha wakatshimuna bukalenge bua bena Babilona mu 539 K.B.B. ne wakanyishila bena Yuda bavua bakuatshibue bua kupingana kuabu. Bukalenge bua bena Pelasa buvua bumbukila ku musulu wa Indus ku est too ne ku mbuu wa Égée ku ouest. Bena Yuda bavua ku bukokeshi bua Pelasa too ne pavua Alexandre Munene mutshimune bena Pelasa mu 331 K.B.B. Danyele ukavua mumone bukalenge bua bena Pelasa mu tshikena kumona, ne budi mu Bible mu Ezela, Nehemiya, ne Esetê. (Ezl 1:1; Dan 5:28)​—Tang. Tshis. B9.

  • Pelata.

    Musulu mule wa mushinga wa bungi wa ku sud kua Asia luseke lua ku est ne umue wa ku misulu minene ya mu Mezopotamia. Mbatele Pelata musangu wa kumpala mu Genese 2:14 bu umue wa ku misulu inayi ya mu Edene. Batu batamba kumubikila ne: “Musulu.” (Gen 31:21) Uvua mukalu wa ku nord wa buloba buvuabu bapeshe Isalele. (Gen 15:18; Bua 16:12)​—Tang. Tshis. B2.

  • Peleshete; bena Peleshete.

    Buloba bua ku muelele kua mâyi ku sud kua Isalele buvuabu balue kubikila ne: Peleshete. Bavua babikila bantu ba mu Kuleta bavua balue kusombela muaba au ne: bena Peleshete. Davidi wakabakokesha, kadi bakashala badikadile ne kushalabu bena lukuna ba Isalele. (Eks 13:17; 1Sm 17:4; Amo 9:7)​—Tang. Tshis. B4.

  • Pentekoste.

    Tshibilu tshibidi tshia ku bibilu binene bisatu bivuabu balombe balume bena Yuda bonso bua kusekelela mu Yelushalema. Pentekoste udi umvuija “(dituku) dia 50,” ndîna didibu batela mu Mifundu ya tshiena Greke ya buena Kristo bua kuleja Tshibilu tshia Dinowa anyi Tshibilu tshia Mbingu tshidibu batele mu Mifundu ya tshiena Ebelu. Bavua batshienza mu dituku dia 50 babala kumbukila ku dia 16 Nisana.​—Eks 23:16; 34:22; Bz 2:1.

  • Pima.

    Bujitu ne mushinga bivua bena Peleshete balomba bua kunona bintu bia biamu bishilashilangane. Bipiminu bia bungi bia mabue  bivuabu bapete mu Isalele pavuabu bakalula buloba bidi ne maleta matshintamane a tshiena Ebelu tshia kale a “Pima”; bujitu buabi budi mua kuikala bua grame 7,8 budi busua kupetangana ne bia bisatu bibidi bia nshekele.​—1Sm 13:20, 21.

  • Porneia.

    Tang. MASANDI.

  • Pulima.

    Tshibilu tshia ku tshidimu tshivuabu benza mu dia 14 ne dia 15 ngondo wa Adâ. Tshidi tshivuluija dipanduka dia bena Yuda ku kabutu mu matuku a mukalenge mukaji Esetê. Muaku udi kawuyi wa mu tshiena Ebelu eu: purim, udi umvuija “nshobo.” Tshibilu tshia Pulima, anyi Tshibilu tshia Nshobo tshivua tshibikidibua nanku bua muvua Hamana muele Pû (Nshobo) bua kumanya dituku dia kukumbaja tshifufu tshivuaye muele bua kushipa bena Yuda.​—Est 3:7; 9:26.

S

  • Samalea.

    Tshimenga tshikulu tshia bukalenge bua bisa 10 bia Isalele bua ku nord munkatshi mua bidimu 200, ne kabidi dîna dia tshitupa tshiatshi tshijima tshia buloba. Tshimenga etshi tshivua tshibakila pa mukuna uvua pawu ne dîna edi. Mu matuku a Yezu, Samalea uvua dîna dia distrike dia bena Lomo divua pankatshi pa Galela ku nord ne Yudaya ku sud. Yezu uvua pa tshibidilu udikanda bua kuyisha mu buloba ebu pavuaye wenza ngendu, kadi uvua upitshilamu imue misangu ne uyukila ne bantu bavuamu. Petelo wakakuata mudimu ne lusapi luibidi lua Bukalenge lua mu tshimfuanyi pavua bena Samalea bapete nyuma muimpe. (1Bk 16:24; Yne 4:7; Bz 8:14)—Tang. Tshis. B10.

  • Sanedren.

    Tshilumbuluidi tshinene tshia bena Yuda tshia mu Yelushalema. Mu matuku a Yezu, tshivua tshienza ne bantu 71, kusangisha ne muakuidi munene ne bantu bakuabu bavua benze mudimu wa buakuidi bunene, bena mu mêku a bakuidi banene, bakulu, bamfumu ba bisa ne ba mêku, ne bafundi.—Mâk 15:1; Bz 5:34; 23:1, 6.

  • Satana.

    Muaku wa tshiena Ebelu udi umvuija “Mukandamanyi.” Miaba idibu bawufunde mu miakulu ya ntuadijilu ya mu Bible bawele kanungu kadi kawusunguluja, apu udi utangila Satana Diabolo, Muluishi munene wa Nzambi.​—Yob 1:6; Mat 4:10; Bua 12:9.

  • Seha.

    Tshipiminu tshia bintu biume. Padibu batshinkila bunene buende pa tshipiminu tshia bata tshia bintu bia mâyi mâyi tshidi tshipetangana nende, udi mua kubuela litre 7,33. (2Bk 7:1)—Tang. Tshis. B14.

  • Sela.

    Dîna divua mu malu a mijiki anyi diambulula didi mu Misambu ne mu Habakuka. Udi mua kumvuija dikisha mu dimba anyi mu mijiki, peshi mu bionso bibidi, bua kuelangana meji mu tshimuma anyi bua kuleja anu muvua muntu udiumvua. Muaku diapsalma udibu bakudimune mu Bible wa Septante wa mu tshiena Greke eu udi umvuija “dikisha mu misambu.”—Mis 3:4; Hab 3:3.

  • Shebata.

    Panyima pa dilekeledibua mu Babilona, dîna dia ngondo wa 11 mu kalandriye ka tshijila ka bena Yuda ne dia ngondo muitanu mu kalandriye kavua kakayi ka bena Yuda. Uvua utuadija munkatshi mua ngondo wa kumpala uya too ne mua ngondo muibidi. (Zek 1:7)—Tang. Tshis. B15.

  • Sheminita.

    Dîna dia mu malu a mijiki didi diumvuija ku muaku ku muaku “wa 8” didi mua kuleja mijiki ya panshi panshi. Bua biombelu, muaku eu udi pamuapa uleja biombelu bivua bipatula dîyi dinene bilondeshile dilondangana dia mêyi mu mijiki. Bua misambu, uvua pamuapa uleja dipunguluja dia panshi panshi, dimba mu dipetangana.—1Ku 15:21; Mis 6:Mut; 12:Mut.

  • Sheole.

    Muaku wa tshiena Ebelu udi upetangana ne wa tshiena Greke “Hadese.” Mbawukudimune ne: “Lukita” (ne dileta dinene) bua kuleja mudiyi lukita lua bukua bantu buonso pamutu pa kuikalalu lukita lua muntu umue.—Gen 37:35; Mis 16:10; Bz 2:31 (dim.).

  • Siona; mukuna wa Siona.

    Dîna dia tshimenga tshikolesha tshia bena Yebuse tshia Yebuse tshivua ku mukuna wa ku sud lua ku est kua Yelushalema. Davidi mumane kutshikuata, wakibakamu nzubu wende wa bukalenge, ne bakalua kutshibikila ne: “Tshimenga tshia Davidi.” (2Sm 5:7, 9) Siona wakalua nangananga mukuna wa tshijila kudi Yehowa pavua Davidi mutumapu Mushete wa tshipungidi. Pashishe, dîna edi diakakongoloja muaba wa ntempelo ku Mukuna wa Moliya, ne imue misangu tshimenga tshijima tshia Yelushalema. Mbaditele kabidi mu tshimfuanyi mu Mifundu ya tshiena Greke ya buena Kristo.—Mis 2:6; 1Pt 2:6; Bua 14:1.

  • Siwana.

    Panyima pa dikuatshibua mu Babilona, dîna dia ngondo muisatu mu kalandriye ka tshijila ka bena Yuda ne dia ngondo wa 9 mu kalandriye kavua kakayi ka bena Yuda. Uvua utuadija munkatshi mua ngondo muitanu uya too ne mua ngondo muisambombo. (Est 8:9)​—Tang. Tshis. B15.

  • Sulia; bena Sulia.​

    Tang. ALAMA; BENA ALAMA.

  • Suti.

    Binkonya bibidi binene bia mâyi mîpi bia ku muelelu kua Libi, ku nord kua Afrike, bivuabu batshina kudi bendeshi ba matu ba kale  bua lusenga lubi luvua lushintuluka misangu yonso bua dipueka ne dibanda dia mâyi. (Bz 27:17)​—Tang. Tshis. B13.

T

  • Tamuza.

    1) Dîna dia nzambi uvua bakaji bena Ebelu batontolodi ba mu Yelushalema badila. Badi bela meji ne: Tamuza uvua kumpala mukalenge uvuabu bavuije nzambi panyima pa lufu luende. Mu mikanda ya bena Sumer badi babikila Tamuza ne: Dumuzi ne badi baleja mudiye bayende anyi munanga wa nzambi mukaji wa bufuke Inanna (Ishtar wa bena Babilona). (Yhz 8:14) 2) Panyima pa dikuatshibua mu Babilona, dîna dia ngondo muinayi wa bena Yuda bilondeshile muvua ngondo ubala mu kalandriye ka tshijila ne dia ngondo wa 10 mu kalandriye kavua kakayi ka tshijila. Ngondo eu uvua utuadija munkatshi mua ngondo muisambombo uya too ne mua ngondo wa 7.​—Tang. Tshis. B15.

  • Tartare.

    Mu Mifundu ya tshiena Greke ya buena Kristo, nkuikala mu nsombelu wa dipuekeshibua milongo muenze bu mu buloko muvuabu bele banjelu bavua kabayi batumikile mu matuku a Noa. Mu 2 Petelo 2:4, ditela muaku wa pa muanda tartaroo (‘kuela mu Tartare’) kadiena diumvuija ne: “banjelu bavua benze mpekatu” abu bavua bedibue mu Tartare wa bampangano wa mu mianu (mmumue ne: buloko bua muinshi mua buloba ne muaba wa mîdima wa nzambi mipuekele) to. Kadi didi dileja ne: Nzambi uvua mubumbushe muaba wabu wa mu diulu mubapuekeshe, mubanyenge diakalenga divuabu nadi ne mubele mu nsombelu wa mîdima mikole ya mu lungenyi bua bidi bitangila malu a butoke adi Nzambi mulongolole. Mîdima idi kabidi ileja nshikidilu wabu udi Mifundu ileja ne: nkabutu ka tshiendelele pamue ne mfumuabu, Satana Diabolo. Nunku Tartare udi uleja nsombelu wa dipuekeshibua milongo bikole bua banjelu batomboke abu. Kena muomumue ne “dijimba dile menemene” didibu batele mu Buakabuluibua 20:1-3 to.

  • Tebeta.

    Panyima pa dikuatshibua mu Babilona, dîna dia ngondo wa 10 mu kalandriye ka tshijila ka bena Yuda ne dia ngondo muinayi mu kalandriye kavua kakayi ka bena Yuda. Uvua utuadija munkatshi mua ngondo wa 12 uya too ne mua ngondo wa kumpala. Misangu ya bungi, badi bamubikila anu ne: “ngondo wa dikumi.” (Est 2:16)​—Tang. Tshis. B15.

  • Telafima.

    Nzambi anyi mpingu ya dîku ivuabu imue misangu bakonka bimanyinu bia malu atshilualua. (Yhz 21:21) Imue ivua ne bunene mienze bu bantu, mikuabu yoyi ivua mikese bikole. (Gen 31:34; 1Sm 19:13, 16) Bintu bia kale bipeta mu Mezopotamia bidi bileja ne: kuikala ne mpingu ya telafima kuvua ne buenzeji bunene kudi muntu uvua ne bua kuangata bumpianyi bua dîku. (Bualu ebu budi buleja tshivua Lakele muangatshile telafima ya tatuende.) Bidi bimueneka ne: kabivua nanku mu Isalele nansha muvuaku ditendelela ne mpingu ya telafima mu matuku a balumbuluishi ne bakalenge, ne telafima ivua mu bintu bivua mukalenge wa lulamatu Yoshiya mubutule.—Bal 17:5; 2Bk 23:24; Hos 3:4.

  • Tishri.​

    Tang. ETANIMA ne Tshis. B15.

  • Tshia dikumi.

    Tshitupa tshia dikumi tshivuabu bafila anyi bafuta bu mulambu nangananga bua malu a ntendelelu. (Mal 3:10; Dut 26:12; Mat 23:23) Mu Mikenji ya Mose, bavua bapesha bena Lewi tshia dikumi tshia bia pa madimi, ne tshia dikumi tshia divulangana dia ngombe ne mikoko ku tshidimu tshionso bua kubambuluisha. Bena Lewi bavua bafila tshia dikumi tshia tshia dikumi etshi kudi bakuidi ba mu ndelanganyi ya Alona bua kubambuluisha. Kuvua bia dikumi bikuabu kabidi. Bena Kristo ki mbalombibue bua kufila tshia dikumi to.

  • Tshia kupikulangana natshi.

    Mushinga mufuta bua kulekeesha ku dikuatshibua, ku dinyoka, ku dikenga, ku mpekatu, anyi mene ku mukenji. Mushinga au kawuvua misangu yonso anu wa makuta to. (Yes 43:3) Bavua balomba tshia kupikula natshi mu nsombelu mishilangane. Tshilejilu, mu Isalele banabute bonso balume ba bantu anyi ba nyama bavua ba Yehowa, ne tshia kupikula natshi, anyi mushinga wa kupikula nawu uvua ne bua kufutshibua bua kubapikula ku dikala bafidibue anu ku mudimu wa Yehowa. (Nom 3:45, 46; 18:15, 16) Ngombe wa tshikisu uvuabu kabayi balame yeye mushipe muntu, bavua bakosela muenayi tshia kupikula natshi bua kumupikula ku tshibawu tshia lufu tshikavuabu bafunde. (Eks 21:29, 30) Kadi kabavua bitaba tshia kupikulangana natshi bua muntu uvua mushipangane ku bukole to. (Nom 35:31) Bualu bua mushinga budi ne: Bible udi utamba kuimanyina pa tshia kupikulangana natshi tshivua Kristo mufute ku lufu luende lua mulambu bua kukuula bantu badi batumikila ku mpekatu ne ku lufu.​—Mis 49:7, 8; Mat 20:28; Ef 1:7.

  • Tshibilu tshia Bitanda.

    Badi batshibikila kabidi ne: Tshibilu tshia Nzubu ya ntenta anyi Tshibilu tshia Disangisha bia pa madimi. Bavua batshienza mu dia 15 too ne dia 21 ngondo wa Etanima. Tshivua tshisekelela dinowa ku ndekelu kua tshidimu tshia didima bua bena Isalele ne tshivua tshikondo tshia disanka ne  diela Yehowa tuasakidila bua dibenesha bia pa madimi. Mu matuku a tshibilu etshi, bantu bavua basombela mu bitanda anyi bisaasa bua kuvuluka Dimuangala diabu mu Ejipitu. Tshivua tshimue tshia ku bibilu bisatu bivuabu balombe bantu balume bua kuya ku Yelushalema bua kusekelela.​—Lew 23:34; Ezl 3:4.

  • Tshibilu tshia Dibanjija.

    Dituku dia ku tshidimu divuabu bavuluka bua dikezula dia ntempelo bobu bamane kumunyanga kudi Antiochus Épiphane. Tshibilu etshi tshivua tshituadija mu dia 25 ngondo wa Kiseleu ne tshienza matuku 8.​—Yne 10:22.

  • Tshibilu tshia Dinowa; Tshibilu tshia Mbingu.​

    Tang. PENTEKOSTE.

  • Tshibilu tshia Mampa kaayi mela Luevene.

    Tshia kumpala tshia ku bibilu bisatu binene bivua bena Isalele benza ku tshidimu. Tshivua tshituadija mu dia 15 ngondo wa Nisana, dituku divua dilonda Pasaka ne tshitungunuka matuku 7. Bavua badia anu mampa kaayi mela luevene bua kuvuluka Dimuangala diabu mu Ejipitu.​—Eks 23:15; Mâk 14:1.

  • Tshibuikidiji tshia dilengejangana.

    Tshibuikidiji tshia mushete wa tshipungidi; kumpala kuatshi ke kuvua muakuidi munene unyakila mashi a milambu ya mpekatu Dituku dia Dibuikila dia mpekatu. Muaku wa mu tshiena Ebelu udi ufumina ku muaku wa pa muanda udi umvuija “kubuikidija (mpekatu)” peshi “kukupula (mpekatu).” Tshivua tshienza ne or munda ne pambelu, tshikale ne bakeluba babidi, benza umue ku ditengu dimue mukuabu ku dikuabu. Imue misangu batu batshibikila anu ne: “tshibuikidiji.” (Eks 25:17-22; 1Ku 28:11; Eb 9:5)​—Tang. Tshis. B5.

  • Tshidimu tshia budikadidi.

    Tshidimu tshionso tshia 50, kumbukila ku dibuela dia Isalele mu Buloba Bulaya. Buloba buvua ne bua kushala tshilala mu Tshidimu tshia budikadidi, ne bapika bena Ebelu bavua ne bua kulekeledibua. Bavua bapingaja maloba a bumpianyi avuabu bapane. Mu ngumvuilu kampanda, tshivua tshidimu tshijima tshia tshibilu, tshidimu tshia dilekeledibua tshivua tshipingajilula tshisamba mu nsombelu uvuatshi pavua Nzambi mutshijadike musangu wa kumpala.​—Lew 25:10.

  • Tshiena Alama.

    Muakulu wa ndelanganyi ya Shema udi upetangana bikole ne tshiena Ebelu muikale pawu ne alfabe wa muomumue. Bavua bawakula ku ntuadijilu kudi bena Alama, kadi pashishe kuluawu muakulu wa pa buloba bujima wa bungenda mushinga ne wa dimanyishangana malu mu bukalenge bua bena Ashû ne bua bena Babilona. Uvua kabidi muakulu munene wa mu bukalenge bua Pelasa mu malu a dilombola midimu. (Ezl 4:7) Bavua bafunde bitupa bia mikanda ya Ezela, Yelemiya, ne Danyele mu tshiena Alama.—Ezl 4:8–6:18; 7:12-26; Yel 10:11; Dan 2:4b-7:28.

  • Tshiena (muena) Ebelu.

    Mbikidilu uvuabu bamba kumpala bua Abalama (Abalahama), umutapulula ne bena Amole bavua badie nende mutumba. Bakalua kubikila ndelanganyi ya Abalahama mu mbikidilu eu ku butuangaji bua muikuluende Yakoba kabidi ne muakulu wayi. Mu matuku a Yezu, tshiena Ebelu tshiakabuela biambilu bia bungi bia mu tshiena Alama ne tshiena Ebelu tshivua muakulu uvua Kristo ne bayidi bende bakula.—Gen 14:13; Eks 5:3; Bz 26:14.

  • Tshiena (muena) Greke.

    Muakulu udibu bakula kudi bena Grese; kabidi, mmuntu wa mu Grese anyi eu udi dîku diabu difumine muntu amu. Mu Mifundu ya tshiena Greke ya buena Kristo, dîna edi didi kabidi ne ngumvuilu mualabale, didi dileja bantu bonso badi kabayi bena Yuda anyi aba bonso bavua bapete buenzeji bua muakulu wa tshiena Greke ne bilele biabu.—Yoe 3:6; Yne 12:20.

  • Tshiendenda tshia masandi.​

    Tang. MASANDI.

  • Tshieya.

    Tshintu tshidi muntu udi muangate dibanza upesha muena dibanza bu tshijadiki tshia ne: neafute dibanza. Mu Mikenji ya Mose muvua malu avua akula bua bieya bua kuakuila bapele ne bena mu tshisamba bavua kabayi ne wa kubambuluisha.​—Eks 22:26; Yhz 18:7.

  • Tshikadilu tshia dikamakama.

    Mu tshiena Greke aselgeia, tshiambilu tshidi tshileja bienzedi bia dishipa mikenji ya Nzambi bibi bitambe ne bileja kapetu ka dikamakama anyi ka dipanga bundu; ndungenyi ludi luleja dipanga kanemu anyi mene kapetu bua bakokeshi, bua mikenji anyi bua mikenji ya bikadilu. Tshiambilu etshi katshiena tshiakula bua tshikadilu tshibi tshia kabualu kakese to.—Gal 5:19; 2Pt 2:7.

  • Tshikaminu tshia mvinyo.

    Pa tshibidilu mbina (bilaminu) bibidi biondola mu dibue, tshimue kuulu kua tshikuabu, bituangaja kudi kamunkoloji. Pavuabu bazaza tumuma tua mvinyo mu tshina tshia kuulu, mâyi atu avua apuongolokela mu tshia muinshi. Badi betela tshiambilu etshi mu tshimfuanyi bua kuleja dilumbuluisha dia Nzambi.—Yes 5:2; Bua 19:15.

  • Tshikokedi.

    Mukamba muambula pa makaya a muntu mulembeleja majitu nseke yonso ibidi, mutshi anyi mabaya mateka pa nshingu ya nyama ibidi itu yambula majitu (nangananga nyama ya minene) padiyi ikoka tshiamu tshia kudima natshi anyi ditempu. Bu muvua bapika batamba kuambuila majitu manene ku bikokedi,  bavua batela tshikokedi mu tshimfuanyi bua kuleja bupika anyi dikokela muntu mukuabu, anyi kabidi dikengeshibua anyi dikenga. Kumbusha anyi kutshibula tshikokedi kuvua kumvuija kumbushibua ku bupika, ku dikengeshibua ne dikuatshibua ku mudimu.—Lew 26:13; Mat 11:29, 30.

  • Tshikutu.

    Tshintu tshivuabu benguluila biamu; boshila kabidi mabungu a buloba ne bintu bikuabu bia diima. Ku kale, bavua benza bikutu ne madioto anyi ne mabue. Bavua kabidi babikila tshikutu tshia kuoshela mabungu a buloba ne bintu bia diima ne tshia kuoshila lupemba ne: mfulu.​—Gen 15:17; Dan 3:17; Bua 9:2.

  • Tshilamba tshia kujingila ku mutu.

    Tshilamba tshivuabu bavuala ku mutu bu tshitambala. Muakuidi munene uvua uvuala tshilamba tshia kujingila ku mutu tshia line mutambe buimpe tshikale ne tshitata tshia or tshisuikila kumpala kuatshi ne muonji wa dikala dia ble. Mukalenge uvua uvuala tshilamba etshi muinshi mua tshifulu tshiende tshia butumbi. Yobo wakatela tshiambilu etshi mu tshimfuanyi pakafuanyikijaye buakane buende ne tshilamba tshia kujingila ku mutu.—Eks 28:36, 37; Yob 29:14; Yhz 21:26.

  • Tshilamba tshia kukosolola natshi.

    Tshilamba tshimpe tshia manda tshizola bimfuanyi bia bakeluba tshivua tshikosolola Muaba wa Tshijila ne Muaba Mutambe Tshijila mu ntenta wa tshitendelelu ne mu ntempelo. (Eks 26:31; 2Ku 3:14; Mat 27:51; Eb 9:3)​—Tang. Tshis. B5.

  • Tshilamba tshia pa tshiadi.

    Mpaya munene mulengeja ne mabue a mushinga tshivuabu bavuala kudi muakuidi munene wa Isalele pa muoyo wende pavuaye ubuela Muaba wa tshijila. Bavua batshibikila ne: “tshilamba tshia pa tshiadi tshia dilumbuluisha” bualu tshivua ne Ulima ne Tumima, bivuabu bamanyisha nabi malumbuluisha a Yehowa. (Eks 28:30)​—Tang. Tshis. B5.

  • Tshilamba tshikayabale.

    Tshilamba tshipapakane tshivuabu benza natshi mifuku anyi bibombi, bu mudi bia kuelela ntete. Bavua batamba kutshiluka batshienza ne miosa mifiike ya mbuji ne tshivua tshilamba tshivuabu bavuala bua madilu.—Gen 37:34; Luk 10:13.

  • Tshimanyinu.

    Tshintu, tshienzedi, bualu, anyi dileja didi kadiyi dia pa tshibidilu didi ne diumvuija kampanda bua kuleja bualu bukuabu, bua mpindieu peshi budi bulua.—Gen 9:12, 13; 2Bk 20:9; Mat 24:3; Bua 1:1.

  • Tshimanyinu tshia tshijila tshia dibanjijibua.

    Tshitata tshia or muimpe menemene tshivua tshibalakana tshiondola miaku ya mu tshiena Ebelu ya ne: “Bunsantu mbua Yehowa.” Bavua batshiasa mu mpala mua tshilamba tshia kujingila ku mutu tshia muakuidi munene. (Eks 39:30)​—Tang. Tshis. B5.

  • Tshimenga tshia Davidi.

    Dîna divuabu bapeshe tshimenga tshia Yebuse Davidi mumane kutshitshimuna ne muibakamu muaba wende wa bukalenge. Badi batshibikila kabidi ne: Siona. Ntshitupa tshia kale tshia ku sud lua ku est kua Yelushalema.​—2Sm 5:7; 1Ku 11:4, 5.

  • Tshimuma tshia grenade.

    Tshimuma tshienze bu pome tshikale ne kantu bu katshifulu ku lusongo. Munda muaku mudi bitetateta bia mâyi mâyi tshionso tshikale ne kalutete kakunze. Kuinshi kua muzabi wa kawuyi maboko wa ble wa muakuidi kabidi ne mutu wa dikunji dia Yakina ne dia Boaza avua kumpala kua ntempelo bivua bilengeja ne bilengejilu bienze bu bimuma bia grenade.​Eks 28:34; Nom 13:23; 1Bk 7:18.

  • Tshioshelu.

    Tshintu tshiasa anyi tshienza ne buloba, ne mabue, ne mushiki wa mabue, anyi ne mabaya malamika biamu tshivuabu balambuila milambu anyi musenga wa manananshi bua kutendelela. Mu tshibambalu tshia kumpala tshia ntenta wa tshitendelelu ne tshia ntempelo, muvua “tshioshelu tshia or” tshikese bua kulambuilapu musenga wa manananshi. Tshivua tshienza ne mabaya malamika or. Bavua bateke “tshioshelu tshia tshiamu tshia mitaku” tshinene pambelu mu lupangu bua milambu ya kuosha. (Eks 27:1; 39:38, 39; Gen 8:20; 1Bk 6:20; 2Ku 4:1; Luk 1:11)​—Tang. Tshis. B5 ne B8.

  • Tshipungudi.

    Disuika dîyi anyi diumvuangana pankatshi pa Nzambi ne bantu anyi pankatshi pa bitupa bia bantu bibidi bua kuenza anyi kubenga kuenza bualu kampanda. Imue misangu anu tshitupa tshimue ke tshivua ne bujitu bua kukumbaja mêyi (tshipungidi tshienza kudi tshisumbu tshimue tshivua nangananga mulayi). Misangu mikuabu bitupa bionso bibidi bivua ne mêyi a kukumbaja (tshipungidi tshivua tshitangila bitupa bibidi). Pa kumbusha bipungidi bia Nzambi ne bantu, Bible udi utela bipungidi bienza kudi bantu, bisa, bisamba anyi bisumbu bia bantu. Mu bipungidi bivua ne buenzeji bukole mudi bivua Nzambi mudie ne Abalahama, ne Davidi, ne tshisamba tshia Isalele (tshipungidi tshia Mikenji), ne Isalele wa Nzambi (tshipungidi tshipiatshipia).​—Gen 9:11; 15:18; 21:27; Eks 24:7; 2Ku 21:7.

  • Tshipupu 1.

    Disama dionso didi diambulukilangana lukasa didi mua kutangalaka bikole ne kukebesha lufu. Tshitu misangu ya bungi tshileja dilumbuluisha dia Nzambi.​—Nom 14:12; Yhz 38:22, 23; Amo 4:10.

  •  Tshipupu 2.

    Mu Mifundu ya mu tshiena Ebelu, muaku eu udi utamba kuleja dikenga, disama, anyi lutatu bituma kudi Yehowa bu dinyoka. Mu Mifundu ya mu tshiena Greke, udi uleja kukuma anyi kuelangana mfimbu wa tubulu tubulu anyi wa tuamu ku nsongo.—Nom 16:49; Yne 19:1.

  • Tshisumbu 1.

    Tshisumbu tshia bantu badi badisangishe bua tshipatshila anyi mudimu kampanda. Mu Mifundu ya tshiena Ebelu, tshidi tshileja mu kabujima tshisamba tshia Isalele. Mu Mifundu ya tshiena Greke ya buena Kristo, tshidi tshileja bisumbu bia bena Kristo ku tshimue ku tshimue kadi misangu ya bungi tshileja tshisumbu tshia bena Kristo mu kabujima.​—1Bk 8:22; Bz 9:31; Lom 16:5.

  • Tshisumbu 2.

    Tshisumbu tshia bantu badisangishe ku diumvuangana. Mu Mifundu ya tshiena Ebelu, muaku eu utu misangu ya bungi uleja masangisha a bena Isalele mu bibilu bia malu a ntendelelu anyi mu bibilu bikuabu binene bia malu avua atangila tshisamba.—Dut 16:8; 1Bk 8:5.

  • Tshitampi.

    Kamu kavuabu batua naku tshimanyinu (nangananga pa diima anyi budimbu) tshidi tshileja muena tshintu, bujalame bua tshintu, peshi diumvuangana bua bualu kampanda. Bitampi bia kale bivua tshipese tshia bintu bikolakane (bu mudi: dibue, mubanga, anyi mutshi) tshikale ne maleta anyi bimfuanyi biondolapu luboko. Batu benza mudimu ne tshitampi mu tshimfuanyi bua tshintu tshidibu bashindike bujalame buatshi, anyi bu tshimanyinu tshia muena tshintu, peshi bu tshintu tshidi tshisokoka.—Eks 28:11; Neh 9:38; Bua 5:1; 9:4.

  • Tushola tua miendu.

    Tuntu tua mudimu tua or, pamuapa tuenze bu nkala, tuvuabu bajima natu kapia ka miendu mu ntenta wa tshitendelelu ne mu ntempelo.—Eks 37:23.

U

  • Ulima ne Tumima.

    Bintu bivuabu benza nabi mudimu kudi muakuidi munene anu muvuabu benza ne nshobo bua kumanya disua dia Nzambi pavuaku malu manene avua atangila tshisamba avua akengela diandamuna dia Yehowa. Bavua bela Ulima ne Tumima mu tshilamba tshia pa tshiadi tshia muakuidi munene pavuaye ubuela mu ntenta wa tshitendelelu. Bidi bimueneka ne: bakalekela kuenza mudimu ne bintu ebi pakabutulabu Yelushalema kudi bena Babilona.—Eks 28:30; Neh 7:65.

Y

  • Yakoba.

    Muana wa balume wa Izaka ne Lebeka. Nzambi wakalua kumupesha dîna dia Isalele, ne wakalua nkambua wa tshisamba tshia Isalele (bavua bababikila kabidi bena Isalele, ne pashishe ne: bena Yuda). Uvua tatu wa bana ba balume 12, bobu ne ndelanganyi yabu bavua benze bisa 12 bia tshisamba tshia Isalele. Bakatungunuka ne kubikila tshisamba tshia Isalele anyi bena Isalele ne: Yakoba.—Gen 32:28; Mat 22:32.

  • Yedutuna.

    Muaku udi diumvuija kadiyi dimanyike udi mu mutu wa mukanda wa Musambu wa 39, 62 ne 77. Mitu ya mikanda eyi idi imueneka bu malu a kulonda bua kuimba misambu, pamuapa bua kuleja mushindu wa kuimba anyi tshiombelu tshia kuimba natshi. Kuvua muimbi wa misambu muena Lewi diende Yedutuna; nunku bavua mua kuikala basuikakaja ngimbilu eu anyi tshiombelu etshi kudiye anyi kudi bana bende.

  • Yehowa.

    Mushindu wa mu Tshiluba udibu bafunda tétragramme (maleta anayi a mu tshiena Ebelu bua dîna dia Nzambi) udi mu nkudimuinu eu misangu mipite pa 7 000.​—Tang. Tshis. A4 ne A5.

  • Yuda.

    Muana muinayi wa Yakoba ne mukajende Lea. Pavua Yakoba wamba mêyi a buprofete mu bulalu bua lufu, wakamba ne: mukalenge munene wa kashidi uvua ne bua kuluila mu ndelanganyi ya Yuda. Yezu, mu buntu buende uvua mufumine kudi Yuda. Dîna dia Yuda didi dileja kabidi tshisa ne pashishe dileja bukalenge bubikila mu dîna dia Yuda. Padibu bakula bua Yuda bu bukalenge bua ku sud, uvua muenza kudi bisa bia Isalele, tshia Yuda ne tshia Benyamina, ukongoloja ne bakuidi ne bena Lewi. Yuda wakangata tshitupa tshia ku sud tshia ditunga tshivua ne Yelushalema ne ntempelo.​—Gen 29:35; 49:10; 1Bk 4:20; Eb 7:14.

Z

  • Zeuse.

    Nzambi munene wa bena Greke bavua batendelela nzambi ya bungi. Mu Luseta, bantu bakatupakana bangata Bânaba bu Zeuse. Mifundu ya kale mipeta pabuipi ne Luseta idi yakula bua “bakuidi ba Zeuse” ne “Zeuse nzambi dîba.” Mazuwa avua Paulo mumbuke nawu ku tshidiila tshia Melita avua ne tshimfuanyi tshia “Bana ba Zeuse” ku mutu, mmumue ne: bana ba mapasa ba balume babidi, Castor ne Pollux.Bz 14:12; 28:11.

  • Ziwa.

    Dîna dia ntuadijilu dia ngondo muibidi mu kalandriye ka tshijila ka bena Yuda ne dia ngondo wa 8 mu kalandriye kavua kakayi ka bena Yuda. Uvua utuadija munkatshi mua ngondo muinayi uya too ne mua ngondo muitanu. Badi bamubikila ne: Iyâ mu Talmud wa bena Yuda ne mu mikanda mikuabu ya panyima pa dikuatshibua mu Babilona. (1Bk 6:37)​—Tang. Tshis. B15.