Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 3 2017

 TSHIENA-BUALU TSHINENE | BENDESHI BA TUBALU BANAYI—MUDI LUBILU LUABU LUKUTANGILA

Wewe ne bendeshi ba tubalu banayi

Wewe ne bendeshi ba tubalu banayi

Badi bajuka, bikono bienda bidila! Tubalu tunayi tudi ne bukole etu ne bendeshi batu badi tshimfuanyi tshidi tshikemesha bikole tshitu misangu ya bungi tshienza bua ne: tupitshishe amue mabeji a mu Bible. Kabalu ka kumpala nkatoke—muendeshi waku mmukalenge mupiamupia udibu bapeshe tshifulu tshia bukalenge udi ne butumbi. Kabalu ka dikala dia kapia kadi kalonda kambule muendeshi udi umbusha ditalala pa buloba bujima. Pashishe kisatu kadi kalonda, kafike bu mundankulu, kambule muendeshi udi muele tshipiminu muulu bu mukenji mubi wa dipangika dia biakudia binene. Kabalu kinayi ka dikala ditokoloke kadi kasama, ntshimanyinu tshia disama ne bintu bikuabu bia lufu, bikebesha kudi lufu nkayalu. Lukita, mmumue ne: lukita lua bukua bantu bonso ludi lulonda pabuipi, luenda lupola mamiinu a muoyo.—Buakabuluibua 6:1-8.

Crystal udi wamba ne: “Ngakumvua buôwa bua musangu wa kumpala umvua mubale malu a bendeshi ba tubalu banayi. Ngakamona ne: dituku dia dilumbuluisha divua dienda dilua, ne bu mumvua tshiyi pabuipi, tshivua mua kupanduka to.”

Ed udi wamba ne: “Bendeshi ba tubalu banayi bashilangane bavua babande pa tubalu tua mekala mashilangane bakakoka ntema yanyi bikole. Diakamue pangakumvua tshivua tshikena kumona tshimvuija, bionso biakumvuika.”

Udiku udiumvua muvua Crystal mudiumvue bua bendeshi ba tubalu banayi ba mu Buakabulubua anyi? Peshi udi udiumvua muvua Ed mudiumvue? Mu nsombelu yonso eyi, lubilu lule lua bendeshi ba tubalu banayi ludi luenza bumue bua ku malu adi mamanyike bimpe mu Buakabuluibua, mukanda wa ndekelu wa mu Bible. Uvuaku mumanye ne: kumvua tshikena kumona etshi kuvua mua kukuambuluisha anyi? Mushindu kayi? Nzambi mmulaye ne: udi mua kupeta disanka dilelela paudi ubala, ulonga ne utumikila malu adi mafunda mu mukanda wa buprofete eu.—Buakabuluibua 1:1-3.

Padi bamue bantu bumvua buôwa bua tshikena kumona tshia bendeshi ba tubalu banayi, manya ne: katshivua tshienza bua kukukuatshisha buôwa to. Mu bulelela, bantu miliyo ya bungi mbamone ne: tshikena kumona etshi tshidi tshikolesha ditabuja diabu ne tshibapesha ditekemena dimpe bua matuku atshilualua. Bidi mua kuikala bia muomumue buebe wewe! Tudi tukulomba bua kubala bidi bilonda.