Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 1 2017

Nkaditupakana kakese patupu anyi?

Nkaditupakana kakese patupu anyi?

Muana wa bakaji wa bidimu bitue 4 wakamona muishi upatuka mu mumbunda wa tshiapu kampanda, utangalaka wenza bu matutu. Ke yeye kuela meji ne: mudimu wa tshiapu etshi uvua wa kuenza matutu. Ditupakana dikese dia muana eu didi mua kuikala bualu budi buenza tuseku. Kadi ditupakana dinene didi mua kutukebela njiwu. Tshilejilu, kumvua bibi malu a mu kanote kadi kaleja mua kunua buanga kudi mua kutufikisha ku bipeta bibi menemene.

Kumvua bibi malu a mu nyuma kudi mua kuikala kuoku kubi menemene. Tshilejilu, bamue bantu bavua bumvue malongesha a Yezu bibi. (Yone 6:48-68) Pamutu pa kulongabu bia bungi, bakabenga bualu buonso buvua Yezu ulongesha. Bavua bajimine bibi be!

Utuku ubala Bible bua kupeta buludiki anyi? Biobi nanku, udi wakuela kalumbandi. Kadi kumvua bibi bualu kampanda buudi mubale kudiku mua kuikala ne njiwu anyi? Bitu bifikila bantu ba bungi. Tukonkononayi malu asatu atu bantu batamba kumvua bibi.

  • Bamue bantu batu ne ngumvuilu mubi wa mukenji wa mu Bible wa ne: “Utshine Nzambi.” Badi bamba ne: ditshina edi nkuikala ne buôwa bukole kumpala kua Nzambi. (Muambi 12:13) Kadi Nzambi ki mmusue bua bantu badi bamutendelela badiumvue mushindu eu to. Udi wamba ne: ‘Kutshinyi, bualu bua ndi nebe; kukenzakanyi bua buôwa nansha, bualu bua ndi Nzambi webe; nenkukoleshe, bulelela, nenkukuatshishe.’ (Yeshaya 41:10) Kutshina Nzambi kudi kumvuija kumunemeka bikole menemene.

  • Nebuoshe buloba ebu ne kapia anyi?

    Bamue bantu batu bumvua bibi mêyi mafundisha ku nyuma wa Nzambi aa: ‘Bualu bua tshintu tshionso tshidi ne tshikondo tshiatshi, tshikondo tshia kuledibua ne tshikondo tshia kufua.’ Badi bamba ne: Nzambi ukadi mumane kujadika tshikondo tshiafua muntu yonso. (Muambi 3:1, 2) Kadi mvese eu udi mu bulelela uleja tshidi muoyo ne uleja kabidi ne: lufu ludi lukuata muntu yonso. Dîyi dia Nzambi didi dilongesha kabidi ne: mapangadika etu adi ne buenzeji pa bungi bua matuku etu a muoyo. Tshilejilu, tudi tubala ne: ‘Ditshina dia Yehowa didi dilepesha matuku a muoyo.’ (Nsumuinu 10:27; Misambu 90:10; Yeshaya 55:3) Mushindu kayi? Tshilejilu, kunemeka Dîyi dia Nzambi nekutusake bua kubenga kuenza malu adi mua kunyanga mubidi wetu bu mudi dikuatshika dia maluvu ne buenzavi buonso.—1 Kolinto 6:9, 10.

  • Padi Bible wamba ne: diulu ne buloba “mbilamibue bua kapia,” bamue batu bangata mêyi aa anu mudiwu mafunda emu, bamba ne: Nzambi neabutule buloba butudi badiate ebu. (2 Petelo 3:7) Kadi Nzambi mmulaye ne: kakulekela bua buloba buetu ebu bubutudibue to. ‘Wakajadika buloba pa bishimikidi biabu, bua kabunyungi too ne kashidi.’ (Misambu 104:5; Yeshaya 45:18) Ndongoluelu mubi wa malu ke wabutulabu ku kapia bua kashidi, ki mbuloba buetu ebu to. Kadi bua diulu, patudi tuangata muaku eu anu mutudi tuumvua amu, udi mua kuleja diulu ditutu tumona edi, tshibuashibuashia tshia mitoto anyi muaba udi Nzambi musombele. Kakuena tshimue tshia ku bintu ebi tshibutuka to.

BUA TSHINYI BANTU BATU MISANGU YA BUNGI BUMVUA MALU A MU BIBLE BIBI?

Anu muudi mua kumona mu bilejilu ebi, bantu batu misangu ya bungi bumvua bibi malu atubu babala mu Bible. Kadi bua tshinyi Nzambi mmulekele bienzeka nanku? Bamue badi bela meji ne: ‘Bu mudi Nzambi muikale ne meji onso ne mumanye malu onso,’ uvua mua kuikala mutupeshe mukanda mufundisha bimpe bua muntu yonso aumvue bipepele. Bua tshinyi ki mmuenze nanku? Tukonkononayi malu asatu atu misangu ya bungi apangisha bantu bua kumvua malu a mu Bible bimpe.

  1. Bible mmuenza bua bamumvue kudi bena budipuekeshi ne badi basue kumulonga. Yezu wakambila Tatu wende ne: “Tatu wanyi, Mukalenge wa diulu ne buloba, ndi nkutumbisha kumpala kua bantu  bualu udi musokoke bena meji ne bamanyi ba mukanda malu aa bikole, kadi udi mualeje bana batekete.” (Luka 10:21) Bible mmufundisha mu mushindu wa ne: anu bantu badi ne meji mimpe bumvue mukenji udimu. Bantu badi ne meji a diditambisha, ngikadilu utu kudi “bena meji ne bena mukanda” utu ubapangisha bua kumvua malu a mu Bible bimpe. Kadi bantu badi babala Bible bu “bana,” mmumue ne: bikale ne budipuekeshi ne dijinga dikole dia kulonga, badi bapeta difutu dia kumvua mukenji wa Nzambi bimpe. Nzambi mmuenze Bible mu mushindu muimpe be!

  2. Bible mmufundila bantu badi basue ne muoyo mujima bua Nzambi abambuluishe bua kumvua malu adimu. Yezu wakaleja ne: bantu bavua ne bua kuikala dijinga ne diambuluisha bua kumvua bimpe malu avuaye mulongeshe. Mmunyi muvuabu mua kudipeta? Yezu wakumvuija ne: “Muambuluishi, nyuma muimpe, watuma Tatu mu dîna dianyi, yeye neanulongeshe malu onso.” (Yone 14:26) Ke bua tshinyi Nzambi utu upesha bantu nyuma wende muimpe, mmumue ne: bukole buende buenzeji bua kubambuluisha bua bumvue malu adibu babala mu Bible. Kadi Nzambi katu upesha bantu badi kabayi bamulomba diambuluisha nyuma wende to, ke bualu kayi misangu ya bungi kabatu bumvua bimpe malu adi mu Bible to. Nyuma muimpe utu kabidi usaka bena Kristo badi ne dimanya dia malu a mu Bible bua kuambuluisha aba badi dijinga ne kupeta ngumvuilu muimpe.—Bienzedi 8:26-35.

  3. Bantu badi mua kumvua amue malu a mu Bible anu mu tshikondo tshiakane. Tshilejilu, bavua bambile muprofete Danyele bua kufunda mukenji kampanda uvua utangila matuku atshivua alua. Muanjelu wakamuambila ne: ‘Danyele, lama mêyi aa, uteke tshimanyishilu ku mukanda eu, bishale nunku too ne ku tshikondo tshia ku nshikidilu.’ Bantu ba bungi mbabale mukanda wa mu Bible wa Danyele eu munkatshi mua bidimu nkama ya bungi, kadi kabavua bawumvue bimpe menemene to. Nansha Danyele muine kavua mumvue amue malu avuaye mufunde to. Wakitaba ne budipuekeshi buonso ne: ‘Ngakumvua mêyi aa, kadi tshiakaajingulula nansha.’ Ndekelu wa bionso bantu bavua anu ne bua kumvua bimpe mêyi a buprofete a Nzambi avua Danyele mufunde, kadi anu mu tshikondo kampanda tshivua Nzambi mulongolole. Muanjelu wakumvuija ne: ‘Danyele, ya biebe; bualu bua mêyi aa adi masokoka ne adi mateka tshimanyishilu too ne palua tshikondo tshia ku nshikidilu.’ Nnganyi wajingulula mukenji wa Nzambi? ‘Kakuena umue wa mu bantu babi wajingulula malu, kadi bantu badi ne meji nebajingulule.’ (Danyele 12:4, 8-10) Nunku, Nzambi utu ufila diumvuija dia imue mvese ya mu Bible anu padi tshikondo tshiakane tshikumbana.

Kukadiku tshikondo tshivua Bantemu ba Yehowa bumvue malu a mu Bibe bibi anyi? Eyowa. Kadi pakakumbana tshikondo tshia Nzambi kutokesha malu, Bantemu bavua pabuipi bua kuakaja ngumvuilu wabu. Badi bitabuja ne: padibu benza nanku badi bidikija bapostolo ba Kristo bavua bakaje ne budipueshi buonso ngelelu wabu wa meji dîba dionso divua Yezu ubabela.—Bienzedi 1:6, 7.

Meji a dishima avua nawu muana wa bakaji bua muaba uvua matutu afumina adi mua kuikala anu kaditupakana kakese patupu. Kadi tshidi Bible ulongesha tshidi ne mushinga wa bungi kuudi. Mukenji wa mu Bible udi pawu ne mushinga kudi muntu yonso udi udienzeja bua kuwumvua padiye udibadila Bible. Nunku keba diambuluisha bua kumvua malu audi ubala. Keba bantu badi balonga Bible ne meji a budipuekeshi, bantu badi beyemena nyuma muimpe wa Nzambi bua kumvua malu a mu Bible, bantu badi batuishibue ne: tudi mu tshikondo tshidi Nzambi musue bua bumvue malu a mu Bible kupita muvuabu baumvua kumpala. Kuelakanyi bua kuyukila ne Bantemu ba Yehowa anyi bua kubala malu adibu bakebulule bimpe ku Enternete mu site jw.org. Bible udi ulaya ne: “Biwadidila dijingulula dia mianda muadi, neusangane dimanya dia malu a Nzambi.”—Nsumuinu 2:3-5.