Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 1 2017

 TSHIENA-BUALU TSHINENE | MUA KUMANYA MALU A BUNGI MU DIBALA DIEBE DIA BIBLE

Bua tshinyi kubala Bible?

Bua tshinyi kubala Bible?

“Mvua ngela meji ne: mbikole bua kumvua Bible.”—Jovy

“Mvua mmona ne: bivua mua kuntonda.”—Queennie

“Pangakamona bunene bua Bible, dijinga dia kumubala diakanjika.”—Ezekiel

Ukadiku muele meji bua dibala dia Bible kadi kuyi umubala bua tubingila tudibu batele kuulu eku anyi? Bua bantu ba bungi, kubala Bible kutu bu kudi kubatonda. Kadi newenze tshinyi wewe mumvue ne: Bible udi mua kukuambuluisha bua kuikala ne nsombelu muimpe ne wa disanka? Newenze tshinyi wewe mumvue ne: kudi imue ngenyi idi mua kuenza bua dibala dia Bible dikusankishe bikole? Udiku musue kumanya malu adi Bible mua kukupetesha anyi?

Tukonkonone bilejilu bikese patupu bia bantu bavua bamone bulenga bua Bible pakatuadijabu kumubala.

Ezekiel udi ne bidimu 20 ne bia mu njila udi wamba ne: “Kumpala, mvua anu bu muntu uvua wendesha mashinyi kayi mumanye kudiye uya. Kadi dibala dia Bible ndingambuluishe bua kuikala ne nsombelu muimpe. Udi ne mibelu mimpe indi mua kutumikila dituku dionso.”

Frieda udi pende ne bidimu 20 ne bia mu njila udi wamba ne: “Kumpala mvua ngenza malu ne dilubakana tshiyi ngela meji. Kadi bua dibala dianyi dia Bible, ngakalonga mua kudikanda. Mbingambuluishe bua kusomba bimpe ne bantu ne mpindieu ndi ne balunda ba bungi.”

Mamu mukuabu diende Eunice, udi ne bidimu 50 ne bia mu njila, udi wamba bua Bible ne: “Mmungambuluishe bua kuikala muntu wa nsongo ne kushintulula bikadilu bianyi bibi.”

Anu mudi bantu aba ne bantu bakuabu miliyo ya bungi balonge, dibala dia Bible didi mua kukuambuluisha bua kuikala ne nsombelu wa disanka. (Yeshaya 48:17, 18) Bible udi mua kukuambuluisha kabidi bua 1) kuangata mapangadika a meji, 2) kupeta balunda bimpe, 3) kupita bimpe ne tunyinganyinga ne 4) bualu buimpe butambe, kulonga bulelela pa bidi bitangila Nzambi. Mibelu ya mu Bible idi ifumina kudi Nzambi, wewe muyilonde kua kututa dikasa dibi to. Nzambi kena mua kufila mibelu mibi to.

Tshia mushinga nkuanji kutuadija. Mmibelu kayi mimpe idi mua kukuambuluisha bua kutuadija dibala bipepele ne kuenza bua dikale dikusankisha bikole?