Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 12 2015

 TSHIENA-BUALU TSHINENE | UDI MUA KUMVUA BIBLE

Diambuluisha bua kumvua Bible

Diambuluisha bua kumvua Bible

Fuanyikijabi ne: udi uya mu ditunga dienyi bua musangu wa kumpala. Udi upeta bantu, bilele, biakudia ne makuta biudi kuyi muibidilangane nabi to. Bushuwa udi mua kumvua bikuntonda.

Ke muudi kabidi mua kumvua paudi ubala Bible. Paudi umubala, udi upingana mu bikondo bia kale biudi pamuapa kuyi mumanye. Udi upetamu bantu badibu babikila ne: Bena Peleshete, utuilangana ne bilele biutu kuyi mumanye bu mudi ‘kupanda kua bilamba’ anyi umanya tshiakudia tshidibu babikila ne: mana ne makuta adibu babikila ne: drakma. (Ekesode 16:31; Yoshua 13:2; 2 Samuele 3:31; Luka 15:9) Bionso ebi bidi mua kukupampakaja. Anu mudibi bua paudi uya mu ditunga dienyi, kuenaku mua kukeba diambuluisha kudi muntu udi mua kukumvuija mudi malu anyi?

DIAMBULUISHA MU BIKONDO BIA KALE

Katshia anu mu tshikondo tshivuabu batuadije kufunda mifundu ya tshijila eyi mu bidimu bia 1500 kumpala kua Yezu, kuvua bantu bavua bambuluisha bantu bua kuyumvua. Tshilejilu, Mose mulombodi wa kumpala wa tshisamba tshia Isalele, ‘wakatuadija kulongesha’ malu avua mafunda.—Dutelonome 1:5.

Balongeshi bapiluke ba Bible bavua anuku too ne mu bidimi 900 biakalonda. Mu 455 kumpala kua Yezu, bakasangisha bena Yuda ba bungi too ne bana mu muaba uvua bantu ba bungi batuilangana mu Yelushalema. Balongeshi ba Bible bavua muaba au “babala mu mukanda.” Kabavua anu babala patupu to, “bakayijinguluila bantu kabidi, nunku buonso buabo bakunvua biakane.”—Nehemiya 8:1-8.

Bidimu 400 pashishe, Yezu Kristo wakaditua pende mu mudimu wa dilongeshangana eu. Yeye muine bavua bamumanye kudi bantu ne: mmulongeshi. (Yone 13:13) Uvua ulongesha bisumbu bia bantu nansha muntu pa nkayende. Mukuabu musangu, wakalongesha bantu ba bungi, pavuaye wenza Muyuki muende lumu wa pa Mukuna, “misumba ya bantu yakakema bikole bua mushindu uvuaye ulongesha.” (Matayi 5:1, 2; 7:28) Mu muvu wa luya mu tshidimu tshia 33, Yezu wakayukila ne bayidi bende babidi pavuabu benda baya mu njila batangile ku musoko kampanda pabuipi ne Yelushalema, ‘ubajinguluila bimpe Mifundu minsantu.’—Luka 24:13-15, 27, 32.

Bayidi ba Yezu bavua pabu balongeshi ba Dîyi dia Nzambi. Musangu mukuabu, munene kampanda wa mu Éthiopie uvua wenda ubala mvese kampanda wa mu Mifundu. Muyidi uvuabu babikila ne: Filipo wakasemena kudiye kumuebejaye ne: “Udi umvua bualu buudi ubala abu anyi?” muntu au kumuandamuna ne: “Mmunyi mundi mua kubumvua bikala muntu kayi mundudike?” Ke Filipo kumumvuija tshivua mêyi au amba.—Bienzedi 8:27-35.

DIAMBULUISHA DIDIKU LELU

Anu bu balongeshi ba Bible ba mu bikondo bia kale, lelu Bantemu ba Yehowa mbaditue mu mudimu wa dilongesha bantu Bible pa buloba bujima mu matunga 239. (Matayi 28:19, 20) Lumingu luonso elu, badi bambuluisha bantu bapite pa miliyo tshitema bua kumvua Bible. Bantu ba bungi badibu balongesha mbafumine mu miaba idibu kabayi bamanye Nzambi. Kabatu bafutshisha makuta bua kulongeshangana to, badi balongeshila bantu ku mbanza yabu anyi mu miaba idibu basungula. Bamue bantu batu basue kulongela ku telefone anyi ku ordinatere.

Suaku umonangane ne Bantemu ba Yehowa bua bakuambile tshiudi mua kuenza bua wewe kulonga pebe. Neumone ne: Bible ki mmukanda uudi kuyi mua kumvua to, kadi udi ‘wambuluisha bua kulongesha, bua kubela, bua kululamija malu, bua kunyoka mu buakane’ bua wewe ‘kuikala mukumbane menemene, muikale ne bionso bidi bikengedibua bua mudimu wonso muimpe.’—2 Timote 3:16, 17.