Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 11 2015

 TSHIENA-BUALU TSHINENE

Mmunyi mutu Nzambi umona mvita?

Mmunyi mutu Nzambi umona mvita?

Udi mua kuandamuna lukonko elu bishi? Bantu ba bungi badi bela meji ne: Nzambi utu wanyisha mvita. Badi bamba muvua Nzambi utuma batendeledi bende ba kale mu mvita, ne malu adibu balonde mu Bible adi aleja ne: bivua nanku. Kadi bakuabu bobu badi bamba ne: Yezu Muana wa Nzambi uvua mulongeshe bayidi bende bua kunanga baluishi babu. (Matayi 5:43, 44) Nunku badi bela meji ne: imue misangu Nzambi mmushintulule mushindu udiye umona mvita ne katshiena uyanyisha lelu to.

Kadi wewe, udi wela meji kayi? Nzambi utu wanyisha mvita anyi? Bikalaye uyanyisha, udi ku luseke lua banganyi mu mvita ya matuku etu aa? Diandamuna dia nkonko eyi didi ne buenzeji pa mushindu uudi wewe umone mvita. Tshilejilu, bu wewe mumanye ne: Nzambi mmuanyishe mvita ne mumvue ne: mu mvita kampanda idi yenzeka mmutue ku tshia bantu baudi wewe pebe munange, udi mua kudiumvua bimpe bua muudi ku luseke luimpe, mutuishibue ne: bena diebe ke batshimuna. Ku lukuabu luseke, udi mua kudiumvua bishi bobu bakuambile ne: Nzambi mmutue ku tshia baluishi benu? Imue misangu nebikusake bua kukeba bua kumanya ni udi ku luseke luimpe.

Kudi bualu bua mushinga butudi katuyi mua kulengulula to. Kumanya mudi Nzambi umona mvita kudi mua kushintulula mushindu uudi umumona. Biwikala munkatshi mua miliyo ya bantu badi mvita mikebele ntatu, kakuyi mpata neujinge kumanya diandamuna dia lukonko elu: Nzambi utuku ukebesha mvita ne usanka padiyi ikebela bantu makenga bu mudi bantu bakuabu bela meji anyi? Peshi katu nansha uditatshisha bua dikala bimpe dia bantu badi bakenga?

Udi mua kukema wewe mumanye ne: diandamuna didi Bible ufila ndishilangane bikole ne malu adi bantu bamba aa. Mu bulelela, mushindu utu Nzambi umona mvita katshia ku kale too ne lelu ki mmushintuluke to. Tumonayi tshidi Bible wamba bua muvua Nzambi umona mvita ku kale ne mu bidimu lukama bia kumpala pavua Yezu pa buloba. Nebituambuluishe bua kumanya mudi Nzambi umona mvita lelu eu nansha mudiyi mindile bukua bantu kumpala eku.