Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 11 2015

 TSHIENA-BUALU TSHINENE | MMUNYI MUDI NZAMBI UMONA MVITA?

Muvua Nzambi umona mvita mu bidimu lukama bia kumpala

Muvua Nzambi umona mvita mu bidimu lukama bia kumpala

Mu bidimu lukama bia kumpala Bantu bavua bakengeshibua bikole. Anu bu bankambua babu, bena Yuda ba mu bidimu lukama bia kumpala bakalomba misangu ya bungi bua Nzambi abasungile, kudi bukalenge bua bena Lomo buvua bubakengesha bikole. Pashishe kumvuabu bakula bua Yezu. Uvuaku mua kuleja ne: yeye ke uvua Masiya uvuabu balaye anyi? Bushuwa, bantu ba bungi bavua “batekemene ne: muntu au ke uvuabu basungule bua kupikula Isalele” ku dikengeshibua dia kudi bena Lomo. (Luka 24:21) Kadi kakuvua disulakana nansha dikese to. Mu bidimu bia 70 panyima pa Yezu, tshiluilu tshia bena Lomo tshiakalua kubutula Yelushalema ne ntempelo uvuamu.

Ntshinyi tshiakenzeka? Bua tshinyi Nzambi kavua muluile bena Yuda mvita bu muvuaye muenze ku kale? Bua tshinyi kavua mubanyishile bua kuluanganabu bua kudisungila ku dikengeshibua adi? Nzambi uvuaku mushintulule mushindu uvuaye umona mvita anyi? Tòo. Kadi, malu a bena Yuda avua mashintuluke bikole. Bakabenga kuitaba Yezu Muana wa Nzambi bu Masiya. (Bienzedi 2:36) Nunku tshisamba mu kabujima tshiakajimija malanda atshi masheme ne Nzambi.—Matayi 23:37, 38.

Tshisamba tshia bena Yuda ne Buloba buabu bulaya kabivua kabidi mu bukubi bua Nzambi to; bena Yuda bine kabavua kabidi mua kupeta dianyisha dia kudi Nzambi bua kuluangana mvita anyi diambuluisha diende to. Anu mukavua Yezu mudianjile kuamba, Nzambi wakumbusha mabenesha ne dianyisha diende kudi tshisamba tshia Isalele tshia ku mubidi, kubipeshaye tshisamba tshipiatshipia, tshisamba tshia mu nyuma tshiakaluabu kubikila mu Bible ne: “Isalele wa Nzambi.” (Galatiya 6:16; Matayi 21:43) Tshisumbu tshia bena Kristo bela manyi a nyuma ke tshiakalua Isalele wa Nzambi. Bobu ke bavuabu bambile mu bidimu lukama bia kumpala ne: “mpindieu nudi tshisamba tshia Nzambi.”—1 Petelo 2:9, 10.

Bu muvua bena Kristo ba mu bidimu lukama bia kumpala balue “tshisamba tshia Nzambi,” uvuaku mubaluile mvita bua kubapikula ku dikengeshibua dia kudi bena Lomo anyi? Peshi uvuaku mubanyishile bua baluangane ne bantu bavua babakengesha anyi? Tòo. Bua tshinyi? Anu mukavua tshiena-bualu tshishale tshileje, pavua Nzambi wanyisha bua mvita kampanda yenzeke, yeye nkayende ke uvua wamba dîba divuayi ne bua kuenzeka. Nzambi kavua muluangene bena Kristo ba mu bidimu lukama bia kumpala mvita anyi mubanyishile bua kuya mu mvita to. Bushuwa, mu bidimu lukama bia kumpala, katshivua tshikondo tshivua Nzambi musungule bua kujikija malu mabi ne dikengeshibua to.

Nunku, anu bu basadidi ba Nzambi ba kale, bena Kristo ba mu bidimu lukama bia kumpala aba bavua ne bua kuindila tshikondo tshivua Nzambi ne bua kujikija makenga ne malu mabi. Mu tshikondo atshi, Nzambi kavua mubanyishile bua kuluangana bobu nkayabu ne baluishi babu to. Yezu uvua muambe bualu ebu patoke mu malongesha ende. Tshilejilu, kavua mulongeshe bayidi bende bua kudituabu mu mvita to, kadi wakabambila ne: “Tungunukayi ne kunanga badi nenu lukuna, ne kulombela badi banukengesha Nzambi.” (Matayi 5:44) Pakakulaye bua tshikondo tshivua biluilu bia bena Lomo ne bua kubunda Yelushalema, kavua muambile bayidi bende bua kushalamu ne kuluangana to, kadi wakabambila bua kunyema; ke tshiakenzabu.—Luka 21:20, 21.

Kabidi, mupostolo Paulo wakafunda ku bukole bua nyuma muimpe ne: “Kanudisombuedi, bualu mbafunde ne: ‘Yehowa udi wamba ne: Disombuela ndianyi; meme nemfute.’” (Lomo 12:19) Paulo wakatela mêyi avua Nzambi muakule kukavua bidimu bia bungi adi mu Lewitiki 19:18 ne mu Dutelonome 32:35. Anu mutuvua bamone mu tshiena-bualu tshishale, umue mushindu uvua Nzambi usombuela bantu bende  ku kale mpavuaye ubambuluisha bua kuela baluishi babu mvita. Nunku mêyi a Paulo adi aleja ne: Nzambi kavua mushintulule mushindu uvuaye umona mvita to. Nansha mu bidimu lukama bia kumpala Nzambi utshivua anu umona mvita bu mushindu mujalame wa kusombuela bantu bende ne kujikija makenga ne malu mabi a mishindu yonso. Kadi, anu muvuabi ku kale, Nzambi nkayende ke uvua wamba dîba divua mvita ya nunku ne bua kuenzeka ne bantu bavua ne bua kuluangana.

Mbimueneke patoke ne: Nzambi kavua muanyishile bena Kristo ba mu bidimu lukama bia kumpala bua kuluangana mvita to. Kadi netuambe bishi bua matuku etu aa? Nzambi mmuanyishilaku tshisumbu kampanda tshia bantu ba matuku etu aa bua kudituabu mu mvita anyi? Peshi, etshi ke tshikondo tshidi Nzambi wangata malu mu bianza bua kuluila bantu bende mvita anyi? Mmunyi mudi Nzambi umona mvita lelu eu? Tshiena-bualu tshidi tshilonda netshiandamune nkonko eyi.