Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 11 2015

Uvua mumanye anyi?

Uvua mumanye anyi?

Bua tshinyi Jozefe uvua mudikungule muedi kumpala kua kuya kudi Palô?

Tshimanu tshia mu ejipitu tshizolapu muntu ukosangana nsuki

Bilondeshele muyuki udi mu Genese, Palô wakatuma dîyi bua balue ne Jozefe muena Ebelu uvua mu buloko pa lukasa bua amujinguluile bilota biende. Tshikondo atshi Jozefe ukavua muenze ndambu wa bidimu mu buloko. Nansha muvua Palô mumubikidishe lukasa lukasa, Jozefe wakanji kudikungula muedi. (Genese 39:20-23; 41:1, 14) Difunda dia bualu ebu nansha mudibu bumueneka kabuyi ne mushinga wa bungi, didi dileja Jozefe uvua mumanye bimpe bibidilu bia bena Ejipitu.

Bisamba bia bungi bia kale bivua ne tshibidilu tshia kulekela muedi ukola, nansha tshia bena Ebelu. Kadi, tshibejibeji kampanda tshidi tshiamba ne: “Bena Ejipitu ba kale ke tshisamba ­tshimue tshivua tshibenga muedi.”—McClintock and Strong’s Cyclopedia of Biblical, Theological, and Ecclesiastical Literature.

Bantu bavua bakungula anu miedi nkayayi anyi? Tshibejibeji tshikuabu tshidi tshileja ne: bilele bia bena Ejipitu bivua bilomba bua muntu kudilongolola kumpala kua kuya kudi Palô anu mutuye wenza kumpala kua kubuela mu ntempelo. Pa nanku, Jozefe uvua ne bua kuikala mudikungule nsuki yonso ya ku mutu ne ya pambidi.—Biblical Archaeology Review.

Mukanda wa Bienzedi udi wamba ne: tatuende wa Timote uvua muena Greke. Bidiku biumvuija ne: uvua mufumine mu ditunga dia Grèce anyi?

Kabiena anu mua kuikala nanku to. Mu mikanda ivua mupostolo Paulo mufunde ku bukole bua nyuma muimpe uvua imue misangu uleja dishilangana pankatshi pa bena Yuda ne bena Greke, utela bena Greke bua kuleja bantu bakuabu bonso bavua kabayi bena Yuda. (Lomo 1:16; 10:12) Diakula dia tshiena Greke ne bilele biabu mu miaba ivua Paulo uyishila ke bumue bualu buvua bumusake bua kuenza nanku.

Mbanganyi bavuabu bangata bu bena Greke ku kale? Mu bidimu bia 300 kumpala kua Yezu, Isocrate ngamba-malu wa ku Athènes wakamba ne lutambishi luonso bua muvua bilele bia bena Greke bitangalake pa buloba bujima. Wakakula bua tshipeta tshia bualu ebu ne: “bakadi babikila bantu batuvua tuetu balongeshe ne: bena Greke pamutu pa kubikilabu bana ba mu Grèce nanku.” Nunku, tudi mua kuamba ne: tatuende wa Timote uvua kayi muena Yuda ne bantu bakuabu bavua Paulo ubikila ne: bena Greke bavua mua kuikala bena Greke bilondeshile bilele, kadi kabayi bana balela ba mu Grèce to.—Bienzedi 16:1.