Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 10 2015

 TSHIENA-BUALU TSHINENE | KUSAMBILA KUDIKU NE MUSHINGA ANYI?

Kudiku muntu utu uteleja masambila anyi?

Kudiku muntu utu uteleja masambila anyi?

Bamue bantu batu bamona bu ne: kusambila nkupitshisha dîba patupu ne kakutu muntu utu uteleja masambila to. Bakuabu bakatu batete kusambila kadi bamona bu ne: kabena babandamuna to. Bu muvua muntu kampanda uvua kayi witaba dikalaku dia Nzambi udifuanyikijila muvua Nzambi mua kuikala, wakasambila wamba ne: “Ungandamunaku nansha ku ditshi.” Kadi udi wamba ne: Nzambi wakashala anu “mupuwe bu pa tshibidilu.”

Kadi Bible udi utujadikila ne: Nzambi udiku ne utu uteleja masambila. Bible wakamba kukadi bidimu bia bungi mêyi aa: ‘Yeye [Nzambi] neanuleje dinanga diende bulelela pumvuaye muadi wenu; mu dîba didiye umvua neitabe kunudi.’ (Yeshaya 30:19) Mvese mukuabu wa mu Bible udi wamba ne: “Ditendelela dia bantu bakane didi dimusankisha.”—Nsumuinu 15:8.

Yezu wakalomba Tatuende, “ne wakamumvuila.”—Ebelu 5:7

Bible udi kabidi ulonda miyuki ya bantu bavua Nzambi muteleje masambila abu. Mvese kampanda udi wamba ne: Yezu “wakasengelela Yeye uvua ne bukole bua kumusungila” ne “wakamumvuila.” (Ebelu 5:7) Bilejilu bikuabu bidi mu Danyele 9:21 ne 2 Kulondolola 7:1.

Kadi bua tshinyi bamue bantu batu bela meji ne: ki mbandamune masambila abu? Bua kutelejabu masambila etu, tudi ne bua kusambila anu Yehowa *, Nzambi wa mu Bible, ki nnzambi kayi mukuabu anyi bankambua to. Nzambi udi utuambila kabidi bua ‘kumulomba bilondeshile disua diende,’ mmumue ne: kumulomba malu adiye wanyisha. Nzambi udi utujadikila ne: tuetu basambile mushindu eu, “udi utumvuila.” (1 Yone 5:14) Nunku, bua Nzambi kuteleja masambila etu, tudi ne bua kulonga Bible bua kumumanya ne kumanya disua diende.

Bantu ba bungi badi bitabuja ne: kusambila ki mmukiya kampanda wa mu malu a ntendelelu to, kadi Nzambi udi uteleja masambila ne uandamuna. Isaac wa mu Kenya udi wamba ne: “Mvua ndomba Nzambi bua angambuluishe bua kumvua Bible. Minite mikese pashishe, muntu kampanda wakalua kundi, kungambuluishaye anu mumvua nkeba.” Hilda wa mu Philippines uvua musue kulekela dinua dia makanya. Bu muvuaye anu upinganununa mu dianua, bayende wakamuambila ne: “Kuenaku mua kulomba Nzambi bua akuambuluishe anyi?” Wakatumikila mubelu eu, kuambaye ne: “Biakankemesha bikole bua muvua Nzambi mungambuluishe. Bivua anu bu ne: tshivua kabidi ne nyota ya makanya to. Mvua mua kualekela kakuyi lutatu.”

Nzambi udiku mua kujinga bua kukuambuluisha mu ntatu yebe bilondeshile disua diende anyi?

^ tshik. 6 Bible udi uleja ne: Yehowa ke dîna dia Nzambi.