Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 10 2015

 TSHIENA-BUALU TSHINENE | KUSAMBILA KUDIKU NE MUSHINGA ANYI?

Bua tshinyi Nzambi mmusue bua tusambile?

Bua tshinyi Nzambi mmusue bua tusambile?

Nzambi mmudiakaje bua kudia netu bulunda.

Balunda batu bayukila bua kushemeja bulunda buabu. Bia muomumue, Nzambi mmusue bua tuikale tuyukila nende, utupesha mpunga wa kudia nende bulunda busheme. Udi wamba ne: ‘Nenumbikile, nenulue kuntendelela, ne nennumvuile.’ (Yelemiya 29:12) Wewe uyukila ne Nzambi, ‘neusemene pabuipi nende, ne yeye neasemene pabuipi nebe.’ (Yakobo 4:8) Bible udi utujadikila ne: ‘Yehowa udi pabuipi ne bonso badi bamubikila.’ (Musambu 145:18) Tuetu tusambila, bulunda buetu ne Nzambi nebukole menemene.

‘Yehowa udi pabuipi ne bonso badi bamubikila.’—Musambu 145:18

Nzambi mmusue kukuambuluisha.

Yezu wakamba ne: “Mmuntu kayi wa munkatshi muenu udi muanende umulomba diampa, yeye umupesha dibue? Anyi umulomba mushipa, yeye umupesha nyoka? Nunku, binuikala nuenu bamanye mua kupesha bana benu bintu bimpe, mmunyi muapanga Tatu wenu udi mu diulu kutamba kupesha bantu badi bamulomba bintu bimpe?” (Matayi 7:9-11) Bushuwa, Nzambi mmusue bua usambile bualu ‘udi uditatshisha bua bualu buebe’ ne mmusue kukuambuluisha. (1 Petelo 5:7) Udi kabidi ukubikila bua kumutuadila ntatu yebe. Bible udi utuambila ne: “Kanusamishi mutu bua tshintu nansha tshimue, kadi mu malu onso mu disambila ne mu disengelela pamue ne disakidila, numanyishe Nzambi milombu yenu.”—Filipoyi 4:6.

Bantu batu ne dijinga dia kutendelela Nzambi.

Bamanyi ba tshitu muntu mbafike ku dimona ne: bantu bapite bungi batu basue kusambila. Nansha bamue bantu batu kabayi bitaba dikalaku dia Nzambi anyi mene kabayi bamanye ni utuku, badi pabu mu bantu aba. * Ebi bidi bileja ne: bantu bavua bafukibue ne dijinga dia kutendelela Nzambi. Yezu wakamba ne: “Badi bamanye ne: mbapele mu malu a mu nyuma mba diakalenga.” (Matayi 5:3) Umue mushindu utudi mua kukumbaja dijinga edi nkuikala ne tshibidilu tshia kuyukila ne Nzambi.

Tuetu bitabe dibikila dia Nzambi dia kumusambila netupete masanka kayi?

^ tshik. 8 Makebulula menza mu 2012 kudi bena Pew Research Center adi aleja ne: mu États-Unis, bantu 11 pa 100 batu kabayi bitaba dikalaku dia Nzambi batu basambila nansha musangu umue ku ngondo.