Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  Ngondo wa 9 2015

 TSHIENA-BUALU TSHINENE BANTEMU BA YEHOWA MBANGANYI

Bantemu ba Yehowa mbantu ba mushindu kayi?

Bantemu ba Yehowa mbantu ba mushindu kayi?

Tudi mu bulongolodi bua pa buloba bujima budi kabuyi budisange ne bitendelelu bikuabu nansha. Nansha mudi biro bietu bia pa buloba bujima bikale mu États-Unis, Bantemu ba Yehowa ba bungi badi mu matunga makuabu. Bantemu batue ku miliyo 8 badi balongesha bantu Bible mu matunga mapite pa 230. Tudi tuenza nunku bua kukumbaja mêyi avua Yezu muambe a ne: “Nebayishe lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso.”—Matayi 24:14.

Mu miaba yonso itudi basombele, tudi tunemeka mikenji ya mbulamatadi. Kadi tudi tuenza ne muetu muonso bua kubenga kubuelakana mu malu a tshididi. Tudi tuenza nunku bua kutumikila tshivua Yezu muambile bena Kristo bua ‘kubenga kuikala ba pa buloba.’ Ke bualu kayi katuena tudibueja mu malu a tshididi ne mu mvita nansha. (Yone 15:19; 17:16) Mu mvita mibidi ya pa buloba bujima, bavua bele Bantemu ba Yehowa mu maloko, babakengeshe ne babenzele malu mabi matambe bualu bavua babenge bua kubuela mu mvita. Bishope mukuabu wa mu Allemagne wakafunda bua Bantemu ne: “Anu bobu ke badi mua kuamba ne: kabavua babuelakane mu mvita pavua bukalenge bua Hitler bukokesha.”

“Bantemu ba Yehowa badi ne bikadilu bimpe be! Tudi mua kupesha bantu ba nunku mianzu minene mu tshididi bua mudibu banange bakuabu, kadi kabenamu to. . . . Badi bakokela bukokeshi bua mbulamatadi, kadi bitabuja ne: anu Bukalenge bua Nzambi nkayabu ke buajikijila bantu ntatu yabu.” —Tshikandakanda tshia Nová Svoboda, République Tchèque.

Nansha nanku, katutu tuditola pa nkayetu to. Yezu wakasambila Nzambi bua bayidi bende ne: “Tshiena nkulomba bua ubumbushe pa buloba.” (Yone 17:15) Ke bua tshinyi mu miaba itudi basombele udi mua kumona mutudi tuenza mudimu, tuya mu tshisalu nansha mu tulasa.